1, 2. a) Cai temapica ¿imatata ricugripanchi? b) ¿Imamandata Jehová Dios ñucanchita ayudangapaj munashcataca cuenta japipanchi?

 JEHOVÁ DIOSCA llaquicunata o problemacunata aguantashpa catichun, paita cushilla sirvishpa catichunmi ayudaita ushan. Cai temapimi Jehová Dios ñucanchita imashna ayudajta, Jehová ayudajpi ñucanchicuna imata rurana cashcatapash ricugripanchi. Pero primeroca Jehová Diosca “¿Ciertopachachu ñucanchicunataca ayudangapaj munan?” nishca tapuitami ricugripanchi.

² Shinaca apóstol Pablo, Hebreo huauquipanicunaman escribishca cartapi imata nishcata ricupashunchi. Pabloca: “Jehová Diosmi ñucataca ayudahuanga. Ñucaca na manllashachu. Gentecunaca na imatapash rurai ushahuangachu” nircami (Heb. 13:6). Bibliamanda parlaj huaquin diccionariocunapica cai textopi “ayudahuanga” shimita utilizashpaca pipash ayudata minishtijujpi, uchalla ayudaj personamandami parlajun ninmi. Shinaca pipash llaquicunahuan cashpa ayudata mañajujpi Jehová Dios chai personata uchalla ayudajushcapi pensaripashunchi. Cai ejemplopi pensarishpami Jehová Dios ñucanchita tucui shungu ayudangapaj munashcata cuenta japipanchi. Jehová Dios ayudajushcamandami llaquicunata charishpapash cushilla aguantashpa cati ushapanchi.

3. ¿Ima quimsa yuyaicunatata yachajugripanchi?

³ Cushilla aguantashpa catichun Jehová imashna ayudajtaca Isaías libropimi yachajuita ushapanchi. Jehová Diospa ayudahuan Isaías escribishca libropi yuyaicunaca cunanbi Jehovata sirvijcunatapashmi ninanda ayudan. Cai libropica Isaiasca Jehová Dios imashna cashcataca facillla shimicunapimi intindichin. Por ejemplo capítulo 30​pica alipacha comparaciongunahuanmi Jehová Diosca paita sirvijcunata ninanda cuidan cashcata ricuchin. Chaipica Jehová Dios 1) ñucanchi mañaicunata uyashpa  contestajta, 2) ñucanchi imata rurana cashcata yachachijta, 3) Jehová Dios cunanbi ñucanchita imashna bendiciajta y jipa punllacunapipash imashna bendicianatapashmi ricuchin. Shinaca cai quimsa yuyaicunamanda ashtahuan yachajupashunchi.

4. a) Isaiaspa tiempopi causaj judiocunamandaca ¿imatata Jehová Diosca nirca? Paicunahuanga ¿imata pasarca? b) Jehová Diosta cazuj judiocunataca ¿imatata nirca? (Isaías 30:18, 19).

⁴ Isaías libropa capítulo 30 callari versocunapica, Jehová Diosca judío gentecunataca ‘ñucamanda anchurij huahuacuna’, ‘ashtahuan ashtahuan juchata rurashpa mirachijcuna’ canguichi nishcatami ricuchin. Shinallata: ‘Cai gentecunaca na cazuj, Mandaj Diosta na uyangapaj munajcunami’ can nircami (Is. 30:1, 9). Judiocuna na cazushcamanda Jehová Dios paicunata llaqui apachun saquina cashcatami profeta Isaiasca nirca (Is. 30:5, 17; Jer. 25:8-11). Chaimandami Babiloniamanda gentecunaca judío gentecunataca prezo aparca. Shinapash Jehová Diosca paita cazuj judiocunata shuj punlla libre saquichun ayudanatapashmi profeta Isaiasca nirca (Isaías 30:18, 19​ta liipangui). Isaías nishcashnami Jehová Diosca judío gentecuna Babilonia llactamanda libre quidachun ayudarca. Pero chaica na ñapash pactarircachu. Bibliapica: “Mandaj Diosca, cangunata llaquingapaca shuyangarami” ninmi. Cai shimicunaca Jehová Diosca judiocunata ayudangapaj tiempo yalichun saquishcatami ricuchin. Shinaca 70 huatacuna yalishca jipami judiocunaca Jerusalenman cutin tigrai usharca (Is. 10:21; Jer. 29:10). Judío gentecuna paicunapa llactaman cutin tigrashpaca ninanda cushijuimandami huacaitapash huacarca.

