1. Ñucanchicunaca ¿imatata ali yachapanchi? Pero ¿imatata seguro capanchi?

 PREDICANAJUJPI gentecuna jarcanataca alimi yachapanchi. Jipacunamangarin jarcaicunaca ashtahuanmi ricuringa (Dan. 11:44; 2 Tim. 3:12; Apoc. 16:21). Pero Jehová Dios ñucanchita ayudashpa catinataca seguromi capanchi. ¿Imamandata shina nipanchi? Porque Jehová Diosca paipa sirvijcuna paipa mandashcata pactachichunga siempremi ayudashca. Por ejemplo Babiloniapi caj judiocunaman predicajpi Jehová Dios profeta Ezequielta imashna ayudashcata ricupashunchi.

2. a) Jehová Diosca ¿ima laya gentecunaman Ezequiel predicana cashcatata nirca? (Ezequiel 2:3-6). b) Cai temapica ¿imatata yachajugripanchi?

² Ezequielca ¿ima laya gentecunamanda predicana carca? Jehová Diosca chai gentecunaca “na cazujcuna”, “fiñajcuna”, “shinlli shungu” runacunami can nircami. Paicunaca nalicunapacha y peligrosocunami carca. Chaimandami Jehová Diosca Ezequieltaca “ama manllanguichu” nirca (Ezequiel 2:3-6​ta liipangui). Ezequielca predicachun 1) Jehová cachashcamanda 2) espíritu santo ayudashcamanda y 3) Jehovapa shimimanda yachajushpa catishcamandami Jehová mingashcataca pactachi usharca. Cai quimsa cosascunaca ¿imashinata Ezequieltaca ayudarca? Y cunanbi ñucanchitapash ¿imashinata ayudan? Caitami cai temapica yachajupashun.

3. Ezequielca ¿imamandata cushijurca? Y ¿imatata seguro carca?

³ Jehová Diosca Ezequieltaca “ñucami candaca cachani” nircami (Ezeq. 2:3, 4). Chai shimicunata uyashpaca Ezequielca ninandami cushijushcanga. Chai shimicunatallata utilizashpa Jehová Dios Moisesta, Isaiasta profetacuna cachun agllashcatami Ezequielca yarishcanga (Éx. 3:10; Is. 6:8). Jehová Dios Moisesta y Isaiasta imashna ayudashcataca Ezequielca alimi yachashcanga.  Chaimandami Jehová Dios “ñucami candaca cachani” nijpica, Ezequielca Jehová Dios ayudanataca seguro cashcanga. Ezequiel libropica tauca viajecunatami ‘Mandaj Diosca cai shimicunatami villahuarca’ nishcataca ricupanchi (Ezeq. 14:2; 6:1). Cai shimicunata uyashpami profeta Ezequielca Jehová Dios paita villachun cachashcata seguro cai usharca. Shinallata Ezequielpa taitaca sacerdotemi carca. Chaimandami paica Jehová Dios paipa profetacunata siempre ayudajta yachachishcanga. Jehová Diosca Isaacta, Jacobta y Jeremiastaca ayudarcami. Chaimi paicunataca: “Ñucami canhuan cani” nirca (Gén. 26:24; 28:15; Jer. 1:8).

4. Ezequielca cushilla sintirichunga Jehová Dios ¿imatata nirca?

⁴ Ezequiel villachijpica ¿israelitacunaca uyarcacha? Jehová Diosca Ezequielmanga “israelcunaca, can villashcataca, na uyangapaj munangachu. Paicunaca, ñucata uyangapaca na munajcunami” can nircami (Ezeq. 3:7). Ezequielta na uyashpaca israelitacunaca Jehovata na uyangapaj munashcatami ricuchirca. Jehová nishcata uyashpami Ezequielca tranquilo sintirishcanga. Shinami Ezequielca israelitacuna paita na uyangapaj munajpica na paipa culpamanda cashcata cuenta japirca. Jehová Diosca Ezequielmanga ñuca nishcacuna pactarijpica “paicunapurapi ñucamanda shuj villaj tiashcataca, tucui causaipimi yachanga” nircami (Ezeq. 2:5; 33:33). Cai shimicunata uyashpami Ezequielca Jehovamanda cushilla villachishpa catita ushashcanga.

5. Isaías 44:8​pi shimicunaca ¿imashinata ñucanchicunataca animan?

⁵ Jehová Diosllata ñucanchicunata predicachun cachashcamandami cushilla sintiripanchi. Jehová Diosca paimanda villachina bendiciondami cushca (Is. 43:10). Profeta Ezequielta  “ama manllaichu” nishcashnallatami Jehová Diosca ñucanchitapash “na manllanachu canguichi” nin. Ama villachichun jarcangapaj munajcunataca ¿imamandata na manllana capanchi? Porque Ezequieltashnallatami Jehová Diosca ñucanchita predicachun cachashca. Y paipa ayudatapashmi charipanchi (Isaías 44:8​ta liipangui).

