1-3. a) Dios ima nishcata Zacarías villai callarijujpica ¿imashinata israelitacunaca causanajurca? b) ¿Imamandata Jehová Diosca israelitacunataca paiman tigrachun nirca?

ZACARIASCA muscuipishnami pillushca cara jahuata rijujta, canasto ucupi tiajuj huarmita, cigüeña nishca animalpa alascunahuan shina ishcai huarmicuna paicunapa alascunapi huairata apanajujtami ñapash ricurca (Zac. 5:1, 7-9). ¿Imamandata Jehová Diosca muscuipishna Zacariasmanga chaicunata ricuchirca? Zacariaspa punllacunapi israelitacunaca ¿imashinata causanajurca? Zacarías muscuipishna ricushcacunaca ¿imashinata ñucanchitapash ayudan?

² Jesús cai alpaman nara shamushca 537 huataca ninan cushijuimi israelitacunapaca carca. ¿Imamandata israelitacunaca ninanda cushijushca carca? Paicunaca 70 huatacunata Babilonia llactapi prezo causanajushca cashpapash, ña libremi quedashcarca. Callaripica israelitacunaca Diospa templo huasita cutin shayachishpa, Jehovata cutin ali adoragrinajushcamandami  cushijushca carca. Huata 536​pica Diospa templo huasita shayachingapami callari rumicunata churarca. Bibliapica ninmi: Israelitacunaca ‘ninanda cushijushpami caparinajurca, paicuna caparinajuica carucamanmi uyarijurca’ nishpa (Esd. 3:10-13). Shinapash israelitacunapa contracunaca templo huasita ama shayachichunmi shuj shuj jarcaicunata churarca. Chaimi israelitacunaca desanimarishpa chai templo huasita shayachinapa randica, paicunapa huasicunata rurashpa, alpacunata tarpushpa causanajurca. Templo huasita shayachi callarishcamanda 16 huatacuna jipaca, templo huasita shayachinataca cungaitami cungashcarca. Chaimandami Jehová Diosca israelitacunataca paicunapa munaicunata saquishpa na manllashpa, cushijushpa cutin paita adorachun yarichirca.

³ Jehová Diosca israelitacunata imamanda Babilonia llactamanda llujchishcata yarichichunmi, profeta Zacariasta huata 520​pi cacharca. Zacarías shutica “Jehová Diosca na cungashcachu” ningapami munan. Shinaca israelitacuna Jehová Dios paicunamanda imata rurashcata cungajpipash, Jehová Diosca paicunataca na cungarcachu (Zacarías 1:3, 4, liingui). Diosca, israelitacuna cutin paita ali adorachunmi ayudagrijurca. Shinapash Jehovata tucui shunguhuan adorajpillami paicunapa adoraciondaca chasquigrijurca. Zacariasca tauca muscuicunatashnami charirca. Chaicunamanda ishcaicunata utilizashpa Jehová Dios imashina israelitacunata ayudashcata ricupashun. Chaita yachajunaca ¿imashinata ñucanchitapash ayudan?

4. a) Zacariasca ¿imatata muscuipishna ricurca? b) Chai carapi ishcandi ladoman escribishca cashpaca ¿imatata ricuchijurca? (Callari dibujocunamanda número 1​ta ricupangui).

⁴ Zacarías capítulo 5​pica Zacarías muscuipishna ricushcamanda parlashpami callarin. Chai muscuipishna ricushca shuj muscuicunahuanga na igual carcachu (Zacarías 5:1, 2, liingui). Profeta Zacariasca ricurcami 9 metro largo, 4 metro chaupi anchota medij pillushca cara jahua huairata rijujta. Chai caraca ishcandi ladoman escribishca liingapaj pascashcallami carca (Zac. 5:3). Chai punllacunapica carapica shuj ladomanllami escribin carca. Ishcandi ladoman escribishca caimandami chai carapi escribishcacunaca importantepacha cashcata ricuchijurca. Ashtahuanbash, chai carapi escribishcacunaca llaquichi tucuna cashcatami ricuchijurca.

5, 6. ¿Imatata Jehová Diosca shuhuanamandaca yuyan?

