1, 2. a) Jesusca pai huañuna punlla chayamujujpica ¿imatata paipa catijcunahuanga parlarca? (Callari dibujota ricupangui). b) Imamanda villachijushcata yaipi charinaca ¿imashinata ayudan? c) Cai temapica ¿imatata yachajupashun?

JESUSCA pai huañungapaj shuj tuta faltajpimi apostolcunahuan unaillaguta parlarca. Jesusca paicunata juyashcatami intindichirca. Imashinami punda temapi ricuparcanchi Jesusca uvas yurashna cashcatami ricuchirca. Shinami Jesusca paipa catijcuna “aliguta fucujunshna” villachishpa catichun animarca (Juan 15:8).

² Jesusca paipa catijcunamanga imata rurana cashcatallaca na nircachu. Imamanda shina rurana cashcatapashmi nirca. Chaimi imamanda villachishpa catina cashcatapash Jesusca intindichirca. Imamanda villachijushcata yaipi charinaca ¿imashinata ayudan? ‘Cai pachapi tiaj tucui llactacunapi causajcunaman’ villachishpa catichunmi ayudanga (Mat. 24:13, 14). Bibliapica imamanda villachishpa catina cashcatami ricuchin. Chai yuyaicunamandaca cai temapica 4 yuyaicunatami yachajupashun. Shinallata villachishpa catichun Jehová Dios cushca 4 ayudacunatapashmi yachajupashun.

3. a) Juan 15:8​pi nishcashnaca ¿imamandata villachishpa catipanchi? b) Jesuspa chimbapuraipi uvascunaca ¿imatata ricuchin? Chai chimbapuraica ¿imamandata ali can?

³ Villachishpaca Jehovatami jatunyachinchi. Paipa shutitapashmi alicachinchi (Juan 15:1, 8, liingui). Cai textopica Jehová Diostaca uvas chagrata tarpuj runaguhuanmi Jesusca chimbapurarca. Cutin paica uvas yurashnami cani nircami. Paipa catijcunataca malquicunahuan o ramacunahuanmi Jesusca chimbapurarca (Juan 15:5). Chaimi uvasca Diospa Reinomanda villachinata ricuchijun. Jesusca apostolcunamanga nircami: “Aliguta fucujunshna causajpimi, ñucapaj yachajujcunapacha cajtaca ricunga” nishpa. Uvas yuracunapi alipacha uvascuna fucujpica tarpuj runami alicachi tucun. Shinallatami Jehovapa Reinomanda tucui shunguhuan villachishpaca Jehovatami jatunyachinchi (Mat. 25:20-23).

4. a) Diospa shutita alicachingapaca ¿imatata rurana capanchi? b)  Diospa shutita alicachina privilegiota charishcamandaca ¿imashinata quiquinga sintiripangui?

⁴ Imashinami ricupanchi villachishpaca Jehovapa shutitami jatunyachinchi. ¿Imamandata shina nipanchi? Jehová Diospa shutica ñami santo can. Shinapash profeta Isaiasca nircami: ‘Tucuita Mandaj Diostallami: ‘Jucha illajmi cangui’ nina canguichi’ nishpa (Is. 8:13). Taita Diospa shutita ashtahuan respetashpami santo o alicachi tucushca cachun ayudanchi. Shinallata Diospa shuti santo cashcata shuj gentecunapash yachajuchun ayudashpami Diospa shutita alicachinajunchi (Mat. 6:9). Diabloca ashtaca llullacunata nishpami Taita Diospa shutita mapayachishca. Chaimi Jehová Diospa ali cualidadcunamanda, shamuj punllacunapi ali causaiguta Jehová Dios caranamanda shuj gentecunaman villachishpaca Diospa shutita jatunyachinchi (Gén. 3:1-5). Ashtahuanbash ‘punchapamba tiajunata, alicachi tucunata, ushaihuan tiajunata’ Jehová Dioslla chasquina cashcata ñucanchi territoriopi gentecunaman villachishpaca Diospa shutitami alicachinajunchi (Apoc. 4:11). Rune shuti huauquica 16 huatacunatami precursor shina sirvijushca. Paica ninmi: Tucuita Ruraj Taita Dios paita sirvichun saquishcamandaca tucui shunguhuanmi agradicini. Chaimi ashtahuan villachishpa catingapaj munani” nishpa.

5. a) Juan 15:9, 10​pi nishcashnaca ¿imamandata villachinchi? b) ¿Imatata Jesusca nirca?

