1, 2. a) Chairalla cazarashcacunaca ¿imamandata Jehová Diospi confiana can? (Salmo 37:3, 4). b) Cai temapica ¿imatata yachajupashun?

QUIQUINGA ¿cazarana yuyaihuan o chairalla cazarashcachu capangui? Shina cashpaca quiquinba juyashca huarmiguhuan o cusahuan cushilla causangapami seguro munapangui. Cusahuarmi causaipica ashtaca llaquicunami tian. Chaimandami callarimandallata ali decisiongunata agllana capanguichi. Quiquinguna Jehová Diospi confiashpa ali decisiongunata agllashpaca quiquingunallatami cushilla ali causai ushapanguichi. Cusahuarmi causaipash alipachami canga. Pero Jehovapa consejocunata na pactachishpaca quiquingunallatami llaquilla caita ushapanguichi, problemacunatapash chari ushapanguichi (Salmo 37:3, 4​ta liipangui).

² Cai temapica chairalla cazarashcacunata ayudangapa cashpapash tucui matrimoniocunata ayudangapami can. Caipica matrimoniopi cushilla causai ushangapaj, Bibliamanda Diosta ali sirvijcunapa ejemplomandami yachajugripanchi. Shinallata cunan tiempopi Jehová Diosta tucui shunguhuan sirvij cusahuarmicunapa ejemplocunamandapashmi yachajupashun.

3, 4. Chairalla cazarashcacunaca ¿ima llaquitata charita ushan?

³ Huaquin llactacunapica chairalla cazarashcacunataca huahuacunata charishpa, tucui cazarashcacunashnallata causachunmi munan. Chaimandami huaquimbica taitamamacuna o  familiacunaca uchalla huahuacunata charichun animan. Shinallata chairalla cazarashcacunataca shuj huasiguta, alpata o cosascunatapash charichunmi animan.

⁴ Cashna yuyaicunamanda na cuidarishpaca talvez ashtaca cosascunata randingapaj munaimandami dibi tucuita ushanman. Chai dibicunata pagangapami talvez ishcandillata ashtahuan trabajana tucunman. Shina rurashpaca estudio personaltaca ñana rurashpa catita ushanmanllu. Shinallata cada semana paipa familiahuan Bibliaguta estudiangapa, villachingapapashmi tiempogutaca ñana charinman. Shinallata culquita ashtahuan ganangapaj horas extrata trabajaimandami tandanajuicunamanbash faltai callarinman. Shina rurashpaca Jehová Diosta sirvina oportunidadcunatami na aprovechaita ushanman.

5. Klaus y Marisa cusahuarmimandaca ¿imatata yachajupangui?

⁵ Ashtaca cosascunatalla charingapaj yapata trabajashpa yalinaca cushilla causaigutaca na cunllu. Chaitaca Klaus y Marisa cusahuarmipa ejemplohuanmi ricuita ushapanchi.  * Paicunaca chairalla cazarashpaca ali causangapaj munaimandami ishcandillata trabajai callarirca. Shinapash paicunaca na tucuipi cushilla carcachu. Huauqui Klausca ninmi: “Ñucanchicunaca tucui imata minishtishcatami charircanchi. Shinapash Jehová Diosta ashtahuan sirvingapaj esforzarina munaica na tiarcachu. Ciertota parlashpaca trabajaitalla trabajashpa yalijuimandami estresado, preocupado yalin carcanchi” nin. Talvez quiquinbashchu ashtaca cosascunata charina munaica na cushilla causaita cujta cuenta japipashcangui. Shina cashpaca ama desanimaripaichu shujcunapa ali ejemplocunami quiquindaca ayudaita ushan. Shinaca callaripica rey Jehosafatmanda cusacuna imata yachajui ushashcata ricupashunchi.

