1. a) ¿Imatata Jesusca paipa chuscu catijcunamanga nirca? b) Paicunaca ¿imatata rurarca?

PEDRO, Andrés, Santiago, Juanbash pescadorcunami carca. Chaimi Jesús ‘ñucata catihuaichi, cangunataca pijita japishpa tandachinshna, gentecunata tandachijcuna cachunmi rurasha’ nijpica cushijurianga. Bibliapica paicuna “linllicunata chai pushtupi saquishpa, Jesusta catinajurca” ninmi (Mat. 4:18-22). Chai punllamandapachami paicunaca Jesuspa catijcuna tucushpa pescadota japinshna, gentecunaman yachachi callarirca (Luc. 5:10). Cunanbipashmi Jesusca Jehová Diosta juyaj gentecunataca shujcunaman villachichun animajun (Mat. 28:19, 20). ¿Quiquinga ñachu Jesuspa mandashcashna shuj gentecunaman villachi callaripashcangui?

2. a) Quiquinbash ¿imatata rurangapaj munapanguiman? b) Chaita decidichunga ¿imata ayudanga?

² Quiquinga talvez ña huaquin tiempotami Bibliamanda yachajujupangui. Chaimi cunanga publicador tucunata o na tucuna cashcataca quiquinllata ricuna capangui. Chaita decidinaca minishtirishcapachami can. Publicador tucunaca shuj jatun responsabilidad cashcata yachaimandachari chai decisionda japinataca manllajupangui. Imashinami Bibliapi ricupanchi Pedro, paipa cumbacunapash “linllicunata chai pushtupi saquishpa” Jesusta catishcatami ricuchin. Shinapash Pedropash, Andrespash 6 quilla yalitami Jesustaca ña ali rijsishca carca. Shinallata Jesús Mesías cashcatapashmi paicunaca seguro carca (Juan 1:35-42). Paicunashnallatami quiquinbash talvez ña Jehovamanda, Jesusmandapash ña yachajupashcangui. Chaimi paicunata sirvingapaj talvez ashtahuan munapangui. Shinapash publicador tucunata o na  tucunata nara decidishpallatami quiquinga imamanda publicador cangapaj munashcata ali yachana capangui. Chaita decidichunga Pedrota, Andresta, Jesuspa shuj catijcunatapash ima ayudashcata yachanami ayudanga.

3. Jesuspa invitacionda chasquichunga ¿imata Jesuspa punda catijcunataca ayudarca?

³ Jesuspa invitacionda chasquichunga Jesuspa punda catijcunataca: Villachina munaita charina, imashina villachinata yachajuna, villachinata na manllana, villachingapaj esforzarinami ayudarca. Shinami paicunaca gentecunata Jehovamanda yachachi usharca. Cunanga Jesuspa punda catijcunamanda imata yachajui ushashcata yachajupashun.

4. Familiata mantiningapaca Pedroca ¿imatata ruran carca?

⁴ Pedroca paipa familiata mantiningapami pescadocunata japishpa trabajan carca. Mantiningapaj trabajashpapash Pedroca pai charishca trabajotaca ninandami gushtan carca (Juan 21:3, 9-15). Jipaca pescadocunata tandachinshna gentecunaman ali villaigucunata villachinatapashmi ninanda gushtai callarirca. Jehovapa ayudahuanga paica alipachami shujcunaman villachinata, yachachinatapash yachajurca (Hech. 2:14, 41).

5. a) Lucas 5:8-11​pi nishca shinaca ¿imamandata Pedroca ishcai shungu carca? b) Bibliamanda yachajuj Pedroshna sintirijujpica ¿imata ayudanga?

⁵ ¿Imamandata villachina capanchi? Jehovata juyaimandami villachina capanchi. Jehovata juyanami ama ishcai shungu tucushpa villachichun ayudanga. Jesusca Pedro pescadocunata tandachinshna gentecunaman yachachichun animangapaj munashpaca “ama manllaichu” nircami (Lucas 5:8-11, liingui). Pedroca Jesuspa catij tucungapaca na ishcai shungu carcachu. Shinapash Jesús paipa  poderhuan tauca tauca pescadocunata tandachijta ricushpami Pedroca ashata manllashcanga. Paica Jesushuan trabajanataca na merecinichu yashcangami. ¿Quiquinbashchu Jesuspa catij tucuitaca na ushashachu yashpa ishcai shungu capangui? Shina cashpaca Jehovata, Jesusta, shuj gentecunatapash ashtahuan juyangapami esforzarina capangui. Shinami Jesuspa mandashcataca pactachi ushapangui (Mat. 22:37, 39; Juan 14:15).

