1, 2. Ashtaca huauquipanicunaca ¿ima llaquicunatata chimbapurana tucushca?

APÓSTOL Pabloca Timoteota, shuj huauquipanicunatapash Jehová Diosmanda villachinataca ali pactachichunmi animarca (2 Tim. 4:5). Cai consejotaca tucuicunallatami ali pactachingapaj esforzaripanchi. Shinapash caita pactachinaca na siemprechu fácil can. Ashtaca huauquipanicunapaca Jehová Diosmanda villachinaca shinllimi can (2 Tim. 4:2). Ñucanchipa obrata prohibishca o jarcashca llactacunapica huauquipanicunaca villachishcamanda carcelman churai tucunata yachashpapashmi Jehová Diosmandaca villachishpa catin.

² Testigo de Jehovacunaca shuj shuj llaquicunatami chimbapurana tucushcanchi. Ashtaca huauquipanicunaca paicunapa familiata mantiningapami ashtaca horascunata trabajana can. Fin de semanapi Jehová Diosmanda ashtahuan villachingapaj munashpapash semanapi ashtaca horascunata trabajashcamandami shaijushca sintirin. Cutin shujcunaca na jambirinalla unguita charimanda o mayorllagucuna caimandami Jehovamanda ashtahuan villachingapaj munashpapash na ushan. Cutin huaquingunaca imatapash na rurai ushanichu, imapapash na sirvinichu nishpami pensarin. Shina pensamientocunata ama charingapaj esforzarinami paicunapaca shinlli can. Oriente Medio llactamanda Mary * shuti paniguca: “Nali yuyaicunata ama charingapaj imatata rurasha yashpami pensarini” nin. “Shina pensarijushpallatami jipamanga shaijushca, nali sintirini. Shina pensarijunapa randica, Jehovamanda villachitarapashmi villachina cashcani. Deganami tiempota pirdishcani yashpami cutin nali sintirini” nin.

3. Caipica ¿imatata yachajupashun?

³ Ima llaquicunata charijpipash ñaupaman catichunga Jehová Diosmi ayudanga. Caipica, Jehová Dios apóstol Pablota, Timoteotapash llaquicunata charijpipash ali villaigucunata villachishpa  catichun imashina ayudashcatami yachajupashun. Shinallata ñucanchita imashina ayudajtapashmi ricupashun.

4. Apóstol Pabloca ¿ima llaquicunatata charirca?

⁴ Apóstol Pabloca ashtaca llaquicunatami charirca. Paitaca ninanda macashpami carcelmanbash churarca. Cashna llaquicunata aguantangapaca paica fuerzatami minishtirca (2 Cor. 11:23-25). Huaquinbica nali yuyaicunata mishangapapashmi ninanda esforzarina carca (Rom. 7:18, 19, 24). Apóstol Pabloca shuj nanaita charimandapashmi Bibliapica “ñuca nanaita anchuchipai nishpa” Diostaca “quimsa viajeta mañarcani” nijun (2 Cor. 12:7, 8).

5. Apóstol Pabloca llaquicunata charishpapash ¿imacunatallata rurarca?

⁵ Apóstol Pabloca ashtaca llaquicunatami charirca. Shinapash villachishpa catichunga Jehová Diosmi ayudarca. Jehová Dios ayudashcamanda apóstol Pablo imacunatalla rurashcata yaripashunchi. Pabloca shuj huasipimi Roma llactapica prezo carca. Chaipi cashpaca ali villaigucunataca na manllashpami judiocunata ñaupaman pushajcunaman, autoridadta charij gentecunamanbash villachirca (Hech. 28:17; Filip. 4:21, 22). Shinallata paita cuidajuj guardiaman, paita visitangapaj shamujcunamanbashmi villachirca (Hech. 28:30, 31; Filip. 1:13). Chai tiempocunapillatami Jehová Diosca cartacunata escribingapaca apóstol Pablota utilizarca. Chai cartacunaca chai tiempopi huauquipanicunata ayudashpapash, cunangamanmi ñucanchitaca ayudajun. Pablopa ejemplota ricushpami Roma llactamanda huauquipanicunaca ‘ashtahuan shinlli tucushpa, na manllashpa Diospa Shimitaca cushijushpa’ villanajurca (Filip. 1:14). Apóstol Pabloca pai munashcashna na siempre villachi ushashpapash Jehová Diosmandaca tucui usharishcagutami rurarca. Ashtahuangarin, ñuca causaipi charishca llaquicunaca Jehová Diospa ali villaigucuna mirashpa catichunmi ayudashca nircami (Filip. 1:12).

