1. Jehová Diosca ¿imata rurachunda munan? (Fotocunata ricupangui).

 LLAQUILLA cashpa tranquilo, ali sintiringapaj o ali decisionda agllai ushangapaca ¿pipa ayudatata mañai ushapanchi? Jehová Diospa ayudatami mañana capanchi. Shinallata paipa ayudata siempre mañachun munashcatapashmi yachapanchi. Chaimandami Bibliapica: “Taita Diostaca siempremi mañariana capanguichi” nishpa animan (1 Tes. 5:17). Jehová Diostaca imagupi cashpapash con confianzami mañaita ushapanchi. Shinallata ñucanchi causaipi ali decidi ushangapapashmi paipa ayudata mañaita ushapanchi (Prov. 3:5, 6). Jehová Dios juyaj Dios caimandami ñucanchicunaca maipi cashpa o ima hora cajpipash siempre paita mañaita ushapanchi.

2. Cai temapica ¿imatata yachajupashun?

² Jehová Diosta mañanaca shuj jatun bendicionmi can. Shinapash huaquinbica ocupado ocupado yalimandami Jehová Diosta mañangapaj tiempota llujchinaca ashata shinllimi can. Na cashpaca “Jehová Diosta mañanataca ashtahuanmi mejorana cani” yashpami pensaita ushapanchi. Chaita rurai ushangapaca Bibliapi ali consejocunatami charipanchi. Cai temapica Jesuspa ejemplota catishpa Taita Diosta mañangapaj tiempota llujchina cashcatami yachajupashun. Shinallata Jehová Diosta mañanata ashtahuan mejorangapaca cinco minishtirishca cosascunamanda mañai ushashcatami ricugripanchi.

3. Jesusca ¿imatata yacharca?

³ Jesusca oracionguna Jehová Diospa importantepacha cashcataca alimi yacharca. Jesús cai alpaman nara shamushpallatami Jehová Diosca paipa sirvijcunapa mañaicunata contestajta ricurca. Por ejemplo, Ana, David, Elías y shuj gentecunapa mañaicunata  Jehová Dios imashna contestajtami Jesusca ricurca (1 Sam. 1:10, 11, 20; 1 Rey. 19:4-6; Sal. 32:5). Chaimandami Jesusca paipa discipulocunataca Jehová Diostaca con confianzami siempre mañana canguichi nishpa animarca (Mat. 7:7-11).

4. Jesusmandaca ¿imatata yachajupanchi?

⁴ Jesusca paipa discipulocunamanga shuj ali ejemplotami curca. Jesús cai alpapi cashpaca cutin cutinmi Jehová Diostaca mañan carca. Paica ocupado ocupadomi yalin carca. Shinallata ashtaca gentecunami paitaca catin carca. Chaimandami Jehová Diosta mañangapaca tiempota llujchingapaj esforzarina carca (Mar. 6:31, 45, 46). Jesusca tutamandata jatarishpami Jehová Dioshuan parlangapaj tiempota llujchin carca (Mar. 1:35). Shuj viajeca Jesusca tuta enteromi shuj importante decisionda ali agllangapaca Jehová Diosta mañarca (Luc. 6:12, 13). Jesusca pai huañungapaj shuj tuta faltajujpica Jehová Diosta cutin cutinmi mañarca. Chai viaje Jehová Diospa mandashcata pactachina ashtahuan difícil canata yachaimandami Jesusca shina mañarca (Mat. 26:39, 42, 44).

5. Jehová Diosta mañajushpaca ¿imashinata Jesuspa ejemplota catita ushapanchi?

⁵ Jesuspa ejemplota catishpami ocupado ocupado cashpapash Jehová Diosta mañangapaj tiempota llujchina capanchi. Jesushnallatami ima horas Jehová Diosta mañanataca ñamanda agllashcalla charina capanchi. Chaita rurangapaca talvez tutamandata jatarishpa o tutacaman quidashpami Jehová Diostaca mañaita ushapanchi. Shina rurashpami Jehová Diosta mañana ñucanchipa ninan valishca cashcata ricuchipanchi. Lynne shuti paniguca Jehová Diosta mañashpa paihuan parlai ushashcata yachajushpaca ninan agradicishca sintirishcatami yaripan. Paica: “Jehová Dios ima horapash ñucata uyangapaj listo cashcata yachajushpaca paitaca shuj ali amigotashnami ricui callarircani. Y paita mañajushpaca ashtahuan mejorana metatami churarircani” ninmi. Seguromi ashtacacunaca cai panigushnallata sintiripanchi. Cunanga ima cinco importante cosascunamanda Jehová Diosta mañai ushashcata ricupashun.

