Escuelata estudiajuj tiempopica ñuca causaipica nima na cambiarcachu. Primer cursopi yaicushca cumbacunahuanllatami último cursotapash tucuchin carcanchi. Ñuca pueblopica casi tucuicunatami shutipi rijsin carcanchi.

Liberty pueblopica uchilla haciendacuna, sara tarpushca pambacunami tiarca. Ñuca taitaca uchilla hacienda dueñopajpimi trabajan carca. Chaimi ña viñarishpaca tractorta manejanata, pambacunapi trabajanata yachajurcani.

Ñuca nacirishca horasca ñuca mamaca 35 huatacunatami charirca. Cutin ñuca taitaca 56 huatacunatami charirca. Ñuca taitaca ña mayorlla cashpapash shinlli, sanomi carca. Ali trabajador caimandami paipa huahuacunapash shinallata cachun munarca. Ñuca taita asha culquigutalla ganajpipash siempremi maipi causanata, ropaguta, micunatapash charircanchi. Ñuca taitaca tucuipimi ñucanchitaca ayudarca. Ñuca mamaca 86 huatacunata charishpami huañurca. Ñuca taitaca 93 huatacunata charishpami huañurca. Ñuca taitamamacunaca na Testigocuna carcachu. Ñuca shuj huauquimi huata 1972manda anciano shina Jehovata sirvijun.

Ñuca mamaca cada domingomi bautista iglesiaman tucuicunata pushan carca. 12 huatacunata charishpami Trinidadmanda parlajta uyarcani. Chaimi ñuca  mamataca tapurcani: “¿Imashinata Jesusca paillata Churipash, paillata Taitapash cai ushan?” nishpa. Chaimi cashna nihuarca: “Chaitaca na yachai ushanchichu. Intinditallapash na intindi ushanchichu” nishpa. Ñucapapash shinallatami carca. Shinapash 14 huatacunata charijpica shuj larcapimi Taitapa shutipi, Churipa shutipi, espiritupa shutipi quimsa viajeta yacupi pambashpa bautizahuarca.

Colegiopi cashpaca boxeador amigotami charircani. Chai amigomi boxeador tucuchun animahuarca. Chaimi boxeota yachajui callarishpaca Golden Gloves nishca organizacionbi anotarircani. Na ali boxeador caimandami huaquinbilla participashca jipaca chai organizacionmanda llujshircani. Tiempo jipaca Estados Unidos llactamanda soldadocunami apahuarca. Chai jipaca Alemania llactamanmi cachahuarca. Chaipimi ñucata mandajcunaca ñaupaman pushangapaj alipachami cangui nishpa soldadocunapa academiapi estudiachun cachahuarca. Paicunaca shuj alipacha soldado tucuchunmi munarca. Shinapash ñucaca soldado cangapaca na munarcanichu. Chaimi ishcai huatacuna jipa 1956 huatapica academiamanda llujshircani. Jipamanga shuj mushuj causaitami callarircani.

Chai tiempopica ñucaca peliculacunapi ricushca jaricuna shina, gentecunapa ñavipi ali ricurij jaricuna shinami cangapaj munarcani. Chai tiempopi gentecunaca shina jovengunatami “jaripachami” can nin carca. Bibliamanda villachishpa purij jaricunataca ciertopacha jaritashnaca na ricun carcanichu. Jipamanga shuj shuj cosascunata yachajuimandami ñuca causaica cambiarca. Ñuca pueblopimi shuj viajeca valishca puca carropi rijurcani. Shina rijujpimi ishcai jovenguna saludahuarca. Paicunaca ñuca cuñadopa jipa panicunami carca. Ishcandimi testigo de Jehovacuna carca. Villajun, Rijcharipaichi revistatapash ñami saquihuashcarca. Villajun revistata intindinaca na fácil carcachu. Shinapash cai viajeca Estudio de Libro de Congregacionmanmi paicunapa huasiman invitahuarca. Chaipica Bibliamanda yachajushpami huaquin comentariocunata cun carca. Ñucaca nircanimi, rishami nishpa. Paicunaca nihuarcami: “Ricungui, shamusha nijunguimi” nishpa. “Ari rishami” nircanimi.

