1. Ciertopacha juyaimanda parlangapaca Bibliapica ¿ima shimicunatata utilizan?

 CIERTOPACHA juyaimanda parlangapaca Bibliapica cai shimicunatami utilizan. Cashnami nin: “Paicunapa rupajuj ninaca Jehovapa rupajuj ninami can. Juyaitaca, ashtaca yacucunapash napacha huañuchi ushangachu. Jatun yacucunapash na quilpai ushangachu” (Cant. 8:6, TNM; 7). b Cai juyailla shimicunaca cusahuarmicuna ima pasajpipash tucui vida juyarishpa cati ushashcatami ricuchin.

2. Cusahuarmicunaca paicunapa causaipi ciertopacha juyai ama tucurichunga ¿imatata rurana can?

² Cusahuarmicunaca siempremi juyaita ricuchishpa causangapaca ishcandillata esforzarina can. Cunanga shuj rupajuj ninapi pensaripashunchi: Cai rupajuj nina ama apagarichunga yamdata catichishpa cuidarianami minishtirin. Pero cai rupajuj ninata na cuidajpica asha ashami apagarishpa rita ushan. Shina cuendallatami cusahuarmipi ciertopacha juyai ashtahuan mirashpa catichunga cuidashpa catina can. Shinapash huaquinbica culqui faltalla caimanda, nali saludta charimanda o huahuacunata viñachina shinlli caimandami matrimoniopi juyaica talvez asha asha tucurita ushan. Quiquin cazado cashpaca ‘Jehovapa rupajuj ninatashna’ ciertopacha juyaita charingapaca ¿imatata rurai ushapangui? Cai temapica matrimoniopi ali, cushilla causangapaj ayudaj quimsa yuyaicunatami ricupashun. c

3. Cusahuarmicuna juyarishpa catichunga ¿imamandata Jehová Diospa amigo canaca importante can? (Eclesiastés 4:12). (Fotota ricupangui).

³ Cusa cashpa o huarmi cashpa juyaita ‘Jehová Diospa rupajuj ninatashna’ charishpa catingapaca Jehová Dioshuan ali amigo cangapami esforzarina can. ¿Imamandata shina nipanchi? Cusahuarmicuna Jehová Dioshuan amigo canata ninanda valorashpaca paipa consejocunata aliguman chasquingapami dispuesto can. Shina rurashpaca cusahuarmicuna ima problemacunata charishpapash chai problemacunata chimbapurashpa y ashtahuan juyarishpami catinga (Eclesiastés 4:12​ta liipangui). Shinallata Jehová Diospa amigocunaca Jehová Diospa ejemplota catingapami ninanda esforzarin. Por ejemplo, paicunaca pacienciata charij, perdonan y juyaihuanmi tratan (Efes. 4:32–5:1). Cai cualidadcunata charij matrimoniocunaca juyaihuan, cushillami causan. 25 huatacunata charij Lena shuti paniguca cashnami nin: “Jehová Diospa ejemplota catingapaj esforzarij personata respetohuan, juyaihuan tratanaca facilmi can”.

4. Jehová Diosca José y Mariataca ¿imamandata Jesuspa taitamamacuna cachun agllarca?

⁴ Bibliapi shuj ejemplota ricupashun rey Davidpa tucui familiacunamandaca José y Mariatami Jesuspa taitamama cachun Jehová Diosca agllarca. Paicunaca Jehová Diospa ali amigocunami carca. Shinallata paicuna, Jehová Diosta siempre pundapi churana cashcata yachaimandapashmi paicunataca agllarca. Cusahuarmicunaca José y Mariamandaca ¿imatata yachajuita ushan?