6. a) Jehová Diosca ¿imashinata ayudasha nin? b) ¿Imamandata tranquilo cushilla sintiripanchi?

⁶ Jehová Diosca ñucanchitaca ayudashami ninmi. Por ejemplo “cangunami, ñucamanda villajcuna canguichi” nishca shimicunata nara nishpallatami, “yacuta yalinajujpipash, cangunahuanmi casha. Jatun yacuta yalinajushpapash, na huashajunguichichu. Nina jahuata purinajushpapash, na rupanguichica. Nina rupajushpapash, cangunataca na rupachingachu” nishcarcami (Is. 43:2). Huaquinbi predicanajujpica jatun yacucunashna o rupajuj ninacunashnami shuj shuj jarcaicuna ricurin. Pero Jehovapa ayudahuanmi predicashpa catita ushapanchi (Is. 41:13). Profeta Ezequielta cuendami ñucanchicunatapash predicajpica mayoría gentecuna na uyangapaj munan. Pero ñucanchicuna na ali predicashcamandaimanga na shina pasanllu. Predicashpa catijpi Jehová Dios cushilla sintirishcamandami ñucanchicunapash tranquilo, cushilla sintiripanchi. Apóstol Pabloca: “Taita Diosca cada unomanmi paicunapa trabajomandaca bendicianga” nircami (1 Cor. 3:8; 4:1, 2). Tauca huatacunata precursora caj paniguca “ñucanchicuna predicangapaj esforzarishcamanda Jehová Dios bendiciajta yachaimandami cushilla sintiripani” ninmi.

7. Profeta Ezequielca muscuipishna ricushcata yarishpaca ¿imashinata sintirishcanga? (Callari dibujota ricupangui).

⁷ Ezequielca shuj muscuipishnami Taita Diospa espíritu santo ninan poderta charishcata ricurca. Por ejemplo ninan poderta charij angelcuna y Jehovapa organizacionbash Jehovapa espíritu santopa ayudahuan imacunatalla rurajtami ricurca (Ezeq. 1:20, 21). Profeta Ezequielca chaita ricushpaca ninandami manllarirca. Chaimandami: ‘Chaita ricushpaca, cungurishpa alpaman chayajta cumurircani’ nirca (Ezeq. 1:28). Profeta Ezequielca chai muscuipishna ricushcata yarishpami Jehovapa espíritu santo ayudajpi paiman mingashcata aliguta pactachi ushanataca seguro carca.

8, 9. a) Jehová Diosca ¿imatata Ezequielmanga mandarca? b) Jehová Diosca ¿imashinata Ezequieltaca ayudarca?

⁸ Jehová Diosca Ezequieltaca cashna nishpami mandarca: “Huañuna aichayu runa, jatarishpa shayari. Canhuanmi parlangapaj munani”. Jehová Dios shina nijpi y paipa espíritu santohuan ayudajpimi Ezequielca shinlliyarishpa cutin animarirca. Chaimandami Ezequielca: “Diospaj Espirituca ñuca shunguman shamushpa, shinllitapacha shayachihuarca” nirca (Ezeq. 2:1, 2). Profeta Ezequieltaca ‘Mandaj Diospa maqui’ o Jehovapa espíritu santoca siempremi ayudarca (Ezeq. 3:22; 8:1; 33:22; 37:1; 40:1). Jehová Diospa espíritu santo ayudajpimi Ezequielca judío gentecunaman predicai usharca. Paicunaca ‘shinlli umacuna, shungupi yuyai illajcunami’ carca (Ezeq. 3:7). Jehová Diosca Ezequieltaca nircami: “Ñucami candaca paicunahuan ñavi ñavi rimachun shinllichircani. Paicunahuan chimbapura rimachunmi shinllichircani. Cambaj umataca, shinlli rumitapash yali diamantetashnami rurarcani. Paicunataca ama manllanguichu. Paicunapaj ñaupajpi cashpapash, ama manllaringuichu” nircami (Ezeq. 3:8, 9). Cai shimicunata Jehová Dios nishpaca profeta Ezequieltaca: Paicunataca “ama manllaichu, ñucami candaca ayudasha” nijuj cuendami carca.