6. Apocalipsis 4:10, 11​pi nishcashnaca Jehová Diosca ¿ima derechotata charin?

⁶ Jehovata alabapashunchi. Apóstol Juanga 24 ancianocuna jahua cielopi Jehová Diosta adorajushcatami shuj muscuipishna ricurca. Paicunaca Jehová Diosta alabashpami “quiquinmi jatunyachi tucuna derechotapash y respetai tucuna derechotapash charipangui” ninajurca (Apocalipsis 4:10, 11​ta liipangui). Angelcunapash Jehová Dioshuan jahua cielopi  cashcamandami paitaca ali ali rijsin. Chaimandami paicunaca Jehová Diosta alaban y respetan. Jehová Dios imata rurajta ricushpami angelcunaca paita ashtahuan ali rijsita ushan. Chaimandami paita ashtahuan alabana munaita charin (Job 38:4-7).

7. Jehová Diosta mañajushpaca ¿imashinata paitaca alabaita ushapanchi?

⁷ Jehová Diosta mañajushpaca ñucanchicunapashmi paitaca alabana capanchi. Paita alabangapaca paimanda imata gushtashcata y imamanda alicachishcatami nita ushapanchi. Shinallata Bibliata estudiajushpaca Jehová Diospa ali cualidadcunata ricungapaj y cai cualidadcunata imamanda gushtashcata ricungapaj esforzaripashunchi (Job 37:23; Rom. 11:33). Jipamanga Jehová Diospa cualidadcunata yachaimanda imashina sintirishcata paiman villashpa mañapashunchi. Shinallata Jehová Dios ñucanchita ayudashcamanda y shuj huauquipanicunatapash ayudashcamandami paitaca alabaita ushapanchi. Jehová Diosca ñucanchita cuidashpa ayudangapaca siempremi listo can (1 Sam. 1:27; 2:1, 2).

8. Jehová Diostaca ¿imacunamandallata agradicita ushapanchi? (1 Tesalonicenses 5:18).

⁸ Jehovata agradicipashunchi. Jehová Diosta mañajushpaca ashtaca cosascunamandami agradicita ushapanchi (1 Tesalonicenses 5:18​ta liipangui). Imapash ali cosasgucunataca Jehová Dios carajpimi charipanchi. Chaimandami paitaca siempre agradicina capanchi (Sant. 1:17). Por ejemplo, cai alpamanda, cai alpapi Taita Diospa juyailla rurashcacunamanda, causaimanda, familiamanda, amigocunamanda y shuj ali esperanzata carashcamandami agradicita ushapanchi. Shinallata paihuan ali amigo cana bendicionda charishcamandapashmi agradicita ushapanchi.

9. ¿Imamandata agradicinataca huaquinbica cunganchilla?

⁹ Jehová Diosta agradicingapaca ¿ima razongunatata charipanchi? Cai nali mundopi causajushcamandami huaquinbica Jehová Diosta agradicinataca cunganchilla. Gentecunaca paicuna charishca cosasgucunamanda agradicinapa randica, na charishca cosascunata charingapaj munaimandami ashtahuan preocuparin. Ñucanchipash chashna pensai callarishpaca ñucanchicuna imata charingapaj munashcatalla nishpami Jehová Diostaca mañanchiman. Ama shina pensai callaringapaca Jehová Diosta mañajushpaca tucui cosasgucunamanda agradicishpami mañana capanchi (Luc. 6:45).

10. Agradecida canaca ¿imashinata shuj panigutaca ayudarca? (Fotota ricupangui).

¹⁰ Agradicinata yachanaca imapash llaquicunata charishpapash aguantashpa catichunmi ayudan. Cunanga 1 de enero de 2015 Villajun revistapi parlashca Kyung-sook panigupa experienciata ricupashun. Cai panigumanga doctorca: “Pulmonbi cáncer unguitami charingui” nishpami villarca. Paniguca: “Huañugringuimi nijpica na crircanichu. Chai punllaca tucuita chingachishcashna sintirishpami ninanda manllarircani” ninmi. Cai panigu ñaupaman catichunga ¿imata ayudarca? Panigutaca cada tutami nara puñushpallata terrazaman rishpa chai punlla ima picha cosascunapi Jehová  Dios bendiciashcata agradicishpa oracionda ruranami ayudarca. Panigutaca chaita ruranami alillata sintirichun y Jehová Diosta tucui shungu juyashcata nishpa mañachunbash ayudarca. Cai paniguca Jehová Dios paipa sirvijcuna llaquicunata charijpipash ayudangapaj siempre listo cashcatami cuenta japirca. Shinallata problemacunatapash yali Jehová Diospa ashtaca bendiciongunata chari ushashcatapashmi cuenta japirca. Kyung-sook panigushnallatami llaquicunata charishpapash Jehová Diosta agradicingapaca ashtaca razongunata charipanchi. Jehová Diosta agradicishpa mañanaca llaquicunata charishpapash aguantashpa catichun, ama yapata preocuparishpa tranquilo sintirichunmi ayudan.

