1. Aliguta pensarina nishpaca ¿imatata ningapaj munan? (2 Timoteo 4:5).

 IMAPASH llaquicuna o problemacuna ricurijpimi Jehovapi y paipa organizacionbi confianapash ashata difícil caita ushan. Shinapash, cai problemacunata o llaquicunata chimbapurachunga ¿imata ayudanga? Bibliapi nishcashnaca aliguta pensarina, rijchariashna cana y Jehová Diospi ‘tucui shunguhuan crinami’ minishtirishca can (2 Timoteo 4:5​ta liipangui). Aliguta pensarina nishpaca ¿imatata ningapaj munan? Imapash pasajpi tranquilo cana, imamandapacha pasashcata aliguta ricuna y Jehová Dios pensanshna pensangapaj esforzarina cashcatami ningapaj munan. Imagutapash aliguta pensarishpa rurashpaca, ñucanchi imashina sintirishcamandallaca na imatapash yangataca rurashunllu.

2. Cai temapica ¿imatata yachajupashun?

² Chaishuj temapica imapash problemacuna ricurijpi Jehová Diosmanda asha asha caruyai ushashcatami ricuparcanchi. Y cai temapica congregación ucupi imapash problemacuna tiajpi Jehová Diosmanda caruyai ushashcatami yachajugripanchi. Por ejemplo, shuj huauqui o shuj pani nali tratahuarca yashpa, shuj consejota o disciplinata cujpi o imapash cambiocuna tiajpi na ucha yacharimandami talvez caruyaita ushanchiman. Pero ñucanchita shina pasajpica aliguta pensari ushangapaj, Jehovapi y paipa organizacionbi confiashpa catingapaca ¿imatata rurana capanchi?

3. Shuj huauqui o shuj pani nalimi tratahuarca yashpaca ¿imatata pensanchiman?

³ ¿Talvez responsabilidadta charij shuj huauqui o pani nali tratahuashca yashpachu pensapashcangui? De seguromi chai huauqui o panica quiquinda nali sintichingapaca na munapashcanga  (Rom. 3:23; Sant. 3:2). Pero shina pasashcamandaca quiquinga llaquillami sintiripangui. Shinallata ‘cai huauquica ¿imamandata shina ruran, ciertopachacha Jehová Diospa organizacionbi cani nishpachari?’ pensaripangui. Diablomi quiquin shina sintirishpa Jehová Diospa organizacionmandapash dudachun munan (2 Cor. 2:11). Shina dudajuimandami Jehová Diosmanda y paipa organizacionmandapash caruyaita ushanchiman. Shinaca, shuj huauqui o shuj pani nali tratahuarca yashpa pensajushpaca imagutapash ali pensarishpa rurangapaj y ama desanimaringapaca ¿imatata rurai ushapanchi?

4. a) Nali tratajpipash Joseca ¿imatata rurarca? (Génesis 50:19-21). b) Josemandaca ¿imatata yachajupanchi?

⁴ Na risintirishca quidanachu capangui. José joven cajpica paipa huauquicunami nali tratarca, na ricunayachirca y hasta huañuchingapapashmi munarca (Gén. 37:4, 18-22). Jipamangarin Josetaca esclavotashnami jaturca. Chaimandami Joseca 13 huatacunata ashtaca llaquicunata charirca. Shina llaquicunata charimandami Joseca Jehová Diosca na juyahuanllu, paica jichushpami saquihuashca yashpami pensai ushanman carca. Shina llaquicunata charishpapash Joseca na risintirishpa quidarcachu. Paica aliguta pensarishpa imagutapash ruraimandami tranquilo caita usharca. Y paipa huauquicunamanda vengarina oportunidadta charishpapash Joseca na vengarircachu. Chaipa randica paicunata juyaihuan tratashpami perdonarca (Gén. 45:4, 5). Joseca ¿imamandata shina rurai usharca? Joseca paipa problemacunapilla pensarijunapa randica, Jehová Dios imamanda pai shina pasachun saquishcapimi pensarirca (Génesis 50:19-21​ta liipangui). Josemandaca ¿imatata yachajupanchi? Shuj huauqui o shuj pani nali tratajpica Jehová Diosca na juyahuanllu, paica jichushpami saquihuashca nishpaca na pensajunachu capanchi. Shina pensajunapa randica Jehová Dios imashina ayudajushcapimi pensarina capanchi. Shinallata shujcunata perdonangapaca dispuestomi cana capanchi. Y “juyanata yachajcunami, shujcunata perdonangapaca siempre listo can” nishca shimicunata yarina capanchi (1 Ped. 4:8).