5. Cusacunaca ¿imashinata José runagupa ejemplota catita ushan?

⁵ José runaguca Jehová Diospa mandashcacunata cazungapaca siempremi esforzarirca. Chaimandami shuj ali cusa carca. Jehová Diosca paimanga quimsa viajetami paipa familiata imashina cuidana cashcataca nirca. José runaguca paipa na fácil cajpipashmi chai rato cazungapaj esforzarirca (Mat. 1:20, 24; 2:13-15, 19-21). Shina cazungapaj esforzarishcamandami paica María huarmigutaca ali cuidaita usharca. José runagu chaita rurashcamandami María huarmiguca paita ashtahuan juyashpa y ashtahuan respetashcanga. Cusacuna, quiquingunaca José runagushnallatami Bibliapa ali consejogucunata mascaita ushapanguichi. Shinami quiquinba familiataca ali cuidaita ushapanguichi. d Cambiocunata rurana cajpipash Bibliapa consejocunata cazungapaj esforzarishpaca quiquingunapa huarmigucunata ninanda juyashcatami ricuchinajupanguichi. Shina rurashpaca cusahuarmi causaipica juyaica ashtahuan mirashpami catinga. 20 huatacunata cazada Vanuatu llactamanda shuj paniguca cashnami nin: “Ñuca cusagu Jehová Diospa mandashcacunata cazungapaj esforzarijta ricushpaca ashtahuanmi respetani. Shinallata ima decisionda japijpipash paipi confiashpa segurami sintirini”.

6. Mariapa ejemplomandaca cazada panigucunaca ¿imatata yachajuita ushan?

⁶ María huarmiguca Jehová Dioshuanga ali amigami carca. Paica Jehová Dioshuan ali amiga cangapaj y shinlli feta charingapaca José runagu  ayudachunllaca na shuyarcachu. Paica Jehovapa mandashcacunataca alimi yacharca. Y cai mandashcacunapi pensaringapami tiempota llujchin carca (Luc. 2:19, 51). María huarmiguca Jehová Diospa mandashcacunata cazungapami esforzarin carca. Chaimandami shuj alipacha huarmigu carca. Cunan punllacunapi panigucunapash María huarmigushnallata cangapami ninanda esforzarin. Cunanga panigu Emiko ejemplota ricupashun. Paica ninmi: “Soltera cashpaca espiritual cosascunata rurangapaca shuj ali horariotami charin carcani. Shinapash cazarashca jipaca ñuca cusagumi Jehová Diostaca mañan carca. Shinallata familiapi espiritualmente ali cachunbash paimi ricurian carca. Shinapash tiempohuanga ñuca cusagu ayudajpilla shinlli feta charishcatami cuenda japircani. Jehová Dioshuan ali amiga cangapaj ñucallata esforzarina cashcatami cuenda japircani. Chaimandami cunanga ñucalla cashpa Jehová Diosta mañangapaj, Bibliata liingapaj y liishcapi pensaringapaj tiempota llujchini” ninmi (Gál. 6:5). Panigucuna, Jehová Diospa ashtahuan ali amiga cangapaj esforzarijpica quiquingunataca cusacunaca ashtahuan juyashpami, alita rurashcamandapash felicitapanga (Prov. 31:30).

7. Cazadocunaca Jehová Diosta adorangapaca ¿imatata José y Mariamandaca yachajui ushapanguichi?

⁷ José y María cusahuarmica Jehová Dioshuan ali amigocuna cangapaca ishcandimanda ayudaringapami ninanda esforzarirca. Paicunaca familia entero Jehová Diosta adorana minishtirishca cashcataca alimi yacharca (Luc. 2:22-24, 41; 4:16). Shinapash chaita pactachinaca, paicunapaca huahuacuna mirajpimi ashtahuan difícil tucushcanga. Ima cashpapash paicunaca chaitaca pactachircami. José y Mariaca matrimoniocunapaca shuj alipacha ejemplomi can. Quiquinguna huahuacunata charishpaca seguromi tandanajuicunaman rina, familiahuan Bibliata estudiana talvez shinlli ricuringa. Ashtahuanbachaca cusahuarmilla Bibliata estudiangapaj, Jehová Diosta mañangapaj tiempoguta llujchinami ashtahuan difícil ricuringa. Shinapash caitami yarina capanguichi. Ishcandi igual Jehová Diosta adorangapaj esforzarishpaca Jehová Dioshuanmi ashtahuan ali amigocuna tucuita ushapanguichi. Shinallata quiquingunapash ashtahuanmi ishcandimandallata juyaripanguichi. Shinaca Jehová Diosta adoranata siempre primero churapanguichi.

