1. Jehová Diosca ¿imashinata gentecunataca rurashca? Y Jehová Diosta adorashpaca ¿imashinashi causashun?

 CIERTOPACHA cushijuica asha ratopallaca na canllu. Para siempremi cushilla causaitaca usharin. Sermón del Montepi cashpaca, Jesusca cushilla causangapaj imata rurana cashcatami nirca. Paica: “Taita Diosmanda yachajungapaj munajcunaca ninandami cushijun” nircami (Mat. 5:3). Jehovata rijsina munaihuan, paita adorana munaihuan Jehová Dios gentecunata rurashcataca Jesusca alimi yacharca. Chaimandami Bibliapica gentecunaca: “Taita Diosmanda yachajungapaj” munaitami charin nin. Shinallata Jehová Diosca “cushilla Taita” Diosmi can. Chaimandami paita sirvijcunapash cushilla causaita ushan (1 Tim. 1:11).

2, 3. a) Jesús Sermón del Montepi yachachijushpaca ¿imatata ashtahuan nirca? b) Cai temapica ¿imatata yachajugripanchi?

² ¿Ali situacionda charishpallachu cushilla causaita ushanchi? Na. Jesusca Sermón del Montepi yachachijushpaca ‘llaquilla cajcunapash’, imapash juchacunata rurashcamanda nali sintirijcuna o imapash difícil situaciongunata charijcunapash cushillami causaita ushan nircami. Shinallata ‘alita rurashcamanda catiriashpa llaquichi tucujcuna’ o Jehová Diosta sirvij cashcamanda nali shimicunahuan rimai tucujcunapash cushillami causaita ushan nircami (Mat. 5:4, 10, 11). Chashna llaquicunata charishpaca ¿imashinata ciertopacha cushilla causaita ushanchi?

³ Jesusca ñucanchicuna ali cashca horaslla cushilla causaita ushanchi nishpaca na nircachu. Chaipa randica Jehová Diosta rijsishpa, paiman ashtahuan quimirishpallami cushilla causaita usharin nishpami yachachirca (Sant. 4:8). Pero ciertopacha cushilla causangapaca ¿imatata rurai ushanchi? Cai temapica cushilla causai ushangapaj quimsa importante yuyaicunatami yachajupashun.

4. Cushilla causangapaca ¿imatata rurana capanchi? (Salmo 1:1-3).

⁴ PASO 1: Ciertopacha cushilla causangapaca, Bibliamandami ashtahuan yachajushpa catina capanchi. Gentecunapash, animalcunapash causashpa catingapaca micunagutami minishtin. Chaimandami tucui gentecuna espiritualmente micunshna cangapaca, Bibliamanda yachajunaca importante can. Jesusca: “Gentecunaca tandata micushpallaca na causai ushangachu. Sino Jehová Diospa shimita pactachishpami causai ushanga” nircami (Mat. 4:4). Shinaca cada punllami Taita Diospa Shimi Bibliagumanda ashtahuan yachajushpa catina capanchi. Caimandallata parlashpami salmista runaguca alita ruraj runaca: “Mandaj Dios mandashcata pactachishpami cushijun. Tutapash, punllapash chai mandashcataca aliguta yariajunllami” nircami (Salmo 1:1-3​ta liipangui).

5, 6. a) Bibliapica ¿imatata yachajuita ushapanchi? b) Bibliata liinaca ¿imashinata ayudan?

⁵ Jehová Diosca ñucanchita juyaimandami cushilla causachun imata rurana cashcataca Bibliapi yachachin. Por ejemplo, Bibliapica Jehová Dios ñucanchiman imamanda causaita cushcata, paipa amigo cangapaj imata rurana cashcata y juchata rurashca cajpi Jehová Dios perdonachun imata rurana cashcatapashmi yachachin. Shinallata shamuj punllacunapipash shuj juyailla causaiguta caranatapashmi parlajun (Jer. 29:11). Cai cosascunamanda Bibliapi yachajuimandami ninanda cushijupanchi.

⁶ Cushilla causangapaca Bibliapica ashtaca consejocunami tian. Cai consejocunata pactachishpaca, ciertopachami cushilla causanchi. Shinaca problemacunamanda ninanda preocuparijushpaca Jehová Diosmanda yachajungapaj,  Bibliata liingapaj, liishcapi pensaringapaj ashtahuan esforzaripashunchi. Jesusca: “Taita Diospa shimita uyashpa pactachijcunami ashtahuan cushijun” nircami (Luc. 11:28).

