1. Jehová Dios ñucanchicuna paiman quimirichun munashcataca ¿imamandata yachapanchi?

 JEHOVÁ Diosca ñucanchicuna paiman quimirichunmi munan (Sant. 4:8). Paica ñucanchi Taita, ñucanchi amigo y ñucanchi Dios cangapami munan. Shinallata ñucanchi mañaicunata uyashpami llaquicunahuan o problemacunahuan cajpica ayudan. Jehová Diosca paipa organizacionhuanmi ñucanchicunataca yachachishpa cuidan. Shinaca Jehová Diosmanda ama caruyangapaca ¿imatata rurana capanchi?

2. ¿Imashinata Jehová Diosmanga quimirita ushapanchi?

² Oracionda rurashpa, Bibliata liishpa y liishcapi pensarishpami Jehová Diosmanga quimirita ushapanchi. Shinami paita juyashcata ricuchishpa agradecido sintirishun. Shinallata paita tucuipi cazungapaj y paitalla alabangapami munashun (Apoc. 4:11). Jehovata ashtahuan rijsishpaca paipi y paipa organizacionbipash ashtahuanmi confiashun.

3. a) Diabloca ¿imashinata ñucanchicunataca Jehovamanda caruyachingapaj munan? b) Jehovamanda y paipa organizacionmanda ama caruyachunga ¿imata ayudanga? (Salmo 31:13, 14).

³ Diabloca ñucanchicuna problemacunahuan cajpimi Jehovamanda caruyachingapaj aprovecharin. Paica ñucanchicuna Jehová Diospi y Jehovapa organizacionbi confianata saquichunmi imacunatapash ruran. Pero paipa trampacunapi ama urmangapaca ñucanchi femi shinlli cana can. Shinallata Jehovapi tucui shunguhuan confiashpaca paimanda, paipa organizacionmandapash na caruyashunllu (Salmo 31:13, 14​ta liipangui).

4. Cai temapica ¿imatata yachajupashun?

⁴ Huaquin problemacuna o llaquicuna ricurijpimi Jehovapi y  paipa organizacionbipash confianataca saquinchiman. Cai temapimi caimandaca yachajupashun. Cai situaciongunaca ¿imashinata Jehovamanda caruyachinman? Shinallata Diablota mishangapaca ¿imatata rurai ushapanchi?

5. Problemacuna na ucha arreglarijpica ¿imata pasaita ushanman?

⁵ Huaquinbica familiacunami Jehovata ama sirvichun jarcaita ushan. Na cashpaca trabajo illami quidaita ushanchiman. Cai cosascunamandami Jehovapi confianata saquishpa, paipa organizacionmandapash caruyanchiman. Por ejemplo shuj problema na uchalla arreglarijpica, imata ruranatapash ñana atinanichu nishpami desanimarita ushanchiman. Shina desanimado cashpaca, Jehová Diosca ñana juyahuanllu nishpa pensachunmi Diabloca imacunatapash ruran. Jehovapa o paipa organizacionba culpamandami cai problemacunahuan cani yarin nishpa pensachunmi munan. Por ejemplo, callaripica israelitacunaca tanto Moisesta como Aarondapash israelitacunata salvachun Jehová agllashcatami crirca (Éx. 4:29-31). Pero faraón runa israelitacunata maltratajpica paicunaca: “Faraonbaj ñaupajpipash, paipaj servijcunapaj ñaupajpipash ñucanchitaca, millanayachi tucuchunmi rurashcanguichi. Ñucanchita huañuchinajuchun, paicunapaj maquipi espadata cunshnami, llaquipi churashcanguichi ninajurcami” (Éx. 5:19-21). Israelitacunaca Moisesta y Aarondami paicunapa llaquicunamandaca culparca. Shinaca problemacuna na ucha arreglarijpipash, Jehovapi y paipa organizacionbi confiashpa catingapaca ¿imatata rurana capangui?