6. ¿Imamandata villachina capanchi?

⁶ Jesusca ‘ñucapa yachajujcuna tucuchun, cai pachapi causanajuj tucuilla gentecunapajman rishpa villachinami canguichi’ nircami. Cai mandashcata pactachingapapashmi esforzarina capanchi (Mat. 28:19, 20). Shinallata gentecunaca “michij illaj, jichushca llamacunashna” cajpimi Diospa Reinomanda villachinaca minishtirishcapacha can (Mat. 9:36). Jehová Diosca tucui gentecuna paimanda cabalguta yachajushpa salvarichunmi munan (1 Tim. 2:4).

7. Romanos 10:13-15​pi nishca shinaca Diospa Reinomanda villachinaca ¿imamandata minishtirishca can?

⁷ Caipi pensaripashun, pescadota japijcunaca pescadota micungapaj o jatungapami pescadocunataca japin. Shinapash ñucanchicunaca pescadota japijcuna cuendami gentecunamanga Jehovapa Reinomanda villachina capanchi. Paicuna salvarichun munaimandami villachipanchi (Romanos 10:13-15, liingui; 1 Tim. 4:16).

8, 9. a) Pescadocunata japijcunaca ¿imatata ali ali yachan carca? b) Ñucanchicunapash ¿imatata gentecunamandaca ali ali yachana capanchi?

⁸ Jesuspa tiempopica israelitacunaca ima pescadocunata japinataca ali alimi yacharca (Lev. 11:9-12). Shinallata ali pescadocunata maipi tarinataca alimi yacharca. Pescadocunaca limpio, jundu jundu yacucunapi, micuna tiaj pushtucunapimi tian. Pescadocunata japijcunaca pescadocuna ima horas llujshijtaca ali alimi yachan. Chaita ali intindingapaca Islas del Pacificomanda shuj huauqui imata nishcata ricupashunchi. Shuj misionero huauquitami villachingapaj jacu nishcarca. Chaipimi chai misionero huauquica “caya las nueveta tuparishun” nirca. Shina nijpimi Islas del Pacificomanda huauquica “pescadocunata japingapaca ñucanchi munashca horasca na rinchichu. Pescadocuna ima horas llujshijtami ali yachana canchi” nirca.

⁹ Apostolcunapa punllacunapipashmi Jesusta ali catijcunaca pescadocunata japijcuna cuenda gentecunaman villachingapaca ima horas ali cashcata ricushpa villachingapaj rin carca. Por ejemplo, paicunaca templo huasipi, sinagoga tandanajui huasicunapi, huasin huasin, plaza mercadocunapipashmi villachin carca (Hech. 5:42; 17:17; 18:4). Ñucanchicunapashmi villachingapaj rishpaca gentecunapa costumbrecunata ricushpa maipi, ima horas villachina cashcatapash ricuna capanchi. Shinami tucuilla gentecunaman villachi ushapashun (1 Cor. 9:19-23).

10. Ali villachingapaca ¿imashinata Jehovapa organizacionga ayudajushca?

¹⁰ Pescadocunata japijcunaca pescadocunata japingapaca ima minishtirishcatami paicunaca charin. Chaicunata utilizanatapashmi ali ali yachan. Shina cuendami Jesusca paipa ali catijcunamanga villachingapaj rijushpa imata apanata, maipi villachinata, imata villachinatapash yachachirca (Mat. 10:5-7; Luc. 10:1-11). Cunanbipashmi Jehovapa organizacionga Yachachingapaj publicaciongunata cushca. Cai publicaciongunahuan imashina villachina cashcatapashmi yachachijun. *Jehovapa  organización yachachishcamandami ñucanchicunaca gentecunaman imashina villachinataca ali ali yachapanchi (2 Tim. 2:15).