7. Bibliata liijushpaca ¿imatata rurana capanchi?

⁷ Bibliata liijushpaca aliguta yachajungapami esforzarina capanchi. ¿Imashinata chaita ruraita ushapanchi? Caipi pensaripashunchi: Pipash ñucanchi gushtashca micunaguta yanushpa carashcanman. Pero ñucanchicunaca yapa apurado cashcamanda o shuj shuj problemacunapi pensajuimandami, chai micunataca una sola micushcanchiman. Y micushpa tucuchishca jiparami micunapa saborta ali sintingapaca alimandalla micuna cashcanchi yashpa pensanchiman. Bibliata liinahuanbash shinallatami pasaita ushan. Talvez yapa apurado cashcamandami Bibliataca jahua jahualla liishpa imata nijujtaca na ali yachajui ushapanchiman. Bibliata liijushpaca Bibliapi parlashca tiempopi cashcashna, chai tiempopi causashca gentecunata ricujunshna y liishcapi aliguta pensaringapami tiempota llujchina capanchi. Shina rurashpaca ñucanchillatami cushilla sintirishun.

8. ‘Aliguta cazushpa, aliguta pensarishpa sirvij esclavoca’ ¿imatata pactachijun? (Notatapash ricupangui).

⁸ Jesusca “aliguta cazushpa, aliguta pensarishpa sirvij esclavomanmi” ñucanchicunaman espiritual micunaguta carachun encargashca. Chaimandami Bibliamanda yachajungapaca ashtacata charipanchi (Mat. 24:45). b Aliguta cazushpa, aliguta pensarishpa sirvij esclavoca espiritualmente micunaguta caranshna yachachingapaca Bibliatami utilizan (1 Tes. 2:13). Shinami Bibliapi nishcashna Jehová Dios imashna pensajta yachajui ushapanchi. Chaimandami Villajun y Rijcharipaichi, revistacunataca liipanchi. Shinallata jw.org paginapi llujshishca temacunatapashmi liipanchi. Fin de semana y chaupi semana reuniondapashmi prepararipanchi. Shinallata JW Broadcasting^® programatapashmi ricupanchi. Shinaca Bibliamanda yachajungapaj cushca ayudacunata ali aprovechapashunchi. Ciertopacha cushilla causangapaj imata ashtahuan rurai ushashcata ricupashunchi.

9. Ciertopacha cushilla causangapaca ¿imatata ashtahuan rurana capanchi?

⁹ PASO 2: Ciertopacha cushilla causangapaca Jehovapa mandashcacunatami cazuna capanchi. Salmista runaguca: “Mandaj Diosta manllashpa, pai yachachishcashna causajcunaca, tucuicunami ninanda cushijun” nircami (Sal. 128:1). Jehová Diosta manllana nishpaca, paita respetaimanda pai nalicachishca cosascunataca na rurana cashcatami ningapaj munan (Prov. 16:6). Chaimandami Bibliapi liishcashna Jehová Diospa mandashcacunata cazushpa causangapaj esforzarina capanchi (2 Cor. 7:1). Jehová Dios na gustashca cosascunata na rurashpa y pai gustashca cosascunata rurashpaca cushillami sintirishun (Sal. 37:27; 97:10; Rom. 12:9).

10. Taita Diospa voluntad maijan cajta yachashpapash ¿imatata rurana canchi? (Romanos 12:2).

¹⁰ (Romanos 12:2​ta liipangui). Talvez shuj personaca Jehová Dioslla ima ali cajta y ima nali cajta nina derechota charishcataca alimi yachan. Pero paipashmi Taita Diospa mandashcataca cazuna can. Caipi pensaripashun: Shuj personaca carrota manejajushpa ama yapa shinlli velocidadpi manejachun gobiernocuna leycunata churana derechota charishcataca alimi yachan. Pero cai personallatami cai leycunata cazungapaca na munan. Leyta na cazushpami ashtahuan shinlli manejashpa rin. Ñucanchi casopipashmi ñucanchi comportamientohuan Jehová Diospa mandashcacunata cazungapaj munashcata o na munashcata ricuchinchi  (Prov. 12:28). Chaimandami Davidca Jehová Diostaca cashna nirca: “Causaipaj ñandami ricuchihuangui. Cambaj ñaupajpimi, ninan jatun cushijuica tiapan. Cambaj ali ladopimi, causaita causaicaman juyailla cushijuica tiapan” nircami (Sal. 16:11).