⁵ (Zacarías 5:3, 4, liingui). Tucuicunallatami ñucanchi causaipi imata rurashpapash Diospa ñaupajpi ricuchina capanchi. Ashtahuanbachaca Jehovata sirvijcunami chaitaca pactachina capanchi. Imatapash shuhuashpaca Jehovapa shutita na respetashcatami ricuchinajupanchi. Chaitaca Jehovata juyajcunaca alimi yachapanchi (Prov. 30:8, 9). Huaquingunaca pensanmi, minishtimanda shuhuanaca na juchachu can nishpa. Shinapash shuhuacunaca imapash cosascunata charinami Jehovamanda, paipa shutimanda, paipa mandashcacunamanda yali cashcata ricuchin.

 ⁶ Zacarías 5:3, 4​pica ninmi: ‘Chai jatun llaquica, shuhuacunapa huasiman chayashpami tucuchingacaman chaipi tiajungalla’ nishpa. Cai shimicunaca ricuchinmi, Jehová Dios paita sirvijcuna ima juchata rurajpipash tucuita ricujuimanda llaquichinata o na llaquichinatapash decidi ushashcata. Gentecunaca imapash nali cosascunata rurashpaca policiacunaman, paicunata trabajachij dueñocunaman, ancianocunaman, taitamamacunaman pacashpapash Jehovaman pacaitaca na ushangachu. Pacalla shuhuajujtapashmi Jehová Diosca ricujun. Chaimi pacalla quedachunga na saquinga (Heb. 4:13). Jehovata sirvijcunaca, tucuipi honrado cangapaj esforzarijcunahuan tandanajuimandami ninanda cushijunchi (Heb. 13:18, NM).

7. Jehová Dios llaquichina punllamanda salvaringapaca ¿imatata rurana capanchi?

⁷ Imatapash shuhuashpaca Jehovatami llaquichinchi. Jehovata sirvijcunaca paipa mandashcacunataca tucui shunguhuanmi cazunchi. Chaimi Jehová munashcashna causashpa paipa shutitapash jatunyachinchi. Chaita pactachishpaca yachashca jahua Jehovapa mandashcacunata na cazuj gentecunata llaquichina punllapica, ñucanchica salvarishunmi.

8-10. a) ¿Shuj juramentoca imata can? b) ¿Imatata Sedequiasca na pactachirca?

⁸ Zacarías muscuipishna ricushca carapi escribishcacunaca Diospa shutipi juramentushpapash na pactachijcuna ima tucunatami villajun (Zac. 5:4). Shuj juramentoca na llulla cashcata ricuchingapami can. Shinallata imatapash rurangapaj o na rurangapaj ofrecijushcata pactachinapacha cashcatami ricuchijun.

⁹ Jehovapa shutipica na yangata juramentunachu canchi. Sedequías Jerusalén llactata mandajujpica ¿imata paihuanga pasarca? Paica Judá llactamanda último reymi carca. Sedequiasca Babilonia llacta ima nishcataca,  tucuitami cazusha nishpami Jehovapa shutipi juramenturca. Shinapash paica “ari nishpa juramentushcata yangapi churashpami na cazurca”. Chaimandami Jehová Diosca cashna nirca: Sedequiasca “Babilonia llacta chaupipimi huañunga” nishpa (Ezeq. 17:16).

¹⁰ Rey Sedequiasca Diospa shutipimi juramentushca carca. Chaimi Jehová Diosca chaita pactachichun munarca (2 Crón. 36:13). Shinapash pai juramentushcata na pactachishpami Sedequiasca babiloniocunapa maquimanda cacharichichun Egipto llactapa ayudata mascarca. Shinapash Egiptoca na ayudaita usharcachu (Ezeq. 17:11-15, 17, 18).

11. Ñucanchicunapaca ¿imata ashtahuan importante can?

¹¹ Jehová Diospashmi ñucanchi imata ofrecishcataca uyan. Chaimi Jehová Diosca pactachichun munan. Chaimandami paipa ñaupajpi ali ricuringapaca imata ofrecishpapash tucuita pactachina capanchi (Sal. 76:11). Diosman mingarinami ñucanchicunapaca ashtahuan importante can. Jehová Diosman mingarishpaca ima pasajpipash candallami para siempre sirvishpa causasha nishpami ofrecinchi.

