1, 2. ¿Imamandata huaquinbica Bibliapa consejocunaca ñucanchi causaipica ashtahuan importante tucun?

 NOVIOCUNACA paicunaman discursota cujujpica chai consejocunata ña ali rijsishpapash chai punllaca chai consejocunataca aligutapacha yaipimi uyan. Noviocunapaca cazarashca punllamandami chai consejocunaca ashtahuan importante tucun. Porque paicunaca chai punllamandami cai consejocunataca ishcandicuna pactachina tucunga.

² Shina cuendami huahuacunata viñachinamanda consejocunapash can. Talvez shuj matrimonioca huahuacunata imashina viñachinamanda discursocunata, consejocunataca ashtacatami uyashcanga. Shinapash paicunapacha huahuata charishpami chai consejocunata pactachinaca ashtahuan importante tucun. Shinaca taitacunapaca cai consejocunata pactachi callarinaca ashtahuan shuj jatun responsabilidadmi can. Rijsishca consejocunapash ña ñucanchi causaipi pactachina tucujpica diferentemi ricurin. Chaimandami Jehová Diosta sirvijcunaca Israel llactapa reycuna cuenda Bibliataca cada punlla liishpa, liishcacunapi pensarina capanchi (Deut. 17:19).

3. Cai yachajuipica ¿imatata ricugripanchi?

³ Taitacunaca quiquingunapacha quiquingunapa huahuacunaman Jehová Diosmanda yachachina bendiciondami charipanguichi. Jehová Diosmanda yachachina nishpaca, Jehová Diosmanda imagutapash asha asha parlanatallaca na nijunllu. Ashtahuangarin tucui shungu Jehová Diosta juyanata huahuacunaman yachachinatami nijun. Chaitaca ¿imashinata rurai ushapanguichi?  Chaipaca cai yachajuipimi Bibliamanda chuscu consejocunata ricupashun. Cai consejocunaca ninandami ayudanga (2 Tim. 3:16). Shinallata Bibliapa consejocunata catina imashina huaquin taitacunata ayudashcatapashmi ricupashun.

4. Jehová Diosta juyanata huahuacunaman yachachichunga ¿ima consejocunata taitacunataca ayudaita ushan? (Santiago 1:5).

⁴ Primeroca: Jehovapa ayudatami mascana capanguichi. Huahuacunata Jehovata juyanata yachachingapaca taitamamacunaca ali yachaita charinatami minishtin. Chaimandami ali yachaitaca Jehová Diosta mañanalla capanguichi (Santiago 1:5​ta liipangui). Jehová Diosca alipacha consejocunata cuj Diosmi can. Paica cai mundo enteropi tucui taitacunamanda ashtahuan yali experienciatami charin (Sal. 36:9). Y chaimandami paipa consejocunaca taitacunataca ashtacata ayudaita ushan (Is. 48:17).

5. a) Jehová Diosca taitacuna huahuacunata viñachichunga ¿imashinata ayudajun? b) Huauqui Amorimba videota ricushpaca huahuacunata viñachinamandaca ¿imatata yachajupanchi?

⁵ Jehová Diosta juyanata huahuacunaman yachachi ushachunga Jehová Diosca Bibliahuan, paipa organizacionhuanmi taitacunataca ayudan (Mat. 24:45). Por ejemplo, “Familiacunata ayudangapaj” nishca partepimi ashtahuan consejocunata tarita ushapanguichi. Cai consejocunataca ashtaca huatacunatami ¡Despertad! revistapi llujchishpa shamunajushca. Cunanbica cai página jw.org paginapimi videocuna, entrevistacuna, escenificacionguna tian. Caicunami taitacunataca huahuacunata ali viñachi ushachun ayudanga (Prov. 2:4-6). *

6. Joseph huauquiguca Jehová Diospa organizacionbi cushca ayudacunamandaca ¿imatata nin?

⁶ Jehová Dios paipa organizacionhuan taitacunata ayudajushcamandaca taitacunaca ninandami agradicishca. Joseph shuti shuj taitaca ninmi: “Quimsa huahuacunata Jehovamanda yachachishpa viñachinaca ñucanchipaca na facilchu cashca. Chaimandami Jehová Diostaca siempre ayudachun mañashcanchi. Y Jehová Diosca ñucanchi minishtishca horaspimi siempre ñucanchi minishtishca consejocunata cushpa ayudashca”. Joseph y paipa huarmigupash Jehová Diospa organizacionbi llujchishca informacionguna, videocunaca paicunapa  huahuacunata Jehová Dioshuan ali amigo tucuchun ayudajushcatami ricushca.