⁹ Jehová Diospa espiritu santomi profeta Ezequieltaca maipi predicana cashcata yachachun  guiarca. Profeta Ezequielca: “Mandaj Diospaj maquica, ñucapaca shinllipachami carca” nircami. Paipaca Jehova Diospa mandashcata pactachinataca na facil carcachu (Ezeq. 3:14, 15). Shinallata Jehová Diosca shuj pambaman richunmi Ezequieltaca mandarca. Chaipimi Jehovapa espiritu santoca paitaca ayudarca (Ezeq. 3:23, 24). Jehová Dios shina ayudajpimi paica predicangapaca preparado carca.

10. Tucui gentecunaman predicai ushangapaca ¿imatata minishtipanchi?

¹⁰ Tucui gentecunaman predicai ushangapaca ¿imatata minishtipanchi? Caita yachangapaca profeta Ezequielhuan ima pasashcata ricupashun. Profeta Ezequiel predicanata manllajujpica Jehová Diospa espíritu santomi ayudarca. Profeta Ezequiel cuendami ñucanchipash Jehovapa espíritu santo ayudajpi predicai ushapanchi. ¿Imamanda shina nipanchi? Porque Diablomi ñucanchicuna ama predicashpa catichun ashtaca jarcaicunata churan (Apoc. 12:17). Ñucanchicunaca Diabloca ashtaca poderta charimandami predicaciondaca jarcaita ushan nishpami pensanchiman. Pero na shina canllu. Porque ñucanchicuna predicanajushpami paitaca mishanajunchi (Apoc. 12:9-11). Predicacionbi imapash jarcaicuna ricurijpipash tucui gentecunamanmi predicashpa catipanchi. Shina rurashpami Diablota na manllashcata ricuchinchi. Shinaca jarcaicuna ricurijpipash Jehová Diospa espíritu santo ayudajushcamanda, Jehovapa ñaupapi ali ricurijushcata yachaimandami predicashpa cati ushapanchi (Mat. 5:10-12; 1 Ped. 4:14).

11. Jehová Diospa espíritu santoca ¿imashinata ayudan? Chai ayudata chasquishpa catingapaca ¿imatata rurana capanchi?

¹¹ Jehová Diosca profeta Ezequieltaca shinlli tucushpa, na manllashpa predicachunmi ayudarca. Shinallatami ñucanchitapash, predicacionbi imapash jarcaicuna ricurijpica Jehová Diospa espíritu santoca ayudaita ushan (2 Cor. 4:7-9). Jehová Diospa espíritu santo ayudashpa catichunga ¿imatata rurana capanchi? Chaipaca Jehová Diostaca cutin cutinmi  mañana capanchi. Y Jehová ñucanchi mañaicunata uyajtaca seguromi cana capanchi. Jesusca paipa discipulocunamanga “mañashpa catichi”, “mascashpa catichi”, “punguta huactachishpa catichi” nircami. ¿Imamandata shina rurana capanchi? Shina rurajpica Jehová Diosca paipa ‘espíritu santotaca carangami’ (Luc. 11:9, 13; Hech. 1:14; 2:4).

12. Ezequiel 2:9-3:3​pi nishcashnaca ¿maimandata rolloca shamurca y chaipica imatata nijurca?

¹² Profeta Ezequieltaca Jehová Diospa espíritu santo ayudashca jahuapash, Jehová Diospa nishcacunata uyanapashmi ayudarca. Profeta Ezequielca shuj muscuipishnami shuj rollota apanajujta ricurca (Ezequiel 2:9-3:3​ta liipangui). Chai rolloca ¿maimandata shamurca? Chai rollopica ¿imatata nijurca? Profeta Ezequieltaca ¿imashinata chai rollopi nishcacunaca ayudarca? Chai rolloca Jehová Diosmandami shamujurca. Ezequiel muscuipishna ricushca chuscu angelcunamandaca shujmi chai rollotaca profeta Ezequielman entregarca. Shina rurachunga Jehová Diosmi chai angeltaca utilizashcanga (Ezeq. 1:8; 10:7, 20). Chai rollopica Jehová Diospa advertenciacunami tiajurca. Chai advertenciacunatami Ezequielca na cazuj judiocunamanga villana carca (Ezeq. 2:7). Chai rollopa ishcandi ladocunapimi escribishca carca.

13. Jehová Diosca Ezequieltaca ¿imata rurachunda mandarca? Chai rolloca ¿imamandata balun mishquishna carca?

¹³ Jehová Diosca Ezequielmanga: ‘Cai pillushca carata micushpa cambaj vijsapi jundachi’ nircami. Paica Jehová Diosta cazushpami uchalla chaita rurarca. Profeta Ezequiel muscuipishna ricushcaca ¿imatata ningapaj munan? Jehová Dios munashcashnami Ezequielca gentecunamanga villachina carca. Ezequielca Jehová nishcata aliguta intindishpami tucuita cabalta villana carca. Chai rollota micushca jipaca Ezequielca ‘balun mishquishna mishqui mishquigu’ cajtami cuenta japirca (Ezeq. 3:3). ¿Imamandata shina mishqui mishquigu carca? Profeta Ezequielpaca Jehová Diosmanda predicanaca shuj jatun bendición carca (Sal. 19:8-11). Ezequielca Jehová Diosta profeta shina sirvi ushashcamandaca ninandami cushijushcanga.