11. Gentecunaman villachingapaca ¿imamandata na manllana capanchi?

¹¹ Pescadocunata japijcunaca mar yacu caiman chaiman ushashcata cuyurijpipash tutacunami trabajan. Shinapash pescadota japijcunaca na manllanllu. Ñucanchicuna villachi callarijpi, testigo de Jehová tucujpimi ñucanchi familiacuna contran. Amigocunapash burlari callarin. Shina burlarijpipash ñucanchicunaca pescadocunata japij cuendami na manllashpa Jehovamanda villachishpa catina capanchi. Shinallata ñucanchicuna villachinajujpipash gentecunaca na uyangapaj munangachu. Shina pasanataca Jesusca ñami villashca carca (Mat. 10:16).

12. Josué 1:7-9​pi nishca shinaca na manllashpa villachichunga ¿imata ayudanga?

¹² Na manllashpa villachichunga ¿imata ayudanga? Jesús ayudajushcata yarinami ama manllashpa villachichun ayudanga (Juan 16:33; Apoc. 14:14-16). Shinallata ñucanchita cuidasha nishcataca Jehová Diosca pactachingami. Chaitaca tucui shunguhuanmi crina capanchi (Mat. 6:32-34). Chaita crishpallami na manllashpa villachi ushapashun. Pedro, paipa cumbacunapash Jesuspi crimandami paicunapa negociocunatapash saquishpa Jesusta catirca. Quiquinbashmi testigo de Jehovacunahuan Bibliamanda yachajui callarishcata, tandanajuicunaman ri callarishcatapash  quiquinba familiacunaman, amigocunamanbash na manllashpa villapariangui. Shinallata Jehovapa mandashcacunata cazuimandami quiquinba causaita cambiapashcangui. Chaicunata rurashpami Jehovapi tucui shunguhuan crishcata, na manllashcatapash ricuchipashcangui. Jehovapi tucui shunguhuan crishpa catijpica Jehová Diosca siempremi quiquindaca cuidanga (Josué 1:7-9, liingui).

13. Jehovata mañana, pai imashina ayudashcata yarinaca ¿imashinata na manllashpa villachichun ayudan?

¹³ Na manllashpa villachichunga ¿imata ayudanga? Ama manllashpa villachingapami Jehovata ayudahuai nishpa mañana capanchi (Hech. 4:29, 31). Jehová Diosca ñucanchi mañaicunata uyashpami siempre ayudanga. Punda tiempopi paita sirvijcunata imashina ayudashcatami siempre yarina capanchi. Shinallata cunanbi charishca llaquicunata aguantashpa catichun, quiquinba causaipi cambiachunbash Jehová Dios imashina ayudashcatami yarina capangui. Israelitacunataca mar Rojota yalichunmi Jehová Diosca ayudarca. Shinallatami quiquindapash Jesusta ali catichun ayudanga (Éx. 14:13). Salmo librota escribij runagushnami ñucanchicunaca Jehovapi tucui shunguhuan confiana capanchi. Paica nircami: “Mandaj Diosca ñucahuan cajpimi, maijan runa ñucata llaquichinatapash na manllasha” (Sal. 118:6).

14. Masae shuti, Tomoyo shuti panigucunamandaca ¿imatata yachajupanchi?

¹⁴ Gentecunahuan ama manllashpa parlachunmi Jehová Diosca ayudan. Cunanga Masae shuti panigumanda yachajupashunchi. Paica paipa crishcacunamanda gentecunahuan parlanataca yapatami manllan carca. Paica tucurimui punllacunapi causajushcata ricushpami Jehovataca ama manllashpa villachingapaj ayudahuai nishpa mañarca. Shinami Jehovata juyaimanda, shuj gentecunatapash juyaimandaca villachingapaj esforzarirca. Ñana manllashpa villachi ushaimandami Masae paniguca precursora regularpash tucurca. Jehová Diosca Josué 1:7, 9​pi nishca shinami mushuj publicadorcunatapash na manllashpa villachichun ayudajun. Cunanga Tomoyo shuti panigumanda yachajupashunchi. Pai primera vez huasin huasin villachingapaj llujshijpica shuj señoraguca, Testigocunataca na uyangapaj munanichu nishpami pungutapash vichashpa saquirca. Chaimi Tomoyo paniguca paihuan caj panigutaca, ñuca imatapash na nijpillatami chai señoraguca ñucanchicuna Testigocuna cashcataca ña yachashca nirca. Cunanga Tomoyo paniguca precursora regularmi can.