6. Proverbios 3:5, 6​pi nishcashnaca, rey Jehosafat llaquipi cashpaca ¿imatata rurarca?

⁶ Cusacunaca huaquinbica familiata cuidana responsabilidadta charimandami preocupado sintirin. Shina pasajujpica rey Jehosafatpa ejemplomi cusacunataca ayudaita ushan. Jehosafatca rey caimandami paipa llactamanda gentecunata cuidana responsabilidadta charirca. Chaimandami paipa llactata cuidangapaca Judá llactapica jatun pircacunata shayachishpa, shinallata 1 millón 160​mil yali soldadocunatapash tandachirca (2 Crón. 17:12-19). Tiempo yalishca jipaca amonitacuna, moabitacuna y Seír pushtumanda gentecunahuan tandanajushpami, rey Jehosafatta y tucuilla chaipi causajcunatapash llaquichingapaj munanajurca (2 Crón. 20:1, 2). Chai llaquipi cashpaca, rey Jehosafatca ¿imatata rurarca? Rey Jehosafatca Proverbios 3:5, 6 shimicunatami pactachirca (chai textota liipangui). Paica Jehová Diostami ayudahuai nishpa mañarca. Rey Jehosafatpa mañashcataca 2 Crónicas 20:5-12​pimi taripanchi. Chaipimi Jehová Diospi tucui shunguhuan confiashcata ricupanchi. Paipa mañashcata Jehová Dios uyashcataca ¿imashinata ricuchirca?

7. Rey Jehosafatpa mañaita uyashcataca ¿imashinata Jehová Diosca ricuchirca?

 ⁷ Jehová Diosca Jahaziel shuti levitata utilizashpami rey Jehosafatpa mañaita uyashcata ricuchirca. Jehosafattaca Jehová Diosca: “Cangunaca, Mandaj Dios ñuca, cangunata imashna quishpichijta ricushpa, casilla shayanajunallami canguichi” nishcarcami (2 Crón. 20:13-17). Shinaca Jehová Diosca rey Jehosafattaca macanajungapaj rishpaca ama imatapash ruranguichichu nishcarcami. Jehosafatca Jehová Diostaca tucuipimi cazurca. Chaimi Rey Jehosafat guerraman rishpaca alipacha macanajuj soldadocunata ñaupa filapi churanapa randica, candanata yachaj jaricunatami ñaupa filapica churarca. Jehová Diosta cazushcamandami Jehosafatca chai guerrapi paipa tucui contracunata mishai usharca (2 Crón. 20:18-23).

8. Cusacunaca Jehosafatpa ejemplomandaca ¿imatata yachajui ushan?

⁸ Rey Jehosafatmandaca cusacunaca ¿imatata yachajuita ushan? Cusacunami familiapica paipa familiata ali cuidana responsabilidadta charin. Chaimandami cusacunaca chaita ali pactachingapaj esforzarinajun. Cusacunaca cai responsabilidadta charimandami familiapi problemacuna ricurijpica paicunalla chai problemacunataca solucionana canchi yuyan. Shinapash chashna pensanapa randica cusacunaca Jehová Diospa ayudatami mascana can. Paipa huarmiguhuanbashmi, Jehová Diostaca mañana can. Jehovapa ayudataca Bibliapi, Jehová Diospa organización cushca publicaciongunapipashmi mascana can. Chaipi yachajushca consejocunatami pactachingapaj esforzarina can. Huaquingunaca Bibliapi yachajushcashna imatapash rurai callarijpimi nalicachishpa ricuita ushan. Paicunaca Bibliapa consejocunata catinapa randica culquita charina, cosascunata charinami ashtahuan cushilla causaita cunga nita ushan. Shinapash ñucanchica Jehosafatpa ejemplotami yarina capanchi. Paica Jehová Diospi confiashcataca ruraicunahuanmi ricuchirca. Shina rurashcamandami Jehová Diosca Jehosafattaca siempre cuidarca, nunca na saquircachu. Shinallatami ñucanchicunatapash Jehová Diosca paipi confiajpica nunca na saquinga (Sal. 37:28; Heb. 13:5). Shinaca matrimoniocunaca cushilla causai ushangapaca ¿imatata rurai ushan?