5. Huauqui Miqueasca ¿imashinata aliguta pensarishpa na yangata imatapash rurarca?

⁵ Sudamérica llactamanda huauqui anciano Miqueaspa ejemplota ricupashunchi. b Shuj viajeca huaquin ancianocuna paita nali tratashcatami sintirca. Paica: “Nunca na shina pasahuashcachu, llaqui llaquimi sintirijurcani. Imata ruraitapash na atinashpami huacaitapash huacajurcani” ninmi. Shina pasajushpapash huauqui Miqueasca aliguta pensaringapaj, llaquilla cashcamandalla na yangata imacunatapash rurangapami esforzarirca. Huauquiguca Jehová Diostaca aguantai ushangapaj ayudahuai nishpami paipa espíritu santota ninanda mañan carca. Shinallata publicaciongunapi informaciongunatapashmi mascan carca. Huauquigumandaca ¿imatata yachajupanchi? Shuj huauqui o shuj pani nalimi tratahuarca nishpa pensajushpaca llaquilla o culira cashcamandalla ama imatapash ningapaj o rurangapami controlarina capanchi. Talvez cai huauqui o panica imapash pasajushcamandami naliguta pensarishpa imatapash nishcanga o rurashcanga. Shinaca imashina quiquin sintirishcata tucuita Jehová Diosman villapangui. Shinallata chai huauqui o pani imamanda shina rurashcata intindingapapash ayudahuai nishpa Jehovataca mañaita ushapangui. Caita ruranami, cai huauqui o pani ñucanchita na llaquichingapaj munashcata cuenta japichun ayudanga. Shinallata chai huauquita o panita perdonachunbashmi ayudanga (Prov. 19:11). Ñucanchita ima pasajujtaca Jehová Diosca tucuitami ricujun. Chaimandami aguantashpa catichun Jehová Dios fuerzata cushpa ayudanatapash yarina capanchi (2 Crón. 16:9; Ecl. 5:8).

6. Jehová Dios ñucanchita juyaimanda corregijta yarinaca ¿imamandata importante can? (Hebreos 12:5, 6, 11).

⁶ Ñucanchita corregijpica nali o llaquillami  sintiri ushapanchi. Pero ñucanchi imashina sintirishcapilla pensarishpaca, imamandapacha corregishcataca na cuenta japishpami, corregishpaca yapatami shina nihuan o yapa injustomi can nishpa pensaita ushanchiman. Shina pensajushpaca Jehová Dios ñucanchita juyaimanda corregin cashcatami cunganchiman (Hebreos 12:5, 6, 11​ta liipangui). Ñucanchicuna imashina sintirishcamandalla imatapash rurashpaca, Diablo ñucanchicunata ashtahuan pandachichunmi saquinajunchiman. Diabloca ñucanchicuna Jehová Dios corregishcata ama chasquichun, Jehová Diosmanda y paipa organizacionmandapash caruyachunmi munan. Corregi tucushca cashpaca aliguta pensarishpa imagutapash rurai ushachunga ¿imata ayudanga?

7. a) Dibujocunapi ricushcashnaca Pedrota corregijpi aliguman chasquishcamandaca Jehová Diosca ¿imashinata bendiciarca? b) Pedromandaca ¿imatata yachajupanchi?