14. Jehová Dios mingashcata pactachichunga profeta Ezequieltaca ¿imata ayudarca?

¹⁴ Jehová Diosca Ezequieltaca: “Ñuca imatalla villashca tucui shimicunataca, cambaj shungupi chasquingui. Cambaj rinrihuanbash, aliguta uyangui” nircami (Ezeq. 3: 10). Jehová Diosca Ezequieltaca rollopi nijushcata yarichun y chaipi pensarichunmi mandajurca. Shina rurajpimi Ezequielpa fe shinlliyashpa, gentecunamanbash predicaita ushagrijurca (Ezeq. 3:11). Jehová Diospa nishcacunata aliguta intindishpami profeta Ezequielca paiman mingashcataca aliguta pactachi usharca (Salmo 19:14​huan chimbapurashpa ricupangui).

15. Predicacionda ama descuidaringapaca ¿imatata rurana capanchi?

¹⁵ Predicacionda ama descuidaringapaca Bibliamanda yachajushpami catina capanchi. Ñucanchicunaca Jehovapa nishcacunataca siempremi yarina capanchi. Cunanbica Jehová Diosca paipa shimi Bibliata utilizashpami ñucanchicunataca yachachin. Jehová Diospa shimi ñucanchita ayudajushcata cuenta japingapaca ¿imatata rurana capanchi?

16. Jehová Diosca ¿imata rurachunda munan?

¹⁶ Alimentocunata micujpimi ñucanchi cuerpoca shinlliyan. Shina cuendami Bibliata liijpi, liishcapi pensarijpica ñucanchi fepash ashtahuan shinlliyan. Chaimandami Jehová Diosca paipa Shimi Bibliamanda yachajushpa, aliguta intindishpa catichun munan. Chaipaca Diosta mañana, Bibliata liina y liishcapimi pensarina capanchi. Diosta mañashpami Jehovapa pensamientocunata  facillla chasquingapaj ñucanchi shunguta preparanchi. Chai jipami Bibliata liishpa, liishcapi pensaripanchi. Shina rurashpami Jehová Diospa nishcacunataca ashtahuan ali intindishun.

17. ¿Imamandata Bibliata liishpa y liishcapi pensarina capanchi?

¹⁷ ¿Imamandata Bibliata liishpa y liishcapi pensarina capanchi? Chaita rurashpallami cunanbillata Jehovapa Gobiernomanda predicashpa cati ushashun. Jipacunamanbash Jehová Dios nalicunata tucuchinatapash na manllashpami villachi ushashun. Jehovapa ali cualidadcunamanda yachajushpa, chai cualidadcunapi pensarishpaca ashtahuanmi Jehovamanga quimirinchi. Chaimi ñucanchillata cushilla, tranquilo ali sintirinchi (Sal. 119:103).

18. Gentecunaca ¿imatata reconocinga?

¹⁸ Ñucanchicunaca Ezequiel cuenda shuj profetaca na canchichu. Pero Jehovapa nishcacunataca paipa shimi Bibliapimi taripanchi. Chaimandami Jehová Dios caicamanllami villachina canguichi ningacaman villachishpa catingapaj munapanchi. Jehová Dios nalicunata tucuchina punlla chayajpica gentecunaca ñucamanga pipash na advirtihuarcachu nitaca na ushangachu. Y Dios paicunata na ayudangapa munashcatapash na nita ushangachu (Ezeq. 3:19; 18:23). Shinallata ñucanchi predicajushca mensajeca Taita Diospa mensaje cashcatami paicunaca reconocinga.

19. Predicashpa catichunga ¿imata ayudanga?

¹⁹ Predicashpa catichunga ¿imata ayudanga? Profeta Ezequielta ayudashca quimsa cosascunallatami ñucanchitapash ayudanga. Ñucanchicunaca Jehová Dios cachashcamandami predicashpa catipanchi. Shinallata Jehová Diospa espíritu santo ayudajushcamanda y Bibliamanda yachajushpa catijushcamandami predicashpa catipanchi. Jehová Dios ayudajushcamandami “ultimocaman” predicashpa y aguantashpa catingapaj munapanchi (Mat. 24:13).