11, 12. a) Preocupado o desanimado cashpapash, ¿imata ama rurangapata cuidadota charina capanchi? b) Ima diversiongunata agllanata ali ricuchunga ¿imashinata Filipenses 4:8​ta ayudan?

¹¹ Imapash problemacunamanda preocupado o desanimarishca sintirishpaca chai problemacunata cungangapaj munaimandami shuj cosascunata rurai ushapanchi. Pero Jehová Dios nalicachishca cosascunata ama rurangapami cuidadota charina capanchi (Efes. 5:10-12, 15-17).

¹² Apóstol Pablo, Filipos huauquipanicunaman shuj cartata escribijushpaca, Taita Diospa ñaupapi ali ricurij tucui cosascunapi, limpio cashca tucui cosascunapi, juyachun ayudaj tucui cosascunapi y tucui ima ali cashca cosascunapimi pensarina canguichi nircami (Filipenses 4:8​ta liipangui). Apóstol Pablo cai shimicunata nishpaca, diversiongunamandaca na parlajurcachu. Pero ima diversiongunata agllagrijushpapash cai shimicunapi pensarinami ayudanga. Por ejemplo musicacunata, peliculacunata, librocunata o videojuegocunata agllagrijushpaca, apóstol Pablopa shimicunapi pensarinami Jehovapa ñaupapi ima ali ricurijta o ima nali ricurijta pensarichun ayudanga. Jehová Dios munashcashna causangapaj munaimandami shina pensarina capanchi (Sal. 119:1-3). Shina rurashpami ñucanchi concienciapipash tranquilo, ali sintirishpa ciertopacha cushilla causaita ushapashun (Hech. 23:1).

13. Ñucanchi causaipica ¿imata ashtahuan importante cana can? (Juan 4:23, 24).

¹³ PASO 3: Ñucanchi causaipica Jehová Diosta sirvinami ashtahuan importante cana can. Jehová Dios tucuita ruraj Dios cashcamandami, paitaca adorana capanchi (Apoc. 4:11; 14:6, 7). Shinaca “Taita Diospa espíritu santo ayudachun saquishpa y Taita Diosmanda cabal yachachishcacunata chasquishpami adorana” capanchi (Juan 4:23, 24​ta liipangui). Bibliapi yachachishcashna Jehová Diosta adorangapaca paipa espíritu santo ayudachunmi saquina capanchi. Jehová Diosta sirvichun prohibishca llactacunapi causashpapash, Jehová Diosta sirvinami ñucanchicunapaca ashtahuanbacha importante cana can. Cunan punllacunapica más de 100 huauquipanicunami testigo de Jehová cashcamanda carcelpi churai tucushca c. Cai huauquipanicuna shina situacionbi cashpapash Jehovata mañangapaj, Bibliamanda yachajungapaj y Taita Diospa Gobiernomanda villachingapaj esforzarijuimandami cushilla caita ushashca. Jehová Diospa contracuna ñucanchicunata nali shimicunahuan rimashpa, catiriashpa llaquichijpipash, Jehová Diospa ayudata charimanda y pai bendicianata yachaimandami cushilla sintiripanchi (Sant. 1:12; 1 Ped. 4:14).