6. Profeta Habacucmandaca ¿imatata yachajupanchi? (Habacuc 3:17-19).

⁶ Jehová Diosta tucui shungu mañashpa paipi confiapai. Profeta Habacucca ashtaca llaquicunata charimandami Jehová Dios paimanda na preocuparinllu nishpa pensai callarirca. Chaimandami pai imashna sintirishcata Jehová Diosman villarca. Profeta Habacucca: ‘Mandaj Dioslla, ¿ima punllacunacamanda caparishpa mañajujpipash, na uyagrihuangui? […] ¿Imashpata nalicunata ricujunguilla?’ nircami (Hab. 1:2, 3). Jehová Diosca profeta Habacucpa mañaita uyashpami contestarca (Hab. 2:2, 3). Jehová Dios paipa sirvijcunata imashna ayudashcata yarishpami profeta Habacucca cushilla sintirirca. Shinallata Jehová Dios paimanda preocuparishcata, llaquicunata aguantachun ayudanatapash seguromi cai usharca (Habacuc 3:17-19​ta liipangui). Habacucmandaca ¿imatata yachajupanchi? Llaquicunahuan cashpaca Jehova Diosta mañashpa quiquin imashna sintirishcata villashpa paipi confiapai. Llaquicunata aguantachun Jehová Dios ayudanataca seguromi cai ushapangui. Jehová Dios imashna ayudashcata ricushpaca ñucanchi fepash ashtahuanmi shinlliyanga.

7. Panigu Shirleypa shuj familiarca ¿imatata nirca? Shinapash Jehová Diospi confiashpa catichunga panigutaca ¿imata ayudarca?

⁷ Espiritual cosascunata rurashpa catipai. Papúa Nueva Guinea llactamanda Shirley panigutaca espiritual cosascunata rurashpa catinami problemacunata charijpipash ayudarca. b Panigupa familiapaca pobrella caimandami micunaguta charinaca na fácil carca. Chaimandami shuj familiarca panigu Jehová Diospi confianata saquichun cashna nirca: “Canga Diospa espíritu ayudajunmi ninguica. Pero imapi ayudajujtapash na ricunica, yangamari predicanajunguichi” nircami. Shina pasashcamandami panigu Shirleyca Jehová Diosca ñucamanda y ñuca familiamandapash ciertopachacha preocuparin nishpa pensarin callarirca. Paniguca: “Chai ratomi Jehová Diosta mañashpa tucuita villarcani. Shinallata Bibliata y publicaciongunatapash liishpami catircani. Predicanata y reuniongunaman rinatapash na saquircanichu”  nin. Shinami panigu Shirleyca micungapaj minishtirishcaguta charimanda y cushillapash caimandami, Jehová Dios paita y paipa familiatapash cuidajushcata cuenda japirca. Paniguca: “Ñuca mañaita Jehová Dios contestashcatami ricurcani” nin (1 Tim. 6:6-8). Shinaca Jehová Diosta mañanata, Bibliata y publicaciongunata liinata, predicacionman llujshinata, reuniongunaman rinatapash na saquishpaca ima problemacuna ricurijpipash Jehová Diosmandaca na caruyapanguichu.

8. ¿Jehovapa organizacionbi responsabilidadta charij huauquicunataca imata pasaita ushan?

⁸ Televisionda, radiocunata o redes socialescunata utilizashpami Jehovapa contracunaca Jehovapa organizacionbi responsabilidadta charij huauquicunataca llullacunata nishpa juchachishca (Sal. 31:13). Huaquin huauquicunataca carcelpi churashpami nalicunata rurashca nishpa juchachishca. Apóstol Pablotaca shinallatami pasarca. Paitaca yangamanda juchachishpami carcelpi churarca. Shinapash chai tiempopi huauquipanicunaca ¿imatata rurarca?

9. Apóstol Pablota carcelpi churajpica ¿imatata huaquin cristianocunaca rurarca?

⁹ Apóstol Pablota Roma llactapi prezu churajpica huaquin cristianocunaca saquishpami rirca (2 Tim. 1:8, 15). ¿Apóstol Pablota shuatashna tratashpa carcelpi churajpichu paimanda pingai tucushpa saquirca? (2 Tim. 2:8, 9). O na cashpaca ¿paicunatapash llaquichinata manllaimandachu saquishpa rirca? Imashina cajpipash, apóstol Pabloca ninandami llaquirishcanga. Paica cai huauquipanicunata ayudangapaca paipa causaitapash peligropimi churashcarca (Hech. 20:18-21; 2 Cor. 1:8). Ayudachun minishtijujpipacha apóstol Pablota jichushca huauquipanicunashnaca na cangapaj munapanchichu. Shinaca responsabilidadta charij huauquicunata catiriashpa llaquichijpica ¿imatata yarina capanchi?

10. Responsabilidadta charij huauquicunata catiriashpa llaquichijpica ¿imatata yarina capanchi?

¹⁰ Imamanda y pipa culpamanda llaquichi tucunajushcatami yarina capangui. 2 Timoteo 3:12​pica: “Cristo Jesushuan shujllashna tucushpa  Taita Diosta tucui shunguhuan sirvishpa causangapaj munajcunaca, tucuicunami catiriashpa llaquichi tucunga” ninmi. Shinaca Diablopa culpamanda Jehovapa organizacionbi responsabilidadta charij huauquicunata catiriashpa llaquichijpica na manllarinachu capanchi. Diabloca cai huauquicuna Jehovata sirvinata saquichunmi munan. Ñucanchipash manllaimanda Jehovamanda caruyachunmi munan (1 Ped. 5:8).