8. Problemacunata charij cusahuarmicunaca ¿imatata ruraita ushan?

⁸ Matrimoniopi problemacunata charishpaca familiahuan Bibliata estudianaca na facilchu ricuringa. Shinaca ¿imatata rurai ushapanguichi? Talvez ishcandipallata gushtashca shuj uchilla temagutami ishcandillata ashaguta estudiangapaj esforzarita ushapanguichi. Shina ruranaca ishcandillata cutin ali llevarishpa, imagutapash cutin igual rurashpa Jehová Diosta adorachunmi ayudanga.

9. Cusahuarmicunaca ¿imamandata ishcandi igual yalingapaca tiempota llujchina capan?

⁹ Cusahuarmicuna juyarishpa catingapaca ishcandi yalingapami tiempoguta llujchina capanguichi. Shina ruranami ishcandillata imata pensashcata, imashina sintirishcata yachachun ayudanga (Gén. 2:24). Lilia y Ruslan cusahuarmi cazarashca jipa imata cuenta japishcata ricupashunchi. Paicunaca ñami 15 huatacuna yalita cazarashca can. Paniguca ninmi: “Trabajana cashcamanda, huasipi ruraicunata charishcamandami ocupado ocupado yalinajurcanchi. Jipamangarin huahuacunata charishpami ashtahuan ocupado yalircanchi. Chashna canataca na pensashcachu carcanchi. Shinalla catishpaca asha asha ishcandimanda caruyagrinajushcatami cuenta japircanchi” ninmi.

10. Efesios 5:15, 16​pi consejotaca ¿imashinata cazadocunaca pactachita ushan?

¹⁰ Cusahuarmicuna ishcandi igual yalingapaca talvezpashmi shuj ali horariota rurashpa tiempota llujchina minishtiringa (Efesios 5:15, 16​ta  liipangui). Nigeria llactamanda Uzondu shuti huauquiguca: “Imagutapash rurangapaj shuj horariota rurajushpaca ñuca huarmiguhuan tiempoguta yalingapapashmi chai horariopica anotapani. Ñuca huarmiguhuan yalina tiempopica shuj cosascunataca na rurapanichu” (Filip. 1:10). Moldavia llactamanda Anastasia panigupa ejemplota ricupashunchi. Paica shuj superintendentepa huarmigumi can. Paica paipa tiempota imashina ali utilizajtami parlan: “Ñuca cusagu imapash responsabilidadcunata rurajujpimi ñucapash ñucapa imapash minishtirishca cosascunata rurapani. Shinami jipamanga ishcandillata igual cangapaj tiempoguta charipanchi” ninmi. Shinapash ocupado ocupado yalishcamanda ishcandi igual yalingapaj tiempota na charishpaca ¿imatata rurai ushapanguichi?

11. Áquila y Priscila cusahuarmica ¿imacunatallata igual ruran carca?

¹¹ Cazarashca huauquipanicunaca Áquila y Priscila cusahuarmimandaca ashtacatami yachajuita ushan. Paicunataca punda cristianocunaca ninandami juyan carca (Rom. 16:3, 4). Bibliapi paicunamanda na ashta parlashpapash, paicuna igual trabajashcata, igual predicashcata, shujcunata igual ayudashcatapashmi ricuchin (Hech. 18:2, 3, 24-26). Bibliapica Áquila y Priscilamanda parlashpaca siempre imagutapash igual rurashcatami ricuchin.

12. Cazarashcacuna ashtahuan tiempota igual yalingapaca ¿imatata ruraita ushan? (Fotota ricupangui).

¹² Cazarashcacunaca ¿imashinata Áquila y Priscila cusahuarmipa ejemplota catita ushan? Cada uno imacunatalla rurana cashcapi pensaripaichi. Chai cosascunamandaca ¿imatapash igual ruraita ushapanguichichu? Por ejemplo, Áquila y Priscila cusahuarmica siempremi igual predican carca. ¿Quiquingunapash igual predicana costumbreta charipanguichichu? Paicunaca igual trabajana costumbretapashmi charirca. Cunanbica talvezpashmi quiquingunaca na chai trabajopillata trabajaita ushapanguichi. Shinapash huasipimi imagutapash igual rurai ushapanguichi (Ecl. 4:9). Imagutapash ishcandi rurangapaj esforzarishpaca, ishcandillatami imagutapash parlangapaj tiempota charipanguichi. Robert y Linda cusahuarmica ñami 50 yali huatacunata cazarashca can. Paica ninmi: “Ciertota parlashpaca igual yalingapaca na ashta tiempota charipanchichu. Shinapash ñuca platoguta maillajujpica ñuca huarmiguca platocunatami chaquichin. Shinallata ñuca jardinbi imagutapash rurajujpica paipashmi ñucata ayudangapaj shamun. Shina rurajpica cushillami sintiripani. Imagutapash ishcandi igual ruraimandami ashtahuan juyarishpa catipashcanchi”.