⁵ (Juan 15:9, 10, liingui). Jehovata, Jesusta tucui shunguhuan juyaimandami villachinchi (Mar. 12:30; Juan 14:15). Jesusca paipa catijcunataca nircami, “juyarishpa causanguichi” o catinguichi nishpa. ¿Imamandata Jesusca shina nirca? Jesusta ali catijcuna cangapaj aguantashpa catina minishtirishca cashcata ali yachaimandami Jesusca shina nirca. Jesusca cutin cutinmi catinguichi nirca. Shina nishpaca aguantashpa catina cashcatami ricuchijurca (Juan 15:4-10, NM).

6. ¿Imashinata Jesús juyanshna, juyarishpa catina capanchi?

⁶ ¿Imashinata Jesús juyanshna, juyarishpa catina capanchi? Jesuspa ñaupajpi ali ricuringapaca ¿imatata rurana capanchi? Paipa mandashcacunata pactachina  capanchi. Jesusca nircami: “Ñuca Taita imata mandashcata pactachijushpami, pai juyajpi causajuni” nishpa (Juan 15:10). Jesusca shuj alipacha ejemplotami saquirca (Juan 13:15).

7. Jesusca ¿imatata intindichirca?

⁷ Juyashcata ricuchingapaca cazuna minishtirishca cashcatami Jesusca intindichirca. Chaimi apostolcunamanga Jesusca nirca: “Ñuca mandashca shimicunata chasquishpa pactachishpa causajllami, ñucataca juyahuan” nishpa (Juan 14:21). Jesús shina nishca cashpapash Jehovapa mandashcami can. Chai mandashcata pactachishpa gentecunaman villachishpaca Jehovata juyashcatami ricuchipanchi (Mat. 17:5; Juan 8:28). Ñucanchicuna villachishpa catijpimi Jehovapash, Jesuspash juyashpa catin.

8, 9. a) ¿Imamandata villachinchi? b) Ezequiel 3:18, 19; 18:23​ca ¿imashinata villachishpa catichun ayudan?

⁸ Gentecuna salvarichun munaimandami villachishpa catinchi. Bibliapica ninmi: Noé runaguca “imatapash cashcatapacha rurashpa causanata” villajmi carca nishpa (2 Pedro 2:5, liingui). Nali gentecunataca ñallami Taita Dios tucuchinga nishpami Noeca villachirca. ¿Imamandata shina nipanchi? Chaipaca Jesús imata nishcata ricupashunchi: “Chai punllacunapica micushpa, ufiashpa, cazarashpa, cazarachishpami gentecunaca causanajurca. Yacuhuan Dios nara tucuchijpica, jatun huambuna huasiman Noé yaicungacamanmi, chashna causanajurca. Chashna causashpami, yacuhuan tucuilla tucuchina punlla chayamungacaman, gentecunaca imatapash na yarirca. Chashnallatami, Runa Aichayu tucushca ñuca shamuna punllapipash canga” nishpa (Mat. 24:38, 39). Gentecuna na uyangapaj munajpipashmi Noeca Jehová mandashcashna villachishpa catirca.

⁹ Cunan punllacunapipash Taita Diospa munai ima cajta yachachunmi gentecunamanga villachipanchi. Jehová Dios shinami ñucanchipash gentecuna salvarichun munapanchi (Ezeq. 18:23). Shinallata huasin huashin o maipi cashpapash Diospa Reino ñalla nali gentecunata tucuchinatami tucuicunaman villachinchi. Shinami salvarichun ayudapanchi (Ezeq. 3:18, 19; Dan. 2:44; Apoc. 14:6, 7).

10. a) Mateo 22:39​pi nishcashnaca ¿imamandata villachinchi? b) ¿Imashinata Filipos llactapica apóstol Pablopash, Silaspash prezuna huasita cuidaj runataca ayudarca?

¹⁰ Gentecunata juyaimandami villachishpa catipanchi (Mat. 22:39). Gentecuna paicunapa causaipi imapash pasajpi cambiajtaca alimi yachapanchi. Chaimi paicunata juyaimanda villachishpa catipanchi. Cunanga apóstol Pablohuan, Silas runaguhuan Filipos llactapi ima pasashcata ricupashunchi. Na uyangapaj munaj gentecunami paicunata carcelpi churarca. ‘Chaupi tutami alpa mama ñapash ninanda chujchujpimi prezuna huasi pungucunapash tucuilla pascarirca. Prezuna huasita cuidaj rijcharishpa pungucuna pascariajta ricushpaca, prezucunaca llujshishcamari yashpa, paillata espadahuan huañuchiringapaj munarca’. Chaipimi Pablo ninanda caparishpa ama huañuchirichu nirca. ‘Shina nijpimi, prezuna huasita cuidaj runaca ñuca quishpiringapaca, ¿imatata rurana capani? nishpa tapurca’. Pablopash, Silaspash nircami: ‘Apunchi Jesucristota crishpaca, quishpiringuimi’ nishpa (Hech. 16:25-34).

