1, 2. a) Gentecunapa causaimanda estudiashca shuj jarica ¿imatata nirca? b) Cunanga ¿imatata yachajupashun?

CUNANBI ashtaca gentecunaca Jesuspi crinchi nishpapash paipa yachachishcacunataca na pactachinllu (2 Tim. 4:3, 4). Gentecunapa causaimanda estudiashca shuj jarica shuj libropica: “Cunan punllacunapipash Jesús cutin cai alpapi cashpa yachachijujpipash, punda tiempopishnallatami gentecunaca Jesuspica na crinman” nircami.

² Jesús cai alpapi cajpica ashtaca gentecunaca Jesús imata yachachishcata, tauca milagrocunata rurajtapashmi ricurca. Shinapashmi Jesuspica na cringapaj munarca. Chaishuj temapica imamanda na cringapaj munashcatami 4 yuyaicunapi yachajuparcanchi. Cunanga cutin shuj 4 yuyaicunatami ricupashun. Shinallata imamanda cunan tiempocunapi Jesusta ali catijcunata gentecuna na uyangapaj munashcatapashmi ricupashun. Ama pandachi tucungapaj imata rurana cashcatapashmi yachajupashun.

3. ¿Imamandata tauca gentecunaca Jesuspica na crirca?

³ Jesús cai alpapi cashpaca autoridadta charijcunahuan, charij charij gentecunahuan, pobre pobre gentegucunahuanbashmi llevarin carca. Ashtaca gentecunaca huaquin gentecunataca, “paicunaca juchayucunapachami can” nishpami riman carca. Shinapash Jesusca paicunatapashmi llaquishpa, juyaihuan tratan carca. Huaquin gentecunaca jariyashcacuna caimandami Jesús chaita rurajta ricushpaca Jesuspica na crinajurca. Paicunaca Jesuspa discipulocunataca cashna nishpami tapurca: “¿Imashpata impuestota japishpa causajcunahuan, juchayu runacunahuan micushpa, ufiashpa tianajunguichi?” nishpa. Chaimi Jesusca paicunataca: ‘Nanaita na charijcunaca, jambij runataca na mascanllu. Huañunajuj gentecunallami, jambijtaca mascan. [Alita] rurajcunata cayangapaca, na shamurcanichu. Ashtahuangarin juchayu gentecuna ninanda  llaquirishpa Diospaman tigrarichun cayangapami shamurcani’ nirca (Luc. 5:29-32).

4. Profeta Isaías nishcashnaca judiocunaca ¿imatata Mesiasmandaca yachashcanga?

⁴ Bibliapica ¿imatata nin? Mesías cai alpaman nara shamujpillatami profeta Isaiasca, gentecunaca Mesiastaca na chasquingachu nishpa villarca. Paica nircami: “Gentepurapica, na ricunayachi tucushca, yangapi churai tucushcami carca [...]. Ñavita shujman churanshna, na ricunayachishpami fiñarcanchi. Paitaca, yangapi churashpami na ricunayachircanchi” nishpa (Is. 53:3). Cai profeciapi nishcashnaca Mesiasca ‘gentepurapica na ricunayachi tucushcami’ cana carca. Shinaca Jesuspa tiempopi causashca judiocunaca Mesías na ricunayachi tucushca canataca yachashcangami.

5. Jesuspa ali catijcunamandaca ¿imatata shuj gentecunaca yuyan?

⁵ ¿Cunanbipashchu chashnallata pasajun? Ari. Religionda ñaupaman pushajcunaca estudiashca, charij gentecunataca ninanda alicachishpami paicunapa iglesiacunapica chasquin. Paicuna Bibliapa mandashcacunata na pactachishpa causajpipashmi ninanda respetan. Cutin Jehová Diosta sirvijcunaca Jehová mandashca shinami causanchi. Shina causajpipashmi shuj religionda ñaupaman pushajcunaca ñucanchicunataca ninanda nalicachishpa ricun. Chaita ricushpami ñucanchicunaca apóstol Pablo nishcashna, Jehová Diosca cai pachapi yangapi churai tucushcacunatara agllashcata cuenta japipanchi (1 Cor. 1:26-29). Shinapash Jehová Diospa ñaupapica tucui paita sirvijcunami valishcapacha capanchi.

