1. Bibliapi yachajushcacunata shujcunaman parlajpica ¿imata pasaita ushan?

BIBLIAMANDA primera vez yachajushpaca seguromi cushijupashcangui. Bibliata intindina fácil fácil cashcata cuenta japishpami quiquinba familiacunaman, amigocunamanbash quiquin yachajujushcataca cushijushpa parlapariangui. Paicuna Bibliamanda yachajushpa cunanbillata jipa punllacunapipash cushilla causaita charita ushanata yachashpami paicunamanga parlapariangui (Sal. 119:105). Shinapash taucacuna quiquin munashcashnaca na uyajpimi llaquilla sintiripariangui.

2, 3. Tauca gentecunaca Jesusmanda, paipa yachachishcacunamandapash ¿imatata yuyarca?

² Ñucanchicuna villachinajujpi shujcuna na gushtashpa uyajpica na manllarinachu capanchi. Jesustapashmi shina pasarca. Jesús cai alpapi cashpaca tauca milagrocunatami rurarca. Cai milagrocunataca Taita Diospa ayudahuan rurashcataca cuenta japinallami carca. Shinapashmi tauca gentecunaca Jesuspica na crirca. Por ejemplo, Lázaro runaguta causachijpica judiocunata ñaupaman pushajcunaca Jesús Mesías cashcataca napacha cringapaj munarcachu. Ashtahuangarin Jesusta, Lazarotapash huañuchingapami munanajurca (Juan 11:47, 48, 53; 12:9-11).

³ Jesusca taucacuna pai Mesías cashcata na crinataca alimi yacharca (Juan 5:39-44). Bautizaj Juanba huaquin catijcunataca Jesusca: “Ñucata crinata na saquishpa na pandajcunaca, ninandami cushijun” nircami (Mat. 11:2, 3, 6). Tauca gentecunaca ¿imamandata na Jesuspica cringapaj munarca?

4. Caipica ¿imatata yachajupashun?

⁴ Cai temapi, cati temapipash Jesús cai alpapi cajpi gentecuna imamanda Jesuspi na crishcata, shinallata ñucanchicuna villachijpi imamanda na uyangapaj munajtapashmi yachajupashun. Ashtahuanbachaca Jesuspi tucui shunguhuan cringapaj, ñucanchicuna  ama pandachi tucungapaj imata rurana cashcatami yachajupashun.

5. ¿Imamandata huaquin gentecunaca, “Jesusca na Mesiaschu can” nishpa pensarca?

⁵ Ashtaca gentecunaca Jesús maimanda cajta, pipa familiamanda cajta na ali yachaimandami Jesús Mesías cashcataca na crirca. Taucacunaca alipacha yachachij cajta, tauca milagrocunata rurajta ricushpapashmi shuj carpinteropa churillami can nin carca. Shinallata Jesusca Nazaret llactamandami carca. Taucacunaca Nazaret llactataca shuj yanga llactatashnami ricun carca. Jesuspa discípulo Natanaelpashmi shuj viajeca: “Nazaret pueblomandaca, ¿ima alipash Ilujshingachu?” nircami (Juan 1:46). ¿Imamandashi shina nirca? Paica, Nazaret llactataca shuj yanga llactatashna ricuimandami shina nishcanga. Na cashpaca Miqueas 5:2​pi profeciata yarimandami shina nishcanga. Chaipica Mesiasca Belén llactapi nacirinatami villajurca, na Nazaret llactapica.

6. Jesús Mesías cashcata cringapaca ¿imatata Jesuspa contracunaca rurana carca?

⁶ Bibliapica ¿imatata nin? Profeta Isaiasca Jesuspa contracunamanda parlashpaca, paicunaca Jesús “maijan familiamanda shamushcatapash” na yachangapaj munangachu nircami (Is. 53:8, TNM ). Jesusmanda ashtaca informaciongunaca, profeciacunapimi ña escribishca tiajurca. Jesuspa contracuna profeciacunata liingapaj esforzarishpaca Jesús, Belén llactapi nacirishcata, rey Davidpa mirai cashcatapash cuenta japinallami carca (Luc. 2:4-7). Miqueas 5:2​pi nishcashnami Jesusca Belenbi nacirirca. Shinaca ¿imamandata shujcunaca Jesuspica na crirca? Paicunaca na tucui informaciongunata investigaimandami pandacunata yuyai callarirca. Chaimi Jesús Mesías cashcataca na cri ushanajurca.

