1. Huaquin huauquicunapaca ¿imamandata Bibliamanda yachajunaca shinlli ricurin?

CUNANBICA familiata mantiningapaca na fácil canllu. Chaimandami ashtaca huauquipanicunaca paicunapa familiacuna minishtirishcahuanlla causachun punlla entero shinllita trabajana can. Shujcunaca trabajoman ringapaj, huasiman tigrangapajpash ashtaca horascunatami rina can. Cutin shujcunaca familiata mantiningapami shinllita trabajan. Chaimi trabajashca jipaca paicunaca shaijushca sintirin. Shina sintirimandami Bibliamanda yachajungapaca paicunapaca shinlli ricurin.

2. Quiquinga ¿ima horasta Bibliamanda yachajupangui?

² Bibliamanda, Bibliapa publicaciongunamanda ali ali yachajungapaca maimandami tiempoguta llujchina capanchi. Aliguta yachajungapaj tiempoguta llujchishpallami Jehová Diospa ñaupapi ali ricurita ushapashun. Para siempre causaigutapashmi chari ushapashun (1 Tim. 4:15, 16). Huaquin huauquipanicunaca Bibliamanda yachajungapaca tutamandatami jatarin. Tuta entero samashcamanda, chai horas huasipi chulunlla caimandami yachajuitapash ali yachajuita ushan. Cutin shuj huauquipanicunaca ña tutayajujpimi Bibliamanda yachajun. Ashtahuanbash shuj tranquilo pushtupimi imata yachajushcapi pensaringapaj tiempota llujchin.

3, 4. a) Cunanbica ¿ima cambiocunata tiashca? b) Chai cambiocunaca ¿imapita ñucanchitaca ayudan?

³ Bibliamanda ashtahuan ali yachajungapaj tiempota llujchina cashcataca alimi yachapanchi. Shinapash ¿imatata yachajuna capanchi? Ashtaca publicacionguna tiajpimi tal vez pensanchi, ashtacata liitaca na usharingachu nishpa. Cutin huaquin huauquipanicunaca tucuilla publicaciongunatami lii ushashca. Shinapash shuj huauquipanicunaca tucuillata liitaca na ushashcachu. Chaitaca Cuerpo Gobernantepi sirvij huauquicunaca alimi yachan. Chaimi  publicaciongunata, Internetpi ashtaca informaciondapash ñana llujchinata decidishca.

⁴ Por ejemplo, español shimipi Anuario de los testigos de Jehová nishca librotaca ñana llujchinllu. Huauquipanicunapa experienciacunaca Internetpi jw.org^® paginapi, JW Broadcasting^® programapimi llujchin. Cunanbica Tucui gentecunapa Villajun, Rijcharipaichi revistacunaca huatapi quimsa viajellami llujchin. Shina cambiocunaca ñucanchicuna shuj cosascunatara rurachunga na canllu. Ashtahuangarin ‘ima ashtahuan importante cashcata pundapi churachunmi’ chai cambiocunaca tiashca (Filip. 1:10, NM). Cunanga, pundapi imata rurana cashcata, Bibliamanda ashtahuan aliguta yachajungapaj imata rurana cashcatapashmi yachajupashun.

5, 6. ¿Imatata ashtahuan yachajuna capanchi?

⁵ ¿Imatata pundapi yachajuna capanchi? Bibliamanda yachajungapami cada punlla tiempoguta llujchina capanchi. Cunanbica chaupi semana tandanajuipa Bibliapa capitulocunata liinaca ashallami can. Shinami liishcapi pensaringapaj, publicaciongunapipash liishcamanda ashtahuan yachajungapami tiempota charipanchi. Shina liishpami Bibliapa yachachishcacunaca ñucanchi shunguman chayanga. Ashtahuanbachaca Jehovapaman ashtahuan quimirichunmi ayudanga. Shinaca Bibliapa capitulocunata liitallaca na liinachu capanchi (Sal. 19:14).