⁷ Corregijpica aliguman chasquishpa cambiocunata rurapai. Jesusca tauca viajecunatami apostolcunapa ñaupapi Pedrotaca corregirca (Mar. 8:33; Luc. 22:31-34). Shina corregijpica, Pedroca pingai tucushcangami. Pero Pedroca Jesusta catinataca na saquircachu. Shinallata corregijpica ali aligumanmi chasquirca. Y cambiocunata rurangapapashmi ninanda esforzarirca. Shina rurashcamandami Jehová Diosca Pedrotaca ninanda bendiciarca. Y congregacionbipash ashtaca responsabilidadcunatami chasquirca (Juan 21:15-17; Hech. 10:24-33; 1 Ped. 1:1). Pedromandaca ¿imatata yachajupanchi? Pipash ñucanchita corregijpica pingai tucushpapash aligumanmi corregishcataca chasquina capanchi, cambiangapapash esforzarinami capanchi. Shina rurashpaca ñucanchillatami beneficiaripashun. Jehovapa ñaupapi ali ricurishpami huauquipanicunatapash ayudai ushapashun.

8, 9. Corregijpica huauqui Bernardoca ¿imashinata sintirirca? Pero cambiocunata rurachunga ¿imata ayudarca?

⁸ Mozambique llactamanda Bernardo huauquihuan ima pasashcata ricupashunchi. Huauquigutaca anciano cana privilegiotami quichurca. Shina pasajpica paica ¿imashinashi sintirirca? Huauquiguca shina corregishcamandaca “ñucaca culirami sintirircani” nircami. Huauquiguca congregacionmanda huauquipanicuna paimanda nalicunatami pensanga yashpami preocuparijurca. Huauquigu Bernardoca ninmi: “Huaquin quillacuna jipami, ñucata imamanda corregichun minishtijushcata cuenta japircani. Shinami Jehovapi y paipa organizacionbipash cutin confiaita usharcani”. Cuenta japichunga huauquigutaca ¿imata ayudarca?

 ⁹ Huauqui Bernardoca cambiocunata rurangapami esforzarirca. Huauquiguca ninmi: “Anciano cashpaca Hebreos 12:7​tami Jehová Diosca imamanda corregin cashcata intindichingapaj utilizan carcani. Chaimi cai textopi shimicunataca picunallata pactachina can nishpa pensarircani. Chaimi Jehovata tucui sirvijcuna cai shimicunata pactachina cashcata cuenta japircani. Y ñucapashmi caitaca pactachina carcani”. Huauquigu Bernardoca Jehová Diospi y paipa organizacionbi ashtahuan confiangapaca Bibliata liingapaj y liishcapi pensaringapami ashtahuan tiempota llujchirca. Shujcuna paimanda nalicunata pensanga nishpa preocuparijushpapash huauquiguca predicacionman ashtahuan llujshishpa, reuniongunapipash participashpami catirca. Tiempohuanga huauquiguca anciano shinami cutin sirvi callarirca. Quiquindapash corregishca cajpica ama yapata preocuparishpa chai consejota pactachingapaj, cambiocunata rurangapaj esforzaripai (Prov. 8:33; 22:4). c Jehovamanda y paipa organizacionmanda na caruyashcamanda quiquinda bendicianataca seguromi caita ushapangui.

10. ¿Ima cambiocuna tiajpita israelitacunapaca cazunaca difícil carca?

¹⁰ Jehovapa organizacionbi imapash cambiocuna tiajpimi chai cambiocunata pactachina difícil caita ushan. Shinapash na cuidadota charishpaca Jehová Diosmandapashmi caruyaita ushanchiman. Por ejemplo. Jehová Dios israelitacunaman Moisesta utilizashpa leycunata cujpica israelitacunapaca huaquin cosascunami cambiarca. Israelitacunaman leycunata Jehová Dios nara cujpica familiacunata ñaupaman pushajcunami sacerdotecuna rurana cosascunataca ruran carca. Paicunaca altarcunata rurashpami paicunapa familiacunamanda Jehová Diosman sacrificiocunata ruran carca (Gén. 8:20, 21; 12:7; 26:25; 35:1, 6, 7; Job 1:5). Pero Jehová Dios israelitacunaman Leycunata cujpica ñana chaita rurashpa cati usharcachu. Jehová Diosca Aaronba familiatami sacerdotecuna cachun agllarca. Paicunami Jehová Diosmanga sacrificiocunata rurana carca. Pero pipash Aaronba familiamanda na cashpata sacrificiocunata rurashpaca huañunami carca (Lev. 17:3-6, 8, 9). d ¿Shina cambiocuna tiashcamandachu Coré, Datán, Abiram y israelitacunata ñaupaman pushaj 250 jaricunapash Moisespa y Aaronba contra tucurca? (Núm. 16:1-3). Imamandapacha Moisesta y Aaronda contrashcataca na yachapanchichu. Shinapash paicunaca Jehová Diosta na cazushcatami ricuchirca. Jehovapa organizacionbi cambiocuna tiajpica quiquinga ¿imatata rurana capangui?

