1. Salmo 5:4-6​pi nishcashnaca Jehová Diosca ¿imashinata nali ruraicunataca ricun?

JEHOVÁ DIOSCA nali ruraicunataca nimamanda na ricunayachinllu (Salmo 5:4-6, liingui). Shinaca huahuacunata violanatapash nimamanda na ricunayachinllu. Chai ruraicunaca nalipacha nali, millanayaimi can. Testigocunapashmi chai ruraicunataca millanayachishpa ricupanchi. Shinallata congregación ucupipash huahuacunata ama violachunmi cuidana capanchi (Rom. 12:9; Heb. 12:15, 16).

2, 3. Huahuacunata violanamandaca ¿imatata Cristopa mandashcapica yachachin?

² Huahuacunata violanaca jatun jucha na ali cashcatami “Cristopa mandashcapica” nijun (Gál. 6:2). Jesusca paipa parlocunahuan, ruraicunahuanmi chai ruraicuna millanayai cashcata yachachirca. ¿Imamandata shina nipanchi? Imashinami chaishuj temapi yachajuparcanchi Cristopa mandashcapica juyanata, tucuita alita ruranatami yachachirca. Ñucanchicunaca Jesuspa catijcuna caimandami chai mandashcataca cazupanchi. Chaimi huahuacunata juyaihuan, paicuna seguro sintirichunbash ayudapanchi. Violadorcunaca paicunapa nali munaicunata pactachingapallami munan. Chaita ruranaca nalipachami can. Chaimandami violai tucushca huahuacunaca manllaihuan causan, pipash ñucataca na juyahuanllu nishpami pensarin.

³ Huahuacunata violajcunaca mundo enteropimi tian. Congregacionbipashmi shina nali ruraicunaca tiashca. ¿Imamandata shina nipanchi? Cunanbi gentecunaca ‘nalitalla rurashpa, shujcunata pandachij’ gentecunami mirashpa catijun. Chai nali gentecunamanda huaquingunaca congregaciongunamanmi yaicungapaj munan (2 Tim. 3:13). Shinallata Testigocuna canchi nij tucushcacunaca millanai, nali mapa munaicunata charimandami huahuacunataca violashca. Cunanga huahuacunata violanaca imamanda jatun jucha cashcatami yachajupashun. Shinallata congregacionmanda pipash huahuacunata  violajpi ancianocuna imata rurana cashcata, huahuacunata cuidangapaj taitamamacuna imata rurana cashcatapashmi yachajupashun. *

4, 5. Huahuacunata violanaca ¿imamandata nalipacha jatun jucha can?

⁴ Violai tucushca huahuaca ashtaca huatacunatami sufrishpa causan. Shinallata paipa familiapash, congregacionmanda huauquipanicunapashmi chai nali ruraimandaca sufrin. Chaimandami huahuacunata violanaca shuj nalipacha jatun jucha can.

⁵ Huahuacunata violanaca shuj jatun juchami can. * Shujcunata imatapash rurashpa llaquichinaca juchami can. Huahuacunata violaj gentecunaca huahuacunata violashpami ninanda llaquichin. Chaitaca shamuj temapimi ashtahuan yachajupashun. Huahuacunata violajcunaca imatapash nishpa o rurashpami huahuacunata umachishpa llaquichin. Chai ruraicunamandami huahuacunataca cuidana capanchi. Shina violai tucushca huahuacunataca ama llaqui llaqui sintirichunmi ayudana capanchi (1 Tes. 5:14).

6. ¿Imata rurashpata congregacionda pingaipi saquipanchiman?

⁶ Chai jatun juchaca congregaciondami pingaipi saquin. Shuj huauqui o shuj pani shuj huahuata violashpaca congregación enterotami pingaipi saquin (Mat. 5:16; 1 Ped. 2:12). Shuj huauqui o shuj pani juchata rurashpa, Jehovata ali sirvij huauquipanicunata nalipi saquinaca nalipachami can. Ashtahuangarin tucui shunguhuan Jehovata sirvijcunaca Diospi crinata ‘shinlli catingapami’ ninanda esforzarinajun (Jud. 3). Congregacionmanda maijambash juchata rurashpa na arrepintirijpica congregacionmandami expulsai tucun.