11. Onesiforomandaca ¿imatata yachajupanchi? (2 Timoteo 1:16-18).

¹¹ Responsabilidadcunata charij huauquicunataca tucui shungu apoyashpa catipai (2 Timoteo 1:16-18​ta liipangui). Apóstol Pablo carcelpi cajpica Onesiforomi ayudarca. Chaimandami apóstol Pabloca: “Carcelpi cadenashca cajpipash paica na ñucamanda pinganayachircachu” nirca. Onesíforo runaguca paipa causaitapash peligropi churashpami apóstol Pablota mascangapaj rirca. Apóstol Pablota tarishpaca pai tucui minishtishcagupi ayudangapami esforzarin. Onesiforomandaca ¿imatata yachajupanchi? Shujcunata manllaimanda catiriashpa llaquichi tucunajun huauquicunata ayudanataca na saquinachu capanchi. Paicunata ayudashpa difindingapaca tucui usharishcagutami ruraita ushapangui (Prov. 17:17). Cai huauquicunaca paicunata juyashcata, apoyashcata ricuchichunmi minishtin.

12. Rusia llactamanda huauquipanicunamandaca ¿imatata yachajupanchi?

¹² Rusia llactapi huauquicunata carcelpi churajpica, huauquipanicunaca paicunata juicioman cumbashpami cai huauquicunata apoyashcatami ricuchin. Cai huauquicunamandaca ¿imatata yachajupanchi? Jehovapa organizacionbi responsabilidadcunata charij huauquicunata yangamanda juchachishpa carcelpi churajpi o catiriashpa llaquichijpica na manllarinachu capangui. Chaipa randica paicunamanda Jehovata mañashpa, paicunapa familiata ayudashpa y cai huauquipanicunata imashina ayudanatapash ricupangui (Hech. 12:5; 2 Cor. 1:10, 11).

13. Shujcuna ñucanchimanda burlarijpica ¿imatata pensari ushanchi?

¹³ Talvez Jehovata na sirvij familiacuna, trabajomanda cumbacuna, escuelamanda compañerocunaca ñucanchicuna predicanajujta ricushpa, Jehovapa mandashcacunata tucuipi cazujta ricushpami burlaringa (1 Ped. 4:4). Huaquingunaca nita ushanmi: “Canga shuj ali personami cangui, pero canba religionga imacunatapash ama rurachun jarcashpami yapatapacha nin”. Shinallata shujcunaca, ñucanchicuna expulsadocunahuan ñana tandanajujta ricushpami paicunahuan na tandanajushpaca: “¿Imashinata gentecunataca juyani ninguiyari?” ningami. Cashna nijpimi Jehová Diosca ñucanchicuna imatapash rurachunga yapatami mañan yarin o paipa organizacionbash tucuitami prohibin yarin nishpami pensarita ushanchi. Shina pasajushpaca Jehovamanda y paipa organizacionmanda ama caruyangapaca ¿imatata rurai ushapangui?

14. Jehovapa mandashcacunata cazushcamanda shujcuna burlarijpipash ¿imatata rurana capanchi? (Salmo 119:50-52).

¹⁴ Jehová Diostaca tucui shungu cazupai. Job runaguca paimanda shujcuna burlarijpipash Jehová Diostaca tucuipimi cazurca. Jobpa shuj nali amigoca Jobtaca cashnami nirca. Can Taita Diosta cazujpi na cazujpipash paipaca na importanllu nircami (Job 4:17, 18; 22:3). Pero Jobca shina nishcacunataca na crircachu. Paica Jehová Diospa mandashcacuna tucui cabal cashcata yachaimandami tucui shungu cazurca. Shina ruraimandami paica Jehová Diosmanda caruyachichunga nipita na saquirca (Job 27:5, 6). Jobmandaca ¿imatata yachajupanchi? Shujcunapa burlacuna Jehová Diospa mandashcacunamanda dudachichunga ama saquipanguichu. Más bien Jehová Diosta cazuimanda  cushilla causajushcapi pensaripangui. Shinallata Jehovapa organizaciondaca tucui shungu apoyapashunchi. Porque cai organizacionmi Jehovapa mandashcacunataca cazun. Shinaca paipa organizacionda tucui shungu apoyangapaj decidido cashpaca shujcunapa burlacuna Jehová Diosmanda caruyachichunga na saquipashunllu (Salmo 119:50-52​ta liipangui).