11. Huaquin cohatitacunamandaca ¿imatata yachajupanchi?

¹¹ Jehová Diospa organizacionbi cambiocuna tiajpi tucui shungu apoyai. Israelitacuna desiertopi causanajujpica Cohat familiamanda levitacunaca shuj jatun bendiciondami charirca. Israelitacuna campamentota shuj ladoman apanajujpica huaquin cohatitacunami Jehová Diospa arca del pactotaca apashpa rin carca (Núm. 3:29, 31; 10:33; Jos. 3:2-4). Pero israelitacuna Jehová Dios cusha nishca alpacunapi ña causajujpica Jehová Diospa arcata shuj ladoman apajunaca ñana minishtirircachu. Chaimandami Salomón mandajuj tiempopica huaquin cohatitacunaca cantorcuna, porterocuna carca. Y huaquin cosascunata cuidangapaj encargadocunapashmi carca (1 Crón. 6:31-33; 26:1, 24). Shina cambiocuna tiashcamanda cohatitacuna quejarinajushcataimanga Bibliapica na ricuchinllu. Pero  shina cambiocuna tiajpipash paicunaca Jehová Diosta cushillami sirvishpa catirca. Cohatitacunamandaca ¿imatata yachajupanchi? Jehovapa organizacionbi cambiocuna tiajpica chai cambiocuna quiquinda afectajpipash uchalla apoyangapami esforzarina capangui. Y shuj asignacionda cujpica cushijushpami pactachina capangui. Quiquin charishca responsabilidadcuna importante cajpipash Jehová Diosta cazuna ashtahuan importante cashcatami yarina capangui (1 Sam. 15:22).

12. Betelmanda llujshishpaca panigu Zaira ¿imashinata sintirirca?

¹² Oriente Medio llactamanda panigu Zaira, ima pasashcata ricupashunchi. Paica 23 huatacunatami Betelpi sirvishcarca. Paitaca Betelmanda llujchishpami precursor especial shina sirvichun cacharca. Paniguca: “Shina pasajpimi ninanda llaquirircani, imapapash na sirvinshnami sintirircani. Chaimandami ima nalitashi rurarcani nishpa pensarin carcani” ninmi. Y shinapipachami congregacionmanda huaquin huauquipanicunaca panigutaca: “Can ashtahuan esforzarijpica Betelmandaca na llujchishpa cachanmanllu carca” nishpami nin carca. Shina pasajushcamandami asha tiempotaca panigu Zairaca tucui tutacuna huacailla pararca. Shinapash paniguca: “Jehová Dios ñucata juyajta y paipa organización imashna cuidajtaca nunca na dudarcanichu” ninmi. Panigu Zaira aliguta pensarishpa imagutapash rurachunga ¿imata ayudarca?

