Ima pasashcata nara nishpallata, imamanda Jehovata tiempo completopi sirvi callarishcatami parlagripani.

Isla caribeña de Curazaopimi 1942 huatapi nacirircani. Ñuca taitaca Surinam llactapimi nacirirca pero trabajangapami Curazao islaman rishcarca. Paica ñuca nara tiajpillatami bautizarishca carca. Curazao islapica paimi casi primer testigo de Jehová cashcarca. a Ñuca taitaca cada semanami ñucanchicunahuanga Bibliata estudian carca. Cincopura huahuacunami carcanchi y na siempre estudiangapaca munanllu carcanchi. Ñuca taitaca, ñuca abuelata cuidagringapami Surinam llactaman causagrishun nirca. Ñucaca 14 añoscunatami charircani.

Surinam llactapica Jehovata cushilla sirvij alipacha amigocunatami rijsircani. Paicunaca ñucamanda asha mayorcunami carca. Y precursorcunami carca. Paicunaca predicacionbi charishca experienciacunataca cushijushpami parlan carca. Shinallata reunionguna jipaca Bibliamanda shuj shuj temacunatami parlan carcanchi. Cai amigocuna ayudashcamandami ñuca causaipica Jehovata sirvingapaj munashcata cuenta japircani. Chaimi 16 añoscunata charishpa bautizarircani. Y 18​pica precursormi tucurcani.

Precursor cashpa yachajushca cosascunami tiempo completopi Jehovata sirvijujpica ninanda ayudahuarca. Por ejemplo shuj huauquicuna paicunapa asignacionda pactachi ushachun ali yachachina importante cashcatami yachajurcani. Ñuca precursor tucujpica Willem van Seijl shuti misioneromi ninanda ayudahuarca. b  Huauquigumi ñucataca congregacionbi responsabilidadcunata ali pactachichun yachachihuarca. Shuj huata jipaca precursor especial cachunmi asignahuarca. Chaimandami Surinam selvapi tiaj grupocunata ayudana carcani. Precursor cajpi ñucata yachachishca huauquigucunataca ninandami agradicini. Porque paicuna shina ayudashcamandami ñuca asignaciondaca ali pactachi usharcani. Chaimi ñucapash cai huauquicunapa ejemplota catishpa shuj huauquicunata ali yachachingapaj tiempota llujchircani.

Precursor cashpaca minishtirishca cosascunahuanlla causanata y organizado canatapashmi yachajurcani. Precursor especial cashpaca cada quillami ñuca y ñuca compañeropash minishtirishca cosascunata randingapaj shuj listata ruran carcanchi. Chai jipaca ñuca o ñuca compañeromi randingapaj ciudadman rin carca. Culquigupash y randishca cosasgucunapash quilla enteropa pactachunmi aliguta organizarina carcanchi. Imapash tucurijpica ñucanchi causanajushca pushtupica na fácil tarita ushanachu carcanchi. Joven cashpallata minishtirishca cosascunahuanlla causanata yachajuna y organizado canata yachajunami ñucapa asignacionda aliguta pactachichun ayudahuarca.

Gentecunaman paicunapa idiomapillata Bibliamanda yachachina mejor cashcatapashmi yachajurcani. Ñucaca holandés, inglés, papiamento y surinamés idiomacunata parlashpami viñarcani, (surinamés idiomataca sranan nishpapashmi rijsin). Surinam llactapimi surinamés idiomataca parlan. Selvapi sirvijushpami gentecunaman paicunapa idiomapillata predicajpi ali uyan cashcata cuenta japircani. Por ejemplo huaquingunaca saramacano idiomapimi parlan carca. Chai idiomata parlanaca asha dificilmi cahuarca. Pero chai idiomata parlangapaj esforzarimandami ashtaca gentecuna Jehovata rijsichun ayudai ushashcani.

Saramacano idiomata yachajujushpaca ashtaca viajecunatami pandarircani. Por ejemplo, shuj viajeca shuj estudiante vijsa nanaihuan cashcata yachaimandami ñachu alilla cangui nishpa tapungapaj munarcani. Pero ñucaca vijsayuchu cangui nishparami tapushcarcani. Chaimi paica ashata culirarca. Shina pandarishpapashmi cai idiomata parlashpa catingapaj esforzarircani.