⁶ ¿Imatata ashtahuan yachajuna capanchi? Tandanajuipi yachajungapaj Villajun revistapa yachajuna temata, Diospa Shimimanda Yachajungapaj nishcata, Jesuspa Chaquita Catishpa Causashunchi Yachachishunchi Tandanajuipa prepararinami capanchi. Shinallata Tucui gentecunapa Villajun revistata, Rijcharipaichi nishca revistatapash liinami capanchi.

7. ¿Internetpi jw.org paginapi, JW Broadcasting nishcapipash llujshishca tucui informaciongunata na liita ushashpaca llaquillachu sintirina capanchi?

⁷ Huauquipanicunaca ninbashchari: “Internetpi jw.org paginapi, JW Broadcasting nishcapipashmi ashtaca informacionguna tian. Chai tucuita ricuita, liitaca na usharingachu” nishpa. Shuj chimbapuraipi pensaripashunchi. Huaquin restaurantecunapica ashtaca mishqui micunacunami tian. Ashtaca micunacuna tiajpipash imata micunatami agllana can. Shina cuendami Internetpi tucui llujshishca publicaciongunata liita na ushashpapash ama yapata llaquiripashunchichu. Ashtahuangarin ñucanchi ushashcaguta publicaciongunata liingapaj, ricungapaj esforzaripashunchi. Shinapash Bibliamanda aliguta yachajungapaca ¿imatata rurana capanchi? Bibliapi yachajushca ñucanchicunata ayudachunga ¿imatata rurana capanchi?

8. a) Tandanajuipi yachajungapaj Villajun revistataca ¿imashinata prepararina capanchi? b) Shina prepararishpaca ¿imashinata ñucanchitaca ayudanga?

⁸ Bibliamanda aliguta yachajunaca publicaciongunata jahua jahualla liinata, respuestacunata señalashpalla saquinaca na canllu. Bibliapa publicaciongunataca yachajungapaj munaihuanmi liina capanchi. Cunanga Tandanajuipi yachajungapaj Villajun revistata imashina prepararinata ricupashunchi. Pundapica, Caitami yachajupashun nishca partepi imata nijta ricupashunchi. Chai jipaca tematapash, subtitulocunatapash, ¿imatata nipanguiman? nishca partepi tiashca tapuicunatapash ricupashunchi. Jipamanga tucui temata alimanda, aliguta intindishpa liipashunchi. Shina liijushpaca cada parrafopa callari yuyaicunata ricupashunchi. Cai yuyaicunaca cada parrafopi imata yachachijushcatami ricuchin. Shinallata tucui parrafocunata liijushpaca cada parrafocuna subtitulocunata, tematapash imashina intindichijta ricupashunchi. Na rijsishca shimicunata, yuyaicunatapash jipaman ashtahuan aliguta yachajungapaj anotapashunchi.

9. a) Tandanajuipi yachajungapaj Villajun revistata prepararijushpaca ¿imamandata Bibliapa textocunata aliguta intindina capanchi? b) Josué 1:8 nishca shinaca textocunata liishca jahuapash ¿imatata rurana capanchi?

 ⁹ Tandanajuipi yachajungapaj Villajun revistata yachajunaca Bibliamanda ashtahuan yachajuchunmi ayudan. Chaimandami chai revistata prepararijushpaca Bibliapa textocunata, congregacionbi liina textocunata aliguta intindingapaj esforzarina capanchi. Shinallata chai textocunapa shimicuna cada parrafocunata imashina intindichishcata ricupashunchi. Ashtahuangarin chai liishca textocunapi pensaringapaj, ñucanchi causaipi imashina pactachingapaj pensaringapami tiempoguta llujchina capanchi (Josué 1:8, liingui).

10. Hebreos 5:14 nishca shinaca taitamamacunaca ¿imamandata Familiahuan Adorana Tutapi huahuacuna Bibliamanda aliguta yachajuchun ayudana can?

