JOHNBA familiaca Gujarat (India) llactapimi causan. 1950 huatacunapica paipa taitaca, bautizarishpami testigo de Jehová tucurca. Shinapash Johnbash, paipa mamapash, paipa 5 huauquipanicunapashmi catolicocunapacha carca. Chaimandami paipa taitapa religiondaca nalicachinajurca.

Shuj punllaca Johnba taitaca congregacionmanda shuj amigomanmi shuj cartata saquigrichun Johndaca cacharca. Chai punllaca Johnga shuj tanqueta pascajushpami dedota ushashcataca chugrirca. Shinapash paipa taitata cazungapaj munaimandami, Johnga dedota shuj findohuan pillushpa paipa taitapa amigopaman rirca.

Chaiman chayajpica, taitapa amigopa huarmillami chaipi cashcarca. Paipash testigo de Jehovami carca. Johba dedo chugrishcata ricushpami chai paniguca, jambicunata llujchishpa chugrishcata limpiashpa, dedotaca aliguta huatachirca. Chai ratopillatami té yacuguta rurashpandi Bibliamanda Johnman parlajurca.

Testigo de Jehovacunata na ricunayachishca yuyaicunaca Johnmandaca asha ashami chingarca. Chaimi Jonhga chai paniguhuan parlangapaj munarca. Johnga cashnami yuyan carca, Jesusca Diosmi can, virgen Mariata rezanami can nishpa. Shinapash paipa taitaca na chaita crinllu carca. Chai paniguca gujarati nishca idiomata parlaita yachaimandami, Johnmanga paipa idiomapi chai yuyaicunamanda Biblia imata yachachijushcata intindichirca. Jipamanga “Estas buenas nuevas del reino”. nishca folletotami paiman curca.

Chai folletota liishpami Johnga chai folletopi yachachishcacunaca Diosmanda cabalta yachachijushcata cuenta japirca. Chaimandami iglesiapi curata ricungapaj rishpa, chai paniguhuan parlashcatallata parlangapaj rirca. Pero chai curaca ninanda culirashpami, Bibliata pigashpa cashna caparirca: “¿Cunanga Diablochu tigrarcangui? Bibliapica ¿maipita Jesusca na Dioschu can nijun? ¿Maipita virgen Mariata na rezanachu can nijun? ¿Maipita shina nijun?” nishpa. Chai cura shina nijta uyashpaca, Johnga manllarishpami ricurca. Chaimi Johga cashna nirca: “Iglesia catolicamanga shuj chaquitallapash nunca na churamushachu” nishpa. Shina nishcataca pactachircami.

Shinami Johnga testigo de Jehovacunahuan Bibliamanda yachajui callarishpa, testigo de Jehová tucushpa Jehová Diosta sirvi callarirca. Paipa familiapuracunapash paipa ejemplotami catirca. Johnga paipa maqui dedopi chugrishca señaltaca charinrami. Chaita ricushpaca sesenta huatacuna huashaman chai panigu alita ruraimanda, Jehová Diosta rijsishcataca juyaihuanmi yuyarin (2 Cor. 6:4, 6).