1, 2. Eclesiastés 11:6​pi nishca shinaca ¿imatata rurashpa catina capanchi?

HUAQUIN llactacunapica gentecunaca Diospa Reinomanda villachijpica cushijushpami aliguman chasquin. Shinapash shuj llactacunapica Taita Diosmandapash, Bibliamandapash huaquingunallami uyangapaj munan. Ñucanchi territoriopi imashina gentecuna tiajpipash Jehová Diosca ñucanchicuna villachishpa catichunmi munan. Jehová Dios caicamanllami villachishpa catina canguichi ningacamanmi villachishpa catina capanchi.

² Jehová Diosca ima punllacamanlla villachina cashcataca ñami agllashcalla charin. Chaipimi “tucurimuica chayamunga” (Mat. 24:14, 36). Chai punlla chayamungacamanga tucui shunguhuan villachishpami catina capanchi (Eclesiastés 11:6, liingui).

3. Cunanga ¿imatata yachajupashun?

³ Caina semanaca pescadota “japishpa tandachinshna, gentecunata” Diospa Reinomanda yachachingapaj chuscu yuyaicunatami yachajuparcanchi (Mat. 4:19). Cunanga ima pasajpipash tucui shunguhuan Diospa Reinomanda o Gobiernomanda villachishpa catingapaj imata rurana cashcatami yachajugripanchi: 1) Villachishpa ocupado yalina, 2) pacienciata charina, 3) Jehovapi tucui shunguhuan crina.

4. Ñucanchicunaca ¿imatata rurashpa catina capanchi?

⁴ Tucurimui punllacunapi imashina gentecuna tianata, imacunalla pasana cashcatapashmi Jesusca paipa catijcunamanga villarca. Chaicunata ricushpami talvez paipa catijcunaca villachinataca ladoman saquinga nircami. Chaimi paicunataca “rijcharianshnami chapariana canguichi” nirca (Mat. 24:42). Cunanbipash  Noepa punllacunapishnami gentecunaca paicunapa munaita rurashpa causanajun. Chaimi Diospa Reinomanda villachijpica na uyangapaj munan (Mat. 24:37-39; 2 Ped. 2:5). Shinapash ñucanchicunaca Jehovapa mingashcataca pactachingapapachami munapanchi.

5. Hechos 1:6-8​pi nishca shinaca ¿maicamanda villachina capanchi?

⁵ Diospa Reinomanda villachishpami ocupado cana capanchi. Jesusca pai huañushca jipapash taucacuna villachishpa catinga nircami (Juan 14:12). Jesús huañushca jipaca, Jesuspa huaquin catijcunaca cutinmi pescadocunata japishpa trabajangapara tigrarca. Jesús causarishca jipaca shuj milagrota rurashpami paipa catijcunataca ashtaca pescadocunata japichun ayudarca. Chai jipami Diospa Reinomanda shuj gentecunaman yachachina ashtahuan minishtirishca cashcata intindichirca (Juan 21:15-17). Jesús nara cieloman tigrashpaca, ñuca catijcunaca mundo enteropimi Diospa Reinomandaca villachinajunga nircami (Hechos 1:6-8, liingui). Huaquin huatacuna jipaca Jesusca apóstol Juanman muscuipishna ricurishpami “pai mandajuj punllacunapi” * imacunalla pasana cashcata ricuchirca. Juanga angelcunapa ayudahuan ‘cai pachapi causajcuna, tucui llactacunapi causajcuna, aillucuna, shuj rimaita parlajcuna, shuj shuj gentecunapash, causaita causaicaman quishpirichun villachinajujtami’ ricurca (Apoc. 1:10, NM; 14:6). Jehová Diosca ñucanchicuna ultimocaman villachishpa catichunmi munan.

6. Diospa Reinomanda tucui shunguhuan villachichunga ¿imata ayudanga?

⁶ Diospa Reinomanda tucui shunguhuan villachichunga Jehová Diosca ashtaca publicaciongunatami cushca. Chai publicaciongunataca  liitapash, uyaitapashmi ushapanchi. Shinallata videocunata, Bibliamanda grabashcacunatapashmi charipanchi. JW Broadcasting programatapashmi charipanchi. Internetpi jw.org paginapash mil yali idiomacunapimi tian (Mat. 24:45-47). Cai mundopi gobiernocuna, religiongunapash culquipilla pensarimandami paicunapuraca na llevarin. Cutin ñucanchicunaca mundo enteropica 8 millón yali testigo de Jehovacunami capanchi. Shina cashpapash shujllashna tandanajushcami capanchi. Por ejemplo, viernes 19 de abril de 2019​pica mundo enteropi tucuilla Testigocunami Betelpi Tutamanda Bibliata Yachajungapaj Programata shuj videopi ricuparcanchi. Chai tutallatami Jesús Huañushcata Yaringapapash 20 millón 919 mil 41 gentecuna tandanajuparcanchi. Chaita yachashpaca ñucanchicunaca Jehovapa organizacionbi cashcamandami ninanda cushijupanchi. Chaicunapi yuyanami tucui shunguhuan villachishpa catichun ayudan.

