Huaquinbica 2 Samuel 21:7-9 textocunata liishpaca ashata pandarishcami sintirita ushanchiman. Shinapash Bibliapica ishcai Mefibosetmandami parlan. Caimanda yachajunaca ninandami ayudanga.

Rey Saulca siete churicunata, ishcai ushicunatami charirca. Rey Saulpa primero churica Jonatanmi carca. Jonatanba catimi rey Saulca Rizpá nishca shuj huarmihuan Mefibóset nishca churita charirca. Jipamanga Jonatanbashmi Mefibóset nishca churita charirca. Shinaca rey Saulpash, Jonatanbashmi Mefibóset shuti churicunata charirca.

¿Imashpata rey Davidca tauca jari gentecunata huañuchichun curca? Shuj tiempoca rey Saulca Israel llactapi causaj gabaonitacunata nimamanda na ricunayachishpami tucuchingapaj munarca. Tauca Gabaonitacunataca huañuchishcallatami yarin. Pero chaita ruranaca nalipachami carca. Josuepa tiempopica Israelitacunata mandajcunaca gabaonitacunahuan ama macanajungapaj nishpa shuj tratota rurashcami carca (Jos. 9:3-27).

Rey Saulpa punllacunapica gabaonitacunahuan rurashca tratoca todavía sirvijurcarami. Shinapash gabaonitacunahuan rurashca tratota respetanapa randica, rey Saulca paicunata tucuchita tucuchingapami munarca. Shina rurashcamandami “Saulpash, paipaj huasi ucu purapash” culpable tucurca (2 Sam. 21:1). David rey tucujpimi na huañushpa quedashca gabaonitacunaca imalla pasashcataca tucuita villarca. Chaimi Davidca: ‘Jehová Dios cai alpata cutin bendiciachunga ¿imatata rurai ushapani? Rey Saulca nalitapachami rurashca’ nirca. Shina nijpica gabaonitacunaca culquitaimanga na mañarcachu. Ashtahuangarin Saulpa sietepura huahuacunata huañuchingapaj cuchunmi mañarca (Núm. 35:30, 31).Chaimi Davidca paicuna mañashcata rurarca (2 Sam. 21:2-6).

Pero chai tiempopica Saulpash, Jonatanbash shuj macanajuipi ña huañushcami carca. Jonatanba churi Mefibosetca causajurcarami. Paica huahuamandallatami shuj accidenteta charimanda lisiado quedashca carca. Paica na paipa abuelo Saúl rurashca macanajuipica participarcachu. Davidca, Jonatandaca ninandami juyarca. Chaimandami Jonatanba miraicunatapash juyaihuan, llaquishpa tratangapaj comprometirishca carca. Mefibosetca Jonatanba churimi carca (1 Sam. 18:1; 20:42). Davidmanda parlashpaca Bibliapica: Davidca: “Saulpaj churi Jonatanbaj churi Mefibóset shuti runatallami na curca. Paicunaca, ima llaquitapash ama rurangapaj nishpami, Mandaj Diospaj shutipi Davidhuan, Jonatanhuanga juramentushca carca” nishpa (2 Sam. 21:7).

Pero Davidca gabaonitacunapa mañashcata pactachingapami Saulpa ishcai churicunata curca. Cai ishcai churicunamandaca shujca Mefibóset shutimi carca. Shinallata Saulpa 5pura nietocunatapashmi curca (2 Sam. 21:8, 9). Davidca shina rurashpami Gabaonitacunata huañuchishpa, yahuarta jichashcamanda llaquicunataca tucuchishpa saquirca.

¿Caipica imatata yachajupanchi? Por ejemplo Saulpa ishcai churicuna, Saulpa picha nietocuna imapash nalita na rurashca cajpica, Jehová Diosca paicuna huañuchunga na saquinmanllu carca. Jehová Diospa leypica huahuacunaca taitacunapa nalita rurashcamandaca na huañungachu nijurcami. “Maijanbash nalita rurashpaca, paillatami chai juchamanda huañunga” nijurcami (Deut. 24:16). Shinaca Saulpa siete familiacunaca na yangamandaca huañuchi tucushcangachu. Gabaonita gentecunata imatapash nalita rurangapaj chaipi participashcamandami huañuchi tucushcanga.

¿Caipica imata yachajupanchi? Ñucanchicunaca mandashcamandallami shina nalitaca rurashcani nishpaca na ninajunachu capanchi. Ashtahuangarin cada unomi ñucanchipa rurashcacunamandaca responsable cana capanchi. Proverbios libropica: “Can saruna chaqui ñandapash, imashna cajta ali ricungui. Tucui imata rurashpapash, aligutalla rurangui. Ali ladomambash, lluqui ladomambash ama anchuringuichu. Cambaj chaquitaca, ima nalimandapash anchuchingui” nijunmi (Prov. 4:24-27; Efes. 5:15).