14. Tayikistán llactamanda huauquigutaca ¿imata pasarca?

¹⁴ Cai temapi yachajushca quimsa pasocunata catishpa llaquicunata charishpapash ciertopacha cushilla cai ushashcatami, huaquin experienciacunapi ricuita ushapanchi. Yovidón Boboyónov huauquipa ejemplomanda ricupashunchi. Paica Tayikistán llactamanda 19 huatacunata charij shuj jovenmi can. Paitaca cuartelman na rinata decidishcamandami, 4 de octubre de 2019pica huaquin quillacunapa prezo churarca. Y prezo cajpica shua cajpishnami  maltratashpa charirca. Huauquiguta shina tratashcataca huaquin llactacunapipashmi noticiacunapica yalichirca. Cai huauquigutaca soldadocunata apoyashpa, soldadocunapa uniformeta churajuchun obligangapaj munaimanda ninanda maltratashcatami noticiacunapica villarca. Chai jipaca huauquigutaca, sentenciashpami shinlli trabajocunatapash rurachun obligarca. Shinapash asha tiempo jipami cai llactapa presidenteca cai huauquiguta libre saquichun mandarca. Cai tucui llaquicunata charishpapashmi huauqui Yovidonga Jehová Diosta cazushpa cushilla cati usharca. ¿Imashinata chaitaca rurarca? Chai huauquiguca Jehová Diosmanda siempre yachajushpa catina importantepacha cashcatami yaipi charirca.

15. Huauqui Yovidonga carcelpi cashpapash ¿imashinata Jehová Diosmanda yachajushpa catirca?

¹⁵ Huauqui Yovidón carcelpi cashpaca Bibliata, publicaciongunata na charishpapash Jehová Diosmandaca yachajushpami catirca. ¿Imashinata chaita rurarca? Huauquipanicuna, huauqui Yovidonman micunaguta apashpami micuna bolsacunapi texto diariota escribin carca. Shinami huauqui Yovidonga, Bibliatapash tucui punlla liishpa, liishcapi pensari ushan carca. Y pai carcelmanda ña llujshishpaca, paishnallata shina shinlli pruebacunata nara charishca huauquipanicunamanga cai consejotami curca: “Jehová Diosta libremente sirvi ushashpallatami paiman ashtahuan quimiringapaj aprovechana capanguichi. Chaipaca Bibliata,  ñucanchi publicaciongunata liinaca importantepachami can”.

16. Huauqui Yovidonga ¿imatata rurarca?

¹⁶ Huauqui Yovidonga Jehová Diospa mandashcacunatami cazurca. Chai huauquiguca nali munaicunata, nali cosascunata ladoman saquishpami Jehová Diospa munaita rurangapaj esforzarirca. Huauquiguca Jehová Diospa rurashcacunapi pensaringapami tiempoguta llujchin carca. Por ejemplo, pajarogucuna candajta uyashpami tutamandacunaca jatarin carca. Y tutacunaca lunata, estrellacunata ricunatami gushtan carca. Huauquiguca nircami: “Jehovapa rurashcacunata ricushpaca cushilla, alimi sintirin carcani”. Jehová Diosta ashtahuan rijsishpa, pai carashca cosascunamanda agradecido cashpaca cushillami sintiripanchi. Chaimi ima llaquicunata charijpipash aguantashpa ñaupaman catichun ayudan.

17. Yovidón huauquigupa situacionbishna caj huauquipanicunataca ¿imashinata 1 Pedro 1:6, 7​ca ayudaita ushan?

¹⁷ Yovidón huauquigupaca Jehová Diosta adorana paita sirvinami ashtahuan importante carca. Huauquiguca Jehovata tucuipi cazuna importantepacha cashcataca alimi yacharca. Jesusca nircami: “Jehová Diostami adorana cangui. Paitallami sirvina cangui” nircami (Luc. 4:8). Soldadocuna, y soldadota mandajcunapash Yovidón huauquigu Jehová Diosta sirvinata saquichunmi obligangapaj munarca. Pero chai llaquicunata aguantangapaca huauqui Yovidonga Jehová Diosta ayudahuai nishpami siempre mañan carca. Shina llaquicunata charishpapash Jehová Diosta sirvinataca na saquircachu. Carcelpi churai tucushca cashpa, macai tucushca cashpapash paipa fe ashtahuan shinlli tucushcamandami cushillapacha sintirin (1 Pedro 1:6, 7​ta liipangui).

18. Cushilla cangapaca ¿imatata rurana capanchi?

¹⁸ Jehová Diosca ñucanchicuna ciertopacha cushilla cangapaj imata rurana cashcataca alimi yachan. Shinaca cai temapi yachajushca quimsa pasocunata catishpaca llaquicunata, problemacunata charishpapash cushillami caita ushapanchi. Chaimi “gentecunaca, paicunapaj Taita Diosca Mandaj Dios cajpimi, ninanda cushijun” nishca shimicunataca ñucanchicunapash nita ushapashun (Sal. 144:15).