7. Taitacunaca ¿imamandata huahuacunamanga shuj ali ejemplota cungapaj esforzarina can? (Romanos 2:21).

⁷ Catipica: imata yachachishpapash huahuacunamanga quiquingunapa ejemplohuan ricuchipaichi. Huahuacunaca tucuitami ricun. Taitacuna imata rurashcatami paicunaca catin. Shinapash pecadorcuna caimandaca tucuicunallatami pandarinchi (Rom. 3:23). Jehová Diospa yachachishcacunata charij taitacunaca masqui pecadorcuna cashpapash paicunapa huahuacunaman ali ejemplota ricuchingapami esforzarin (Romanos 2:21​ta liipangui). Shuj taitaca huahuacunamanda parlashpaca huahuacunaca taitacuna alita rurajpi o nalita rurajpipash tucuitami copian nircami. Shinallata huahuacunaca, huahuacunaman imata yachachishcata taitacuna na pactachijta ricushpapash cuenta japinllami nircami. Shinaca ñucanchi huahuacuna Jehová Diosta tucui shunguhuan juyachun munashpaca, ñucanchirami Jehová Diostaca tucui shunguhuan juyana capanchi.

8, 9. Andrew huauquigupa, Emma panigupa ejemplomandaca ¿imatata yachajupanchi?

⁸ Taitacunaca paicunapa huahuacuna Jehová Diosta juyachunga ashtaca cosascunatami ruraita ushan. 17 huatacunata charij Andrew shuti joven huauquiguca ninmi: “Cada tutami ñuca taitaca Jehová Diostaca ñucahuan mañan carca. Jehová Diosta ñucalla mañashca cajpipashmi, ñucahuan cutin mañan carca. Ñuca taita, ñuca mamaca ‘Jehová Diostaca mashna viajeta cashpapash mañanallami canguichi’ nishpami yachachihuarca. Chaimandami Jehová Diosta mañanaca ñuca causaipica ninan importante tucurca. Cunanga Jehová Diosta mañashpaca shuj juyaj Taita cashcata ricuimandami cushilla sintirini” ninmi. Taitacuna quiquinguna Jehová Diosta tucui shunguhuan juyashpaca huahuacunamanga shuj alipacha ejemplotami cunajupanguichi.

⁹ Cunanga Emma panigumanda yachajupashunchi. Emma panigupa taita paicunata jichushpa rijpica, paipa mamaca ashtaca dibicunahuanmi quidarca. Emma paniguca: “Ñuca mamita dibicunamanda culqui illa quidashpapash Jehová Dios cuidanapi, Jehová ima minishtirishcagucunatapash caranapimi confiarca. Ñuca mamitaca paipa ejemplohuanmi Jehová Dios ayudanapi confiashcataca ricuchirca” ninmi. Caimandaca ¿imatata yachajupanchi? Problemacunata charishpapash taitacunaca huahuacunaman shuj ali ejemplota cui ushashcatami yachajupanchi (Gál. 6:9).

10. Israelitacunaca paicunapa huahuacunahuan parlangapaca ¿ima horata oportunidadta charirca? (Deuteronomio 6:6, 7).

¹⁰ Quimsapica: huahuacunahuan parlana costumbreta charipaichi. Jehová Diosca israelita taitacunamanga Jehová Diosmanda cada punlla paicunapa huahuacunaman parlachunmi mandarca (Deuteronomio 6:6, 7​ta liipangui). Israelitacunaca huahuacunaman Jehová Diosta juyanata yachachingapaca ashtaca tiempotami charirca. Por ejemplo, chai tiempopica jari huahuagucunaca ashtaca tiempotami paicunapa taitacunata tarpunacunapi, cosechacunapi ayudashpa yalin carca. Cutin huarmi huahuagucunaca ashtaca tiempotami paipa mamata huasipi imatapash ayudashpa yalin carca. Huahuacunahuan shina pacta yalishpaca Jehová Diosmanda parlangapaca ashtaca oportunidadtami charirca. Por ejemplo Jehová Dios imashina paicunata juyashcata, imashina cuidajushcapi pensarina oportunidadtami charirca.