6. a) Mateo 11:25, 26​pica ¿imatata Jesusca nirca? b) ¿Imashinata Jesuspa ejemplota cati ushapanchi?

⁶ ¿Imata ama pandachi tucuchunga ayudanga? (Mateo 11:25, 26​ta liipangui). Testigo de Jehovacunata shujcuna nalicachishpa ricujpipash ñucanchicunaca na desanimarinachu capanchi. Jehová Diosca paipa munaita pactachingapaca humilde gentecunatami utilizan. Chaitaca siempremi yarina capanchi (Sal. 138:6). Canllamanda gentecuna Testigocunata nalicachishpa ricujpipash, Jehová Diosca ñucanchicunata utilizashpami ashtaca ashtaca cosascunata rurashca.

7. a) Jesusca fariseocunataca ¿imamandata mishqui shimi, jayaj shungucunami canguichi nirca? b) Shina nijpica paicunaca ¿imatata rurarca?

⁷ Judiocunata ñaupaman pushajcunataca pandacunata yachachishcamandami Jesusca na manllashpa rimarca. Jesusca fariseocunataca mishqui shimi, jayaj shungucunami canguichi nircami. Paicunaca taitacunata cuidanapa randica, maquicunata maillanatarami preocuparin carca (Mat. 15:1-11). Jesús chashna nijpica paipa discipulocunaca manllarishpami cashna nirca: “Can chashna villajujpica, fariseocunaca ninandami fiñarirca. Chaitaca, ¿nachu yacharcangui?” ninajurcami. Shina nijpimi Jesusca: “Jahua pachapi tiajuj ñuca Taita na tarpushca yuracunataca, tucuillatami sapimanda llujchishpa shitanga. Chai fariseocunataca, upalla saquichilla. Paicunaca, shuj ñausa runata ñausallata pushashpa rijunshnami purinajun. Shuj ñausa runata shuj ñausa pushashpa rijushpaca, ishcandimi utujupi huashajunga” nircami (Mat. 15:12-14). Judiocunata ñaupaman pushajcuna Jesushuan culirajpipash, Jesusca paicunataca na manllashpami rimarcalla.

8. Tucui religiongunata Dios na chasquishcataca ¿imashinata Jesusca ricuchirca?

⁸ Jesusca chai tiempopi judiocunata ñaupaman pushajcuna pandacunata yachachijushcatami ricuchirca. Chaimandami Taita Diosca tucui religiongunata na chasquij cashcatapash ricuchirca. Jesusca ashtacacunami ancho ñanda rishpa huañuiman chayanga. Cutin ashacunallami quichiji ñanda tarishpa causaita causaiman ringa nircami (Mat. 7:13, 14). Jesusca ashtacacunami Diosta sirvinchi nishpapash, Diosta nali sirvinajunga nircami. Chaimi Jesusca cashna nishpa advirtirca: “Llullashpa villanajuj profetacunamandaca, cuidarinami canguichi. Paicunaca, llamagushna ali  ricurishpapash, shungu ucupica shuhuanata yachaj millai atujcunashnami. Ima cajpipash grano fucunshna cajta ricushpami rijsinguichi” nircami (Mat. 7:15-20).

9. Jesusca ¿judiocunapa maijan yachachishcacunata llulla cashcata ricuchirca?

⁹ Bibliapica ¿imatata nin? Shuj profeciapica Jesusca, Jehovapa huasita ninandapacha juyashcatami ricuchinga nijurcami (Sal. 69:9; Juan 2:14-17). Chaimandami Jesusca judiocunata ñaupaman pushajcuna pandacunata yachachijushcataca na manllashpa rimarcalla. Fariseocunaca, “huañushca jipaca almaca causashpa catinmi” nishpami yachachin carca. Shinapash Jesusca, “huañushcacunaca ni maipipash ñana canllu, samanajunmi” nishpami yachachirca (Juan 11:11). Saduceo gentecunaca, gentecuna huañushpa causarinataca na crinllu carca. Shinapash Jesusca paipa amigo Lazarotaca causachircami (Juan 11:43, 44; Hech. 23:8). Fariseocunaca imapash pasajpica “destinomi cashcanga” o “Diosmi shina pasachun munashcanga” nishpami yachachin carca. Shinapash Jesusca, “gentecunaca cada unomi Diosta sirvinata o na sirvinatapash agllaita ushan” nishpami yachachirca (Mat. 11:28).