7. ¿Imamandata autoridadcunata cazuna capanchi?

⁷ Chai jatun juchaca autoridadcunata na cazujushcatami ricuchin. Jesusta ali catijcunaca ‘mandajcunata cazunami’ capanchi (Rom. 13:1). Llactapa leycunata cazushpaca autoridadta cazushcatami ricuchinajupanchi. Shuj huauqui o shuj pani chai leycunata na cazushpaca autoridadta na cazujushcatami ricuchin. Por ejemplo, shuj huauqui o pani shuj huahuata violashpaca autoridadcunapa leycunata na cazujushcatami ricuchin (Hechos 25:8 chimbapurashpa ricupangui). Ancianocunaca huahuacunata violadorpa ladoca na tucunllu. Shinallata chai juchata rurashcamanda autoridadcuna imatapash rurajpica ancianocunaca na satirinllu (Rom. 13:4). Chai jatun juchata rurajca paillatami ninan llaquita chasquinga (Gál. 6:7).

8. Pipash, pitapash llaquichishpaca Jehovapa ñaupapica ¿imatata rurajun?

⁸ Cai jatun juchaca Jehovapa ñaupapica nalipachami can (Sal. 51:4). Pipash, pitapash llaquichishpaca Jehovapa ñaupapi jatun juchatami rurajun. Jehová Dios israelitacunaman cushca leypi imata mandashcata ricupashunchi. Chai leypica ninmi carca, pitapash shuajpi o pitapash umachijpica jatun juchata rurashpami ‘Mandaj Diosta ninanda fiñachijun’ nishpa (Lev. 6:2-4). Huahuata violajca huahuacuna paipi confiachunmi imacunatapash rurashpa huahuacunataca umachin. Shina umachishpami huahuacunataca violan. Chaimandami shuj huauqui o pani shuj huahuata violashpaca Jehovata na cazujushcata, paipa shutitapash nalipi saquishcatami ricuchin. Huahuacunata violanaca Jehovapa ñaupapica millanai nali jatun jucha caimandami, congregación ucupi nimamanda na tiachun saquipanchi.

9. a) Jehovapa organizacionga ¿ima temacunatata llujchishca? b) ¿Imamandata chai temacunata llujchishca?

⁹ Huatacuna yalijpica Jehovapa organizacionga huahuacunata violai tucushcamanda parlaj ashtaca Bibliapa publicaciongunatami llujchishca. Por ejemplo, Villajun, Rijcharipaichi revistacunapica violai tucushcacuna ama llaqui llaqui sintirichun imata rurai ushashcatami ashtaca temacunata llujchishca. Shinallata violai tucushcacunata imashina ayudanata,  huahuacunata cuidangapaj taitamamacuna imata rurana cashcatami ashtaca temacunata llujchishca. Ashtahuanbash congregación ucumanda pipash huahuacunata violajpi imata ruranata yachangapami ancianocunamanga Bibliamanda instrucciongunata cushca. Ancianocunaman cushca instrucciongunataca Jehovapa organizacionga cutin cutinmi ima cambiocuna tiajta ricurianajun. Chai informaciongunaca Cristopa mandashcata ali pactachingapami ayudan.

10. Congregación ucupi pipash shuj jatun juchata rurashcata yachaj chayashpaca ¿imatata ancianocunaca ruran?

¹⁰ Congregación ucupi shuj huauqui o pani jatun juchata rurajpica ancianocunaca juyaihuanmi paicunataca ayudan. Shinallata ancianocunaca Jehová Dios munashcashnami imatapash alita rurangapaj esforzarin. Shinami paicunaca Cristopa mandashcata cazunajushcata ricuchin. Ancianocunaca Taita Diospa shuti ama nalipi quedachunmi ricurianajun (Lev. 22:31, 32; Mat. 6:9). Ashtahuanbash huauquipanicuna espiritualmente ali cachun, llaqui apashca huauquipanicunata ayudangapami esforzarin.

