¿Yachaparcanguichu?
Punda tiempopica barcocunataca ¿imahuanda ruran carca?
Papiro nishca sucus yura.
PUNDA tiempopi causashca egipciocunaca papiro yurapimi escribin carca. Griegocunapash, romanocunapashmi papiro yurapica escribin carca. * Pero papiro yurataca escribingapallaca na utilizanllu carca. Barcocunata rurangapapashmi utilizan carca. Chaitaca ashalla gentecunami yachan.
Egipciocunata pambashca pushtupimi papirohuan rurashca 2 uchilla barcogucunata tarishca.
2 mil 500 huatacuna huashamanga profeta Isaiasca nircami: ‘Etiopía llactapi tiaj jatun yacu huashacunapi causajcunaca mama cucha jahuatami villajcunata cachanajun’. “[Papiro] sucusta rurashca canoacunapimi, yacu jahuata cachanajun” nishpa. Shuj tiempo jipaca profeta Jeremiasca nircami: Medopersia llactacunamanda soldadocuna Babilonia llactata llaquichingapaj chayashpaca babiloniocuna ama pacajushpa llujshichunmi papirohuan rurashca barcocunataca rupachigrin nishpa (Is. 18:1, 2; Jer. 51:32, TNM ).
Biblia Taita Dios yarichishpa escribishca libro cashcamandami chaipi nishcacuna cabal cashcataca seguro capanchi. Chaimi arqueólogo nishca estudiashcacuna punda tiempopi papirohuan rurashca barcocunata tarishcata uyashpaca na manllaripanchi (2 Tim. 3:16). Cunanga Egiptopi papiro yurahuan barcocunata imashina ruran cashcata yachajupashun.
PAPIRO YURACUNAHUANGA ¿IMASHINATA BARCOCUNATACA RURAN CARCA?
Egipciocunata pambashca pushtucunapica barcocunata imashina ruran cashcata, papiro yuratapash imashina cozechan cashcatami dibujashcacunata tarishca. Jaricunaca papiro yurata cuchushpami maqui japina valiguta shinllita huatan carca. Jipaca huaquingunata tandachishpami huatan carca. Papiro caspicuna triángulo formata charishcamandami tandachishpa huangujpica ali quidanlla carca. Chaimi cai caspicunaca na yacupi pambarishpa, huambushpa rinlla carca. A Companion to Ancient Egypt nishca libropica, papiro yurahuan rurashca barcocunaca 17 yali metrocunatami midin carca. Shinallata 10 o 12 remo caspicunatami cada ladopi barcota cuyuchingapaca charin carca ninmi.
Cai dibujopica egipciocuna papirohuan barcocunata imashina ruraj cashcatami ricuchijun.
¿IMAMANDATA BARCOCUNATACA PAPIRO YURAHUANGA RURAN CARCA?
Río Nilo ladolla pambacunapica papiro yuraca ninandami viñan carca. Ashtahuangarin barcocunataca papiro yurahuan ruranaca facilmi carca. Shinallata caspicunahuan barcocunata rurai callarijpipash pescadorcuna, cazadorcunaca papirohuan rurashca uchilla barcocunatami utilizashpa catin cashca yarin.
Papiro caspicunahuan rurashca barcocunataca ashtaca tiempocunatami utilizarca. Chaimi siglo primero y segundopi causashca historiador Plutarcoca chai tiempopipash papirohuan rurashca uchilla barcocunata utilizashpa catishcata nirca.
^ párr. 3 Papiro yuracunaca yacu tiaj lado pushtucunapi, na yapa shinlli rijuj huaicucunapimi viñan. 5 metro altotami viñan. Cutin tallo siquipica 15 centimetrocunacamanmi midi ushan.