5. Isaías 30:19​pica ¿imata nishpata animan?

⁵ Bibliapica: “Cangunata llaquij Diosca juyangami. Diosca, canguna huacashpa caparinajujta uyashcandimi tigrachinga” ninmi. Cai shimicunaca ñucanchitaca ninandami animan (Is. 30:19). Cai textopica Jehová Diosca ñucanchi mañaicunata uyashpa ñapash contestan cashcatami ricuchin. Shinallata profeta Isaiasca Diosca “uyashcandimi tigrachinga” nircami. Cai shimicunaca Jehová Dios ñucanchita ayudangapaj listo cashca jahuapash tucui shungu ayudangapaj munashcatami ricuchin. Caita yachanami ima llaquicunata charishpapash aguantashpa cushilla catichun ayudanga.

6. ¿Imashinata ñucanchi mañaicunata Jehová Dios paipacha uyaj cashcata seguro capanchi?

⁶ Cai textopica Jehová Diosca cada unomanda preocuparishpa ñucanchi mañaicunata uyan cashcatapashmi ricuchin. ¿Imamandata shina nipanchi? Isaías capítulo 30​pa callari shimicunaca paipa sirvijcunamanda parlashpami “canguna” nin. Cutin verso 19​pica “can” ninmi. Shina nishpaca cada unomanda parlajushcatami ricuchin. Chaimanda parlashpami Isaiasca: Canga ‘na ashtahuan huacanguichu’, canda “llaquij Diosca juyangami”, canda “uyashcandimi tigrachinga” nircami. Jehová Diosca juyaj Dios caimandami paipa sirvijcuna desanimarishca cajta ricushpaca “camba huauquishna shinllimi cana cangui” nishpaca na comparanllu. Chaipa randica Jehová Diosca cada unomanda ninanda preocuparishpami ñucanchi mañaicunata paipacha uyashpa ayudan (Sal. 116:1; Is. 57:15).

7. Jehová Diosta mañanamandaca ¿imatata profeta Isaías y Jesuspash nirca?

⁷ Imapash problemacunamanda ninanda preocuparishpa Jehová Diosta mañajpica paica ñucanchicuna chai problemacunata chimbapurashpa ñaupaman catichunmi fuerzata cushpa ayudan. Shinapash ñucanchi munashcashna chai problemacuna na ucha arreglarijpica chai problemacunata aguantashpa catingapami Jehová Diostaca cutin cutin mañana tucupashun. Jehová Diosca paita shina mañachunmi  ñucanchicunataca animan. Caimanda parlashpami Isaiasca: Jehová Diostaca ‘samachunga na saquina canguichichu’ nirca (Is. 62:7). Cai shimicunata nishpaca Jehová Diostaca cutin cutin mañana cashcatami nirca. Caimandallata parlashpami Jesusca Lucas 11:8-10, 13​pipash shinallata nirca. Paica huaquin ejemplocunata churashpami Jehová Diostaca ‘cutin cutin mañachun’, paipa espíritu santotapash mañashpa catichun animarca. Shinallata ali decisiongunata japingapaj ayudahuai nishpapashmi Jehová Diostaca mañaita ushapanchi.

8. Isaías 30:20, 21​pi shimicunaca ¿imashinata pactarirca?

⁸ (Isaías 30:20, 21​ta liipangui). Babiloniamanda soldadocunaca Jerusalén llactataca shuj huata chaupitami atacangapaj muyurca. Chai tiempopica Babiloniamanda soldadocunaca judío gentecunataca ninandami sufrichinajurca. Chaimandami versículo 20 y 21​pica Jehová Diosca israelitacunataca, ñucata cazushpa y nali ruraicunamanda arrepintirijpica ñucallatami cangunataca salvasha nirca. Isaiasca Jehová Diosmi israelitacunapa ali “Yachachij” can nircami. Jehová Diosllata paita imashna adorana cashcata israelitacunaman yachachinatapashmi nirca. Profeta Isaiaspa shimicunaca Babilonia llactamanda judiocuna libre quidajpimi pactarirca. Jehová Diosca judiocunata pai munashcashna adoranatami yachachishpami Jehová Diosca ali yachachij cashcata ricuchirca. Cunan punllacunapipashmi Jehová Diosca ñucanchimanga yachachishpa catin. Chaimandami ninanda cushijupanchi.