11, 12. Santiago 5:14, 15​pi nishca shinaca ¿imatata ancianocunaca rurangapaj esforzarin?

¹¹ Shuj huauqui o pani jatun juchata rurajpica cutin espiritualmente ali cachunmi ancianocunaca ayudan. Shinapash juchata ruraj huauqui o pani ayudachun saquijpillami ancianocunaca ayudaita ushanga (Santiago 5:14, 15 *, liingui). Shuj huauqui o pani nali munaicunata charimanda jatun juchata rurashpaca espiritualmente nali cashcatami ricuchin. Shinallata Jehovapa ñaupajpi nali cashcatapashmi ricuchin. * Ancianocunaca doctor cuendami espiritualmente nali caj huauquipanicunata ayudan. Ashtahuanbash ancianocunaca juchata ruraj huauquita o panita Jehovapa ñaupajpi cutin ali cachunmi Bibliapa consejocunahuan ayudan. Shinapash juchata rurajca ciertopacha arripintirishpallami Jehovapa ñaupajpi cutin ali caita ushan (Hech. 3:19; 2 Cor. 2:5-10).

¹² Imashinami ricupanchi, huauquipanicuna Jehovapa llamagucunashna caimandami ancianocunaca paicunata juyaihuan cuidana can (1 Ped. 5:1-3). Shinallata congregación ucupi huauquipanicuna seguro sintirichun munaimandapashmi ancianocunaca paicunata cuidan. Chaimi congregación ucupi shuj huauqui o pani shuj huahuata violashcata yachaj chayashpaca, ancianocunaca uchalla imatapash ruranata ricun. Shina pasajpica ¿imatata ancianocunaca ruran? Chaipaca  párrafo 13,  15,  17​pi tiashca tapuicunamanda yachajupashunchi.

13, 14. Pipash huahuacunata violashcata uyashpaca ¿ancianocunaca leycunata cazushpa autoridadcunapa ñaupajpi denuncianllu? Intindichipai.

 ¹³ Huahuacunata violashcata uyashpaca ¿ancianocunaca leycunata cazushpa denuncianachu can? Ari, denuncianallami can. Huahuacunata violashcata denunciana leycunata charij llactacunapica ancianocunaca chai leycunatami cazun (Rom. 13:1). Ashtahuanbash Jehová Diospa ñaupajpi chai leycunata catina ali cashcamandami shina ruran (Hech. 5:28, 29). Shinaca congregación ucupi huahuacunata violashcata uyashpaca ancianocunaca llactapa leycunata pactachingapaj imata ruranata yachangapami uchalla sucursalman cayana can.

¹⁴ Violai tucushcacunata, violai tucushca huahuapa taitamamacunaman o pi violashcata yachajcunamanga ancianocunaca ninmi, chaitaca denunciai ushanguichimi nishpa. Shinapash congregación ucumanda shuj huauqui o pani huahuata violashcata gentecuna yachaj chayajpica, huahuata violashcata denunciaj huauqui o panica ¿Taita Diospa shutitami nalipi saquishcani nishpachu pensana can? Na, na shina pensanachu can. Ashtahuangarin huahuata violaj huauqui o panimi Taita Diospa shutitaca nalipi saquishca.

15. 1 Timoteo 5:19​pi nishca shinaca ¿imamandata comité judicialta rurangapaj ishcai o ashtahuan testigocuna minishtirin?

 ¹⁵ Congregacionbi ancianocuna comité judicialta rurangapaca ¿imamandata chai juchata  rurashcata yachaj ishcai o ashtahuan testigocunata minishtin? Bibliapi shina yachachishcamandami ishcai testigocunata minishtirin. Shinami huauqui ancianocunaca juchata rurashca huauquita o panitaca comité judicialta ruraita ushan (Deut. 19:15; Mat. 18:16; 1 Timoteo 5:19, liingui). Shinapash huahuata violashcamanda autoridadcunaman denunciangapaca ¿ishcai testigocuna tiachunllu minishtirin? Violashcata autoridadcunaman denunciangapaca ishcai testigocunaca na minishtirinllu. Shinaca huahuata violashcata ancianocuna o pipash uyashpaca denuncianallami can.