7. ¿Imamandata tauca gentecunaca Testigocunataca na chasquingapaj munan?

⁷ ¿Cunanbipashchu chashnallata pasajun? Ari. Jehovata sirvijcunaca shujcunapa ricuipica imatapash na yachanshna, imapapash na sirvinshnami ricurinchi. Chaimi ashtaca gentecunaca ñucanchitaca ‘na yachajushca, yanga runacunatashna’ ricun (Hech. 4:13). Taucacunaca, “Bibliamanda yachachingapaca paicunaca na estudiashcachu, chaimi ñucanchitaca Bibliamanda yachachitaca na ushanllu” nishpa ricun. Cutin shujcunaca: “Testigo de Jehovacunaca Estados Unidospi callarichishca religionllami can” ninmi. Pero ali yachajpica, 7 Testigocunapuramandaca, shujllami Estados Unidosmanda can. Cutin shujcunaca: “Testigocunaca Jesuspica na crinllu” nishpami pensarin. Tauca huatacunatami Testigocunataca, “gringocunapa espiacuna” o “gobiernopa contracunami can” nishpa juchachishca. Cai llullacunata crimandami taucacunaca ñucanchicuna villachinajujpi, yachachinajujpica na chasquingapaj munashca.

8. Testigo de Jehovacuna imashina cashcata yachangapaca ¿imatata Hechos 17:11 nishcashnaca rurana capangui?

⁸ ¿Imata ama pandachi tucuchunga ayudanga? Ima pasashcata ali investiganami ayudanga. Lucas librota escribingapaca Lucas jariguca ‘callarimanda imata rurashcacunata aliguta tapushpami’ escribi callarirca. Lucasca, Lucas librota liijushpaca Jesusmanda imata uyashcacuna “chashnapacha cajta ashtahuan aliguta yachachunmi” munarca (Luc. 1:1-4). Berea llactamanda judiocunapashmi chaitallata rurarca. Paicunaca Jesusmanda primera vez ali villaigucunata uyashpaca, Escrituras Hebreas o Antiguo Testamentopi ¿shinapachachu nijun, imashi? nishpami paicunallata investigan carca (Hechos 17:11​ta liipangui). Chaitallatami quiquinbash rurana capangui. Testigo de Jehovacuna imata yachachishcataca quiquinba propio Bibliahuanmi chimbapurashpa ricuna capangui. Shinallata Testigocuna ima horamanda tiashcatapashmi ali investigana capangui. Shinami shujcuna quiquinda pandachingapaj munajpipash na pandachi tucupangui.

9. Paicuna munashcashna shuj señalcunatapash Jesús na rurajpica ¿imata pasarca?

⁹ Jesuspa tiempopica Jesuspa alipacha yachachishcacunaca huaquin gentecunapaca na suficiente carcachu. Chaimandami Jesús Mesías cashcata cringapaca, “jahua pachamanda imatapash rurashpa ricuchijuchun mañanajurca” (Mat. 16:1). Paicunaca Daniel 7:13, 14​pi profeciacunata nali intindimandami Jesús ashtahuan señalcunata ricuchichun mañanajushcanga. Danielpa profeciacuna pactarichunga ashtaca tiempo yalinarami carca. Jesuspa yachachishcacunallatami chai tiempopi gentecunataca Jesús Mesías cashcata crichunga suficiente cana carca. Pero Jesús yachachijujpi shuj señalta mañajpi, Jesús na cushcamandami chai gentecunaca Jesuspica na crirca (Mat. 16:4).