10. Ashtaca gentecunaca ¿imamandata ñucanchi yachachishcacunataca nalicachishpa uyan?

¹⁰ ¿Cunanbipashchu chashnallata pasajun? Ari. Ñucanchicunaca, religionda ñaupaman pushajcunaca pandacunatami yachachishca nishpami gentecunamanga Bibliahuan ricuchipanchi. Chaimi taucacunaca nalicachishpa uyan. Religionda ñaupaman pushajcunaca, “Taita Diosca nali gentecunataca castigashpami infiernoman cachan” nishpami yachachin. Shinami paicunataca manllachishpa charin. Shinapash Jehovata sirvijcunaca cai yachachishcaca panda cashcatami Bibliapi ricuchishpa ali yachachipanchi. Shuj religiongunaca, “huañushca jipaca almaca causashpa catinmi” ninmi. Chai cierto cashpaca gentecuna huañushpa cutin causarinaca na minishtirinmanllu. Shinapash ñucanchicunaca Bibliapi ricuchishpami, huañushca jipaca almaca na causashpa catinllu nishpa yachachipanchi. Shinallata shuj religiongunaca, “nacirishca punllamandami imapapash ña destinashca nacirinchi” ninmi. Shinapash chaica na ciertochu can. Ñucanchicunaca cada unomi Diosta sirvinata o na sirvinata decidita ushapanchi. Cashna panda yachachishcacunata Bibliahuan “na ciertochu can”  nishpa yachachijpimi, religionda ñaupaman pushajcunaca ñucanchitaca culirashpa ricun.

11. Juan 8:45-47​pi nishcashnaca Jehová Diosca paipa sirvijcuna ¿imata rurachunda munan?

¹¹ ¿Imata ama pandachi tucuchunga ayudanga? Jehovapa mandashcacunata alicachishpaca, chai mandashcacunataca crishpa, cazunami capanchi (Juan 8:45-47​ta liipangui). Ñucanchica na Diabloshna cangapaj munapanchichu. Ñucanchicunaca Bibliapi yachachishcacunatami siempre cazungapaj munapanchi (Juan 8:44). Jehová Diosca ñucanchicuna Jesuspa ejemplota catichunmi munan. Chaimandami: “Nalita ruranataca, na ricunayachishpa, alita ruranata catinguichi” nin (Rom. 12:9; Heb. 1:9).

12. Jesús imashina huañushcata ricushpaca ¿imashpata ashtaca judiocunaca na crirca?

¹² Judiocunaca ¿imamandata Jesuspica na crirca? Apóstol Pabloca: “Ñucanchicunaca, Cristoca shuj jatun racu caspipi huañuchi tucushcatami villachinchi. Pero judiocunaca chai villashcacunata chasquingapaca nimamanda na munanllu” nircami (1 Cor. 1:23, TNM ). Judiocunaca ¿imamandata Jesús Mesías cashcataca na crirca? Paicunaca Jesús shuj racu caspipi shuhuashna o shuj juchayu runashna huañushcamandami Jesús Mesías cashcataca na crirca (Deut. 21:22, 23).