16. Congregacionmanda shuj huauquita o panita huahuata violarca nishpa juchachijpica ¿imatata ancianocunaca ruran?

¹⁶ Huahuacunata violashca nishpa congregación ucumanda pitapash juchachijpica ancianocunaca ishcai cosascunatami ruran. Pundapica, huahuacunata violashcata denunciana leycunatami ancianocunaca cazun. Shinallata ancianocunaca Bibliapa yachachishcacunata catishpami imapacha pasashcata yachangapaj ali ali ricun. Ashtahuanbash comité judicialta ruranata o na ruranatapashmi ancianocunaca ricun. Shinapash juchata rurajca yangatami juchachihuajun nijpica ancianocunaca chai juchamanda yachaj testigocunatami uyanga. Chai jucha ciertopacha pasashcata chai ishcai testigocuna ricuchijpillami ancianocunaca comité judicialta rurai ushan. Chai ishcai testigocunamandaca shujca juchata rurajta juchachijmi cana can. Cutin caishuj testigoca ciertopacha ima pasashcata ricushcatami villana can. * Shinapash shujlla testigo tiajpica, paipa nishcacuna llulla cajtaca na pensanachu can. Ashtahuanbash ishcai testigocuna na tiajpipash ancianocunaca, congregación ucupi shuj huauqui o pani jatun juchata rurashpa shuj huauquipanicunata ninanda llaquichishcatami cuenta japin. Llaquichi tucushcata, llaquichi tucushca familiatapashmi ancianocunaca ayudan. Shinallata jatun juchamanda juchachi tucushca huauqui o pani congregacionbi shujcunata ama llaquichichunmi ancianocunaca cuidan (Hech. 20:28).

17, 18. Ancianocunaca ¿imapata comité judicialta rurangapaj tandanajun?

 ¹⁷ Comité judicialta ruraj ancianocunaca ¿imatata rurana can? Huahuacunata violaj huauquita o panita congregacionmanda expulsanata o na expulsanata ricungapami comité judicialta ancianocunaca ruran. Shinapash ancianocunaca comité judicialta rurashpaca huahuacunata violaj huauquita o panita autoridadcuna carcelpi vichachun ricungapaca na canllu. Ancianocunaca autoridadcunapa leycunapica na satirinllu. Ashtahuangarin chai leycunata pactachichunga autoridadcunapa maquipimi saquin (Rom. 13:2-4; Tito 3:1).

¹⁸ Huauqui ancianocuna comité judicialta rurashpaca congregación ucupi tucuicuna espiritualmente ali catichun munaimandami shina ruran. Ancianocunaca Bibliapi imata yachachishcata catishpami juchata ruraj arripintirijta o na arripintirijta ricun. Na arrepintirijpica congregacionmanda expulsanatami ancianocunaca decidin. Shinallata juchata rurajca ñana testigo de Jehová canllu nishpami ancianocunaca congregacionman villan (1 Cor. 5:11-13). Cutin huahuata violaj huauqui o pani tucui shunguhuan arripintirijta ricushpaca ancianocunaca na expulsanllu. Shinapash na expulsashpapash chai huauqui o panica congregacionbi imapash asignacionda, imapash privilegiota o responsabilidadtaca tal vez nunca na chasqui ushanguichu nishpami ancianocunaca paiman villan. Shinallata ancianocunaca huahuacunata juyaimandami paicunata cuidana can. Ancianocunaca ¿imashinata huahuacunataca cuidana can? Huahuacunata charij taitamamacunahuan parlashpami paicunapa huahuacunata chai huauquihuan o chai panihuan ama saquipaichichu nishpa ancianocunaca huahuacunata cuidan. Shinapash taitamamacunahuan chaimanda parlashpaca na tucuicunapa ñaupajpi parlangachu. Ashtahuangarin taitamamacunahuanllami parlanga. Shina parlashpapash picunalla violai tucushcata, violai tucushca huahuapa familiamandapash ancianocunaca na villanachu can.