13. Cusahuarmicuna randimanda pendiente cangapaca ¿imatata rurana can?

¹³ Cazarashcacuna igual causashpapash, ishcandimanda pendiente cangapaj tiempoguta llujchinaca minishtirishcapacha can. Brasil llactamanda cazada paniguca cashnami nin: “Huaquinbica chai huasipillata causashcamandami ñami tiempotaca igual yalinajunchi yashpa pensaita ushapanchiman. Shinapash chai huasipillata igual causanaca na suficientechu can. Ashtahuangarin ñuca cusaguhuan imagutapash rurashpa tiempota yalinami minishtirishcapacha can” ninmi. Bruno y Tays cusahuarmi randimanda pendiente  cangapaj imata rurashcata ricupashunchi. Huauquiguca: “Ishcandillata igual cashpa tiempoguta ali aprovechangapami telefonocunataca ladoman saquinchi” nin.

14. Matrimoniocunaca imagutapash rurashpa na igual yalinata gushtashpaca ¿imatata ruraita ushan?

¹⁴ Talvez igual imagutapash rurashpa tiempoguta yalinata na gushtashpa, culirajlla cashpa, o cada uno imatapash ruranata gushtashpaca ¿imatata rurai ushapanguichi? Por ejemplo, callari parrafocunapi parlashca ninapi pensaripashunchi. Ninagu prendirishpa catichunga asha asha yamdaguta churashpa cuidarianami minishtirin. Shina cuendami cada punlla ashagutallapash igual tiempoguta yalingapaj esforzarina capanguichi. Shinallata ama fiñaringapapash ishcandipallata gushtashca cosascunata rurapaichi (Sant. 3:18). Chashna uchilla cosasgucunata rurai callarinami quiquinguna cutin ishcandimanda juyarishpa catichun ayudanga.

15. Matrimoniopica ¿imamandata respetota ricuchinaca minishtirishcapacha can?

¹⁵ Matrimoniopica respetota ricuchinaca minishtirishcapachami can. Imashinami gentecunaca causangapaca samaita minishtin shina cuendami can. Gentecunaca samaita na charishpaca huañuita ushanmanmi. Matrimoniopipash respetota na ricuchishpaca juyaimi tucurita ushan. Matrimoniopi respetohuan tratarishpaca ishcandimandami juyarishpa catita ushan. Shinapash matrimoniopica respetuosomi cani nishpa pensanallaca na suficientechu can. Ashtahuangarin cusa o huarmimi respetohuan tratajta sintina can. Penny y Aret cusahuarmica ñami más de 25 huatacunata cazado can. Paica ninmi: “Ishcandimanda respetota ricuchirishpami huasipica tranquilo ali causanchi. Ishcandimanda respetarishcamandami imaguta pensashcata, sintishcatapash tranquilo parlarinchi” ninmi. Quiquinba cusa o huarmi respetashcata sintichunga ¿imatata rurai ushapanguichi? Abrahán y Sara imata rurashcata ricupashunchi.

