1. Adanbash, Evapash pandarishca jipaca ¿imatata Jehová Diosca villarca?

SHUJ culebrami parlahuarca nishpa Eva villajpica Adanga shuj espiritumi parlashca yariangami. Adanga culebracuna na parlajtaca alimi yacharca (Gén. 3:1-6). Chai espiritumandaca Adanbash, Evapash nimata na yacharcachu. Shinapash Adanga Taita Diosta na cazushpami chai espiritutara cazurca (1 Tim. 2:14). Chai espiritumi Adandapash, Evatapash pandachirca. Chai jipallami Jehová Diosca chai espíritu pi cashcata villarca. Chai espíritu tucuchi tucuna cashcatapashmi villarca. Shinallata Jehovata sirvijcunata chai espíritu llaquichina cashcatapashmi Jehová Diosca intindichirca (Gén. 3:15).

2, 3. Cai alpaman Mesías nara shamujpica ¿imamandata Jehová Diosca huaquin cosascunatalla Satanasmandaca parlarca?

² Chai na cazuj angelpa shutitaca Jehová Diosca nunca na villarcachu. * Jehová Diosca 2 mil huatacuna jipami chai nali ángel imashina cashcata ricuchingapaj Satanás nishpa Bibliapica escribichirca. Satanás shimica “Contra” ningapami munan  (Job 1:6, NM). Chai shimica Escrituras Hebreasmanda librocunapica 1 Crónicas, Job, Zacarías librocunapillami ricurin. Mesías cai alpaman nara shamushca punllacunapica ¿imamandata Jehová Diosca huaquin cosascunatalla chai nali angelmandaca parlarca?

³ Jehová Diosca Escrituras Hebreaspica Satanasmanda, pai imatalla rurashcamandaca huaquin cosascunatallami parlarca. Chaipa randica gentecuna Mesiasta rijsishpa, paita catichunmi Escrituras Hebreastaca escribichirca (Luc. 24:44; Gál. 3:24). Mesías cai alpaman shamujpica Jehová Diosca Mesiasta, paipa catijcunatapash utilizashpami Satanás, paipa demoniocunapash imashina cashcata villarca. * Chaimandami cunanbipash Satanás, paipa demoniocunapash imashina cashcata yachanchi. Jehová Diosca Jesusta, ungidocunata utilizashpami Satanastapash, paipa demoniocunatapash tucuchinga (Rom. 16:20; Apoc. 17:14; 20:10).

4. ¿Imamandata Satanastaca na yapata manllana capanchi?

⁴ Apóstol Pedroca nircami, Diabloca ‘león huacashpa muyuriajunshnami’ can nishpa. Juanga nircami, Diabloca ‘culebra’, ‘dragonmi’ can nishpa (1 Ped. 5:8; Apoc. 12:9). Shinapash Satanastaca na yapata manllanachu capanchi. Paica tucui podertaca na charinllu (Santiago 4:7, liingui). Satanaspa trampacunata mishachunga Jehovapash, Jesuspash, ali angelcunapashmi ñucanchitaca ayudanga. Cai quimsa tapuicunatami yachajuna capanchi: ¿Satanasca tucui podertachu charin? Satanasca ¿imashinata gentecunata pandachingapaj munan? ¿Satanasca tucuitachu rurai ushan? Cai tapuicunamandaca alipacha yuyaicunatami yachajupashun.

5, 6. ¿Imamandata gentecuna ali causachunga cai alpapi gobiernocunaca na ayudaita ushashca?

⁵ Ashtaca ashtaca nali angelcunami Satanaspa lado tucurca. Jatun Manllanai Tamia nara chayamujpillatami, huaquin angelcuna cai alpapi huarmicunahuan pacta puñuchun Satanasca umachirca. Chai punllacunapi ima pasashcata ricuchishpami Bibliapica cashna nin: ‘Shuj dragonga quimsamanda shuj chaupi luzerocunatami aisashpa jahua pachamanda urmachirca’ nishpa (Gén. 6:1-4; Jud. 6; Apoc. 12:3, 4). Chai angelcunaca Jehovapa familia canatami saquirca. Paicunataca Satanasmi mandajun. Satanasca Taita Diospa Reino cuendatashnami charin. Paica rey shinami demoniocunataca grupopi ali organizashpa ñaupaman pushajun. Satanasca cai mundo enterota mandachunmi demoniocunaman autoridadta cushca (Efes. 6:12).

