1, 2. Jehová Diosta mañashca jipaca ¿imatata talvez pensaripanchiman?

 QUIQUINGA ¿Jehová Diosca ñucapa mañaicunataca uyanlla nishpa pensaripashcanguichu? Shina pensarishca cashpaca na quiquinllachu capangui. Ashtaca huauquipanicunapashmi cashnallata pensarishca. Ashtahuanbachaca llaquicunapi cashpami cashna pensarishca. Llaquicunahuan cashpaca Jehová Dios ñucanchi mañashcacunataca na contestanllu yashpami pensaita ushapanchi.

² Cai temapica Jehová Dios paita sirvijcunapa mañashcacunata contestajta imamanda seguro caita ushashcatami ricugripanchi (1 Juan 5:15). Shinallata imamanda huaquinbi ñucanchi mañashcacunata Jehová Dios na contestajtashna sintishcata, shinallata Jehová Dios imashina ñucanchi mañaicunata contestajtapashmi ricugripanchi.

3. Jehová Diosca ¿imamandata paita mañachunga munan?

³ Bibliapica Jehová Dios ñucanchita ninanda juyashcata y paipa ñaupapi ninan valishca cashcatami ricuchin (Ageo 2:7; 1 Juan 4:10). Chaimandami mediante oración paipa ayudata mañachun munan (1 Ped. 5:6, 7). Paica ñucanchicuna llaquicunata, problemacunata charishpapash paita sirvishpa catichunmi ayudangapaj munan.

4. Jehová Dios paipa sirvijcunapa mañashcacunata uyajtaca ¿imashinata yachapanchi? (Dibujocunata ricupangui).

⁴ Bibliapica Jehová Dios ashtaca sirvijcunapa mañaicunata uyashcatami ricuchin. Rey Davidpa ejemplopi pensaripashunchi. Davidtaca ashtaca contra gentecunami llaquichingapaj munarca.  Chaimandami paica Jehová Diostaca ayudahuai nishpa mañana costumbreta charirca. Shuj viajeca: “Mandaj Dioslla, ñuca mañajujta uyahuayari. Ninanda ñuca mañajujtaca uyahuayari. Canga, na llullaj imatapash cashcatapacha rurajmi cangui. Shina cashcamanda, ñuca mañajujta tigrachihuayari” nishpami Jehová Diosta mañarca (Sal. 143:1). Jehová Diosca paita salvashpami paipa mañashcacunata contestashcata ricuchirca (1 Sam. 19:10, 18-20; 2 Sam. 5:17-25). Chaimandami Davidca Jehová Diosca “tucui yuyaihuan paita mañajcunata ayudangapaca ladopimi” can nirca. Ñucanchicunapash Jehová Dios ayudanataca tucui shungumi confiaita ushapanchi (Sal. 145:18).

5. ¿Jehová Diosca paita sirvijcuna mañashcashnachu siempre contestashca? Shuj ejemplomanda parlapai. (Dibujocunata ricupangui).

⁵ Jehová Diosca ñucanchi mañashcacunataca huaquinbica ñucanchi munashcashnaca na contestanllu. Apóstol Pablotaca chaimi pasarca. Paica shuj problematami charirca. Chai problemaca ‘cuerpopica tujsijuj shuj cashashnami’ carca. Y chai llaquita anchuchihuai nishpaca quimsa viajetami Jehová Diostaca mañarca. Paipa mañashcataca ¿Jehová Diosca contestarcachu? Ari, pero shinapash apóstol Pablo munashcashnaca na contestarcachu. Jehová Diosca chai llaquita anchuchinapa randica paita sirvishpa catichunmi apóstol Pablomanga fuerzata curca (2 Cor. 12:7-10).

6. ¿Imamandata huaquinbica Jehová Dios ñucanchipa mañashcacunata na contestajtashna sintita ushapanchiman?

⁶ Ñucanchicunamanbashmi Jehová Diosca ñucanchi mañashcacunataca na siempre ñucanchi munashcashna contestanga. Shinapash Jehová Dios ñucanchipa ima ali cashcata yachajtaca seguromi caita ushapanchi. ‘Taita Diosca ñucanchi mañashcacunatapash yali, ñucanchi pensaitallapash na pensashca cosascunatapash yalimi ruraita ushan’ (Efes. 3:20). Chaimandami ñucanchi na yashca horaspi, ñucanchi na pensashcashnami talvez Jehová Diosca ñucanchi mañashcacunataca contestanga.