6. Apóstol Pablotaca 2 Corintios 12:9, 10​pi nishcashnaca villachishpa catichunga ¿imata ayudarca?

⁶ Apóstol Pabloca Jehová Diosmanda imata rurai ushashpapash Jehová Dios ayudajushcamandallami shina rurai ushani nircami. Chaimandami Pabloca ‘imata na rurai ushajujpimi’ Diospa ‘ninan ushaica’ ñucanchitaca ayudajun nishpa escribirca (2 Corintios 12:9, * 10​ta liipangui). Jehová Diosca apóstol Pablo villachishpa catichunga paipa espíritu santota cushpami ayudarca. Chaimandami llaquicunata, problemacunata charishpapash, carcelpi churai tucushpapash Jehová Diosmandaca villachishpa catirca.

7. Jehová Diosta sirvishpa catingapaca Timoteoca ¿ima llaquicunatata mishana carca?

 ⁷ Jehová Diosca Timoteotapashmi paimanda villachishpa catichunga ayudarca. Timoteoca apóstol Pablo shuj shuj llactacunapi villachingapaj rijpimi cumbashpa rirca. Shinallata Pabloca Timoteotaca huaquin viajecunatami shuj shuj congregaciongunapi huauquipanicunata visitachun cacharca (1 Cor. 4:17). Caicunata pactachinaca Timoteopaca shinllimi ricurishcanga. Caita ricushpami Pabloca Timoteotaca “pipash candaca, chairalla viñai cajpilla nalicachinman” nishcanga (1 Tim. 4:12). Shinallata chai tiempopica Timoteopashmi cuerpopica shuj nanaita charirca. Bibliapica Timoteo cada rato irquiyan cashcatami ricuchin (1 Tim. 5:23). Shinapash, Timoteoca Jehová Diosmanda villachingapaj, huauquipanicunata ayudangapaj Jehová Diosllata paipa espíritu santota cushpa ayudanataca seguromi carca (2 Tim. 1:7).

8. Jehová Diosca cunan punllacunapica ¿imashinata ñucanchitaca ayudajun?

⁸ Cunan punllacunapica, Jehová Diosmi ñucanchicunamanga ninan ushaita cushpa, paita sirvishpa catichun ayudajun (2 Cor. 4:7). Chaipaca Jehová Diosca 4 ayudacunatami cushca: 1) mañaita, 2) Bibliata, 3) huauquipanicunata, 4) villachinata.

9. Jehová Diosta mañanaca ¿imashinata ñucanchitaca ayudan?

⁹ Mañaita. Efesios 6:18​pica apóstol Pabloca, Jehová ‘Diostaca na samashpami tucuipi mañana canguichi’ nircami. Shina rurajpica Jehová Diosca ñucanchitaca ayudangami. Bolivia llactapi causaj Jonnie huauquiguca llaquicunahuan cajpi Jehová Dios ayudashcatami nin. Paipa taitacunapash, paipa huarmigupash quimsandimi shuj viajepilla irquiyashca nin. Quimsandita cuidanaca cai huauquigupaca shinllimi ricurirca. Paipa mamita huañushca jipaca, paipa huarmigu, paipa taitapash ashtaca tiempo jiparami asha asha ali tucushpa rishca. Jonnie huauquiguca ninmi: “Cashna llaquicunahuan ñana ushanshna sintirishpami caicunapipacha ayudahuai nishpa Jehová Diostaca mañan carcani” nin. Cai huauquigutaca llaquicunata aguantashpa catichunga Jehová Diosmi ayudarca. Chai llactamandallata Ronald shuti shuj anciano huauquigupashmi paipa mamita cancerhuan cashcata yachaj chayarca. Chai punllamanda shuj quilla jipallami paipa mamitaca huañurca. Cai huauquigutaca ñaupaman catichunga ¿imata ayudarca? Paica ninmi: “Jehová Diosman ñuca imashina sintirishcata villanami ninanda ayudahuarca. Ñucallata imashina sintirijushcata na atinajujpipash Jehovami intindihuarca” nin. Huaquinbica yapata problemacunahuan, llaquicunahuan cashcamandami Jehová Diosta mañashpaca imata ninatapash talvez na atinapanchi. Shina cajpipashmi Jehová Diosca paita mañachun, paihuan parlachun invitajun (Rom. 8:26, 27).

