MARDOQUEO runagumandaca Bibliapa Ester libropimi parlan. Paica “rey Asueropa punllacunapimi” Persia llactapa palacio huasipi trabajarca. Chaica Jesús cai alpaman nara shamujpillata, más o menos 500 huatacuna huashamanmi pasarca. (Rey Asuerotaca cunanbica rey Jerjes primero nishpami ashtacacunaca rijsin). Rey Asuerota ama huañuchichunmi Mardoqueo runaguca jarcai usharca. Chaimandami reyca Mardoqueo runagutaca gentecunapa ñaupapi agradicirca. Hamán nali runa huañushca jipaca reyca Mardoqueotami primer ministro cachun churashpa autoridadta curca. Shina autoridadta charishcamandami Mardoqueo runaguca, Persia llactapi causaj judío gentecunata huañuchingapaj munajpica paicuna difindiri ushachun shuj leyta churarca (Est. 1:1; 2:5, 21-23; 8:1, 2; 9:16).

1901 huatamanda callarishpami huaquin historiadorcunaca Ester libropash y chaipi parlashcacunapash na ciertochu can nishcarca. Pero 1941 huatapica arqueologocunaca Mardoqueo runagu ciertopacha tiashcata ricuchij cosascunatami tarirca. Paicunaca ¿imatata tarirca?

Paicunaca persa idiomapi shuj escribishcatami tarirca. Chaipica Marduka shuti runamandami parlajurca. (Marduka nishpaca españolpica Mardoqueo nisha ninmi). Shinallata cai runaca Susa llactapa palacio huasipi administrashpa trabajashcatami ricuchin. Historiacunata estudiashca Arthur Ungnad runa chaita tarishpaca “caipillami Mardoqueo runamandaca parlajushca y Bibliahuanga na ricunata charinllu” nircami.

Arthur Ungnad runa cai shimicunata nishca jipallami persa idiomapi ashtaca ashtaca escribishcacunataca gentecunaca traduci callarirca. Por ejemplo Persépolis llacta ladollapi tarishca tablillacunatapashmi traducirca. Cai tablillacunaca rey Jerjes primero mandajuj tiempocunamandami can. Cai tablillacunaca elamita idiomapimi escribishca can y chaipica Ester libropi parlashca huaquin shuticunami escribishca tianajun. a

Persépolis llactapi tarishca huaquin tablillacunapica Marduka runamandami parlan. Chaipica Marduka runa, Susa llactapi Jerjes primero mandajuj tiempopi reypa trabajan cashcatami ricuchin. Shuj tablillapica Marduka runa traductor cashcatami nin. Cai nishcaca Bibliapi Mardoqueo runagumanda nishcahuanga igualmi can. Bibliapica Mardoqueoca rey Asueropa (Jerjes primeropa) shuj funcionario cashcata, al menos ishcai idiomacunata parlan cashcata y Susa llactapi palacio huasipa pungupi tiarin cashcatami ricuchin (Est. 2:19, 21; 3:3). Cai pungu nishcaca shuj jatun edificiomi carca. Cai pushtupimi reypa funcionariocunaca trabajan carca.

Shinaca tanto cai tablillacunapi parlashca Marduka y Bibliapi Ester libropi parlashca Mardoqueo runagupash chaillatami can yarin. Porque tablillacunapi y Bibliapipash chai tiempopillata, chai pushtupillata causashcatami parlan. Marduka y Mardoqueopash reypa funcionario cashcatami nin. Caicunata ricushpami Marduka y Mardoqueopash chai personallata cashcata nita ushapanchi.