12. Diosman mingarishcata ricuchingapaca ¿imashinata causana capanchi?

¹² Diosman mingarishcataca ¿imashinata pactachi ushapanchi? Ima llaquicunata charishpapash chaita chimbapurashpami, Jehovatalla punllandi sirvisha nishcata pactachinajunchi (Sal. 61:8). Caipi yuyapashun, pipash trabajopi, escuelapi ñucanchita molestajpica ¿alicachishpachu ricunajunchi? O ¿Jehovata tucuipi cazungapaj munashcatachu ricuchinchi? (Prov. 23:26). Familiapi ñucanchilla testigo de Jehová cashpaca ¿Jehová munashcashna portaringapaj ayudahuai nishpachu Jehovata mañanchi? ¿Ñucanchi causaipi ima pasajpipash cada punllachu Jehovapa juyaimanda, ñucanchita ayudajushcamanda agradicingapaj Jehovata mañanchi? ¿Bibliata cada punlla liingapaj tiempota llujchinajunchichu? Jehovaman mingarijushpaca chai tucui cosascunata pactachisha nircanchimi. Chai nishcata pactachishpaca Jehovata cazushcatami ricuchinchi. Jehovata tucui shunguahuan sirvishpaca paita juyashcataca, tucui shunguhuan paiman mingarishcatapashmi ricuchinchi. Jehovata sirvijushcataca tucui ñucanchi causaipimi ricuchina capanchi. Jehovaman imata nishcata pactachinaca ñucanchillata ali causachunmi ayudan. Jehová Diosca paita tucuipi cazujcunamanga jipa punllacunapi shuj alipacha causaita carasha ninmi (Deut. 10:12, 13).

13. Zacarías muscuipishna ricushca caramandaca ¿imatata yachajupanchi?

¹³ Zacarías muscuipishna ricushca caramandaca ¿imatata yachajupanchi? Jehovata juyajcuna na shuhuana cashcata, ñucanchi imata ari nishpapash tucuita pactachina cashcata. Israelitacuna pandarijpipash Taita Dios paicunata na cungashcatami yachajupanchi. Israelitacunaca ashtaca contracunapa chaupipi causanajuimandami ashtaca llaquicunata charirca. Chaitaca alimi Jehová Diosca intindirca. Jehová Diosca siempremi paipa nishcacunata pactachin. Chaimi ñucanchipash paipa ejemplota cati ushapanchi. Ashtahuanbash ñucanchi  ari nishcata pactachichun Jehová Dios ayudanataca seguromi cana capanchi. ¿Imashinata Jehová Diosca seguro cachun ayudan? Jehová Diosca ñallami cai alpamanda tucui nali ruraicunata tucuchinga. Caimanda ashtahuan yachajungapaca Zacariaspa caishuj muscuipishna ricushcata yachajupashunchi.

14, 15. a) Zacariasca ¿imatata muscuipishna ricurca? (Callari dibujocunamanda número 2​ta ricupangui). b) Canasto ucupi tiajuj huarmica ¿imatata ricuchin? c) ¿Imamandata chai huarmitaca ñapash canastopi tapashpa saquirca?

¹⁴ Zacarías muscuipishna carata ricushca jipaca shuj angelca nircami: “Cambaj ñavita vichai alsashpa ricui” nishpa. Chashna nishca jipallami Zacariasca muscuipishna ‘granota medina cajonda’ o canastota ricurca (Zacarías 5:5-8, liingui). Cai canastoca ‘plomohuan rurashca tapahuan’ tapashcami carca. Tapata alzajpica, Zacariasca chai canasto ucupi shuj huarmi tiajujtami ricurca. Chaimi chai angelca nirca, chai huarmica ‘juchata’ o nali ruraicunatami ricuchijun nishpa. Profeta Zacariasca canastomanda chai huarmi llujshingapaj munajta ricushpaca ninandami manllarishcanga. Shinapash chai angelca ñapashmi chai huarmitaca granota medina canasto ucupillata tapashpa saquirca. Shina rurashpaca ¿imatata ricuchijurca?