¹⁰ Cunanga Familiahuan Adorana Tutamanda yachajupashunchi. Taitamamacunaca paicunapa huahuacuna cada semana Familiahuan Adorana Tutapi aliguta cushijushpa yachajuchunmi munan. Shinapash taitamamacuna huahuacunaman imata yachachinata ña yachashpapash, cada semana imapash shuj jatun ruraicunata ruranaca na minishtirinllu. Shinallata JW Broadcasting programata cada quilla ricuna, imaguhuanbash Noepa arcata rurana o shuj cosascunata ruranaca alimi can. Shinapash taitamamacunaca huahuacuna paicunallata Bibliamanda aliguta yachajuchunmi ayudana can. Huahuacunaca tandanajuicunapa aliguta prepararichun o escuelapi imatapash tapuchijpi Bibliahuan contestangapaj aliguta prepararinatami yachajuna can (Hebreos 5:14, liingui). Shuj yuyaimanda Bibliapi o publicaciongunapi aliguta intindingapaj huahuacuna yachajushpaca Tandanajuicunapi, Jatun tandanajuicunapipash aliguta yachajuchunmi ayudanga. Huaquinbica tandanajuicunapi videocunatalla na ricuchimandami shina ruranaca ali can. Taitamamacunaca huahuacunapa edadta ricushpa, paicuna imashina cajta ricushpami yachachina can.

11. Bibliamanda yachajujcunapash paicunallata Bibliamanda ashtahuan aliguta yachajuchunga ¿imamandata ayudana capanchi?

¹¹ Bibliamanda yachajujcunapash paicunallata Bibliamanda ashtahuan aliguta yachajuchunmi ayudana capanchi. Paicunallata tandanajuicunapa o Bibliamanda yachajungapaj prepararishcata, respuestacunata señalashcata ricushpaca ninandami cushijupanchi. Shinapash paicunallata Bibliamanda ashtahuan aliguta yachajuchunmi ayudana capanchi. Shinami paicunaca problemacuna ricurijpi imata ruranata yachai ushanga. Shuj huauquipanicunapa ayudataca na ñapash mañangachu. Chaipa randica paicunallatami Bibliapa publicaciongunapi imata ruranata mascanga.

12. Bibliamanda yachajuchunga ¿imata ayudanga?

¹² Bibliamanda yachajunata na gushtashpaca, tal vez cashnami pensari ushanchiman Bibliata intinditaca na ushashachu nishpa. Ama shina pensangapaca Bibliamanda asha asha yachajungapaj esforzaripashunchi. Shinami jipamanga Bibliamanda ashtahuan yachajungapaj munapashun. Bibliamanda yachajunaca Jehová Dioshuan alipacha amigo cachunmi ayudan. Shinallata ñucanchi ima problemacunata charishpa imata ruranata, gentecunapa tapuicunata imashina tigrachinatapashmi Bibliaca ayudan. Chaita yarishpami Bibliamanda ashtahuan yachajungapaj munapashun.

13. a) Colegiopi o escuelapi cumbacuna quiquinba crishcacunamanda imatapash tapujpica ¿imatata ruragripangui? b) Colosenses 4:6​pi nishcacunataca ¿imashinata pactachi ushapangui?

¹³ ¿Quiquinga shuj jovenllu capangui? Shinallata ¿colegiopi o escuelapi estudiajupanguichu? Tal vez colegiopi o escuelapi quiquinba cumbacunaca tucuicunallatami cumpleañosta ruran. Shinapash quiquinga Bibliapa yachachishcacunata quiquinba cumbacunaman intindichingapami munapangui. Shinapash cumpleañosmanda imashina intindichita na ushashpami manllaita charipangui. Cumbacunaman aliguta intindichingapaca quiquinrami cai ishcai yuyaicunata ali yachana capangui. Pundapica cumpleañosta rurana Taita Diospa ñaupajpi nali cashcatami alipacha yachana capangui. Cati yuyaipica Bibliapi yachachishcacunata imashina yachachinatami quiquinra ali intindina capangui (Mat. 14:6-11; 1 Ped. 3:15). Cumpleañosta ruranata imamanda quiquinba cumbacuna gushtashcatami ali yachana capangui. Jipaca cumpleañosmanda publicacionguna imata yachachijtami ali ali mascana capangui. Shina rurashpaca quiquinba imata crishcata cumbacunaman parlaitaca ushanguimi. Ashtaca gentecunaca cumpleañosta tucuilla gentecuna rurajpillami paicunapash cumpleañoscunataca ruran. Shinaca cumpleañosmanda quiquinra ña ali intindishpaca na manllashpami chai temamanda parlaita ushapangui. Shinallata gentecuna imata tapujpipash Bibliamandami ali yachachita ushapangui (Colosenses 4:6, liingui).

