MAS O MENOS 2691 huatacuna huashamanga Asiria llactaca chai tiempopi shuj llactacunahuan ricujpica, ashtahuan jatun jatun llactami carca. Gran Bretaña llactamanda shuj Museopa informacionbica, “Asiria llactaca Chipremanda Irán llactacamanmi cashca nin. Jipaca Egiptocamanmi jatun jatun cashca” nin. Niniveca Asiria llactapa capitalmi carca. Niniveca shuj llactacunahuan ricujpica ashtahuan jatun jatunmi carca. Nínive llactapica alipacha monumentocunata charishcamanda, juyailla jardingunata charishcamanda, juyailla jatun jatun huasicunata, jatun jatun bibliotecacunata charishcamandami jariyashcacuna carca. Cunan punllacunapica punda tiempo Nínive llactapi tiashca ashtaca jatun pircacunapica chai llactamanda reycuna imata pensan cashcata, escribishpa saquishcatami tarishca. Chai reycunaca mundo enteropa reycunami canchi nishpami nin cashca. Chai tiempopica Asiria, Nínive llactatapash pipash na mishai ushanashnami ricurijurca.

Shinapash Asiria llactata chai tiempopi pipash na mishai ushanashnalla ricurijuj tiempopipachami, profeta Sofoniasca Jehová Dios chai llactahuan imata ruranata villarca. Profeta Sofoniasca: Taita Diosca “Asiria llactataca tucuchinga. Nínive shuti pueblotapash llaquinayaita tucuchishpami, jichushca pambatashna chaquichishpa saquinga” nircami. Shinallata Asiria llactahuan ima pasanataca, Profeta Nahunmanbashmi villarca. Paica “culquitapash, orotapash japishpa apaichilla. Chushaj, shaijushca llaquinayaita tucuchi tucushcami quedashca. Canda tucui ricujcunami, canmandaca anchurishpa cashna ninajunga: Nínive puebloca, llaquinayaitami tucuchi tucushca” nishpa ninajunga nircami (Sof. 2:13; Nah. 2:9, 10; 3:7). Cai profetacunaman, Jehová Dios nichun cachashca shimicunata shuj gentecuna uyashpaca, “¿Ciertopachachu caica pasanga? yanajushcangami. Asiria llactataca ¿pishi mishai ushanga? yanajushcangami”.

Shinapash na crinaitami pasarca. Más o menos 2621 huatacuna huashamanga, Media shuti llactamanda gentecuna y Babilonia llactamanda gentecunahuan tandanajushpami Asiria llactataca macanajushpa misharca. Shinaca tiempohuanga Asiria llactapa Nínive capitalca, asha ashami tucurishpa rirca. Nínive llactamanda parlashpaca, Estados Unidos llactapa Museo de Arte Metropolitano nishcapica, cashnami nijurca, “ashtaca huatacuna yalijpicarin gentecunaca Nínive llacta tiashcataca yachaitapash na yacharcachu. Bibliapi parlajushcamandallami Nínive llacta tiashcataca yacharca nin”. Shinallata shuj rijsishca libropa informacionbipash (Biblical Archaeology Society) 1800 huatacunapica gentecunaca Asiria llactapa capital tiashcataca yachaitallapash na yachashcachu” nijurcami. Shinapash, huata 1845​pica Austen Henry Layard arqueólogo o punda causashca gentecunamanda investigaj jarimi, shuj pushtupi allashpa Nínive llacta tiashcataca yachaj chayarca. Chaipimi Nínive llacta shuj jatun, shinlli llacta cashcatapash yachaj chayarca.

Jehová Dios Nínive llactamanda imata nishcataca tucuimi cabal pactarishca. Jehová Diospa nishcacuna siempre pactarijta ricunami, ñucanchicunataca Jehová Diospa nishcacunapi tucui shunguhuan confiashpa catingapaj ayudan. Jehová Diosca Bibliapica tucui gobiernocunata anchuchishpa tucuchinatami nishca y chaica pactaringami (Dan. 2:44; Apoc. 19:15, 19-21).