7. Jesuspa ejemploca ¿imashinata ayudan?

⁷ Diospa Reinomanda tucui shunguhuan villachingapaca Jesuspa ejemplotapashmi catina capanchi. Jesusca villachinataca nimahora na saquircachu (Juan 18:37). Diabloca Jesusmanga “cai pachapi muyundi tucui llactacunatapash, chai llactacuna juyailla cajtapashmi” cusha nirca. Shina nijpipash Jesusca cai alpapi charijyangapaca na munarcachu. Shinallata rey cangapapash na munarcachu (Mat. 4:8, 9; Luc. 9:58; Juan 6:15). Contracuna llaquichingapaj munajpipash na manllarcachu (Juan 8:59). Ñucanchicunaca apóstol Pablo nishcashnami llaquicunapi cashpaca Jesuspa ejemplota catina capanchi. Shinami tucui shunguhuan crishcata ricuchi ushapashun (Heb. 12:3).

8. Pacienciata charinaca ¿imamandata minishtirishcapacha can?

⁸ Llaquicuna tucurichun shuyangapaj, imapash pactarichunga pacienciata charinami minishtirishcapacha can. Profeta Habacucca Judá llactapi llaquicuna tucurichunmi ninanda munarca (Hab. 1:2). Jesuspa catijcunaca “Taita Dios mandai callarinaca, ñallami chayamunga” nishpami pensanajurca. Chaimi ñallami romanocunamandaca libre quidashun nishpa pensanajurca (Luc. 19:11). Ñucanchicunapash Diospa Reino cai alpata mandajpi llaquicunata tucuchichun, shuj juyailla causaiguta apamuchunmi shuyanajupanchi (2 Ped. 3:13). Jehovapa Reino chayamungacamanga pacienciahuanmi shuyana capanchi. Shinapash pacienciata charichunga ¿imashinata Jehová Diosca ayudanga?

9. Jehová Dios pacienciata charishcataca ¿imashinata ricupanchi?

⁹ Tucuita yalica Jehová Diosmi pacienciata charin. Jehová Diosca Noé runagu arcata rurashpa tucuchichunmi shuj tiempota curca. Gentecunaman ‘villachichunbashmi’ tiempota curca (2 Ped. 2:5; 1 Ped. 3:20). Sodoma, Gomorra llactacunapi nalicunata tucuchigrijujpica Abrahanga cutin cutinmi ali gentecunatapashchu tucuchigringui nishpa Jehovataca tapuchijurca. Shina tapuchijujpipash Jehová Diosca pacienciahuanmi paitaca uyarca (Gén. 18:20-33). Ashtaca huatacunata israelitacuna Jehovata na cazujpipash, Jehová Diosca paicunataca pacienciahuanmi tratarca (Neh. 9:30, 31). Cunanbipash ashtaca gentecuna Jehovata rijsishpa, paipa amigocuna tucuchunbashmi Jehová Diosca pacienciahuan shuyajun (Juan 6:44; 1 Tim. 2:3, 4; 2 Ped. 3:9, NM ). Jehová Diosca pacienciata charij  Diosmi can. Chaimi villachinajushpa, yachachinajushpaca Jehová Dioshna pacienciata ricuchina capanchi. Jehová Diosca Bibliapi shuj chimbapuraita churashpami pacienciata charina cashcata yachachin.

10. Santiago 5:7, 8​pica ¿imatata tarpuj runagumandaca yachajupanchi?

¹⁰ (Santiago 5:7, 8, liingui). Pacienciata charinata yachajungapaca tarpuj runagumanda yachajupashunchi. Huaquin plantacunaca ñapashmi viñanlla. Shinapash granocunata cuj plantagucunaca ashtaca quillacunatami fucungacaman paran. Israelitacunapa tiempopica 6 quillacunatami cozechangapaca shuyana carca. Tarpuj runaca octubre quillacunapimi tarpun carca. Shinapash abril quilla chayamungacamanmi cozechangapaca shuyana carca (Mar. 4:28). Ñucanchicunaca tarpuj runagushnami pacienciata charina capanchi. Shinapash huaquinbica dificilmi caita ushan.