10. Hebreos 4:12​pi nishcashnaca ¿imamandata Bibliata liina, liishcapipash pensarinaca minishtirishca can?

¹⁰ Bibliata. Apóstol Pabloshnallatami ñucanchicunapash aguantashpa catingapaca Bibliata liina capanchi (Rom. 15:4). Bibliapi imatapash liijujpimi, Jehová Diosca paipa espíritu santota utilizashpa chai liijushca texto ñucanchi causaipi imashina ayudai ushashcata cuenta japichun ayudanga (Hebreos 4:12​ta liipangui). Párrafo 9​pi parlashca huauqui Ronaldca: “Cada tuta Bibliata liinami Jehová Dios imashina cashcata, imashina cuidajushcata, ñucanchita juyashcata cuenta japichun ayudahuashca” ninmi. “Chaita yachanami llaquicunata charishpapash aguantashpa catichun ayudahuashca. Chaimi Bibliata liina costumbreta charishcamandaca ninanda cushijupani” nin.

11. ¿Imashinata Bibliapi liishcacunaca shuj panigutaca ayudarca?

¹¹ Bibliata liina, liishcapi pensarinami ñucanchicuna llaquicunahuan cashpa ama yapata preocuparijuchun ayudanga. Shuj paniguca paipa cusagu huañushcamandami ninandapacha llaquirishca carca. Chaimi shuj anciano huauquiguca  chai panigutaca, Job librota liinami quiquindaca ashtacata ayudanga nirca. Cai panigu Job librota liishca jipaca: “Jobca paipa llaquicunapilla pensarijuimandami shinacunatara nijun” nishpami pensarca. Chaita nishca jipallami paipash Jobshnallata paipa llaquicunapilla pensarijushcata cuenta japirca. Chaimi paitaca paipa cusagu huañushcamanda ama yapatapacha llaquirijuchun ayudarca.

12. Ñucanchita ayudangapaca Jehová Diosca ¿imashinata huauquipanicunataca utilizan?

¹² Huauquipanicunata. Ñucanchicuna llaquicunata, problemacunata charishpapash aguantashpa catichunga Jehová Diosca ñucanchi huauquipanicunatami cushca. Apóstol Pabloca, randimanda animaringapami huauquipanicunataca ricungapaj munani nirca (Rom. 1:11, 12). Párrafo 2​pi parlashca Mary paniguca shuj huauquipanicunahuan tiempoguta yalinatami ninanda gushtan. Paica ninmi: “Jehová Diosmi ñucataca turiñañagucunata utilizashpa ayudahuashca. Turiñañagucunaca ali shimigucunata nishpa o imapash tarjetaguta carashpami ñucataca animahuashca. Shinallata ñucashnallata sintirishca ñañagucunahuan parlana, paicunapa experienciacunami ñucataca ashtacata ayudahuashca. Ancianocunapashmi congregacionbi tucuicunallata ñucata juyashcata intindichunbash ayudahuashca” nin.

13. Tandanajuicunapica ¿imashinata caishujmanda chaishujmanda animarita ushapanchi?

¹³ Ñucanchi tandanajuicunapimi ñucanchi huauquipanicunataca ashtahuanbachaca animaita ushapanchi. Tandanajuicunapi cashpaca ñucanchi tucui huauquipanicunata juyashcata, paicunapa tucui rurashcacuna valishca cashcatami ricuna capanchi. Shinallata paicuna imaguta ruranajujpipash agradicinami capanchi. Shuj tandanajuipica, Peter shuti shuj anciano huauquica na Testigo cusata charij shuj panigutaca: “Quiquinba sujta huahuacuna tandanajuicunapi alipacha comentajta uyashpa, ali mudarishcagucuna cajta ricushpaca ninandapachami cushijunchi. Alitami rurajupangui panigu” nishpami felicitarca. Shina nijpimi chai paniguca viqui muyushpa cashna nirca: “Pagui turigu chaita uyanatami ninanda minishtijuparcani” nishpa.

14. Diospa Reinomanda villachinaca ¿imashinata ñucanchitaca ayudan?

¹⁴ Villachinata. Gentecuna uyangapaj munajpi na munajpipashmi villachipanchi. Porque villachinami ñucanchicunataca cushilla sintirichun ayudan (Prov. 11:25). Cai shimicuna cabalpacha cashcatami Stacy shuti paniguca paipa causaipica ricushca. Paipa shuj familiarta expulsajpica paica ninandami llaquirirca. Chaimi paica ¿imashpashi paitaca na ashtahuan ayudarcani? nishpami cutin cutin tapurin carca. Shinapash paitaca ñaupaman catichunga, Diospa Reinomanda villachinami ninanda ayudarca. Paica villachingapaj llujshishpami gentecunata ayudashpaca cushilla sintirin carca. Paica ninmi: “Chai tiempopica Jehová Diosca shuj ali estudiogutami cuhuarca. Chai estudioca ñapashmi Jehovamanda imata yachajushcata paipa causaipi pactachi callarirca. Chaita ricushpami ninandapacha animarircani. Ñucataca cushilla ali sintirichunga villachingapaj llujshinami ayudahuashca” ninmi.