15. a) Pescadota japijcunaca ¿imatata munai na munai rurana tucun? b) Jehovata sirvijcunaca ¿imatata tamia o na tamia rurana capanchi?

¹⁵ Pescadocunata japijcunaca munai na munaimi tutamandata jatarishpa huaquinbica tamia o na tamia trabajangapaj rin. Shinami ña pescadocunata japishpaca huasiman muyun. Shina cuendami Jehovata sirvijcunaca tamia o na tamia Jehovamanda villachishpa catingapaj esforzarina capanchi (Mat. 10:22).

16. ¿Imatata ñucanchimandallata rurana capanchi?

¹⁶ Tucuicunallatami imapash fácil cajpilla imatapash rurangapaj munapanchi. Shinapash imapash na fácil cajpica shujcuna ayudachunmi minishtipanchi. Shinallata imatapash alita rurangapaca obligarinami capanchi. Na ushajujpica Jehová Diosmi paipa espiritu santohuan ñucanchitaca ayudanga (Gál. 5:22, 23).

17. Jesusta ali catijcunamanga ¿imatata 1 Corintios 9:25-27​pica apóstol Pabloca nirca?

¹⁷ Apóstol Pabloca paimandallatami imatapash alita rurangapaj obligarin carca. Chaimi ‘ñuca cuerpota macanshna’ ninanda  esforzarijuni nirca (1 Corintios 9:25-27, liingui). Shinallatami Jesusta ali catijcunatapash apóstol Pabloca ‘imata rurana cajpipash, imashna rurana cashcashnallata rurana canguichi’ nirca (1 Cor. 14:40). Ñucanchicunaca apóstol Pabloshnallatami Jehovamanda villachishpa, yachachishpa catingapaca obligarina capanchi (Hech. 2:46).

18. Jehová Dios cushilla cachunga ¿imatata rurana capanchi?

¹⁸ Pescadocunata japijcunataca ashtaca ashtaca pescadocunata japijta ricushpami paica alipacha trabajador can nishpa ninanda alicachishpa gentecunaca ricun. Shinapash Jehovapa organizacionbica paica alipacha Testigomi, paica tauca gentecunatami Testigo tucuchun ayudashca nishpaca na yapata alicachishpaca ricupanchichu (Luc. 8:11-15). Chaipa randica Jehovata, Jesustapash cazujushcatami ricupanchi. Ñucanchicuna Diospa Reinomanda villachishpa, yachachishpa catijpica Jehová Diosca cushillami sintiringa (Mar. 13:10; Hech. 5:28, 29).

19, 20. ¿Imamandata cunanbica ashtahuan Diospa Reinomanda villachishpa catinapacha capanchi?

¹⁹ Huaquin llactacunapica huaquin quillacunatallami pescadocunata japichunga saquin. Chaimi chai quillacuna tucurijujta yachashpaca pescadota japijcunaca ashtahuan japingapaj rin. Shina cuendami ñucanchicunapash tucurimui punllacunapi causanajuimanda Diospa Reinomanda villachishpa catina capanchi. Shinapash ñucanchipa ali causaitaraca ama mascapashunchichu. Chaipa randica Jehovapa Reinomandami villachinapacha capanchi. Shinallami gentecunaca salvarita ushanga (Ecl. 11:4).

²⁰ Cunanmandallatami villachina munaita charingapaj, Bibliamanda ashtahuan yachajungapaj, villachinata na manllangapaj, tamia o na tamiapash villachingapaj obligarina capanchi. Mundo enteropica 8 millón yali Testigocunami pescadocunata japinshna gentecunamanga Diospa Reinomanda villachinajun. Quiquinbash paicunashna Diospa Reinomanda villachishpaca “Mandaj Dios cushijuita cushcamandami” cushilla sintiripangui (Neh. 8:10). Jehová Dios caicamanllami villachina canguichi ningacamanmi villachishpa catina capanchi. Caya semanaca tucui shunguhuan villachishpa catingapaj ima quimsa yuyaicuna ayudai ushashcatami yachajupashun.