Risha nishcatapash ninandami arripintirircani. Shinapash chai tandanajuimanga rircanimi. Chaipi huahuacuna Bibliamanda ashtacata yachajta ricushpaca manllarircanimi. Ñuca mamahuan cada domingo iglesiaman rishca cashpapash, ñucaca nima nimata Bibliamandaca na yacharcanichu. Chaimi Bibliamanda yachajui callarircani. Chaipimi Tucui Ushaita charij Taita Diospa shuti Jehová cajta yachajurcani. Huaquin huatacuna huashaman ñuca mamataca Testigocunaca picunata can nishpami tapurcani. Shina tapujpimi cashna nihuarca: “Paicunaca Jehová shuti rucu taitagutami adoran” nishpa. Ñuca ñavimanda imapash quilpashcata anchuchi cuendami carca.

Ali religionda tarishcata yachashpami ñapash espiritualmente ñaupaman catircani. Chaimi primera vez tandanajuiman rishcamandaca 9 quillacuna jipa marzo de 1957 huatapi bautizarircani. Chaipimi ñuca causai cambiarca. Bibliapimi shuj “ciertopacha jari” imashina cashcata yachajurcani. Chaita yachajushcamandaca cushillami sintirini. Jesusca jucha illaj caimandami shuj jaricunatapash yali poderta, fuerzatapash charirca. Shinapash Jesusca macanajuicunapica nunca na chapurircachu. Chaipa randica Bibliapi nishcashnami, Jesusca ‘ninanda llaquichi tucushpa imatapash na nirca’ (Is. 53:2, 7). Jesusta ali catijcunaca ‘pihuanbash na fiñanajushpa aliguta causana’ cashcatami yachajurcani (2 Tim. 2:24).

1958 huatapimi precursor shina sirvi callarircani. Shinapash tiempo jipaca cazaragrijuimandami precursor  canatapash saquircani. Gloria paniguhuanmi cazararcani. Paimi primera vez tandanajuiman invitahuarca. Chai decisionda agllashcamandaca nunca na arripintirinichu. Gloriaca cunangamanmi shuj juyailla valishca rumigushna can. Paihuan cazarashcamandaca ninandami cushijuni. Cunanga Gloriami paipa causaimanda parlanga.

“Ñuca taitamamacunaca 17 huahuacunatami charirca. Ñuca mamaca tucui shunguhuan Jehovata sirvishpami, ñuca 14 huatacunata charijpi huañurca. Chai tiempopimi ñuca taitapash Bibliata yachajui callarirca. Ñuca mama huañujpimi ñuca taitaca directorhuan parlagrirca, shuj punllaca ñuca, shuj punllaca ñuca ñaña escuelaman richun nishpa. Shina nijpica directorca ari nishcarcami. Ñuca ñaña colegiota tucuchichunga ashallami faltarca. Chaimi ñuca ñaña escuelaman rijpica turiñañacunata cuidashpa huasipi quedan carcani. Ñuca papito trabajomanda tigramujpi tucuicuna igual micungapami yanushcalla shuyan carcani. Cutin cayandi punllaca ñuca ñañami huasipi quedan carca. Ñuca ñaña graduaringacamanmi shina rurarcanchi. Ishcai Testigo familiacunahuanmi Bibliamanda yachajurcanchi. Chaimi ñucapash, ñucapa10 turiñañacunapash Testigocuna tucurcanchi. Gentecunahuan parlanata manllashpapash villachinataca ninandami gushtan carcani. Ñuca cusaca cai tucui huatacunatami ayudahuashca”.

Febrero de 1959 huatapimi Gloriahuan cazararcani. Ishcandimi precursorcuna shina sirvishpa cushilla yalircanchi. Jatun Betelpi sirvingapaj munashpami julio quillapica Betelman shuj solicitudta cacharcanchi. Ñucanchicunataca Simon Kraker huauquimi entrevistarca. Paica nircami, cusahuarmicuna Betelpi sirvichunga na chasquinajupanchichu nishpa. Shina nijpipash Betelpi sirvina munaitaca na cungarcanchichu. Ashtaca huatacuna jipami Betelpi sirvigrinaca pactarirca.

Jatun Betelman escribishpami, maipita sirvigri ushapanchi nishpa tapurcanchi. Chaimi cashna nirca: Pine Bluff, Arkansas llactapimi sirvigri ushanguichi nishpa. Chai llactapica ishcai congregaciongunallami tiarca. Shuj congregacionbica yura huauquipanicunami tandanajun carca. Cutin chaishuj congregacionbica yana huauquipanicunami tandanajun carca. Ñucanchitaca yana huauquipanicunapa congregacionmanmi cacharca. Chai congregacionbica 14 publicadorcunallami tiarca.