9. Profeta Isaiaspa y paipa huarmigupapash ¿imata ashtahuan importante carca?

⁹ Isaiasca paipa huarmigundimi Jehová Diostaca paicunapa tucui causaipi sirvirca. Isaiasca profetami carca y paipa huarmigupashmi talvez profetallata cashcanga. Chaimi Bibliapica paipa huarmigumanda parlashpaca profetisa nin (Is. 8:1-4). Cai cusa huarmipaca Jehová Diosta sirvinami tucuimanda yali ashtahuan importante carca. Chaimandami cai cusa huarmicunaca shuj cusahuarmicunapaca alipacha ejemplocuna can.

10. Bibliapa profeciacunamanda yachajunaca ¿imashinata cusahuarmicunataca ayudan?

¹⁰ Cusahuarmicunaca Jehová Diosta paicunapa causaipi ashtahuan sirvingapa esforzarishpami Isaiaspa y paipa huarmigupa ejemplota catinajushcata ricuchita ushan. Ishcandillata Jehová Diospi shinlli feta charingapami Bibliapi profeciacuna imashina pactarijushcata estudiaita ushan (Tito 1:2). * Por ejemplo Jesusca Diospa Reinomanda ali villaigucunataca mundo enteromanda gentecuna yachachunmi villanajunga. Chai jipami tucurimuica chayamunga nircami. Cusahuarmicunaca cai profeciacuna imashina pactarijujtami pensarita ushan (Mat. 24:14). Bibliapa profeciacuna imashina pactarijushcata seguro cashpami cusa huarmica Jehová Diosta ashtahuan sirvishpa catina munaita charinga.

11. Aquilapash Priscilapash ¿imatata rurarca? ¿Imatata yachajui ushapanchi?

¹¹ Chairalla cazarashcacunaca Aquilamanda Priscilamandapash ashtacatami yachajui ushan. Áquila y Priscilaca Roma llactapimi causan carca. Paicunaca Jesusmanda yachajushpami Jesuspa catijcuna tucurca. Roma llactapi causashpaca paicunaca cushillami causan carca. Shinapash cungashcapimi Roma llactamanda emperador Claudioca tucui judiocunata chai llactamanda llujshichun mandarca. Roma llactamanda rinaca Aquilapapash, Priscilapapash shinllimi cashcanga. Paicunaca shuj mushuj llactamanmi rina carca. Shinallata paicunapa negociotapashmi shuj llactapi callarichina carca. Shina cambiocuna ricurijpica ¿Diospa Reinomanda villachinataca ladomanllu saquirca? Na. Paicunaca Corintio llactapi cashpaca, chai congregacionmanda huauquipanicunata ayudangapa, animangapami apóstol Pablotaca ayudarca. Shinallata shuj tiempo jipaca, publicadorcuna minishtirijuj pushtucunapi villachingapami paicunaca shuj llactacunamanbash rirca (Hech. 18:18-21; Rom. 16:3-5). Paicunaca Jehová Diosta siempre sirvingapaj esforzarimandami cushilla causaiguta charirca.

12. Cusahuarmicuna Jehová Diospa ayudata ashtahuan ricungapaca ¿imatata rurana can?

¹² Cunan punllapi matrimoniocunapash Aquilashna Priscilashnami Jehová Diostaca pundapi churaita ushapanguichi. Caita pactachi ushangapaca novio cashpallatami caicunamandaca parlarina can. Shuj cusahuarmi paicunapa causaipi Jehová Diosta ashtahuan sirvingapaj esforzarishpaca Jehovapa ayudataca ashtahuanmi ricuita ushan (Ecl. 4:9, 12). Cunanga shuj cusahuarmi ima nijta ricupashunchi. Paicunaca Russell y Elizabethmi can. Huauquigu Russellca: “Ñucanchica novio cashpallatami Jehová Diosta ashtahuan sirvinamanda parlarin carcanchi” nin. Panigu Elizabethpash: “Cazarashca jipa Jehová Diosta ashtahuan sirvingapaj munajpi ama imacunapash jarcachunmi novio cashpallata chaitaca parlarin carcanchi” nin. Tiempohuanga paicunaca Micronesia llactaman rishpami publicadorcuna minishtirijuj pushtupi sirvingapaj ri usharca.