11, 12. a) Carcelta cuidaj runagupa ejemplomandaca ¿imatata villachinamanda yachajupanchi? b) ¿Imamandata villachishpa catina capanchi?

¹¹ Carcelta cuidaj runagupa ejemplomandaca ¿imatata villachinamandaca yachajupanchi? Carcelta cuidaj runaca alpa chujchushca jipami Diospa Shimimanda uyangapaj munarca. Shinallatami cunanbi gentecunapash pundapi na uyangapaj munashpapash paicunapa causaipi imapash cambiocuna tiajpi uyangapaj munan. Por ejemplo, huaquingunaca trabajo illaj quedashpa, cusahuarmi separarishpami llaquilla sintirin. Shinallata millai ungüicuna japijpi o paicunapa juyashca familia huañujpimi llaqui llaqui sintirin. Shina pasajpimi huaquingunaca imapata causani nishpa tapurin. Huaquingunacarin carcelta cuidaj runagushnami tapurin: ‘Quishpiringapaca ¿imatata rurana capani?’ nishpa. Chaimi ali villaicunata villachijpica gentecunaca aliman uyan.

¹² Shinaca tucui shunguhuan villachishpa catinami gentecuna uyangapaj munaj horaspi villachichun ayudanga (Is. 61:1). Charlotte shuti paniguca 38 huatacunatami tiempo completopi sirvijushca. Paica ninmi: “Cunanbi gentecunaca imata ruranatapash na atinaimandami chingashca cuenda causan. Chaimi gentecunaman villachinaca minishtirishcapacha can” nishpa. Shinallata 30 huatacunata precursora shina sirvij Ejvor paniguca ninmi: “Cunanbimi ashtaca gentecuna llaqui llaqui sintirin. Paicunata ayudangapaj munaimandami villachishpa catingapaj munani” nishpa. Imashinami ricupanchi, gentecunata juyanaca villachishpa catichunmi ayudan.

13, 14. a) Juan 15:11​pica ¿ima ayudamandata parlan? b) Jesús cuenda cushilla cangapaca ¿imatata rurana capanchi? c) Cushilla canaca ¿imashinata ayudan?

¹³ Cai alpapi último tutata cashpami apostolcunamanga Jesusca cashna nirca, villachishpa catichunga Jehovami huaquin ayudacunata cunga nishpa. ¿Ima ayudacunatata cugrijurca? Chai ayudacunaca ¿imashinata ñucanchitapash ayudanga?

 ¹⁴ Cushilla causana. Jesuspa mandashcata pactachishpa villachinaca ¿shinllichu can? Na, na shinlli canllu. Jesusca uvas yuramanda parlashca jipaca nircami, Diospa Reinomanda villachishpaca ñuca cuendami cushilla causanguichi nishpa (Juan 15:11, liingui). ¿Imamandata Jesusca shina nirca? Imashinami ña ricuparcanchi Jesusca uvas yurashnami cani nirca. Cutin paipa catijcunataca ramacunahuanmi chimbapurarca. Ramacunaca verdella cangapami trocomanda yacuta, shuj shuj cosascunatapash aisan. Shinallatami Jesushuan ali amigo cashpa, paipa ejemplota catishpa Jehovapa munaita pactachishpaca Jesús cuenda cushilla causashun (Juan 4:34; 17:13; 1 Ped. 2:21). Hanne shuti paniguca 40 huatacuna yalitami precursora shina sirvijushca. Paica ninmi: “Villachishca jipaca cushillami sintirini. Shina sintirinami Jehovata ashtahuan sirvishpa catichun animahuan” nishpa. Cushilla sintirinami na uyangapaj munaj territoriocunapi villachichun ayudanga (Mat. 5:10-12).

15. a) Juan 14:27​pica ¿ima ayudamandata parlan? b) Casilla ali causaica ¿imashinata ayudan?