Imamandashi Testigocunapa congregaciongunaca shujca yana gentepa, shujca yura gentepa carca nishpa tapuringuipashchari. Chai punllacunapica nimata na rurai usharcanchichu. Chai llactapa leycunaca shuj razamanda gentecunahuan tandanajuchunga na saquinllu carca. Shuj razamanda gentecunahuan tandanajujpica ninandami llaquichin carca. Huaquin pushtucunapi Tandanajui Huasicunata huaglichinga yashpami yura huauquipanicunaca, yana gentecunahuanga na tandanajun carca. Ña shina pasashca caimandami na tandanajun carca. Yana huauquipanicuna yura gentecuna causaj pushtucunapi villachijpica carcelman churanllami carca. Huaquinbicarin macaitapashmi macan carca. Chaimi villachishpa cati ushangapaca chai leycunata cazuna carcanchi. Chai leycuna tucurichunmi shuyan carcanchi.

Chai punllacunapi villachinaca na fácil carcachu. Yana gentecuna causaj pushtucunapi villachinajushpaca huaquinbica na yashcapimi yura gentecunapa huasiman chayan carcanchi. Shina pasajpica villachinata o disculparinatami uchalla decidina carcanchi. Chai punllacunapica shinami causan carcanchi.

Mantiniringapaca shinllitami trabajana carcanchi. Casi tucui trabajocunapimi punlla enterota trabajajpipash 3 dolartalla pagan carca. Gloriaca huaquin huasicunapimi trabajan carca. Shuj huasipica Gloriata ayudachunmi saquihuan carca. Chaimi uchalla tucuchin carcanchi. Chai huasipica micunagutapashmi caran carca. Cutin shuj huasipica Gloriaca ropata planchashpami trabajan carca. Chai huasipillatami ñucaca jardinda arreglashpa, ventanacunata limpiashpa, shuj cosascunatapash rurashpa trabajan carcani. Shinallata yura gentecunapa huasipica ishcandimi ventanacunata limpiashpa trabajan carcanchi. Punlla entero trabajajpimi micunagutapash chai huasipica caran carca. Shinapash Gloriaca chai familiamanda separadomi huasi ucupillata micun carca. Cutin ñucaca garajepimi micun carcani. Chaipi micushpapash llaquillaca na sintirinllu carcani. Micunaca micunaimi carca. Chai familiaca shujcuna nishcata uyaimandallami shina ruran carca. Paicunaca ali alicunami carca. Shuj viajeca carropi gasolinata churangapami shayarircanchi. Gasolinata churashca jipaca bañota mañachihuai nircanimi. Shina nijpica chai jarica culira ricushpami cashna nihuarca: “Vichashcami can” nishpa.

Ñucanchi huauquipanicunahuanga cushillami yalircanchi. Cushijushpami villachin carcanchi. Pine Bluff llactaman chayashpaca siervo de congregación sirvijuj huauquipa huasipimi causagrircanchi. Chai huauquipa huarmica na Testigo carcachu. Chaimi Gloriaca paiman Bibliata yachachi callarirca. Cutin ñucaca chai huauquipa ushiman, ushipa cusamanmi Bibliamanda yachachi callarircani. Mamapash, ushipashmi Jehovata sirvingapaj munaimanda bautizarirca.

Yura huauquipanicunapa congregacionbica ali amigocunatami charircanchi. Paicuna micungapaj invitajpica pipash ama ricuchunmi tuta rin carcanchi. Chai punllacunapica Ku Klux Klan organizacionga shuj razamanda gentecunahuan tandanajuchunga na saquishpami llaquichitapash llaquichinajurca. Halloween tutapi shuj jari Ku Klux Klan organizacionbi gentecunashna churajushca paipa huasi patiopi tiajujtami ricurcani. Shina gentecuna tiajpipashmi huauquipanicunapura ayudarishpa causan carcanchi. Shuj viajeca jatun tandanajuiman ringapami culquita minishtinajurcanchi. Chaimi chai jatun tandanajuiman ri ushachun shuj huauqui ñucanchipa carrota randirca. Shuj quilla jipaca, villachishpa shuj gentecunaman Bibliata yachachishpami shaijushca tigranajurcanchi. Huasi ñaupajpi ñucanchi carro shayajujta ricushpaca ninandami manllarircanchi. Carropica shuj papelgutami cashna nishpa saquishcarca: ‘Carrotaca caraitami carajuni’ nishpa.