9. Cunan punllacunapica Jehová Diosca ¿imata utilizashpata ñucanchicunataca yachachin?

⁹ Jehová Dios ñucanchicunata yachachishpa catijushcamandaca ninandami cushijupanchi. Cai textocunapica Jehová Diosca ñucanchicunata shuj estudiantecunatashna ishcai formata utilizashpa yachachin cashcatami ricuchin. Primer formapica Isaiasca: Yachachijtaca, “cangunapaj ñavihuambachami ricunguichi” nircami. Jehová Diosca estudiantecunapa ñaupapi yachachijunshnami can nircami. Shinaca ¿imashinata cunan punllacunapipash Jehová Diosca yachachijun? Paica paipa organizacionda utilizashpami yachachin. Chaipaca reuniongunata, asambleacunata, publicaciongunata, JW Broadcasting® programacunata y shuj cosascunata utilizashpami ñucanchicunataca yachachin. Cashna ñucanchicunata yachachishcamandami ima llaquicunata charishpapash aguantashpa cushilla ñaupaman catita ushapanchi.

10. Taita Diostaca ¿imashinata uyapanchi?

¹⁰ Isaiasca Jehová Diosca shuj formapipash  yachachin cashcatami nirca. Paica: ‘Cangunapaj huashamanda, cashna nijtaca cangunapaj rinrihuambachami uyanguichi’ nircami. Profeta Isaiasca Jehová Dios shuj alipacha yachachij caimanda estudiantecuna maijan ñanda rinata ricuchishpami catijun nircami. Cunan punllacunapica Jehová Diostaca ¿imashinata uyapanchi? Bibliata liishpami paitaca uyaita ushapanchi. Biblia ashtaca huatacuna huashaman escribishca cajpipash Bibliata liishpaca Jehová Dios ñucanchi huashamanda parlajujtashnami sintita ushapanchi (Is. 51:4).

11. ¿Imata rurashpata Jehová Diosta cushilla sirvita ushapashun?

¹¹ Jehová Dios paipa organizacionda y Bibliata utilizashpa yachachishcacunata ali aprovechangapaca ¿imatata rurana capanchi? Profeta Isaiasca ishcai cosascunatami nirca. Primeroca “Ñanga caitamari”, catipica “Cai ñanda purichi” nircami (Is. 30:21). Shinapash cai ‘ñanda’, rijsinallaca na minishtirinllu. Ashtahuanbachaca cai ñanbimi purina canchi. Shinaca Bibliata charimanda y Jehová Diospa organizacionbi mushuj explicaciongunata cushpa ayudajushcamandami ninanda cushijupanchi. Jehová Dios ñucanchicuna imata rurachun munashcata y paipa yachachishcacunata pactachingapaj imata rurana cashcatapashmi yachajupanchi. Cai ishcai cosascunata pactachishpallami ima llaquicunata charishpapash aguantashpa Jehová Diosta cushilla sirvita ushapashun. Shinallata Jehová Dios ñucanchicunata bendicianatapash seguro caita ushapashun.

12. Isaías 30:23-26​pi nishcashnaca ¿imashinata Jehová Diosca israelitacunataca bendiciarca?

¹² (Isaías 30:23-26​ta liipangui). Cai textopi profeciaca ¿imashinata pactarirca? Babilonia llactamanda libre quidashca judío gentecuna Israel llactaman tigrashpaca ashtaca bendiciongunatami chasquirca. Judío gentecuna Israel llactaman tigrajpica Jehová Diosca ashtaca ashtaca micunacunatami cararca. Shinallata pai munashcashna adorachun y espiritualmente ñaupaman catichunmi ashtahuan yachachishpa catirca. Cai yachachishcacunami micunamandapash ashtahuan yali importante carca. Israelitacunaca ima horapash na bendiciai tucushcatami ashtaca bendiciongunata chasquinajurca. Verso 26​pi nishcashnami Jehová Diosca punchapamba michagushna paipa yachachishcacunata ali intindichun ayudarca (Is. 60:2). Jehová Dios shina bendiciajushcamandami israelitacunaca shinlli tucushpa Jehová Diostaca cushilla sirvishpa cati usharca (Is. 65:14).

13. Profeta Isaías nishca profeciaca ¿imashinata cunan punllacunapipash pactarijushca?

¹³ Profeta Isaías nishca profeciaca ¿imashinata cunan punllacunapipash pactarijushca? 1919 huatapimi ashtaca millón gentecunaca  panda religionmanda, panda yachachishcacunamanda libre quidashca. Paicunataca Jehová Diosca shuj paraíso espiritualpi cachunmi ayudashca (Is. 51:3; 66:8). Shinapash paraíso espiritualca ¿imata can?

14. Paraíso espiritualca ¿imata can? Chaipica ¿picunata causan? (Notata ricupangui).

¹⁴ 1919 huatamandami ungido huauquipanicunaca cai paraíso espiritual nishcapi o Jehová Diosta shujllashna tandanajushpa sirvina bendicionda charishca. b Cai alpapi para siempre causana esperanzata charij gentecuna o ‘shuj llamagucuna’ nishcacunapashmi cai paraíso espiritualman yaicushca. Paicunaca Jehová Diospa ashtaca bendiciongunatami chasquishca (Juan 10:16; Is. 25:6; 65:13).