7. Huaquinbica ¿imamandata ñucanchi mañashcacunata cambiana tucupanchiman? Shuj ejemplomanda parlapai.

⁷ Huaquinbica Jehová Diospa voluntadta ashtahuan ali intindishpami talvez ñucanchi mañashcacunataca cambiana tucupanchiman. Martin Poetzinger huauquipa ejemplomanda yachajupashunchi. Huauquigu cazarashca jipallami shuj campo de concentración nazi nishcaman paitaca cacharca. Callaripica paipa huarmihuan cangapaj y cutin predicai ushangapami chai pushtumanda llujchichun Jehová Diostaca cutin cutin mañan carca. Shinapash ishcai semana jipaca huauquiguca Jehová Dios chai  carcelmanda paita talvez na llujchinatami intindi callarirca. Chaimandami huauquiguca imata rurachun munashcata ricuchihuayari nishpa Jehová Diosta cutin mañarca. Chai jipaca huauquiguca shuj huauquicunapash chai carcelpi ima llaquicunatalla charishcapimi pensai callarirca. Ashtaca huauquigucunaca paicunapa huarmicunamanda, huahuacunamandami preocupadopacha carca. Chaita ricushpami Poetzinger huauquiguca “Jehová Diostaca pagui cai responsabilidadmanda. Ñucapa huauquicunata shinllichishpa animangapaj ayudahuai” nirca. Huauquigu mañashcashnallatami nueve huatacunata chai carcelpi huauquigucunata animashpa ayudarca.

8. Jehová Diosta mañajushpaca ¿imatata yarina capanchi?

⁸ Jehová Dios paipa voluntadta pactachingapaj shuj tiempota agllashcalla charishcataca siempremi yarina capanchi. Por ejemplo Jehová Diosca acapanacunata, terremotocunata, unguicunata, huañuicunata, ñucanchita llaquichij shuj llaquicunatapashmi tucuchinga. Chaicunata tucuchingapaca Jehová Diosca paipa gobiernotami utilizanga (Dan. 2:44; Apoc. 21:3, 4). Shinapash chai punlla chayamungacamanga Diablo cai mundota mandashpa catichunmi saquishca (Juan 12:31; Apoc. 12:9). b Cunan tiempopillata Jehová Dios llaquicunata tucuchijpica llaquicuna ñana tiaimandami Diablo cai mundota alita mandajunshna ricurita ushanman. Shinaca Jehová Diospa huaquin promesacuna pactarichun shuyanara cashpapash cunan tiempopillata Jehová Dios ñucanchita ayudajushcataca na cunganachu capanchi. Chaimandami Jehová Dios ñucanchimanda imata rurajushcata cunanga ricugripanchi.

9. Decisiongunata japina cajpica ¿imashinata Jehová Diosca ayudan? Shuj ejemplomanda parlapai.

⁹ Jehová Diosca ali yachaita cushpami ayudan. Paica ali decisiongunata japi ushachunmi ali yachaita cushpa ayudasha nin. Ashtahuanbachaca ñucanchi causaipi shuj importante decisionda japina cashpami paipa ayudata minishtipanchi. Por ejemplo cazaranata o na cazaranata decidina cashpami Jehová Dios ali yachaita cuchun mañana capanchi (Sant. 1:5). María c shuti shuj soltera panigupa experienciata ricupashunchi. Paica precursora regular shinami Jehová Diostaca cushilla sirvijurca. Shinapimi shuj huauquigutaca rijsirca. Paica ninmi: “Tiempohuanga ali amigocunami tucurcanchi. Asha ashami randimanda gushtari callarircanchi. Shinaca shuj decisionda japina cashcata yachaimandami Jehová Diostaca ninanda mañarcani. Jehovapa ayudata minishtijushpapash ñucapacha shuj decisionda japina cashcatami yacharcani” ninmi. María paniguca Jehová Dios ali yachaita cushpa paipa mañashcacunata contestashcatami sintirca. Pero Jehová Diosca ¿imashinata paitaca contestarca? Paniguca publicaciongunapi mascashpami paita ayudaj ashtaca consejocunata tarirca.  Shinallata paipa mamita testigo de Jehová cashcamandami ali consejocunata cushpa imashina sintirishcata intindichun ayudarca. Chaimandami María paniguca shuj ali decisionda japi usharca.

10. Filipenses 4:13​pi nishcashnaca Jehová Diosca ¿imashinata paita sirvijcunataca ayudanga? Shuj ejemplomanda parlapai. (Fotota ricupangui).