Shuj panigu ñucanchita ayudashcataca nunca na cunganichu. 1962 huatapimi South Lansing, Nueva York llactapi Escuela del Ministerio del Reino nishcaman shuj quillata invitarca. Superintendente de circuito, Superintendente de distrito, congregaciongunapi ancianocunapa escuelami carca. Chai escuelaman ringapaca trabajotapash na charircanichu. Culquitapash ashagutallami charircanchi. Pine Bluff llactapica compañía telefónica nishcapi trabajachunmi entrevistahuarca. Chai compañiapica yana gentecunaca nunca na trabajashcarcachu. Shinapash chai compañiapi trabajachun ari nihuarcami. Chaipica primera vezmi shuj yana gente trabajagrijurca. Nueva York llactaman ringapami culquita minishtijurcani. Chaimi imata ruranatapash na atinashca carcani. Chai escuelaman rinapa randica trabajota chasquisha yajurcanimi. Chai escuelaman na rishachu nishpa escribigrijujpi ima pasashcataca nunca na cungashachu.

Shuj punllaca ñucanchi congregacionmanda na testigo cusata charij shuj panigumi tutamandata ñucanchi huasiman shamushcarca. Paica culquigutami carahuarca. Chai paniguca paipa uchilla huahuacunandimi tutamandata jatarishpa algodón pambacunapi nali jihuata anchuchishpa trabajagrishcarca. Nueva York llactaman ñuca ri ushachunmi shina rurashcarca. Chai paniguca nircami: “Chai escuelaman rishpa ali ali yachajupangui. Tigramushpaca chai yachajushcacunata tucuicunaman yachachipangui” nishpa. Chai jipaca compañía telefónica nishcapi 5 semanacuna jipa trabajai ushapanichu nishpami cayarcani. Shina nijpica paicunaca na nihuarcami. Na nijpipash na pinarircanichu. Escuelaman rinatami ña decidishca carcani. Chai trabajota na chasquishcamandaca na arripintirinichu.

 Cunanga Gloriami Pine Bluff llactapi imatalla rurashcata parlapanga: “Chai llactapi villachinataca ninandami gushtarcani. Ashtaca gentecunamanmi Bibliamanda yachachin carcani. Tutamandaca huasin huasinmi villachin carcanchi. Chishica gentecunaman Bibliamanda yachachingapami rin carcanchi. Huaquinbica 11 de la nochetami huasiman tigran carcanchi. Villachishpaca cushillami yalin carcanchi. Chai llactamanda ringapaca na munarcanichu. Llaquilla sintirishpapash ñuca cusaguta superintendente de circuito cachun agllajpimi apoyana tucurcani. Jehová Diosca shuj privilegiotami ñucanchimanga cugrijurca”. Jehová Diosca ñucanchi na pensashca privilegiocunatami curca.

Pine Bluff llactapimi precursor regular shina sirvinajurcanchi. Chaimi precursor especial cangapaj shuj solicitudta cacharcanchi. Superintendente de distrito huauquica Texas llacta congregacionbi precursor especial shina sirvichunmi munarca. Chaimi precursor especial tucushun yarcanchi. Precursor especial cangapami munarcanchi. Chaimandami chai privilegiota cunga yashpa shuyanajurcanchi. Shinapash nunca na chayamurcachu. 1965 huatapica shuj cartatami chasquircanchi. Superintendente de circuito cachunmi agllahuarca. Chai tiempopillatami Leon Weaver huauquitaca Superintendente de circuito cachun agllarca. Chai huauquica cunanbica Comité de Sucursal de Estados Unidos coordinadormi can.

Superintendente de circuito shina sirvinataca manllajurcanimi. Shuj huata huashamanga imapilla mejoranataca Superintendente de distrito James Thompson huauquica ñami nihuashcarca. Ali superintendente cangapaj imata rurana cashcata, ima cualidadcunata charinatapashmi nihuarca. Chai huauquipa consejoca ñuca asignacionda ali pactachichunmi ayudahuarca. Superintendente de distrito Thompson huauquimi primera vez ñucanchitaca visitarca. Chai huauqui visitajui horasca ñami Superintendente de circuito carcani. Thompson huauquimandaca ashtacatami yachajurcani.