10. Isaiaspi nishca profeciacunataca Jesusca ¿imashinata pactachirca?

¹⁰ Bibliapica ¿imatata nin? Mesiasmanda parlashpaca Bibliapica: “Paica, na caparijungachu, na shinllita rimajungachu. Pai rimashcapash, na ñangunapi uyaringachu” nircami (Is. 42:1, 2). Jesusca shuj gentecuna paita alicachishpa ricuchunga na villachircachu. Jehová Diosta adorangapaj nishpa jatun templocunatapash na rurarcachu. Shinallata ropatapash judiocunata ñaupaman pushajcunashnaca na churajurcachu. Tucuicuna chai shutipi alicachishpa parlahuachun nishpapash na shuj shutita churarircachu. Paita Herodespa ñaupapi juzgangapaj apajpi, paipa causai peligropi cajpipash Herodespa ñaupapi ali quidangapallaca shuj milagrota rurachun mañajpipash ni shuj milagrota na rurarcachu (Luc. 23:8-11). Jesús cai alpapi cashpaca huaquin milagrocunatami rurarca. Shinapash paipaca Jehová Diosmanda ali villaigucunata villachinami ashtahuan importante carca. Chaimandami paipa discipulocunamanga: “Chaipajmi shamurcani” nirca (Mar. 1:38).

11. Huaquin gentecunaca Taita Diosta adoranamandaca ¿ima panda yuyaicunatata charin?

¹¹ ¿Cunanbipashchu chashnallata pasajun? Ari. Gentecunaca jatun iglesiacunapi imacunalla tiajta ricushpa, iglesiata ñaupaman pushajcuna jariyashca, valishca churajunacunata churajushcata ricushpami Taita Diostaca chashnami adorana canchi nin. Shinapash cai tucui cosascuna  panda yachachishcacunamanda shamujtaca huaquingunallami yachan. Chai iglesiacunaman rij gentecunaca Taita Diosmanda o Diospa munaimandaca imatapash na yachajunajunllu. Cutin testigo de Jehovacunapa tandanajuiman shamujcunaca Jehová Dios imata munajta, Jehovapa munaita imashina pactachinatami ali yachajun. Ñucanchipa Tandanajui Huasicunaca na ushashca valishca cosascunata charinllu. Ashtahuangarin limpio, imapash minishtirishca cosasgucunallami chaipica tian. Congregacionda ñaupaman pushajcunapash na jariyashca ropacunataca churajunllu. Paicunataca na imapash shuj shuticunata agllashpaca parlanchichu. Ñucanchicunaca imata yachachishpapash Bibliamandallami yachachipanchi. Shinapashmi cunan punllapi gentecunaca ñucanchicuna Bibliamanda yachachijpica na cringapaj munan. Paicunapa ricuipica ñucanchicuna imashina Diosta adoranaca yapa simplemi ricurin. Shinallata paicuna uyangapaj munashcatashna na yachachijpimi paicunaca nalicachin.

12. Hebreos 11:1, 6​pi nishcashnaca tucui shunguhuan cringapaca ¿imatata rurana capanchi?

¹² ¿Imata ama pandachi tucuchunga ayudanga? Apóstol Pabloca Roma llactamanda huauquipanicunamanga: “Villachishca shimicunata uyashca jiparami gentecunaca crita ushan. Cristomanda pipash villachijpimi, chai shimicunataca gentecunaca uyaita ushan” nircami (Rom. 10:17, TNM ). Huaquin iglesiacunapica Bibliapi na mandajpipashmi huaquin cosascunata o fiestacunata ruran. Shinacunapi participanaca Jehová Diospi tucui shunguhuan crichunga na ayudangachu. Jehová Diospi tucui shunguhuan cringapaj o feta charingapaca Bibliatami ali ali yachajuna capanchi. Bibliapica: ‘Crishpallami, Taita Diostaca cushichi’ usharin ninmi (Hebreos 11:1, 6​ta liipangui). Shinaca Taita Diosmanda cabalguta yachajujushcata cringapaca imapash milagrocunata ricunaca na minishtirinllu. Bibliata aliguta yachajushpaca Jesuspa yachachishcacunataca tucui shungumi crishun. Shinami imapash pandachichunga na saquishun.