15. Paraíso espiritualca ¿maipita can?

¹⁵ Paraíso espiritualca ¿maipita can? Mundo enteromanda huauquipanicunahuanmi Jehová Diosta shujllashna tandanajushpa sirvina bendicionda charipanchi. Chaimandami paraíso espiritualca cai alpapillatami can nipanchi. Shinaca maipi causashpapash cai paraíso espiritualpi catingapaca Jehová Dios munashcashna siempre adorangapami esforzarina capanchi.

16. Jehová Diosta shujllashna tandanajushpa sirvishpa catingapaca ¿imatata rurana capanchi?

¹⁶ Jehová Diosta shujllashna tandanajushca sirvishpa catingapaca mundo enteromanda huauquipanicunata valorashpami catina capanchi. Chaitaca ¿imashinata rurapanchi? Huauquipanicunapa pandarishcacunata ricunapa randica paicunapa ali cualidadcunata ricungapami esforzarina capanchi (Juan 17:20, 21). ¿Imamandata chaita ruranaca importante can? Caipi pensaripashun: Shuj jatun bosquepica tucui clase quirucunami tian. Shinapash shuj vishtu quirutalla ricujushpaca bosque entero juyailla cashcataca na cuenta japishunllu. Shina cuendallatami ñucanchi organizacionbipash shuj shuj llactamanda huauquipanicunata charipanchi (Is. 44:4; 61:3). Pero huauquipanicunapa pandarishcacunatalla ricujushpaca Jehová Diosta shujllashna tandanajushpa sirvina juyailla cashcataca na ricui ushashunllu.

17. ¿Imata rurangapata esforzarina capanchi?

 ¹⁷ Jehová Diosta shujllashna tandanajushpa sirvishpa catingapaca ñucanchi huauquipanicunahuan ali llevaringapami esforzarina capanchi (Mat. 5:9; Rom. 12:18). Huauquipanicunahuan ali llevaringapaj esforzarishpaca Jehovapa organización juyailla ricurichunmi ayudanajupanchi. Jehová Diosmi huauquipanicunataca paipa organizacionman apamushca. Chaitaca siempremi yarina capanchi (Juan 6:44). Jehová Diosca paita sirvijcuna shujllashna tandanajushpa sirvinajujta ricushpa y tucuicunallata ali llevaringapaj esforzarijta ricushpaca ninandami cushijun (Is. 26:3; Ageo 2:7).

18. ¿Imapita pensarina capanchi?

¹⁸ Jehová Diosca ashtaca ayudacunatami paita sirvijcunamanga carashca. Chai ayudacunata aliguta utilizangapaca ¿imatata rurana capanchi? Bibliata y publicaciongunata yachajujushpaca aliguta pensaringapami esforzarina capanchi. Shina aliguta yachajushpa, liishcapi pensarishpami ñucanchicunaca ali cualidadcunata charita ushapashun. Shinami ñucanchi huauquipanicunataca ‘familiatashna juyaihuan’ trataita ushapashun (Rom. 12:10). Jehová Dios ñucanchita imashna bendiciashcata pensarinami paiman ashtahuan quimirichun ayudan. Shinallata shamuj punllacunapi Jehová Dios ima bendiciongunatalla caranapi pensarishpaca para siempre paita sirvina bendicionda chari ushashcataca na cungashunllu. Cai cosascunapi pensarinami Jehová Diosta cushilla sirvishpa catichun ayudanga.

19. a) Isaías 30:18 nishcashnaca ¿imatata seguro caita ushapanchi? b) ¿Imata rurashpata Jehová Diosta cushijushpa sirvita ushapanchi?

¹⁹ Jehová Diosca cai nali mundota tucuchishpami ñucanchitaca protegishpa salvanga (Is. 30:18). Paica “imatapash cashcatapacha ruraj” o alita ruraj Diosmi can. Chaimandami cai nali mundota y nalita rurajcunata tucuchitapacha tucuchinataca seguro cai ushapanchi (Is. 25:9). Chai punlla chayamungacamanga Jehovapash y ñucanchipash pacienciahuanmi shuyanajupanchi. Paipa punlla chayamungacamanga Jehovata mañangapaj, Bibliata estudiangapaj, paipa nishcacunata pactachingapami esforzarina capanchi. Shinallata jipa punllacuna imashina ñucanchita bendicianatapashmi pensarina capanchi. Cai cosascunata rurajpica Jehová Diosca ñucanchicuna ima llaquicunata charijpipash aguantashpa catichun y paita cushilla sirvishpa catichunmi ayudanga.