1970 huatapimi superintendente de circuito cachun nombrahuarca. Chai huatapica selvapi tiaj huaquin grupocunamanga “Visitando la central mundial de los testigos de Jehová” nishca discursotami curcani. Chai grupocunata visitangapaca ñucapash y shuj huauquicunapash canoacunapimi viajan carcanchi. Chaipi michata charingapaca shuj motorta, gasolinata, lamparacunata y shuj shuj cosascunatami apan carcanchi. Y ña chayashpaca programata ricuchigrijuj pushtucamanmi chai cosascunataca aparishpa rina carcanchi. Cashna visitajpica gentecunaca Bibliamanda yachachishcamandami ninanda agradicin carca. Paicunaman Jehovamanda y paipa organizacionmanda rijsichi ushashcamandaca cushillami sintirin carcani. Shinllita esforzarina cashpapash chai  gentecunata Jehová Diosman quimirichun ayudanaca shuj jatun bendicionmi cashca.

Soltero cashpa superintendente de circuito shina sirvina ashtahuan fácil cashcataca alimi yacharcani. Pero shinapash cazarangapaca munarcanimi. Chaimi ñuca sirvijushca pushtupillata Jehovata sirvishpa catichun ayudaj huarmiguta taringapaj ayudahuai nishpa Jehová Diostaca mañarcani. Ñuca huarmigupash ñucahuan cushilla Jehovata sirvishpa catichunmi munarcani. Y shuj huata jipaca Ethel paniguhuanmi novios tucurcanchi. Paica precursora especialmi carca. Ethelca jovenmandallatami apóstol Pablopa ejemplota catishpa ashtahuan Jehovata sirvingapaj munashcarca. Ñucanchica septiembre de 1971 huatapimi cazararcanchi y ñucaca superintendente de circuito shinami sirvishpa cati usharcani.

Ethelca ashalla cosascunata charishpami viñashca carca. Chaimi selvapi sirvinataca ñapash acostumbrarirca. Por ejemplo, selvamanda carulla congregaciongunata visitagrinajushpaca na ashtaca cosascunata apanllu carcanchi. Riopimi armaita o ropatapash tajshan carcanchi. Huauquipanicuna carashcatami micunlla carcanchi. Huaquinbica iguanacunata, piraña animalcunata o shuj shuj cosascunatami caran carca. Platocuna na tiajpica plátano hojacunapimi micun carianchi. Y cucharacuna na tiajpica maquihuanllami micun carcanchi. Ishcandillata Jehovata sirvingapaj ninanda esforzarimandami ñucanchi matrimoniopipash ashtahuan cushilla causai ushapashcanchi (Ecl. 4:12). Jehová Diosta cashna sirvinaca ninandami cushichishca.

Carulla congregaciongunata visitashca jipa tigranajushpami ñucanchi canoaca rumicunapi huactarimanda hundirijurca. Pero antsicarinmi chalecos salvavidas nishcata churajushca carcanchi. Y canoamandapash na urmarcanchichu.  Canoaca yacu jundami carca. Chaimi micunata shitashpa chai platocunataca canoapi yaicushca yacuta llujchingapaj utilizarcanchi. Caimandami callaripica parlajuparcani.

Micuna illa quidaimandami, canoapi viajanajushpallata pescadocunata japingapaj munarcanchi. Pero nimata na tari ushanajurcanchichu. Chaimi Jehovataca micunaguta taringapaj ayudahuai nishpa mañarcanchi. Chai jipallami shuj huauquiguca shuj pescadota japi usharca. Chai pescadoca cincopurapami pactarca.

Ña cinco huatacunata superintendente de circuito shina sirvijujpimi ñuca huarmiguca vijsayu quidarca. Ñucaca cushijushcami carcani. Pero ñucanchi causaipi ima cambiocuna tianataca na yacharcanchichu. Usharijpica ñucapash y ñuca huarmigupash Jehovata tiempo completopi sirvishpa catingapami munarcanchi. 1976 huatapica ñucanchi primer churigu Ethniëlmi nacirirca y ishcai huata chaupi jipaca Giovannimi nacirirca.