13. ¿Imamandata taucacunaca Jesushuanga ninanda culiranajurca?

¹³ Jesuspa tiempopica Bautizaj Juanba catijcunaca Jesuspa discipulocuna na ayunajta  ricushpaca ninandami manllarirca. Chaimi Jesusca pai causajushca horascamanga paipa discipulocuna ayunanaca na minishtirinllu nishpa paicunamanga intindichirca (Mat. 9:14-17). Shinapashmi fariseocuna, Jesuspa shuj contracunapash Jesús judiocunapa costumbrecunata na catishcamanda nalicachishpa ricurca. Sábado punllapi huañujujcunata jambijpicarin ashtahuanmi culiranajurca (Mar. 3:1-6; Juan 9:16). Chai judiocunaca, “sábado punllapa leytaca alipachami pactachinchi” ninmi carca. Shina ninajushpapash templo huasipica imapash negociocunata ruranllami carca. Chaita rurashcamanda Jesús paicunata shinllita rimajpica ninandami culiranajurca (Mat. 21:12, 13, 15). Jesús Nazaretmanda sinagogapi villachijushpaca judiocuna paicunapilla pensashcata, Diospi na crishcata ricuchingapami punda israelitacunapa tiempopi imacunalla pasashcata paicunamanga parlarca. Chaita uyashpaca ninandami culiranajurca (Luc. 4:16, 25-30). Ashtacacunaca paicunapa munaita Jesús na rurashcamandami Jesuspica na crirca (Mat. 11:16-19).

14. Jesusca ¿imamandata judiocunapa costumbrecunataca nalicachishpa rimarca?

¹⁴ Bibliapica ¿imatata nin? Profeta Isaiasta utilizashpami Jehová Diosca nirca: “Cai gentecunaca, shimihuanllami ñucataca mañanajun. Shimi jahuallami ñucataca alicachinajun. Ashtahuangarin paicunapaj shunguca, ñucamandaca carupimi. Ñucata manllanatapash runacuna mandashpa yachachijpillami ruranajun” nirca (Is. 29:13). Judiocuna gentecunapa costumbrecunata catishcamanda, Bibliapa mandashcacunata na pactachinajushcamanda shinllita rimashpaca Jesusca alitami rurarca. Gentecunapa costumbrecunata catijcunaca Jehová Diosta, pai cachamushca Mesiastapashmi na chasquirca.

15. ¿Imata na rurajpita gentecunaca testigo de Jehovacunataca nalicachishpa ricun?

¹⁵ ¿Cunanbipashchu chashnallata pasajun? Ari. Ashtaca gentecunaca testigo de Jehovacuna cumpleañoscunata, Navidadcunata na rurajta ricushpami ñucanchitaca culiran. Shinapash caicunata rurachunga Bibliapica na mandajunllu. Shinallata shujcunaca llactapa fiestacunapi na participajpi, pipash huañujpi imapash costumbrecunata na catijpimi ñucanchitaca culiran. Talvez paicunaca Taita Diospa ñaupapica alitami ruranajunchi yashpami shina ruran. Shinapash Bibliapi mandashcashna imatapash na rurajpica Jehová Diosca na chasquingachu (Mar. 7:7-9).

16. Salmo 119:97, 113, 163-165 nishcashnaca ¿imatata rurana capanchi? Chaita ruranaca ¿imapata ayudanga?

¹⁶ ¿Imata ama pandachi tucuchunga ayudanga? Jehovapa mandashcacunata, paipa yachachishcacunata juyanami ama pandachi tucuchun ayudanga (Salmo 119:97, 113, 163-165, liipangui). Jehová Diosta juyashpaca pai nalicachishca cosascunataca na rurashunllu. Ashtahuangarin pai munashcatalla rurangapami esforzaripashun.

17. ¿Mesías imata rurachunda tauca judiocunaca shuyanajurca?