15. ¿Imamandata panigu Brizittaca paipa familiaca nali tratarca?

¹⁵ India llactamanda Brizit paniguhuan ima pasashcata ricupashunchi. Panigu Brizit testigo de Jehová cashcamandami paipa familiacunaca burlarin carca. Paniguca 1997 huatapimi bautizarirca. Chai jipallami paipa cusaca trabajo illa quidarca. Paipa cusaca na testigochu carca. Panigupa cusaca paipa tucuilla familiahuan paipa taitacunahuan causangapaj rinatami decidirca. Shinapash panigupa cusaca trabajotaca na tarircachu. Chaimandami paniguca familiata mantiningapaca tiempo completo trabajana tucurca. Shinallata panigupa congregacionbash caru carupimi carca. Y panigupa cusapa familiarcunaca panigu testigo de Jehová cashcamandami paitaca contrarca. Shuj shuj llaquicunata charimandami panigu Brizit y paipa familiapash cutin shuj ladoman causangapaj rina tucurca. Na yashcapimi paipa cusaca huañurca, chai jipaca 12 añoscunata charij ushigupash cancerhuan huañurca. Shina pasashcamandaca panigu Brizitpa familiaca can testigo de Jehová tucushcamandami shina pasan nishpami panigutaca culparca. Shina pasajushpapash panigu Brizitca Jehová Diospimi confiashpa catirca, Jehovapa organizacionmandapash na caruyarcachu.

16. Panigu Brizitca Jehová Diospi confiashcamanda y paipa organizacionmanda na caruyashcamandaca ¿ima bendiciongunatata chasquirca?

¹⁶ Panigu Brizit congregacionmanda carupi causashcamandami superintendente de circuito huauquiguca panigu causashca pushtupillata predicachun y paipa huasigupillata reuniongunatapash rurachun animarca. Primeropica panigupaca caita ruranaca dificilmi ricurirca. Shina cajpipash cai huauquigupa consejota pactachingapami esforzarirca. Chaimandami chai pushtupillata predicai callarishpa, paipa huasipipash reuniongunata ruraita callarirca. Shinallata paipa ushicunahuanbashmi adoración en familiatapash rurai callarirca. Panigu shina rurashcamandami  ashtaca gentecunaman Bibliamanda yachachi callarirca. Shinallata ashtacacunatami bautizarichunbash ayudarca. Y 2005 huatapimi paica precursora regular tucurca. Jehová Diospi y paipa organizacionbi confiashcamandami Jehová Diosca paitaca bendiciarca. Shinallata panigupa ushigucunaca Jehová Diostaca tucui shungumi sirvinajun. Y panigu causashca pushtupipash ishcai congregaciongunami tian. Panigu Brizitca llaquicunata aguantachun Jehová Dios fuerzata cushpa ayudashcataca segurami can.

17. ¿Imatata rurana capanchi?

¹⁷ Llaquicunahuan cajpi Jehová Dios na ayudangapaj munajta y paipa organizacionda apoyanaca nimapa na sirvijtashna pensachunmi Diabloca munan. Shinallata Jehovapa organizacionbi responsabilidadcunata charij huauquicunata llullacunata nishpa catiriashpa llaquichishpa o carcelpi churajta ricushpa manllarichunmi Diabloca munan. Y shujcuna ñucanchimanda burlarijpi Jehovapa mandashcacunapi confianata saquichun, paipa organizacionmanda caruyachunbashmi munan. Pero ñucanchicunaca Diablo imashna pandachijtaca alimi yachapanchi. Chaita yachaimandami Diablo pandachichunga na saquishun (2 Cor. 2:11). Shinaca Jehovapi y paipa organizacionbi confiashpa catipashunchi. Jehová Diosca ñucanchicunataca nunca na saquingachu (Sal. 28:7). Jehová Diosmanda imapash caruyachichunga na saquinachu capanchi (Rom. 8:35-39).

18. Cati temapica ¿imatata yachajupashun?

¹⁸ Jehovapi confianata saquishpa, paipa organizacionmandapash caruyachij situaciongunamandami cai temapica yachajupashcanchi. Congregación ucupipash ¿ima cosascuna pasajpita Jehová Diospi confianata saquishpa, paipa organizacionmandapash caruyanchiman? Ama shina pasachunga ¿imata ayudanga? Caitaca cati temapimi yachajupashun.