⁶ Satanasca ‘cai pachapi tiaj tucui llactacunata’ Jesusman ricuchishpami cashna nirca: “Cai llactacunata mandana ushaitapash, chai juyailla llactacunatapash, ñucami canman cusha. Chaicunata mandajuchunga, ñucamanmi saquirca. Chaitaca, piman cungapaj munashpapash cushallami” nishpa. Chaita ricushpami Satanás paipa demoniocunata utilizashpa cai alpapi gobiernocunata mandajushca yachapanchi (Luc. 4:5, 6). Diablo mandajujpipashmi ashtaca gobiernocunaca gentecunamanda ali cosascunata ruranajushca. Huaquin gobiernocunaca  gentecuna ali causachunmi ayudangapaj munan. Shinapash gentecuna ali causaita charichunga ni shuj gobierno na ayudaita ushashcachu (Sal. 146:3, 4; Apoc. 12:12).

7. Satanasca ¿imashinata gobiernocunata, negociocunata, panda religiongunatapash utilizan? (Callari dibujota ricupangui).

⁷ Satanaspash, demoniocunapash ‘cai pachapi tiaj tucui llactacunapi’ gentecunata pandachingapaca gobiernocunata utilizashca jahuapash panda religionda, negociocunatapashmi utilizan (Apoc. 12:9). Tucuilla gentecuna Taita Diospa shutita cungachunmi Satanasca panda religionda utilizashpa, Jehová Diosmanda llullacunata yachachishca (Jer. 23:26, 27). Chaimi gentecunaca Taita Diosta adoranajunchi yashpapash paicunaca demoniocunata adoranajun (1 Cor. 10:20; 2 Cor. 11:13-15). Satanasca negociocunata utilizashpami gentecunataca crichin ashtaca culquita, ashtaca cosascunata charishpa cushilla causai ushashcata (Prov. 18:11). Chaita crishpami ashtaca gentecunaca Jehovata sirvinapa randica cosascunata charinapi preocuparishpa causan (Mat. 6:24). Chaimandami charishca cosascunata ashtahuan alicachishpa Jehovamanda caruyashca (Mat. 13:22; 1 Juan 2:15, 16).

8, 9. a) Adanmanda, Evamanda, nali angelcunamandapash ¿imatata yachajupanchi? b) Satanás cai mundota mandajujta yachanaca ¿imashinata ayudan?

⁸ Adanmanda, Evamanda, nali angelcunamandaca ishcai yuyaicunatami yachajupanchi. Punda yuyai, Jehovapa lado tucunata o Satanaspa lado tucunatami agllana capanchi. Ishcandipa lado tucuitaca na ushanchichu (Mat. 7:13). Cati yuyai, Satanaspa lado tucushpaca ashatallami ali causashun. Adanbash, Evapash ima ali cajta, ima nali cajtaca paicunallatami agllai usharca. Demoniocunaca cai alpapi gobiernocunatami mandai callarirca (Gén. 3:22). Imashinami ricupanchi, Satanaspa lado tucushpa ali causaitaca ashapallami charishun. Paipa lado tucushpaca llaquicunatallami charishun (Job 21:7-17; Gál. 6:7, 8).

⁹ Satanás cai mundota mandajujta yachanaca ¿imashinata ayudan? Autoridadcunata, gobiernocunatapash respetachun Jehová Dios munashcata intindichunmi ayudan (1 Ped. 2:17). Gobiernocunapa leycunata cazuna cajpipash Jehová Diosca paipa mandashcacunatara cazuchunmi munan (Rom. 13:1-4). Shinallata gobiernocunata, partido politicocunataca na apoyanachu capanchi (Juan 17:15, 16; 18:36). Satanás cai mundota mandajuimandami Jehovata, paipa shutitapash llullacunahuan mapayachishca. Chaimi gentecuna Jehovata rijsi ushachun ashtahuan villachingapaj munapanchi. Testigo de Jehovacuna caimandaca cushillami sintirinchi. Culquita charina, ashtahuan cosascunata charinapa randica, Jehovata juyanami ashtahuan cushilla causachun ayudanga (Is. 43:10; 1 Tim. 6:6-10).