¹⁰ Llaquicunata aguantachunmi fuerzata cushpa ayudan. Apóstol Pablota ayudashcashnallatami ñucanchitapash llaquicunata aguantashpa catichun fuerzata cushpa ayudanga (Filipenses 4:13​ta liipangui). Benjamin shuti huauquiguta imashina Jehová Dios ayudashcata ricupashunchi. Paica jovenmandapachami ashtaca huatacunata paipa familiahuan paipa llactamanda llujshishpa África llactapi pacajushpa causarca. Paica ninmi: “Jehová Diostaca siempremi alita rurangapaj fuerzata cushpa ayudahuai nishpa mañan carcani. Jehová Diosca ñuca mañashcacunataca tranquilo sintirichun ayudashpa, na manllashpa predicachun ayudashpa, paita sirvishpa catichun publicaciongunatapash cushpami ñuca mañashcacunataca contestarca. Shinallata shuj Testigo huauquipanicunapa experienciacunata liinami Jehová Diosta sirvishpa catichun ayudahuarca” ninmi.

11, 12. Jehová Diosca ñucanchi mañashcacunata contestangapaca ñucanchi huauquipanicuna ¿imata rurachunda utilizaita ushan? (Fotota ricupangui).

¹¹ Ñucanchi huauquipanicunata utilizashpami ayudan. Jesustaca Taita Diostami nalicachishpa rimashca nishpami yangamanda juchachishpa huañuchigrinajurca. Chaimandami Jesusca huañungapaj shuj tuta faltajujpi Jehová Diostaca ama shina huañungapaj ayudahuai nishpa ninanda mañarca. Jehová Diosca Jesusta ama shina huañuchichun jarcanapa randica Jesustaca shuj angelta cachashpami shinllichishpa ayudarca (Luc. 22:42, 43). Shinallatami ñucanchitapash Jehová Diosca ayudangapaca huauquipanicunata utilizan. Paicunaca talvez ñucanchita cayashpa o visitashpami animaita ushan. Tucuicunallatami ñucanchi huauquipanicunataca ‘alita rimashca shimicunahuan’ ayudaita ushapanchi (Prov. 12:25).

¹² Miriam shuti panigupa experienciata ricupashunchi. Paipa cusagu huañushcamanda asha semanacuna jipaca paipa huasipica solallami carca. Llaqui llaqui sintirijuimandami huacaitalla huacajurca. Chaimandami pihuanbash parlanata minishtijurca. Paniguca ninmi: “Pitapash cayana animoca na tiarcachu. Chaimandami Jehová Diosta mañarcani. Shina huacashpa  mañajujpillatami teléfono huacaj uyarirca. Shuj anciano turigumi cayachimujushca carca” ninmi. Chai huauquigu y paipa huarmigupashmi Miriam panigutaca consolachirca. Cai huauquigu cayashpa consolachishcamandaca Miriam paniguca Jehová Dios paita ayudangapaj chashna rurashcatami segura can.

13. Jehová Diosca paita na sirvij gentecuna ¿imata rurachunda utilizaita ushan? Shuj ejemplomanda parlapai.

¹³ Ñucanchita ayudangapaca paita na sirvij gentecunatapashmi utilizaita ushan. (Prov. 21:1). Jehová Diosca paita na sirvij gentecunata utilizashpami huaquinbica paita sirvijcunapa mañaita contestan. Por ejemplo Jehová Diosca rey Artajerjesta utilizashpami Nehemías runagu Jerusalenman tigrashpa chai llactapa pircacunata cutin shayachichun ayudarca (Neh. 2:3-6). Cunan tiempopipashmi Jehová Diosca na Testigo gentecuna ñucanchita ayudachun utilizaita ushan.

14. Soo Hing panigupa experienciamandaca ¿imatata yachajupanchi? (Fotota ricupangui).

¹⁴ Soo Hing shuti shuj paniguca paita ayudangapaca Jehová Dios paita atindijun doctorta utilizashcatami cuenta japirca. Paipa churiguca umahuan nali cashca jahuapash shuj jatun accidentetami charirca. Chaimandami panigupash y paipa cusapash paipa churiguta cuidangapaca trabajota saquirca. Chaimandami mantiniringapaca culqui faltai callarirca. Shina llaquicunahuan cashpami paniguca ushaitapacha ñana ushanshna sintirirca. Chaimandami imashina sintirijushcata Jehová Diosman tucuita villashpa paipa ayudata mañarca. Paicunata atindij doctorca caita yachaj chayashpami gobiernopa ayudata charichun, gobiernopa ayudata charichun ayudashpa, shinallata baratolla pushtupi causai ushachunbash ayudarca. Chai jipaca Soo Hing paniguca “Jehová Dios ñucanchita ayudajushcatami cuenta japircanchi. Jehová Diosca mañaicunataca uyanmi” nircami (Sal. 65:2).