11. Jesuspa discipulocunaca ¿imamandata na manllashpa shinlli tucunata minishtirca?

¹¹ Na manllashpa predicangapaj Jehová Diospa ayudata mañapashunchi. Jesús jahua cieloman ña tigragrijushpaca paipa discipulocunamanga: ‘Jerusalenbi, tucuilla Judea llactapi, tucuilla Samaria llactapi y mundo entero llactacunapipash ñucamanda villachinaca [importantemi can]’ nishpami yarichirca (Hech. 1:8; Luc. 24:46-48). Asha tiempo jipaca judiocunata ñaupaman pushajcunaca Pedrota y Juanda Sanedrín ñaupamanmi pusharca. Paicunataca Jesuspa shutipi ama villashpa catichunmi amenazarca (Hech. 4:18, 21). Cashna nijpica apostolcunaca ¿imatata rurarca?

12. Hechos 4:29, 31​pi nishcashnaca Jesuspa discipulocunaca ¿imatata rurarca?

¹² Pedro y Juanda amenazajpica paicunaca: “¿Taita Diosta cazunapa randica cangunata cazunami Taita Diospa ñaupapica ashtahuan ali can yashpachu pensanguichi? Pero ñucanchicunaca imata uyashcata, imata ricushcata parlanataca nimamanda na saquita ushanchichu” nircami (Hech. 4:19, 20). Judiocunata ñaupaman pushajcuna paicunata libre saquijpica apostolcunaca chaishuj discipulocunahuanmi tandanajungapaj rirca. Shina tandanajushpami Jehová Diosta mañarca. Paicunaca: “Quiquinba esclavocunataca, na manllashpa quiquinba shimita predicashpa catichun ayudapayari” nircami. Y Jehová Diosca paicunapa mañaitaca uyarcami (Hechos 4:29, 31​ta liipangui).

13. Jin-hyuk huauquigumandaca ¿imatata yachajupanchi?

¹³ Autoridadcuna predicanata prohibijpipash cai discipulocunapa ejemplota catishpami predicashpa catipanchi. Jin-hyuk shuti huauquiguca chaitami rurarca. Cai huauquiguca paipa crishcacunamandami carcelpi carca. Carcelpi cajpica chai huauquigutaca shuj prezocuna imata minishtijujta ricushpa atindichunmi churarca. Chaimandami paicunahuanga imata minishtishcamandalla parlaita usharca. Bibliamandaca na parlai usharcachu. Chaimandami, “na manllashpa shinlli tucungapaj, aliguta yuyashpa parlangapaj ayudahuai” nishpa Jehová Diostaca mañarca (Hech. 5:29). Huauquiguca: “Jehová Diosta mañajpica ama manllashpa, shinlli tucuchunmi ayudahuarca. Chaimandami carcelpica cinco minutogutalla parlana cashpapash huaquin gentecunaman Bibliamanda yachachi callarircani. Carcelpi cashpaca tutacunami cayandi punllapa presocunaman shuj cartaguta entregangapaj escribin carcani” ninmi. Ñucanchicunapashmi predicashpa catichun Jehová Dios ayudanataca confiaita ushapanchi. Jin-hyuk huauquigushnallata na manllashpa, ali yuyashpa villachingapami mañaita ushapanchi.

14. Problemacunata chimbapurai ushachunga ¿imata ayudanga? (Salmo 37:3, 5).

¹⁴ Problemacunata chimbapurai ushangapaj Jehová Diospa ayudata mañapashunchi. Ashtacacunami llaquicunata chimbapuranajupanchi. Por ejemplo, shuj familiar huañujpi, catiriashpa llaquichijpi, salud na ashta ali cashcamanda, depresión unguita o shuj problema emocional nishcata charimanda o familiapi imapash problemacunata charimandami talvez llaquilla  sintirinajupanchi. Ashtahuanbash pandemiacuna, guerracuna tiaimandaca chai llaquicunaca ashtahuanmi mirashca. Chaimandami Jehová Diosman imashinapacha sintirishcata villashpa mañana capangui. Chaimandami imashinapacha sintirishcataca shuj amigoman parlajuj cuenda Jehová Diosman villashpa mañana capangui. Shinaca quiquinba mañashcacunata uyashpa Jehová Dios contestanataca seguromi caita ushapangui (Salmo 37:3 b, 5ta liipangui).