¹⁵ Casilla ali causana (Juan 14:27, liingui). Chai tutallatami Jesusca apostolcunataca nirca: “Casilla ali causaiguta cangunaman carashpa saquini” nishpa. Casilla ali causaica ¿imashinata villachishpa catichun ayudan? Na shaijushpa villachinaca Jehová Diospa, Jesuspa ñaupajpipash ali ricurichunmi ayudan. Shinami tranquilo ali sintirishun (Sal. 149:4; Rom. 5:3, 4; Col. 3:15, NM). Ulf shuti huauquica 45 huatacunatami tiempo completopi sirvijun. Paica ninmi: “Villachinamanda shaijushca tigrashpapash cushilla alimi sintirini” nishpa. Casilla ali causaiguta carashcamandaca ninandami agradicinchi. Shina causaica na tucuringachu.

16. a) Juan 15:15​pica ¿ima ayudamandata parlan? b) Jesushuan ali amigocuna cashpa catingapaca ¿imatata apostolcunaca rurana carca?

¹⁶ Ali amigo cana. Casilla ali causaimanda parlashca jipaca caishujhuan, chaishujhuan juyarishpa causanamandami Jesusca nirca (Juan 15:11-13). Chai jipaca nircami: “Ñuca juyashca cumbacunami canguichi” nishpa. Jesushuan ali amigo canaca shuj alipacha regalomi can. Jesushuan ali amigo cashpa catingapaca ¿imatata apostolcunaca rurana carca? Na shaijushpami villachishpa catina carca (Juan 15:14-16, liingui). Ishcai huatacuna huashamanga Jesusca paipa catijcunataca cashna villachigrichi nircami:  “Jahua pachamanda Dios mandanaca, ñami chayamushca” nishpa (Mat. 10:7). Chai tutallatami Jesusca apostolcunataca na shaijushpa villachichun animarca (Mat. 24:13; Mar. 3:14). Chai mandashcata pactachina na fácil cajpipash, pactachishpaca Jesushuan ali amigo cashpami cati usharca. Jehová Diosca paicunamanga shuj ayudatapashmi curca.

17, 18. a) Juan 15:16​pica ¿ima ayudamandata parlan? b) Chaica ¿imashinata Jesuspa catijcunataca ayudagrijurca? c) Villachishpa catichunga ¿imata animan?

¹⁷ Taita Dios ñucanchi mañashcacunata uyana. Jesusca apostolcunamanga nircami, imatapash ñuca shutipi mañajpica Jehová Diosca carangallami nishpa (Juan 15:16). Chaita uyashpaca apostolcunaca ninandami cushijushcanga. * Jesús huañuna punlla ña chayamunataca apostolcunaca nara ali intindircachu. Jesusca paicunataca ayudashpami catigrijurca. Apostolcuna Diospa Reinomanda villachishpa catichunmi paicunapa mañashcacunata uyashpa Jehová Diosca ayudagrijurca. Tiempo jipallami Jehová Dios paicunapa mañashcacunata uyashcata apostolcunaca cuenta japirca (Hech. 4:29, 31).

¹⁸ Cunanbipashmi Jehová Diosca ñucanchi mañashcacunata uyan. Na shaijushpa villachinami Jesushuan ali amigo cashpa catichun ayudanga. Villachinapi imapash jarcaicunata mishashpa villachishpa catichun Jehová Dios ayudanataca seguromi capanchi (Filip. 4:13, NM). Jehová Dios ñucanchi mañashcacunata uyajta yachashpaca cushillami sintirinchi. Shinallata Jesús ñucanchipa ali amigo cajta yachashpaca tucui shunguhuanmi agradicinchi. Caicunami villachishpa catichun animan (Sant. 1:17).

19. a) ¿Imamandata villachishpa catipanchi? b) Jehovapa mandashcata pactachichunga ¿imata ayudanga?

¹⁹ Imashinami cai temapi ricupashcanchi, Jehovapa shutita jatunyachinamanda, Jehová Diosta, Jesusta juyaimanda, gentecuna salvarichun munaimanda, tucui gentecunata juyaimandami villachishpa catinchi. Ashtahuanbash cushilla causanata, casilla ali causanata, Jesushuan ali amigo canata cushpami Jehová Diosca paipa mandashcata pactachichun ayudajun. Shinallata Jehová Diosca ñucanchi mañashcacunata uyashpami chai mandashcata pactachichun ayudan. Villachishpa catingapaj tucui shunguhuan esforzarijta ricushpaca Jehová Diosca ninandami cushijun.