15. Shuj paniguca Jehová Dios paipa mañashcacunata contestajujta cuenta japingapaca ¿imatata rurarca?

¹⁵ Jehová Diosca ñucanchi mañashcacunataca na shuj jatun milagrocunata rurashpaca contestangachu. Jehová Diosca paita sirvishpa catichunga imata minishtishcata cushpami ñucanchi mañashcacunata contestanga. Chaimandami Jehová Dios ñucanchi mañaicunata imashina contestajta ricungapaca pendiente cana capanchi. Yoko shuti shuj paniguca Jehová Dios paipa mañaicunata na contestajujta shinami sintirca. Chaimandami Jehová Diosta imaguta mañashpapash anotashpa churai callarirca. Tiempohuanga paipa anotashcacunataca cutinmi ricui callarirca. Chaipimi Jehová Dios paipa mañashcacunata cazi tucuita contestashcata cuenta japirca.  Huaquin mañashca cosascunatacarin cungashcami carca. Chaicunatapash Jehová Dios contestashcatami cuenta japirca. Huaquinbi huaquinbillapash Jehová Dios ñucanchipa mañashcacunata imashina contestajujta pensaringapami tiempoguta llujchina capanchi (Sal. 66:19, 20).

16. Feta charishcataca ¿imashinata ricuchi ushapanchi? (Hebreos 11:6).

¹⁶ Jehovata mañangapaca fetami minishtipanchi. Shinapash Jehová Dios imashina contestajpipash chaita chasquingapapashmi feta minishtipanchi. Mike y Chrissy ejemplota ricupashunchi. Paicunaca Betelpi sirvina munaitami charirca. Mike huauquiguca ninmi: “Ñucanchicunaca Betelpi sirvingapaca ashtaca viajecunatami solicitudtaca jundachircanchi. Jehová Diostaca siempremi mañanajurcanchi. Shinapash Betelmanga nunca na invitarcachu” ninmi. Paicunaca Jehová Dios maipi minishtirishca pushtupi ali utilizanatami seguro carca (Hebreos 11:6​ta liipangui). Mike y Chrissy huauquipanicunaca minishtirishca pushtupi Jehová Dios ali utilizanataca confiashpami catirca. Tucui usharishcaguta Jehova Diosmanda rurangapami minishtirishca pushtupi precursores regulares shina sirvishpa, construccionbipash apoyarca. Cunanbica superintendente shinami sirvinajun. Mike huauquiguca ninmi: “Jehova Diosca ñucanchi mañaicunataca siempremi contestashca ñucanchi munashcashna na contestashpapash ñucanchi mañashcacunataca ashtahuan yalitami contestashca”.

17, 18. Salmo 86:6, 7​pi nishcashnaca ¿imatata seguro cai ushapanchi?

¹⁷ (Salmo 86:6, 7​ta liipangui). Davidca Jehová Dios paipa mañashcacunata uyashpa contestajtaca seguromi carca. Quiquinbashmi quiquinba mañaicunata Jehová Dios uyashpa contestajtaca seguro caita ushapangui. Cai temapi yachajushca ejemplocunaca llaquicunata aguantashpa catichun Jehová Dios ali yachaita cushpa, fuerzata cushpa ayudajtami ricupashcanchi. Shinallata ñucanchita ayudangapaca huauquipanicunata, Jehová Diosta na sirvij gentecunatapash utilizai ushashcatami ricupashcanchi.

¹⁸ Jehová Dios ñucanchi mañaicunata ñucanchi munashcashna na contestashpapash ñucanchi mañaicunataca siempremi contestan. Minishtijuj horaspimi ñucanchi mañaicunataca siempre contestanga. Shinaca tucui shunguhuan mañashpa catipashunchi. Shinallata ñucanchita cuidanata, paraíso alpagupi ‘causaita charijcunatapash, tucuicunata ninanda bendicianata’ seguro capashunchi (Sal. 145:16).