19, 20. Taitamamacunaca quiquingunapa huahuacunata cuidangapaca ¿imatata ruraita ushapanguichi?

¹⁹ Taitamamacunami huahuacuna imapash ama llaqui apachun ninanda cuidana can. * ¿Imashpata huahuacunataca taitamamacunaca cuidana can? Bibliapica ninmi: “huahuacunataca Mandaj Dios carashcami” can nishpa. Jehová Dios carashcamandami taitamamacunaca paicunapa huahuacunata ali ali cuidana can (Sal. 127:3). Taitamamacunami quiquingunapa huahuacunataca cuidana derechota charipanguichi. Quiquingunapa huahuacuna ama violai tucuchunga ¿imatata rurai ushapanguichi?

²⁰ Punda yuyai, huahuacunata violajcuna imatalla rurajta ali ricupai. Huahuacunata picunalla violajta, imacunahuanlla umachijta yachajupai. Huahuacuna ama llaqui apachun imatalla ruranata ali ali ricupai (Prov. 22:3; 24:3). Shinallata huahuacunata violajcunaca huaquinbica familia ucupuramandallatami can. Huaquinbicarin huahuacunapa ali amigo o ali amigami caita ushan.

21. Cati yuyaipi nishca shinaca ¿imashinata taitamamacunaca huahuacunata cuidai ushapanguichi?

²¹ Cati yuyai, huahuacunahuan parlapaichi (Deut. 6:6, 7). Taitamamacuna huahuacuna imata parlajta ali ali uyapaichi (Sant. 1:19). Huahuacunaca manllaimandami violahuarca nishpaca nipiman na parlangapaj munan. Shinallata ñucataca na crihuangachu yashpami nipiman na villangapaj munan. Violadorcunaca, pimanbash villajpica macashami o imatapash rurasha nishpami huahuacunata manllachin. Chaimi huahuacunaca nipiman na villangapaj munan. Shinaca taitamamacuna, quiquingunapa huahuacuna nalishnalla o llaquilla cajta ricushpaca uchallami quiquingunapa huahuacunahuan parlana capanguichi. Imaguta tapuchishpapash juyaihuan tapuchipaichi. Huahua ña parlai callarijpica na culirashpa ali ali uyapanguichi.

22. Último yuyaipi nishca shinaca ¿imashinata taitamamacunaca huahuacunata cuidai ushapanguichi? (Callari paginapi fotota ricupangui).

²² Último yuyai, huahuacunaman ali ali yachachipaichi. Shuj jarihuan, shuj huarmihuan pacta puñunamandaca taitamamacunaca huahuacunapa edadta ricushpami paicunahuanga parlana capanguichi. Cuerpopa partecunata pipash tacaringapaj munajpi huahuacuna imata ruranata, imata ninatapashmi taitamamacunaca yachachina capanguichi. Shinallata huahuacuna ama llaqui apachun imashina cuidana cashcata Jehová Diospa organización llujshishca publicaciongunata utilizapaichi (“taitamamacuna huahuacunata cuidapaichi” nishca recuadrota ricupangui).

23. a) Testigocunaca huahuacunata violanamandaca ¿imatata yuyan? b) Cati temapica ¿imatata yachajupashun?

²³ Huahuacunata violanaca shuj jatun juchami can. Chaimi testigo de Jehovacunaca chai rurai jatun nali, millanayai cashcata yachapanchi. Jehová Diosta sirvijcunaca Cristopa mandashcata cazushpami causapanchi. Chai mandashcata cazuimandami ñucanchicunaca shuj huauqui o pani shuj huahuata violajpica chai jatun juchata rurajpa ladoca na tucupanchichu. Shinapash huahua cajpi violai tucushcacunataca ¿imashinata ayudai ushapanchi? Cai tapuitaca cati temapimi yachajupashun.