¹⁷ Jesuspa tiempopica huaquin gentecunaca shuj mushuj gobierno tiachun, Mesías romanocunapa maquimanda quishpichichun o salvachunmi shuyanajurca. Pero shinapash Jesusta rey tucuchun churangapaj munajpica, Jesusca na rey cangapaj munarcachu (Juan 6:14, 15). Cutin sacerdotecuna, shuj gentecunaca Jesús politicapi yaicushpa imapash cambiocunata ruranga yashpami manllanajurca. Shina pasajpica romanocunaca paicunapa contra tucushpa, paicuna charishca autoridadtapash quichunga yashpami manllanajurca. Cashna cosascunamandami tauca judiocunaca Jesuspica na crirca.

18. Tauca judiocunaca ¿ima profeciacunatata ladoman saquinajurca?

¹⁸ Bibliapica ¿imatata nin? Bibliapica, Mesías shuj guerrapi macanajushpa, chai guerrata mishanatami nijun. Shinapash chai guerraman nara rishpallata Mesías ñucanchi juchacunamanda huañuna cashcatapashmi ricuchijun (Is. 53:9, 12). Shinaca ¿imashpata tauca judiocunaca Mesiasmandaca panda yuyaicunata charirca? Paicunaca  Mesías shamushpa problemacunata tucuchina profeciacunatalla yaipi charimandami Mesiasmanda parlaj shuj profeciacunataca ladoman saquirca (Juan 6:26, 27).

19. ¿Imashpata cunanbica tauca gentecunaca ñucanchitaca na uyangapaj munan?

¹⁹ ¿Cunanbipashchu chashnallata pasajun? Ari. Ashtaca gentecunaca ñucanchicuna politicapi na chapurijpimi ñucanchitaca na uyangapaj munan. Paicunaca, “shuj candidatota apoyanami canguichi” ninmi. Pero ñucanchicunaca gentecunapa shuj gobiernota apoyashpaca Jehovapa Gobiernota na apoyajushcatami ricuchinchiman (1 Sam. 8:4-7). Cutin shuj gentecunaca: “Hospitalcunata, escuelacunata, shuj shuj ali ruraicunata rurashpami gentecunataca ayudana canguichi” ninmi. Paicunaca cunanbi tiashca problemacunata ñucanchicuna uchalla arreglachunmi munan. Ñucanchicuna villachinapi ashtahuan empeñarijpimi ñucanchi yachachijpica na uyangapaj munan.

20. Mateo 7:21-23​pi nishcashnaca ¿imata ñucanchipaca ashtahuan importante can?

²⁰ ¿Imata ama pandachi tucuchunga ayudanga? (Mateo 7:21-23​ta liipangui). Ñucanchipaca Jesús mandashcashna Diospa Reinomanda villachinami ashtahuanbachaca importante can (Mat. 28:19, 20). Cai mundopi politicamanda o shuj cosascunamanda tiashca problemacuna ñucanchita pandachichunga na saquinachu capanchi. Testigo de Jehovacunaca gentecunata juyaimandami, paicuna llaquicunata charijpica preocuparipanchi. Chaimi paicunata ayudangapaca Diospa Reinomanda ali villaigucunata villachishpa, yachachishpa Jehová Diospa amigocuna tucuchun ayudapanchi.

21. ¿Imata rurangapata esforzarina capanchi?

²¹ Cai temapica Jesuspa tiempopi gentecuna imacunamandalla Jesuspa yachachishcacunata na chasquishcatami 4 yuyaicunapi ricupashcanchi. Cunanbipashmi chai yuyaicunamandallata testigo de Jehovacunataca na uyangapaj munan. Shinapash gentecunaca na chaicunatallachu nalicachishpa ricun. Cati temapica cutin shuj 4 yuyaicunatami yachajupashun. Shinaca tucuicunallata Jehová Diospi tucui shunguhuan crishpa catingapaj, gentecuna imacunata ninajujpipash ama pandachi tucungapaj esforzarishpa catipashunchi.