14-16. a) Bibliamanda librocunata ali intindingapaca ¿imatata rurana capanchi? b) Bibliamanda textocunaca ¿imashinata Amós librota ali intindichun ayudan? (“ Bibliapi parlashca gentecunata ali rijsipashunchi” nishca recuadrota ricupangui).

¹⁴ Cunanga caipi pensaripashunchi. Tandanajuipi na rijsishca profetamanda yachajugrinajushcanchiman. Chai profeta pi cashcata ali yachangapami Bibliamanda ashtahuan yachajuna capanchi. Yachajuna munaita charishpaca chai profeta pi cashcata, imatalla chai profeta escribishcatami Bibliapi ali intindi ushapanchi. Chaipaca ¿imatata rurana capanchi?

¹⁵ Pundapica cashna pensaripashunchi. Chai profetaca ima librotata escribirca, pita carca, maipita causarca, imatata ruran carca nishpami pensarina capanchi. Shina pensarinami imamanda chai shimicunata escribishcata, imashpa chai ejemplocunata churashcata ali intindi ushashun. Shinaca chai profeta imashina cashcata pensarishpami Bibliataca liina capanchi.

¹⁶ Jipamanga chai profeta chai librota ima hora escribishcata ali intindingapaj esforzaripashunchi. Chaita ali intindingapaca Traducción del Nuevo Mundo de las Santas Escrituras (con referencias) Bibliapi callari paginapi “Tabla de los libros de la Biblia” nishcapi mascapashunchi. Shinallata Guía para el estudio de la Palabra de Dios nishca folletopipashmi profetacunamanda, israel llactamanda reycunamanda tema 3​pi yachajuita ushapanchi. Shuj profeta escribishca libromanda yachajujushpaca, maipi, imashina tiempopi chai librota escribishcatami ali ali intindina capanchi. Shinallata chai tiempopi imashina gentecuna tiashcata, ima nalicunata rurashpa causashcata, chai profeta causashca punllacunapillata paicunapash  chai tiempopillata cashcatapashmi ali ali intindingapaj esforzarina capanchi. Chaicunamanda na intindijushpaca tal vez Bibliamanda shuj textocunahuanbashmi chimbapurashpa mascana capanchi. Por ejemplo, profeta Amospa punllacunapi ima pasashcata ashtahuan yachangapaca 2 Reyes librota, 2 Crónicas librota liishpapashmi Amós 1:1​pi nishca shimicunataca ali intindi ushapanchi. Chai textocunata ali intindingapaca Amós libropa chaupipi tiaj textocunatashpami ricuita ushapanchi. Shinallata Oseas librota liishpapashmi ali intindi ushapanchi. Oseasca, Amós causajuj punllacunapillatami causarca. Caicunata ali intindishpaca, Amós runagu imashina tiempopi causashcata ali intindi ushapashun (2 Rey. 14:25-28; 2 Crón. 26:1-15; Os. 1:1-11; Amós 1:1).

17, 18. Bibliamanda ali intindingapaj munashpaca ¿imatata ruraita ushapanchi? Intindichipai.