13. Salmo 28:7​pi nishcashnaca Jehová Diosta ashtahuan sirvingapaj esforzarijpica ¿imata pasanga?

¹³ Ashtaca cusahuarmicunaca Russell y  Elizabeth matrimoniocunashnami minishtirishca cosascunahuanlla causanata dicidishpa paicunapa tiempotaca gentecunaman ashtahuan villachingapaj, yachachingapaj utilizashca. Shuj cusahuarmi Jehová Diosta ashtahuan sirvina munaita charishpaca chai munaita pactachingapami ashtahuan esforzaringa. Shina rurashpaca ashtaca bendiciongunatami chasquinga. Shinallata Jehová Dios paicunata imashina ashtahuan cuidajta ricushpami Jehová Diospica ashtahuan confianga. Shuj cushi causaigutapashmi chari ushanga (Salmo 28:7​ta liipangui).

14. Mateo 6:25, 31-34​pi nishcashnaca ¿imashinata apóstol Pedro paipa huarmigupash Jehovapa nishcacunapi confiashcata ricuchirca?

¹⁴ Apóstol Pedropash y paipa huarmigupash ali ejemplocunami can. Jesusta rijsishcamanda sucta quillacuna jipaca, apóstol Pedroca paipa causaipica shuj importante decisiondami agllana tucurca. Apóstol Pedrota Jesús ñucata catihuai nij horasca familiata mantiningapami Pedroca pescadocunata japishpa trabajajurca. Chaimandami apóstol Pedroca paipa familiapipash pensarishpa shuj ali decisionda japina carca (Luc. 5:1-11). Apóstol Pedroca shuj ali desicionda japishpami villachinapica Jesustaca cumbanata dicidirca. Chai decisionda paipa huarmigu apoyashcataca ¿imamandata seguro capanchi? Bibliapica Jesús huañushpa causarishca jipaca, apóstol Pedrotaca paipa huarmiguca huaquin viajecunata cumbashpa rin cashcatami ricuchin (1 Cor. 9:5). Shinaca paipa huarmigu paita tucuipi apoyashcamandami apóstol Pedroca shuj cusa huarmicunamanga ali consejocunata cungapapash seguro sintirishcanga (1 Ped. 3:1-7). Shinaca apóstol Pedro, paipa huarmigupash Diospa Reinotara pundapi churashpami Jehová Dios cusha nishca bendiciongunapi tucui shunguhuan confiashcata ricuchirca (Mateo 6:25, 31-34​ta liipangui).

15. Tiago y Esther cusahuarmimandaca ¿imatata yachajui ushapanchi?

¹⁵ Quiquinguna huaquin huatacunata ña cazarashca cashpaca, Jehová Diosta ashtahuan sirvi ushangapaca ¿imatata rurana capanguichi? Chaipaca shuj matrimoniocuna Jehová Diosta ashtahuan sirvingapaj imacunatalla rurashcatami ricui ushapanguichi. Por ejemplo, JW Library^® aplicacionbimi, experienciacuna nishca partepi, Jehová Diosta sirvishcamanda bendicionguna nishca videocunata ricui ushapanguichi. Cashna experienciacunata liinami publicadorcuna minishtirijuj pushtupi sirvina munaita charichun Brasilmanda Tiago y Esther cusahuarmitaca ayudarca. Huauqui Tiagoca: “Cai experienciacunapica Jehová Dios paipa sirvijcunata imashina ayudashpa cuidashcatami ricurcanchi. Chaimandami ñucanchipash chashnallata experienciacunata charingapa munarcanchi” nin. Tiempohuanga paicunaca Paraguay llactapi sirvingapami rirca. Paicunaca 2014 huatamandami portugués shimita parlaj congregacionbi sirvinajushca. Esther paniguca: “Ñucanchica Efesios 3:20​pi textotami ninanda gushtanchi. Jehová Diosta tucui shunguhuan sirvishcamanda cai shimicuna ñucanchi causaipipacha pactarishcatami ricupashcanchi” nin. Apóstol Pabloca Efesios congregacionman cai cartata escribishpaca, ñucanchipa mañashcatapash yalimi, Jehová Diosca caranga nircami. Cai shimicunaca siempremi pactarijushca.