13. Judiocunaca ¿imata na cringapaj munaimandata Jesustaca yangamanda juchachishpa huañuchirca?

¹³ Jesús Mesías cashcata na cringapaj munaj judiocunaca Jesús inocente cashcata ali yachashpatami Jesusmandaca llullacunata nishpa, yangamanda juchachishpa shuj juicioman aparca. Juiciopica Jesustaca yangatami paicuna munashcashna juzgarca. Jesustaca judiocunata mandajpuracuna tandanajushpami leycunatapash na respetashpa yangata juzgarca (Luc. 22:54; Juan 18:24). Jesús ima nishcata uyashpa ciertopacha culpable o na culpable cashcata ali yachanapa randica, Jesusta huañuchingapaj munaimandami “llullashpa villajcunata mascanajurca”. Jesusmanda llullashpa villaj testigocunapa nishcacunapash na sirvijpimi sumo sacerdoteca Jesusta yangamanda juchachingapaj munaimanda imatapash nichun atichijurca. Chai tiempopi juiciocunata na shina rurana cajpipashmi shina rurarca (Mat. 26:59; Mar. 14:55-64). Jesús huañushpa causarishca jipapashmi, cai juezcunaca romano  soldadocunamanga llashajlla plata ‘culquicunata’ pagashpa Jesuspa pambashca pushtuta cuidachun, shinallata Jesuspa pambashca pushtu chushaj cajpipash imamanda chushaj cashcata llullashpa villachun pagarca (Mat. 28:11-15).

14. Mesías huañunamandaca Bibliapica ¿imatata nijurca?

¹⁴ Bibliapica ¿imatata nin? Ashtaca judío gentecunaca Mesías huañunataca na shuyanajurcachu. Shinapash Bibliapica ñami caita nijurca, paica huañuchi tucungacamanmi llaquichi tucunga. Ashtacacunapaj juchata apashpa, na cazujcunamandapash Diosta mañashpami juchayucunamandaca huañunga nishpa (Is. 53:12). Shinaca Jesús shuj shuhuashna o shuj juchayuj genteshna huañushcamandaca judío gentecunaca Jesusca na Mesiaschu can nitaca na usharcachu.

15. Testigo de Jehovacunamanda ¿ima llullacunata nishcamandata ashtacacunaca Testigocunapica na crishca?

¹⁵ ¿Cunanbipashchu chashnallata pasajun? Ari. Cai tiempopipashmi Jesustashnallata testigo de Jehovacunataca yangamanda juchachishpa prezo cachanajushca. Estados Unidospica testigo de Jehovacunaca Jehová Diosta libre adorangapaj munaimandami huata 1930, 1940cunapica tribunalcunaman cutin cutin rina tucurcanchi. Chai juiciocunapica huaquin juezcunaca Testigocunata na ricunayachishcatami ricuchirca. Canadá llactapica iglesia Catolicapash, gobiernopash ñucanchicuna ama villachishpa catichunmi ñucanchipa obrata jarcangapaj tandanajushpa parlarirca. Ashtaca publicadorcunatapash Diospa Reinomanda villachishcamandallami prezo churarca. Alemania llactapi Hittler mandajushca tiempopica, ashtaca joven Testigocunatami huañuchirca. Cai último huatacunapica Rusia llactapica ashtaca huauquipanicunatami Bibliamanda villachishcamandalla carcelpi churashca. Paicunaca, “gobiernopa contracunami tucunajun” nishpa juchachishpami chashna rurashca. Ruso shimipi Traducción del Nuevo Mundo de las Santas Escrituras Bibliatapashmi, Jehová shutita charishcamandalla Bibliatapash prohibishca.

16. Testigocunamanda imapash llullacunata nijujpica ¿imamandata 1 Juan 4:1​pi nishcashnaca na crina capanchi?

¹⁶ ¿Imata ama pandachi tucuchunga ayudanga? Chaipaca ima pasashcacunatami ali ali yachana capanchi. Mateo capítulo 5​manda, 7​caman parlashca shimicunapica Jesusca paipa catijcunamandaca ‘imatapash llullashpa nalicachishpami’ rimanga nircami (Mat. 5:11). Cai llullacunaca Satanasmandami shamun. Paica ñucanchipa contracuna ñucanchimanda llullacunata nishpa parlachunmi imacunatapash rurajun (Apoc. 12:9, 10). Cashna llullacunataca na crinachu capanchi. Chaipa randica Jehovapi tucui shunguhuan cringapami esforzarina capanchi (1 Juan 4:1​ta liipangui).