11. Testigo de Jehová taitacunaca ¿ima horata paicunapa huahuacunahuan parlangapaca oportunidadta charin?

¹¹ Israelitacunapa tiempohuan ricujpica cunanbica diferentemi can. Huaquin llactacunapica huahuacunahuan pacta yalingapaca taitacunaca cazi na tiempota charinllu. Huahuacunaca escuelapi, taitacunaca trabajopimi yalin. Chaimandami taitacunaca huahuacunahuan parlangapaj, paicunahuan tiempota yalingapaca ninanda  esforzarina can (Efes. 5:15, 16; Filip. 1:10). Familiahuan Bibliata estudianajushpami huahuacunahuan parlashpa paicunaman tiempota llujchita ushan. Alexander shuti huahuaguca: “Ñuca papitoca familiahuan Bibliata estudiangapaj, ñucanchihuan yalingapaca maimandami tiempoguta llujchin. Bibliata estudiashca jipaca paicunahuan parlashpami quidanchi” ninmi.

12. Familiahuan Bibliata estudiajushpaca taitaca ¿imatata yaipi charina can?

¹² Familiahuan Bibliata estudianajushpa huahuacuna cushilla sintirichunga taitaca ¿imatata rurana can? Talvez Para siempre cushilla causapashunchi nishca librotami familiahuan estudiaita ushan. Cai librota familiahuan estudiashpaca parlangapaca ashtaca yuyaicunami llujshinga. Huaquinbica Bibliamanda yachachishcacunapi huahuacuna imapipash na de acuerdo cashcata nijpica na culiranachu capanguichi. Paicuna imashna sintirishcata nishcamanda agradicishpami imashna sintirishcata parlashpa catichun animana capanguichi. Huahuacuna imashna sintirishcata parlashcacunallatami taitacunataca paicunata imapi ayudanata ricuchun ayudanga.

13. Huahuacuna Jehová Diosman ashtahuan quimirichunga taitacunaca ¿imashinata ashtahuan ayudaita ushan?

¹³ Huahuacuna Jehová Diosman ashtahuan quimirichun ayudangapaj tiempoguta llujchipaichi. Huahuacunaman Jehovamanda yachachingapaca shuj shuj cosascunatami ruraita ushapanguichi. Por ejemplo Lisa shuti paniguca: “Ñucanchi huahuacunamanga maipipash purijushpa Jehová Diospa rurashca cosascunata ricuchishpami Jehovamandaca yachachin carcanchi” ninmi. “Por ejemplo alcucuna imatapash rurashpa huahuacunata asichijpica, huahuacunamanga Jehová cushi Dios caimandami animalcunataca shina rurashca, Jehová Diospash ñucanchishnallata causaitaca ninandami juyan nishpami parlan carcanchi” ninmi.

14. Taitacunaca ¿imamandata paicunapa huahuacuna ali amigocunata charichun ayudana can? (Proverbios 13:20).

¹⁴ Ultimopica: quiquingunapa huahuacuna ali amigocunata charichun ayudapaichi. Amigocunaca causaipica alita rurachun o nalita rurachunmi yachachita ushan (Proverbios 13:20​ta liipangui). Taitacuna ¿quiquingunaca quiquingunapa huahuacunapa amigocuna picuna cajta yachapanguichichu? ¿Quiquingunapa  huahuacunapa amigocunahuan talvez asha tiempotallapash yalishpa paicunata rijsipashcanguichichu? Quiquingunapa huahuacuna Jehová Diosta juyaj amigocunata charichunga ¿imashinata ayudaita ushapanguichi? (1 Cor. 15:33). Chaipaca quiquinba huahuacunahuan imagutapash ruragrinajushpaca Jehová Diosta juyaj amigocunata invitapanguichi (Sal. 119:63). 