16. Jehová Diosta ashtahuan sirvingapaj munashpaca chairalla cazarashca cusahuarmicunaca ¿picunapa ayudatata mascaita ushan?

¹⁶ Chairalla cazarashca cusahuarmicunaca, tauca huatacunata Jehová Diosta sirvinajuj cusahuarmicunamandaca ashtacatami yachajui ushapanguichi. Huaquin cusahuarmicunaca ashtaca huatacunatami Jehová Diostaca tiempo  completopi sirvinajushca. Chaimandami quiquinguna Jehová Diosta ashtahuan sirvingapaj munashpaca, paicunapa consejota mañanalla capanguichi. Chaita rurashpaca Jehová Diospi confiashcatami ricuchi ushapanguichi (Prov. 22:17, 19). Anciano huauquicunapashmi Jehová Diosta ashtahuan sirvina munaita charichun y chai munaicunata pactachichunbash ayudaita ushan.

17. Klaus y Marisa cusahuarmitaca ¿imata pasarca? Caimandaca ¿imatata yachajui ushapanchi?

¹⁷ Jehová Diosta ashtahuan sirvingapaj ali decisiongunata agllashca cajpipash, huaquinbica na ñucanchi munashcashnaca llujshinllu. Por ejemplo, párrafo 4​pi parlashca Klaus y Marisaca quimsa huatacuna cazarashca jipallami, paicunaca paicunapa huasita saquishpa Finlandia sucursalpi construccionbi ayudangapaj rirca. Paicunaca chaipi ashtahuan tiempota quidangapami munarca. Pero paicunaca 6 quillacunacamanlla quidai ushashcatami yachaj chayarca. Chaimi llaquilla sintirirca. Shinapash jipamanga árabe shimita yachajungapaj shuj cursomanmi invitarca. Cunanga shuj llactapimi árabe shimita parlaj congregacionbi cushilla sirvinajun. Paicunapa experienciamandaca, panigu Marisaca ninmi: “Jehová Diosta sirvi ushangapaj ñucanchi causaipi jatun cambiocunata ruranaca na fácil carcachu. Shinapash ñucanchica Jehová Dios ñucanchita tucuipi ayudashcatami ricupashcanchi. Jehová Diospipash ashtahuanmi confiapanchi” nin. Shinaca imashina ricupanchi Jehová Diospi tucui shunguhuan confiajpica, seguromi Jehová Diosca ñucanchitaca ninandami bendicianga.

18. Jehová Diospi confiashpa catingapaca ¿imatata cusahuarmicuna rurana can?

¹⁸ Jehová Diosca cusahuarmicuna cushilla, ali causachunmi munan (Prov. 5:18; Mat. 19:5, 6). Chairalla cazarashcacuna ¿Jehovata ashtahuan sirvingapaj esforzarinajupanguichichu? Quiquingunaman Jehová Dios tucuita cushcamanda agradicishcataca ¿imashinata ricuchinajupanguichi? Jehová Diospi confiashpa catingapaca paita mañashpa, Bibliamanda consejocunatapash ñucanchi causaipi pactachinami capanchi. Quiquingunapa causaipi Jehová Diosta ashtahuan sirvingapaj esforzarishpaca quiquingunapa cazarashca causaipica cushillami causapanguichi.