¹⁷ Bibliata liijushpaca yachajungapaj munaihuan liipashunchi. Cunanga caipi pensaripashunchi. Profeta Zacarías imata escribishcata capítulo 12​ta liinajushcanchiman. Chaipica Mesías huañunatami parlarca (Zac. 12:10). Zacarías 12:12​ta liijushpaca “Natán runapaj huasi ucupura miraicunapash” Mesías huañujpi ninanda huacarca nishcatami ricuchin. Cai nishcata na intindishpaca cashnami tapurina capanchi: “Mesías huañushcahuan, Natán runapa miraicunahuanga ¿imatata ricunata charin? Caita ali intindingapaca ¿imacunapillata mascai ushani?” nishpa. Shinaca caicunamanda ali intindingapami esforzarina capanchi. Zacarías 12:12​pa textota ali intindichunga 2 Samuel 5:14 textomanmi cachan. Chai textocunata liishpami Natán runagu Davidpa churicunapuramanda cashcata ali intindi ushapanchi. Shinallata Lucas 3:31, 32​pica, Natán runagupa mirai María huarmigumanda Jesús shamushcatami yachachin (Chaipaca agosto de 2017, página 32 Villajun revistamanda párrafo 4​ta ricupangui). Davidpa miraimanda Jesús shamushcataca alimi yachapanchi (Mat. 22:42). David runaguca  20 yali huahuacunatami charirca. Chaicunata ali intindimandami Natán runagupa huasi ucupuramanda miraicuna Mesías huañujpi huacashcata profeta Zacarías escribishcata ali yachai ushapanchi.

¹⁸ Cunanga shuj ejemplopi pensaripashunchi. Lucas capítulo 1​pi liishpaca yachajui ushapanchimi, ángel Gabriel, María huarmiguta visitashpa cashna nishcata: Jesusca “ninan ushaita charijmi canga. Paitaca: ‘Jahua pachapi causajuj Diospaj Churimi cangui’ ninajungami. Mandaj Taita Diosca paimanmi, paipaj ñaupa taita David mandashpa tiajushcataca cunga. Paimi, Jacobopaj mirai israelcunataca, causaita causaicaman mandajunga” nishpa (Luc. 1:32, 33). Chai textota liishpaca, “Jahua pachapi causajuj Diospaj Churimi cangui” nishcatallami tal vez ñucanchicunaca liinchiman. Shinapash Jesusca rey tucugrin nishpapashmi ángel Gabrielca Mariaman villarca. Ángel nishcata María uyashpaca ¿imatashi pensarirca? Mariaca tal vez cashnachari pensarirca ¿Herodes mandajpa randi o Israelitacunapa paipa catijcunapa mandajchu Jesusca mandagrijun? O ¿Shuj juyailla jatun huasipi, shuj reina cuenda causanatachu pensarijurca? María chaicunatara ángel Gabrielta tapujushcataca Bibliapica imatapash na ninllu. Shinallata Jesuspa punllacunapi paipa ishcai catijcunashnaca María huarmiguca Diospa Reinopi ñucatapash chaipi churachun munani nishcatapash Bibliapica na nijunllu (Mat. 20:20-23). Ashtahuangarin María huarmigu humilde cashcatami Bibliapica yachachin.

19, 20. Santiago 1:22-25​pi, 4:8pi nishca shimicunata liishpaca ¿ima yuyaihuanda Bibliataca yachajuna capanchi?

¹⁹ Bibliamanda yachajushpa, publicaciongunata liishpaca Jehovapa ashtahuan ali amigo cangapaj munashpami yachajuna capanchi. Shina liishpaca ñucanchicuna imashina cashcata yachajungapaj, Jehovapa ñaupajpi ali cangapaj cambiana cashcatapashmi yachajuna capanchi (Santiago 1:22-25; 4:8, liingui). Bibliamanda yachajui callarijushpaca Jehová Diospa espiritu santota siempre mañapashunchi. Shinallata Bibliamanda ali intindingapaj ayudahuai nishpapashmi mañana capanchi. Chaimi Jehová Diosllata ali intindichun ayudanga. Shinami Jehová Dios munashcashna ruraita ushapashun.

²⁰ Salmo librota escribij runagushnami cangapaj munapanchi. Salmo 1:2, 3​pica ninmi: Jehová “Dios mandashcata pactachishpami cushijun. Tutapash, punllapash chai mandashcataca aliguta yariajunllami. [...]Tucui imata rurajpipash, ali llujshingallami” nishpa.