Eclesiastés 5:8​pica ninmi: “Llactapica, imagutapash na charijcunata jatun llaquita rurashpa, paicuna japina cashcata na cushpa, paicunaman imatapash cashcatapacha na ruranajujta ricushpaca, ama manllaringuichu. Shuj mandajtaca, paitapash yali mandajmi ricujun. Chai mandajcunatapash ashtahuan yali jatun mandajmi ricujun”.

Eclesiastespi nishca shimicunaca cunan punllapi gobiernocuna imashina cashcatami villan. Shinallata Jehová Dios shuj alipacha mandaj cashcatapashmi nijun. Chaita yachanaca tranquilo, cushilla sintirichunmi ayudan.

Eclesiastés 5:8​pica gobiernocunaca pobre gentecunataca yangata tratajtami ricuchin. Chai gobiernocunaca shuj Dios paicunata ricujujtaca yaritapash na yarinllu. Chaimi pobre gentecunataca paicuna munashcashna tratashpa causan. Cutin huaquin gobiernocunacarin ashtahuan podertami charin. Imashina cashpapash tucui cai alpapi gobiernocunaca shuhuacuna, umachij gobiernocunami can. Shina gobiernocunaca ¿picunatata sufrichin? Pobre gentecunami ashtahuanbachaca sufrichin.

Chai gobiernocuna gentecunata llaquichishpa sufrichinajujtaca Jehová Diosca alimi ricujun. Chaita yachashpami ñucanchicunaca tranquilo sintiripanchi. Shinaca ima llaquita charishpa o imamandapash sufrinajushpaca Jehovata mañashpa paipa maquipi saquipashunchi. Shinami ñucanchicunaca tranquilo sintiripashun (Sal. 55:22; Filip. 4:6, 7). Bibliapica Jehová Diosca “ima pandatapash na yarij shunguhuan paita cazujcunaman alita rurashpa, paipaj tucui ushaita ricuchingapajmi, tucui cai pachata ricuriajun” nijunmi (2 Crón. 16:9).

Eclesiastés 5:8​pica cai alpapi gobiernocunamandaca shuj gobierno ashtahuan yali autoridadta charishcatami ricuchin. Shinallata cai textopica cai gobiernocunamandaca Jehovapa gobierno ashtahuanbacha yali autoridadta charishcatami ricupashcanchi. Cunanbica Jehová Diosca paipa Reinopi mandachunga Jesusmanmi autoridadta cushca. Jehová Diosca ima nalitapash na ruraj Diosmi can. Paipa churi Jesuspashmi shinallata can. Paicunaca tucui tucuitami ricurianajun.