Chai tiempopica Superintendente de circuito huauquicunamanga ashatallami yachachin carca. Chai huauqui congregaciongunata visitajujpica shuj semanatami cumbarcani. Chaipimi congregaciongunata imashina visitanata yachajurcani. Cutin chaishuj semanapaca ñucami congregacionda visitana tucurcani. Cunanga chai huauquimi congregacionbi imashina yachachijta ricujurca. Chai huauquica imacunapilla mejoranatami nihuarca. Cunanga ñucanchillami congregaciongunata visitana carcanchi. Ñuca huarmigumanga nircanimi: “¿Ñucanchitallachu saquigrin?” nishpa. Ñucanchicuna ayudachun saquijpica siempremi ayudangapaj munaj huauquicuna tianga. Chaitaca tiempo yalijpimi cuenta japircani. Superintendente James Brown huauqui ñucata ayudashcataca  cunangamanmi yarini. Shinallata Betelpi sirvij Fred Rusk huauqui ñucata ayudashcataca nunca na cungashcanichu.

Chai punllacunapica shuj razamanda gentecunahuan tandanajuchunga nimamanda na saquinllu carca. Shuj viajeca ñucanchi visitajuj Tennessee pueblopimi Ku Klux Klan organizacionga parota rurashcarca. Cutin shuj punllaca villachishca jipami huauquipanicunandi micungapaj shuj restauranteman rircanchi. Bañoman rijujpi shuj jari tatuaje junda catimujujtami cuenta japircani. Chaita ricushpami paita yali jatun, shinlli huauqui catimushpa “alichu cangui, huauqui Herd” nirca. Chai huauquita ricushpaca manllarishpami chai jarica rirca. Juchayu caimandami yura gentecunaca yana gentecunata na ricunayachin. Chaitami cai tucui huatacunapi cuenta japishcani. Shinallata yura cashpa yana cashpapash tucuicunallata ñucanchi huauquipanicuna cashcatami yachajushcani. Huauquipanicunaca paicunapa causaita cuna cajpipash shuj huauquipanicunamandaca cungallami.

12 huatacunatami Superintendente de circuito shina sirvircani. Cutin 21 huatacunatami Superintendente de distrito shina sirvircani. Chai tucui huatacunapica ashtaca bendiciongunata, experienciacunatami charishcanchi. Shuj privilegiotapashmi chasquigrinajurcanchi. Agosto de 1997 huatapimi ñucanchi munashca asignacionda chasquircanchi. Estados Unidos Betelpi sirvichunmi invitarca. Primera vez solicitudta cachashcamanda 38 huatacuna jipami Betelpi sirvichun invitarca. Shuj quilla jipami Betelpi sirvi callarircanchi. Asha tiempotalla Betelpi sirvichun invitahuashca yarcanimi. Shinapash pandatami yuyashcarcani.

Callaripica Departamento de Servicio nishcapimi ayudarcani. Chaipica ashtacatami yachajurcani. Chai llactamanda cuerpo de anciano huauquicunapa, superintendente de circuito huauquicunapa shinlli tapuicunatami chaipi ayudaj huauquicunaca contestan carca. Chai huauquicuna pacienciahuan ñucata ayudashcamandaca ninandami agradicini. Cutin chaipi ayudachun cachajpica yachajushpallatami catiman.

Ishcandimi Betelpi causaitaca alicachinchi. Siempremi madrugadota jatarin cashcanchi. Chaimi Betelpi sirvichunga ayudashca. Casi huata jipaca Comité de Servicio del Cuerpo Gobernantepimi ayudai callarircani. Cutin 1999 huatapica Cuerpo Gobernantepimi sirvi callarircani. Cai asignacionbica ashtacatami yachajushcani. Por ejemplo, cai alpapi tucui congregaciongunata gentecunaca na pushajunllu. Jesús ñaupaman pushajushcatami yachajushcani.

Ñuca causaita yarishpaca profeta Amós cuendami sintirini. Paica llamata michij humilde runagu, sacha jigosta pallajmi carca. Chaitaca pobre gentecunallami micun carca. Shina cajpipash Jehová Diosca Amós runagutaca profeta cachunmi agllarca. Paitaca ashtacatami bendiciarca (Amós 7:14, 15). Liberty pueblomanda pambapi trabajaj jaripa churi cajpipash, Jehová Diosca paita sirvichunmi agllahuarca. Jehová Diosca ashtaca ashtaca bendiciongunatami cuhuashca. Chai tucui bendiciongunataca cuentaitapash na ushanichu (Prov. 10:22). Pobre nacirishca cajpipash Jehovami espiritualmente charij cachun ayudahuashca. Chashna causanataca yaitallapash na yarcanichu.