15. Panigu Marypa experienciamandaca ¿imatata yachajupanchi?

¹⁵ Huaquinbica llaquicunahuan cashcamandami ñucanchi munashcashnaca Jehová Diosmandaca na villachi ushapanchi. Shinapash ñucanchicuna tucui usharishcaguta rurajpica, Jehová Diosca cushijushpami ricunga. Ñaja parrafopi parlashca Mary panigumanda yaripashunchi. Paica shuj shimita parlaj congregacionman yalishpaca imapipash na ayudajuj shinami sintirirca. Paica: “Asha tiempotaca congregacionbica shuj comentariotalla o Bibliamanda shuj versogutallami liin carcani. Villachinapipash shuj tratadogutallami saquin carcani” ninmi. Chai shimita parlaj huauquipanicunahuan ricujpica, imatapash na rurajujshnami sintirirca. Shinapash ama shina pensangapami esforzarirca. Paica shuj shimita nali yachajpipash Jehová Dios paita sirvichun utilizashcatami cuenta japirca. Paica ninmi: “Ñucanchicuna shuj shimita nali yachajpipash  Bibliapa yachachishcacunaca fácil, intindirinallami can. Cai yachachishcacunami gentecunapa causaita cambiachun ayudan” ninmi.

16. Huasimanda na llujshi ushajcunataca aguantashpa catichunga ¿imata ayudanga?

¹⁶ Villachingapaj huasimanda na llujshi ushajpipashmi Jehová Diosca ñucanchicuna villachingapaj munajushcataca ali yachan. Jehová Diosca villachingapaj imapash oportunidadcuna ricurichunmi ayudaita ushan. Por ejemplo, ñucanchita cuidajuj gentecunaman o doctorcunamanbashmi villachi ushapanchi. Pundacunapi ashtaca horascunata villachishcacunahuan, cunanbi ashalla horasguta villachishcacunahuan comparashpa ricushpaca llaquillami sintiripashun. Shinapash cunangunapi Jehová Dios ñucanchita imashina ayudajujta ricunami, llaquicunata problemacunata charijpipash shinlli tucushpa ñaupaman catichun ayudanga.

17. Eclesiastés 11:6​pi nishcashnaca ¿imamandata villachishpa catina capanchi?

¹⁷ Jehová Diosmanda villachinataca na shaijushpami villachina capanchi. Picuna Diospa Shimita ali chasquinataca na yachapanchichu (Eclesiastés 11:6​ta liipangui). 80 huatacunata charij Barbara shuti paniguca telefonopi, shinallata cartacunata rurashpapashmi villachin. Shuj cartapica, “Quiquinda juyaimandaca ¿imatata Taita Diosca rurashca?” nishca revistatami churashpa cacharca. Cai Villajun revistaca 1 de marzo de 2014​pimi llujshirca. Cai cartataca pundacuna testigo de Jehová cashca shuj cusahuarmimi chasquishcarca. Paicunami cai revistataca cutin cutin liishcarca. Cusaca Jehová Diospacha chai shimicunata nijushcatashnami sintirca. Chai jipallami ishcandicunallata tandanajuicunaman cutin ri callarirca. 27 huatacuna jipami paicunaca cutin Jehovapa organizacionman tigrarca. Chaita uyashpaca ¿imashinashi Barbara paniguca sintirishcanga? Paicunaca shuj cartaguta chasquimandami cutin Jehovapa organizacionmanga tigrai usharca.

18. Jehová Dios ñucanchita ayudachunga ¿imatata rurana capanchi?

¹⁸ Llaquicunata, problemacunata aguantachunga Jehová Diosca huaquin ayudacunatami cushca. Paica, paita mañana oportunidadta, Bibliata, huauquipanicunata, Jehová Diosmanda villachinatapashmi ñucanchimanga cushca. Cai ayudacunata ali aprovechashpaca Jehová Diospi confiashcata, pai ñucanchita ayudai ushashcapi crishcatapashmi ricuchipanchi. Chaimandami, ñucanchicunaca tucui shunguhuan Jehová Diospi confiashpa catina capanchi. Paica “ima pandatapash na yarij shunguhuan paita cazujcunaman alita rurashpa, paipa tucui ushaita ricuchingapajmi, tucui cai pachata ricuriajun” (2 Crón. 16:9).