17. Jesús nara huañujpillata paipa apostolcuna imata rurashcata yachashpaca ¿imatata shuj gentecunaca ninman carca?

¹⁷ Jesús huañuna tutapica Jesuspa 12 apostolcunaca, shujca quimsa viajetami “Jesustaca na rijsinichu” nirca. Shujcarin traicionaitarami traicionarca. Tucuicunallatami chai tutapipacha Jesustalla saquishpa rirca (Mat. 26:14-16, 47, 56, 75). Caita ricushpapash Jesusca na manllarircachu. Porque cai pasanataca paillatami ña nishca carca (Juan 6:64; 13:21, 26, 38; 16:32). Jesuspa apostolcuna imata rurashcata pipash yachaj chayashpaca caitami nita ushanman carca: “Paicunaca Jesuspa apostolcuna cangapami paitalla saquirca. Shinaca ¿imashpata ñucaca Jesuspa catij tucuna caniyari?” nishpa.

18. Jesús huañuna punllapica ¿Bibliapa maijan profeciacunata pactarirca?

¹⁸ Bibliapica ¿imatata nin? Bibliapica Jesús ashtaca huatacunata cai alpaman nara shamujpillatami, Mesiastaca ‘quimsa chunga culquipami’ traicionanga nishpa villajurca (Zac. 11:12, 13). Paita traicionajca shuj amigomi canga nijurcami (Sal. 41:9). Shinallata Zacarías libropipashmi: ‘Llamacunata michijta chugrichijpimi, llamacunaca  caita chaita rinajunga’ nirca (Zac. 13:7). Cai tucui cosascuna pasajpipash ali shunguta charij gentecunaca Jesuspi cai profeciacuna pactarijta ricushpaca Jesusmanda caruyanapa randica, Jesús Mesías cashcata crishpami tucui shungu catina carca.

19. Ali shunguta charij gentecunaca ¿imatata ali yachan?

¹⁹ ¿Cunanbipashchu chashnallata pasajun? Ari. Cunan punllacunapipash huaquin rijsishca testigo de Jehovacunaca Bibliapa yachachishcacunata saquishpami paicunaca yanga yachachishcacunata crishpa Jehovamanda caruyashca. Shinapash paicunaca shujcuna paicunashnallata Jehová Diosmanda caruyachunmi huaquinbica Internetpi, telepi, radiopi testigo de Jehovacunamanda imapash llullacunata nishca. Shinapash ali shunguta charij gentecunaca cai llullacunataca na crinllu. Paicunaca cunan punllacunapi cashna llullacunata nij gentecuna tianata Bibliapi yachajushcamandami na crin (Mat. 24:24; 2 Ped. 2:18-22).

20. Jehová Diosmanda caruyashcacuna llullacunata nijpipash paicunata ama crichunga ¿imata ayudanga? (2 Timoteo 4:4, 5).

²⁰ ¿Imata ama pandachi tucuchunga ayudanga? Ñucanchicunaca Bibliatami ali ali yachajushpa catina capanchi. Shinallata Jehová Diostaca cutin cutinmi mañana capanchi. Diospa Reinomanda Jehová villachichun mingashcatapashmi siempre pactachina capanchi (2 Timoteo 4:4, 5​ta liipangui). Jehovapa yachachishcacunapi tucui shunguhuan crishpaca testigo de Jehovacunamanda imapash llullacunata nijpica na manllarishpa uyashunllu (Is. 28:16). Jehová Diosta, Bibliapa yachachishcacunata, huauquipanicunata juyanami Jehová Diosta saquishcacuna ñucanchita ama umachichun ayudanga.

21. Cunanbi ashtaca gentecuna Bibliapa yachachishcacunata na uyangapaj munajpipash ñucanchicunaca ¿imatata seguro capanchi?

²¹ Jesuspa tiempopica ashtacacunami Jesús Mesías cashcataca na crirca. Shinapash ashtacacunaca Jesuspica crircami. Paicunapurapica Sanedrinmanda huaquin sacerdotecunapashmi Jesuspica crirca (Hech. 6:7; Mat. 27:57-60; Mar. 15:43). Cunan punllacunapipash ashtaca millón gentecunami Jesusta catinata decidishca. ¿Imamandata shina rurashca? Paicunaca Bibliamanda yachajushpa, Bibliapi nishcacunata juyaimandami Jesusta catinataca decidishca. Bibliapica: “Can mandashcata juyajcunaca, casilla ali causaitami charin. Paicunapaca, imapi nitijanapash na tianllu” nijunmi (Sal. 119:165).