15. Llaquicunata charishpa aguantachunga ¿imashinata Jehovata mañanaca ayudan? Shuj ejemplomanda parlapai.

¹⁵ Siempre Jehovata mañanami problemacunata charishpapash aguantachun ayudanga (Rom. 12:12). Jehová Diosca paipa sirvijcuna ima pasanajujtaca alimi yachan. Chaimandami paicunapa “caparishpa mañashcatapash” uyan (Sal. 145:18, 19). Cai shimicuna cierto cashcatami 29 huatacunata charij Kristie shuti precursora paniguca cuenta japirca. Na yashcapimi cai paniguca shuj millai unguihuan irquiyarca. Chaimandami cai paniguca depresión unguita japirca. Tiempohuanga paipa mama shuj millai unguita charimanda ña huañugrijushcatapashmi yachaj chayarca. Kristie paniguca: “Jehová Diostaca cada punlla aguantashpa catingapami tucui shungu mañarcani. Shinallata espiritual cosascunata rurangapaj, reuniongunaman ama faltangapaj y Bibliamanda ashtahuan yachajungapapashmi esforzarircani. Ashtaca llaquicunata charijpipash Jehovata mañanami ayudarca. Shina situacionbi cajpi Jehová Dios ñucata na saquishcata yachanaca ninandami ayudahuarca. Chai rato na ashtahuan ali sintirijushpapash Jehová Dios ñuca mañashcacunata uyashcata yachanami tranquila, ali sintirichun ayudahuarca” ninmi. Shinaca ‘Jehová Dios, paita tucui shunguhuan sirvij gentecuna pruebacunapi cajpi salvan’ cashcataca nunca na cunganachu capanchi (2 Ped. 2:9).

16. Tentaciongunapi ama urmangapaca ¿imatata rurana capanchi?

¹⁶ Tentaciongunapi ama urmangapaj Jehovapa ayudata mañapashunchi. Imperfectocuna caimandami  imapash tentacionguna ricurijpi ama nalita rurangapaca siempre esforzarina tucupanchi. Shinallata Diabloca cai tentaciongunapi urmachun munaimandami imacunatapash ashtahuan ruran. Por ejemplo, mapa diversiongunahuanmi ñucanchi yuyaita pandachingapaj munan. Cai nali diversiongunaca mapa pensamientocunata charishpa Jehová Diospa ñaupapi ali ricurichunga na saquinllu. Shinallata jatun juchacunapimi urmachita ushan (Mar. 7:21-23; Sant. 1:14, 15).

17. Mañashca jahuapash tentaciongunapi ama urmangapaca ¿imatata rurana capanchi? (Fotocunata ricupangui).

¹⁷ Tentaciongunataca na ñucanchilla mishaita ushapanchichu. Jehová Dios ayudachunmi minishtipanchi. Jesusca: “Ñucanchicuna ima tentacionbi urmachunbash ama saquihuanguichu. Ashtahuangarin, Diablomandaca cuidahuangui” nishpami mañarca (Mat. 6:13). Jehová Diosca ñucanchita ayudangapaca listomi can. Pero ñucanchicunami Jehovapa ayudataca mañana capanchi. Jehovata mañashpallaca na chaipi quidanachu capanchi. Ashtahuanbash nali pensachij cosascunata na liina y na uyanachu capanchi (Sal. 97:10). Ñucanchicunaca ali yuyaicunata charingapaca Bibliata liina, reuniongunaman rina, predicacionmanbashmi llujshina capanchi. Shinallata Jehová Dios quiquinguna aguantai ushashca pruebacunatalla charichun saquisha nishcatapashmi yarina capanchi (1 Cor. 10:12, 13).

18. ¿Imatata tucuicunallata rurana capanchi?

¹⁸ Cai último punllacunapi Jehová Diosta sirvishpa cati ushangapaca paitami ashtahuan mañariana capanchi. Shinaca cada punlla Jehová Diosta tucui shunguhuan mañangapaj tiempota llujchinami capangui. Jehová Diosca “paipaj ñaupajpica, tucui shungu” mañachunmi munan (Sal 62:8).Mañashpaca Jehová Dios quiquinmanda imacunatalla rurashcata yarishpami agradicishpa alabaita ushapangui. Shinallata na manllashpa predicangapaj, problemacuna ricurijpi chimbapurangapaj y tentaciongunata aguantangapapashmi Jehová Diostaca mañana capangui. Jehová Diosta mañashpa catichunga pipash o imapash jarcachunga na saquinachu capangui. Pero Jehová Diosca ¿imashinata ñucanchi mañashcacunataca contestan? Chaitaca cati temapimi yachajupashun.