15. Taitacunaca paicunapa huahuacuna ali amigocunata charichunga ¿imatata rurai ushan?

¹⁵ Shuj taitamamapa ejemplota ricupashunchi. Paicunaca paicunapa huahuacuna ali amigocunata charichun imata rurashcatami villan. Paicunaca ninmi: “Ñucanchicunaca ñucanchi huahuacunahuan Bibliata estudiangapaca shuj shuj edadta charij huauquipanicunata, shinallata shuj shuj culturata charij huauquipanicunatami invitan carcanchi” nin. “Caita ruranaca Jehová Diosta cushijushpa sirvij shuj shuj huauquipanicunata rijsichun ayudangapaca alimi cashca” ninmi. “Ñucanchi huasipica superintendente de circuito huauquita, misionero huauquicunata y shuj shuj huauquicunatapashmi mingachishcanchi. Cai huauquicunapa ejemplomi ñucanchi huahuacuna Jehová Dioshuan ashtahuan ali amigo tucuchunga ninanda ayudashca” ninmi. Shinaca taitacuna quiquinba huahuacuna ali amigocunata charichun esforzaripaichi.

16. Huahuacuna Jehová Diosta sirvinata saquijpica taitacunaca ¿imatata yaipi charina can?

¹⁶ Quiquingunapa huahuacunaman Jehová Diosmanda yachachishca jahua, Jehová Diosta sirvinata saquijpica ñucami nali taita cashcani nishpaca na pensanachu capanguichi. Jehová Diosca tucuicunamanmi paita sirvinata o na sirvinata decidichun saquishca. Chaimanda huahuacuna Jehová Diosta sirvinata saquijpica na desanimarinachu capangui. Culquita yangata malgastashpa tucuchishca churimanda yaripaichi (Luc. 15:11-19, 22-24). Culquita yangata malgastashca churica nalita rurashpa causashca cashpapashmi, paipa taitapa huasimanga cutin alita rurangapaj tigrarca. Bibliapi cashna cosascunata uyashpaca talvezpashmi ñucanchicunaca pensanchi, pero chai cosascunaca yanga parlashcacunallami can nishpa. Shinapash Elie jovenba ejemplopimi chai cosascuna ciertopacha cunanbipash pasajta ricuchin.

17. Elie jovenba ejemplomanda yachajunaca quiquindaca ¿imashinata animan?

 ¹⁷ Elie shuti jovenga: “Ñuca taitacunaca Jehová Diosmanda yachachingapaj, Jehová Diosta juyachunga ninandami esforzarirca. Shinapash viñashpami nalicunata rurai callarircani” nin. Elie shuti jovenga Jehovapa yachachishcacunata yangapi churashpa, paipa taitacuna Jehová Diosman quimirichun ayudangapaj munajpipash na chasquircachu. Chaimandami paipa huasimandapash rishpa Jehová Diospa mandashcacunatapash ñana pactachishpa causai callarirca. Shina causashpapashmi huaquinbi huaquinbica paipa amigohuanga Bibliamanda parlan carca. Cai jovenga ninmi: “Ñuca amigoman Bibliamanda parlashpami Jehová Diospi ashtahuan pensari callarircani. Chaipimi ñuca taitacuna Jehovamanda ñucaman imata yachachishcataca asha asha pensari callarircani” nin. Shinami tiempohuanga cai jovenga Jehová Diosta sirvinata decidirca. * Cai joven Jehová Diosta cutin sirvinata decidijpica, taitacunaca huahua cajpi paiman Jehová Diosmanda yachachishcamandaca ninandami cushijushcanga (2 Tim. 3:14, 15).

18. Taitacuna huahuacunaman Jehová Diosmanda yachachingapaj esforzarinajushcamandaca ¿imatata yuyapangui?

¹⁸ Taitacuna, Jehová Diosca quiquingunapa huahuacunaman paimanda yachachina shuj jatun responsabilidadtami cushca (Sal. 78:4-6). Taitacunapaca huahuacunaman Jehová Diosmanda yachachishpa viñachinaca na facilchu can. Chaimandami tucui taitacuna caicunata ruranajushcamandaca ninanda felicitapanchi. Taitacuna quiquingunapa huahuacuna Jehová Diospa mandashcacunata pactachishpa causachun yachachishpa catipaichi (Efes. 6:4). Chashna rurajpica Jehová Diosca ninandami cushijunga.