16. Abrahanba ejemplomandaca cusacunaca ¿imatata yachajuita ushan? (1 Pedro 3:7). (Fotota ricupangui).

¹⁶ Abrahanga, Sara huarmigutaca siempremi respetohuan tratarca. Paica paipa huarmigu imata nijpipash ali uyashpami respetohuan tratashpa intindishcata ricuchirca. Shuj viajeca Sara huarmiguca shuj problema tiajpimi preocupada carca. Chaimi paipa cusa Abrahandaca ninanda culirashpa, chai problemamandapash culpashpa rimarca. Paipa huarmigu shina tratajpipash paihuanga na culirarcachu, nali shimicunahuanbash na rimarcachu. Abrahán runaguca paipa huarmigu Sara paita respetashcata, paipa decisiongunapi apoyajtapash alimi yacharca. Chaimi paipa huarmigu shina tratajpica aliguman uyashpa chai problematapash solucionanapi pensarirca (Gén. 16:5, 6). ¿Imatata yachajupanchi? Cusaca familiapi imapash decisiongunata japingapaj autoridadtami charin (1 Cor. 11:3). Shinapash paipa huarmiguta juyaimandami imata pensashcataca respetan. Ashtahuanbachaca shuj decisión quiquinba huarmiguhuan imapipash ricunata charijpimi paipa pensashcataca respetana can (1 Cor. 13:4, 5). Huaquinbica quiquinba huarmiguca talvez estresada caimandami quiquinhuanga ashtahuan parlanata minishtinga.  Shina pasajpica ¿quiquinba huarmiguta ali uyashpa respetohuanllu tratapangui? (1 Pedro 3:7​ta liipangui). Angela y Dimitri shuti cusahuarmica cazi ña 30 huatacunatami cazado can. Paica paipa cusagu, paita respetohuan tratangapaj imata rurajtami nin: “Ñuca cusaguca imamandapash culira cajpi o parlaitalla parlangapaj munajpipash siempremi uyahuan. Paica ñuca llaquilla o yapa culira cajpipash siempremi pacienciahuan tratahuan” ninmi.

17. Sara huarmigumandaca cazadacunaca ¿imatata yachajuita ushan? (1 Pedro 3:5, 6).

¹⁷ Sara huarmiguca Abrahanba decisiongunata apoyashpami paita respetashcata ricuchirca (Gén. 12:5). Shuj viajeca menos pensadomi huaquin jaricunaca Abrahanda visitangapaj chayarca. Chaimi Abrahanga paicunataca micungapaj invitarca. Paipa huarmigu shuj cosascunata rurashpa ocupada ocupada cajpipashmi tandaguta rurashpa carachun mañarca (Gén. 18:6). Sara huarmiguca chaita uchalla pactachishpami paipa cusaguta apoyashcata ricuchirca. Huarmigucuna quiquingunapashmi Sarapa ejemplota catishpa quiquinba cusacunapa decisionda apoyaita ushapanguichi. Shina rurashpaca quiquinba matrimoniopica cushilla, alimi causapanguichi (1 Pedro 3:5, 6​ta liipangui). Huauquigu Dimitrica paipa huarmigu paita respetashcata ricuchingapaj imata rurajtami parlan. Paica ninmi: “Ñuca huarmigu shuj decisionhuan na de acuerdo cashpapash chai decisionda japijpica ñuca huarmigu apoyanataca seguromi capani. Shinallata shuj decisión nali llujshijpipash ñuca huarmiguca, ricui nircanimitapash na nihuanllu. Ñuca huarmigu shina cashcamandaca ninandami agradicipani”. Shinaca respetajpica shuj personata juyanaca ashtahuan facilmi ricurin.

18. Matrimoniopi juyaita ricuchingapaj esforzarinaca ¿imatata ayudanga?

¹⁸ Diabloca cusahuarmicuna juyarinata saquichunmi munan. Diabloca cusahuarmicuna ñana juyarishpaca Jehová Diosmanda caruyanataca alimi yachan. Shinapash ciertopacha juyaitaca pipash na tucuchita ushanllu. Shinaca cusahuarmicuna quiquingunapa juyaica, Cantar de los Cantares libropi nishcashnami cana can. Shinaca Jehová Diostami matrimoniocunaca primero churana can. Shinallata igual yalingapami tiempoguta llujchina can. Ishcandimanda imagupipash intindirishpami respetarishcata ricuchina can. Shina rurashpaca Jehová Diosta respetashcatami ricuchipanguichi. Ciertopacha juyaica Jehová Diosmandami shamun. Shinami quiquingunapa matrimoniopica cushilla, ali, para siempremi juyaita ricuchishpa catita ushapanguichi.