Surinam pushtupi ayudata minishtinajuimandami sucursalmanda huauquicunaca superintendente cashpa catichun nihuarca. Huahuacuna uchilla cajpica huaquin congregaciongunatallami visitan carcanchi. Shinami quillapica ishcai semanacunataca shuj congregaciongunata visitashpa y ishcai semanacunataca ñuca congregacionbillata precursor shina predicacionbi ayudai usharcani. Ñucanchi huasi ladolla caj congregaciongunata visitajushpaca ñuca huarmigupash y huahuacunapashmi cumbashpa rin carca. Pero selvapi congregaciongunata visitana cashpa y asambleacuna tiajpica ñucallami rin carcani.

Tanto familiapi y congregacionbi charishca responsabilidadcunata pactachingapaca organizadomi cana carcani. Cada semanami na faltashpa estudio de familiata rurangapaj esforzarin carcani. Selvapi tiaj congregaciongunata ñuca visitajujpica ñuca huarmigumi huahuacunandi estudio de familiata ruran carca. Paicunahuan cashpaca chuscundimi imagutapash rurangapaj aprovechan carcanchi. Shinallata huahuacunahuanga pugllangapaj o paseangapami rin carcanchi. Congregacionbi responsabilidadcunata pactachingapaca casi siempremi tutacaman preparashpa quidan carcani. Ñuca huarmiguca Proverbios 31:15​pi parlashca huarmigushnami cashca. Paica tutamandata  jatarishpami desayunota ruran carca. Shinami huahuacuna nara escuelaman rijpillata texto diariotaca chuscundi liin carcanchi. Ñuca responsabilidadcunata pactachichunga ñuca huarmiguca siempremi ayudashca. Chaimandami paitaca ninanda agradicini.

Ñucapash y ñuca huarmigupash huahuacunamanga Jehová Diosta juyachun y predicanata valorachunmi yachachin carcanchi. Paicunallata paicunapa munaimanda Jehovata tiempo completopi sirvinata decidichunmi munarcanchi. Jehová Diosta tiempo completopi sirvishpa cushilla yalin cashcatami huahuacunamanga siempre parlan carcanchi. Difícil situaciongunata yalishca cashpapash Jehová Dios imashna ayudashcata, familiata imashna bendiciashcatami parlan carcanchi. Ñucanchi churicunataca Jehová Diosta sirvinata pundapi churaj huauquipanicunahuan yalichunmi ayudan carcanchi.

Jehová Dios ayudashcamandami minishtirishca cosasgucunataca siempre charircanchi. Ñucapash familiata cuidangapaca siempremi esforzarin carcani. Selvapi soltero cashpa y precursor especial shina sirvijushpa yachajushca cosascunami culquiguta na yangata gashtanata yachajuchun ayudahuarca. Shina cashpapash huaquinbica minishtirishca cosasgucunaca faltanllatami carca. Pero shina situaciongunapi Jehová Dios ayudashcataca seguromi capani. Entre 1980 y 1990 huatacunapica Surinam llactapimi shuj guerra tiarca. Chaimandami minishtirishca cosascunata charinapash difícil carca. Pero Jehová Diosca siempremi ñucanchitaca cuidarca (Mat. 6:32).

Jehová Diosca ñucanchitaca nunca na saquishcachu. Paita sirvimandami cushilla causai ushashcanchi. Huahuacunata charina, Jehovata juyachun yachachinapash shuj jatun bendicionmi cashca. Paicuna Jehovata tiempo completopi sirvinata decidishcata ricushpaca ninandami cushijupanchi. Ethniël y Giovannipash Surinam sucursalpimi paicunapa huarmigucunandi sirvinajun.

Ñucapash y ñuca huarmigupash ñami mayorlla canchi. Pero ishcandillatami precursor especialcuna shina Jehovata sirvishpa catinajunchi. Ocupado yalimandaca nadanatapash nara yachajushcanichu. Pero joven cashpallata Jehovata tiempo completopi sirvinata decidishcamandaca na arripintirinichu.