10-12. a) ¿Imashinata Satanasca ashtaca angelcunata pandachirca? b) Chai angelcunahuan ima pasashcata ricushpaca ¿imatata yachajupanchi?

¹⁰ Satanasca paipa munaita rurashpa causachunmi munan. Chaipaca shuj shuj trampacunahuanmi pandachin. Huaquinbica manllaita charichunmi shuj shuj jarcaicunata churan. Huaquin yuyaicunata ricupashun.

¹¹ Primero. Ashtaca angelcunata Satanás  imashina pandachishcata ricupashunchi. Angelcunata imashina pandachinataca Satanasca ña unaitami ricujushcanga. Satanaspa trampapi urmaimandami ashtaca angelcunaca cai alpapi huarmicunahuan pacta puñurca. Chai nali angelcunapa huahuacunaca jatun jatun millaicunami carca (Gén. 6:1-4). Satanasca chai trampata utilizashca jahuapash chai angelcunamanga nishcangami, cai alpapi gentecunata mandachunmi autoridadta cusha nishpa. Taita Diosca nishcarcami, ‘huarmipa mirai’ tianga nishpa. Satanasca chai profecía ama pactarichunmi jarcangapaj munashcanga (Gén. 3:15). Satanás shina rurachunga Jehová Diosca na saquircachu. Chaimi Jatun Manllanai Tamiata cachamurca.

¹² Caimandaca ¿imatata yachajupanchi? Nara cazarashpallata shuj jarihuan, shuj huarmihuan igual puñuna ali cajtashna ricuchunmi Satanasca munan. Shinallata jariyashca sintirichunbashmi munan. Chaicunamandami cuidarina capanchi. Satanaspa lado tucushca angelcunaca ashtaca huatacunatami Jehová Diosta sirvishpa jahua cielopi causashcarca. Shina causashpapashmi chai angelcunaca paicunapa shungupi nali munaicuna mirachun saquirca. Tal vez ñucanchipash ashtaca huatacunatachari cai alpapi Jehovapa organizacionbi sirvinajunchi. Shina sirvinajushpapashmi ñucanchi shungupi nali munaicuna ama mirachun cuidarina capanchi (1 Cor. 10:12). Ñucanchi shungupi ima tiashcata yachanaca minishtirishcapachami can. Shinallata jariyana yuyaicunata, nali munaicunata ama charingapami cuidarina capanchi (Gál. 5:26; Colosenses 3:5, liingui).

13. a) Satanasca ¿imashinata gentecunataca pandachin? b) Satanaspa trampapi ama urmangapaca ¿imatata rurana capanchi?

¹³ Segundo. Brujeriamanda, huañushcacunahuan parlanamanda, demoniocunapa ruraicunamanda yachana munaicunahuanmi Satanasca pandachin. Shuj nali cosascunahuanbashmi gentecunataca pandachin. Gentecunata pandachingapaca Satanasca panda religionhuanllaca na pandachinllu. Shuj shuj diversiongunahuanbashmi pandachin. Satanasca demoniocunapa  ruraicunamanda parlaj peliculacunahuan, musicahuan, computadorapi imapash pugllaicunahuan, shuj cosascunahuanbashmi pandachin. Chaimi gentecunaca demoniocunapa ruraicunamanda yachajushpa o ricushpaca cushilla ali sintirin. Satanaspa trampapi ama urmangapaca ¿imatata rurana capanchi? Maijan diversión ali cashcata o nali cashcata Jehovapa organización nichunga na shuyanachu capanchi. Cada unomi Jehovapa mandashcacunata catishpa ñucanchi concienciata ali yachachina capanchi (Heb. 5:14). Ali decisiongunata agllachunga apóstol Pablopa consejomi ayudanga. Paica nircami, “na nij tucushpallami” Taita Diostaca juyana canguichi nishpa (Rom. 12:9). Shinaca diversiongunata agllajushpaca cashna tapuripashunchi: “¿Bibliapa mandashcatachu pactachijuni? Bibliamanda yachajujcuna o revisitacunaca ¿imatashi chai diversiongunamandaca pensanga?” nishpa. Bibliapa mandashcacunata pactachingapaj esforzarishpaca Satanaspa trampacunapica na urmashunllu (1 Juan 3:18).