13. Ama desanimada cashpa catingapaca ¿imatata panigu Zairaca rurarca?

¹³ Panigu Zairaca ama desanimada catingapaca pai minishtijushca temacunatami publicaciongunapica liirca. Por ejemplo, La Atalaya del 1 de febrero de 2001​pi “Usted puede afrontar el desánimo” nishca temaca ninandami ayudarca. Cai temapica Marcos librota escribij Marcos runagumandami parlan. Marcospashmi Jehovata sirvinapica huaquin cambiocunata charirca. Paipashmi Zaira panigushnallata sintirishcanga. Zaira paniguca ninmi: “Marcospa ejemplomanda yachajunami, ama desanimada cashpa catichun ninanda ayudahuarca”. Zaira paniguca paipa amigocuna ayudachunmi saquirca. Huauquipanicunamandapash na caruyarcachu. Y paita ima pasashcapipash ñana pensashpa catircachu. Paniguca Jehová Dios paipa espíritu santohuan paipa organizacionda guiajushcata y ñaupaman pushaj huauquicunapash paimanda preocuparin cashcatami cuenta japirca. Ashtahuanbash paniguca Jehová Diospaca paipa organización cushca asignacionda pactachina ashtahuan importante cashcatami cuenta japirca.

14. Huauqui Vladopa congregacionbica ¿ima cambiota tiarca? Y chai cambiota apoyangapaca ¿imata huauquigutaca ayudarca?

 ¹⁴ Eslovenia llactamanda 73 huatacunata charij Vlado shuti huauquiguta ima pasashcata ricupashun. Huauquigupa congregacionga shuj congregaciongunahuanmi tandanajurca. Y huauquigu tandanajun cashca Salón del Reinopica ñana tandanajushpa catigrinajurcachu. Chaimandami huauquiguca na cushilla carca. Paica ninmi: “Imashpata ñucanchi Salondara vichana carca yashpami culira sintirircani. Chairallami Salón del Reinotaca arreglarcanchi. Y ñuca carpintero caimandami huaquin cosascunata rurarcani. Congregacionguna shina tandanajushcamandaca mayorlla huauquipanicunapaca dificilmi carca”. Pero chai cambiocunata apoyashpa catichunga huauquigutaca ¿imata ayudarca? Paica ninmi: “Jehovapa organizacionbi cambiocuna tiajpi chai cambiocunata apoyanaca ñucanchitallatami benefician. Cunanmandallata cambiocunata apoyashpami jipacunamanbash cambiocuna tiajpica ashtahuan facillla apoyaita ushashun”. ¿Quiquinba congregacionbi cambiocuna tiashcamanda o shuj mushuj asignacionda chasquishcamandachu talvez preocupado sintiripangui? Ama yapata preocuparipaichu. Jehová Diosca quiquin imashna sintirijujtaca intindinmi. Cambiocuna tiajpipash Jehová Diosta y paipa organizaciondapash siempre apoyajpica Jehová Diosca ninandami bendicianga (Sal. 18:25).

15. Congregación ucupi imapash cambiocuna tiajpica ¿imashinata aliguta pensarishpa imagutapash ruran cashcata ricuchi ushapanchi?

¹⁵ Último punllacunapi causajuimandami congregación ucupica huaquin cambiocuna tiaita ushan. Y chai cambiocunata apoyashcata o na apoyashcatami ricuchina tucupanchi. Chaimandami tucuita aliguta pensarishpa rurangapaj esforzarina capanchi. Shuj huauqui o pani ñucanchita nali tratashcata pensashpaca, na resintirishca quidanachu capanchi. Ñucanchita corregijpica, corregishcata aliguman chasquishpami cambiocunata rurangapaj esforzarina capanchi. Y Jehovapa organizacionbi tiashca cambiocuna ñucanchitapacha afectajpipash tucui shungu apoyashpa cazupashunchi.

16. Jehovapi y paipa organizacionbi confiashpa catingapaca ¿imatata rurai ushapangui?

¹⁶ Problemacuna o cambiocuna tiajpipashmi quiquinga Jehovapi y paipa organizacionbi confiashpa catita ushapangui. Y chaipaca quiquindaca tranquilo cana, imagutapash aliguta pensarishpa rurana y Jehová Dioshnallata pensanami ayudanga. Bibliapica quiquinba situacionbishna cashca gentecunapa ejemplomanda yachajupai, Jehová Diospa ayudata mañapai y huauquipanicunamandapash ama caruyapaichu. Shina rurashpaca Jehovamanda, paipa organizacionmandapash Diablo caruyachichunga na saquishunllu (Sant. 4:7).