¹⁵ Jehová Diosca paipa llactapi nali ruraicuna tiachunga nimamanda na saquinllu. Imapash nali ruraicuna tiajpica Jehová Diosca ñapashmi anchuchin (1 Cor. 5:13). Chai angelca ñapashmi canastota tapashpa saquirca. Shinami Jehová Dios nali ruraicunata ñapash anchuchinata ricuchirca.

16. a) Chai canastota pascajpica ¿imatata Zacariasca ricurca? (Callari dibujocunamanda número 3​ta ricupangui). b) Alasyu huarmicunaca ¿maimanda canastotaca aparca?

¹⁶ Chai jipaca Zacariasca cigüeña nishca animalpa alascunahuanshna ishcai huarmicunatami  ricurca (Zacarías 5:9-11, liingui). Cai ishcai huarmicunaca, canasto ucupi tiajuj huarmihuanga na igual carcachu. Zacariasca caitapashmi ricurca, ‘juchata’ o nali ruraicunata charij canastota chai alasyu huarmicuna apashpa rijta. ¿Chai canastotaca maimanda apashpa rirca? Chai canastotaca Sinar o Babilonia llactamanmi apashpa rirca. ¿Imamandata chai llactaman aparca?

17, 18. a) ‘Juchata’ o nali ruraicunataca ¿imamandata Sinar llactaman apana carca? b) Jehovapa llacta limpio cachunga ¿imatata rurana capanchi?

¹⁷ ‘Juchata’ o nali ruraicunata Sinar o Babilonia llactaman apana cashcataca Zacariaspash, chai punllacunapi causanajuj israelitacunapash alimi yacharca. Babilonia llactapica huainayashpa, yanga dioscunata adorashpallami causan carca. Chaimi israelitacunaca cada punlla chai nali ruraicunapi ama urmangapaj cuidarina carca. Chaimandami chai llactapi nali ruraicunalla tiashcataca ali yacharca. Zacarías muscuipishna imata ricushcata israelitacuna yachashpaca ninandami animarishcanga. Chai muscuica, Jehová Dios chai tucui nali ruraicunata tucuchishpa paita ali adorachun ayudanatami ricuchijurca.

¹⁸ Zacariaspa muscuica caitapashmi ricuchijurca. Jehovata ali adorangapaca israelitacunallata imapash nali ruraicunata ama rurangapaj esforzarina cashcata. Jehová Diosca paipa llactapi nali ruraicuna tiachunga na saquingachu. Jehovami paipa limpio llactaman apamushca. Cai llactapimi Jehová ñucanchita juyashcata, cuidashcatapash cuenta japinchi. Shina cajpipash Jehovapa llacta limpio cachunga ñucanchipashmi ayudana capanchi. ¿Chaitaca ñucanchipashchu ruranajunchi? Jehová Diospa llactapica nali ruraicunaca na tianachu can.

19. Zacarías muscuipishna ricushcacunaca ¿imatata ricuchin?

¹⁹ Zacariaspa muscuipishna ricushcacunaca na honrado cangapaj munajcunahuan ima tucunatami ricuchijurca. Jehová Dios nali ruraicunata nimamanda na ricunayachishcata yarichunbashmi ayudarca. Jehovapa ñaupajpi ali ricuringapaj esforzarijpica Jehová Diosca na llaquichingachu. Chaimi Jehovata sirvijcunaca nali ruraicunataca millanayachina capanchi. Shina rurajpica Jehová Diosca ñucanchita cuidanga, ashtaca bendiciongunatapashmi caranga. Cai nali mundopi causashpapash limpio cangapaj esforzarijpica Jehovallatami ayudanga. Shinaca Jehovata ali adoranaca ¿ima horapash tucuringacha? Ninan Manllanai Llaqui Punllacunapi Jehová Dios paipa llactata cuidanataca ¿imamandata seguro capanchi? Cai tapuicunataca cati temapimi yachajupashun.