14. a) Satanasca ¿ima jarcaicunatallata churan? b) Chai jarcaicunata mishangapaca ¿imatata rurana capanchi?

¹⁴ Jehovata tucui shunguhuan cazuchunga Satanasca na munanllu. Chaimi shuj shuj jarcaicunata churan. Por ejemplo, ama villachichunmi gobiernocunata Satanasca utilizan. Shinallata Jehovapa mandashcacunata pactachingapaj munajta ricushpaca trabajopi, escuelapi o colegiopi cumbacuna burlarichunmi Satanasca imatapash ruran (1 Ped. 4:4). Satanasca ñucanchi familiata utilizashpami desanimachingapaj munan. Chaimi paicunaca alita ruranchi yashpa tandanajuicunaman na richun saquin (Mat. 10:36). Chai jarcaicunata mishangapaca ¿imatata rurana capanchi? Primero. Satanasca Jehovamanda caruyachingapami munan. Chaitaca na cunganachu capanchi (Apoc. 2:10; 12:17). Segundo. Satanasca nircami, ali causanajushpallami gentecunaca Jehovataca sirvinajun. Llaquicuna ricurijpica Jehovata saquingallami nishpa. Llaquicuna ricurijpica Satanaspa nishcataca na cunganachu capanchi (Job 1:9-11; 2:4, 5). Tercero. Aguantashpa  ñaupaman catingapami Jehovata mañana capanchi. Paica nunca na saquingachu (Heb. 13:5).

15. Satanasca ¿imatata na rurai ushan?

¹⁵ Satanasca ñucanchi na munashca cosascunata rurachunga na obliganllu (Sant. 1:14). Ashtaca gentecunaca Diablopa lado cashcataca na cuenta japinllu. Paicunaca Diospa Shimimanda yachajushpami Jehovapa lado tucunata o Diablopa lado tucunata agllana can (Hech. 3:17; 17:30). Taita Diosta tucui shunguhuan cazungapami esforzarina capanchi. Shina rurajpica Satanasca Jehová Diosmandaca na caruyachingachu (Job 2:3; 27:5).

16, 17. a) Diablopash, demoniocunapash ¿imatata na rurai ushan? b) Shinllita mañataca ¿imamandata na manllana capanchi?

¹⁶ Diablopash, demoniocunapash gentecunapa shungupi, yuyaipi ima tiajtaca na yachai ushanllu. ¿Imamandata shina nipanchi? Diablopash, demoniocunapash gentecunapa shungupi, yuyaipi ima tiajta yachashcataca Bibliapica na ricuchinllu. Jehová Dioslla, Jesusllami gentecunapa shungupi, yuyaipi ima tiajtaca yachai ushan (1 Sam. 16:7; Mar. 2:8). Shinaca shinllita parlajpi o shinllita mañajpica ¿imata pasanga? ¿Diablopash, demoniocunapash ñucanchi ima nishcata uyashpa llaquichinataca manllanachu capanchi? Na, na manllanachu capanchi. Por ejemplo, Diablo ricujun nishpallaca Jehovata sirvinataca na saquishcanchichu. Shinallata Diablo uyajun nishpallaca shinllita mañanataca na saquinachu capanchi. Bibliapica ricuchinmi ashtaca Diosta sirvijcuna shinllita mañashcata. Shinapash Satanás uyanga nishpa paicuna manllashcataca Bibliapica na ninllu (1 Rey. 8:22, 23; Juan 11:41, 42; Hech. 4:23, 24). Jehová munashcashna parlangapaj, rurangapaj esforzarishpaca Dios ayudanapimi confiana capanchi. Shina rurajpica Diablo llaquichijpipash llaquicunahuanlla causachunga Jehová Diosca na saquingachu (Salmo 34:7, liingui).

¹⁷ Diablo imashina cajta yachajushpapash paitaca na manllanachu capanchi. Juchayucuna cashpapash Jehovapa ayudahuanga Diablota mishashunmi (1 Juan 2:14). ‘Diablohuan shinllita macanajunshna causajpica Diabloca anchuringami’ (Sant. 4:7; 1 Ped. 5:9). Diabloca ashtahuanbachaca jovengunatami pandachingapaj munan. Diablopa trampacunapi ama urmangapaca ¿imatata jovengunaca rurana can? Cai tapuitaca cati temapimi yachajupashun.