11. Bibliamanda yachachinajushpaca ¿imamandata pacienciata charina capanchi?

¹¹ Juchayucuna caimandami imatapash rurashpaca ñapash tucui ali llujshichun munapanchi. Caipi pensaripashunchi, imagutapash tarpungapaca alpatarami segurapanchi. Chai jipami tarpupanchi. Ña plantagucuna viñajpica jihuata limpiachishpami alpataca culmachipanchi. Tiempohuanmi cozechapanchi. Gentecunaman villachishpa Bibliamanda yachachinapash shina cuendami can. Gentecunaca Bibliamanda yachajushpaca na ñapash Jesuspa catijcuna tucunllachu. Jesuspa catijcuna tucuchunga paicunaman ali yachachingapaj, ima panda crishcacunatapash saquichun ayudangapami tiempoguta llujchina capanchi. Huaquinbica paicunapa panda crishcacunataca na fácil saquita ushangachu. Chaimi na desanimarishpa, pacienciahuan yachachina capanchi. Jesuspa catijcunapash Jesús yachachijpica na tucuita ñapash  intindircallachu (Juan 14:9). Ñucanchicunaca tarpunshnami villachinajupanchi. Shinapash Taita Diosmi plantaguta viñachinshna gentecunapa shunguta ricushpa paipi crichun ayudajun (1 Cor. 3:6).

12. Ñucanchi propio familiacunaman villachijushpaca ¿imashinata villachina capanchi?

¹² Huaquinbica ñucanchi propio familiacunaman Bibliamanda parlangapami ashtahuanbachaca pacienciata minishtipanchi. Chaimi Eclesiastés 3:1, 7​pi nishcata siempre yarina capanchi. Chaipica: “Upalla cangapajpash, rimangapajpash, chai punllacunami chayamun” ninmi. Ñucanchi ali ruraicunata ricushpami talvez ñucanchi propio familiacunaca Bibliamanda yachajungapaj munanga. Shinapash ñucanchi propio familiacunahuan Bibliamanda imagutallapash parlangapami esforzarina capanchi (1 Ped. 3:1, 2). Gentecunaman, ñucanchi propio familiacunamanbash Bibliamanda yachachijushpaca cushilla, pacienciahuanmi yachachina capanchi.

13, 14. ¿Picunapa ejemplotata catina capanchi?

¹³ Cunanbi, punda tiempopi Jehovata sirvijcunaca pacienciatami charirca. Paicunamandami ñucanchica yachajuita ushapanchi. Habacucca nali ruraicuna tucurichunmi ninanda munarca. Chaimi Jehová Diostaca “chapachun churashcapimi chapashpa shayajusha” nirca (Hab. 2:1). Apóstol Pabloca villachinataca tucui shunguhuan pactachingapaj munaimandami pacienciahuan ‘ali villaicunata tucuicunaman villachingapaj’ esforzarirca (Hech. 20:24, NM ).

¹⁴ Cunanga Galaad Escuelapi graduarishca shuj cusahuarmimanda yachajupashunchi. Paicunataca shuj llactapi sirvichunmi cacharca. Chai llactapica ashalla Testigocunami tiarca. Chai llactamanda tauca gentecunapash Jesuspica na crinllu carca. Shinapash huaquingunatallami Bibliamanda yachajungapaj munajcunataca chai cusahuarmica tarirca. Cutin Galaad Escuelapi cashca paicunapa cumbacunaca shuj llactacunapica taucacunatami Bibliamanda yachachinajurca. Shinallata taucacunatami bautizarichunbash ayudanajurca. Cutin cai cusahuarmi villachinajuj llactapica gentecunaca na Bibliamanda yachajungapaj munanllu carca. Chaimi pacienciata charinaca minishtirishcapacha carca. 8 huatacuna jipami shugu bautizarijpi paicunaca ninanda cushijurca. Punda tiempopi Jehovata sirvijcunahuan, cunan tiempopi Jehovata sirvijcunahuanga ¿imapita igual can? Tucuicunallatami Jehovamandaca villachinajupanchi. Na shaijushpa villachishcamandami Jehová Diosca paicunata, ñucanchitapash ninanda bendicianga. Shinaca ñucanchicunapashmi ‘Dios carashapacha nishcacunata crijcunashna’ pacienciata charina capanchi (Heb. 6:10-12).

15. ¿Imamandata villachingapaj esforzaripanchi?

¹⁵ Jehovapa Reinopi, paipa nishcacunapipash tucui shunguhuan crimandami tucuicunaman villachingapaj esforzaripanchi (Sal. 119:42; Is. 40:8). Bibliapa huaquin nishcacunaca cunanbillata pactarijujtami ricupanchi. Bibliamanda yachajujcuna paicunapa causaipi Jehovapa mandashcacunata cazushpa, paicunapa causaipipash cambiashcatami ricupashcanchi. Chaimi shuj gentecunamanbash villachina cashcata cuenta japipanchi.

16. Salmo 46:1-3​pi nishca shinaca Jehovapi, Jesuspipash tucui shunguhuan crinaca ¿imapata ayudan?

¹⁶ Ñucanchicunaca Jehovapi, Jesuspipashmi tucui shunguhuan cripanchi (Juan 14:1). Chaimandami ima llaquicunata charishpapash Jehová Dios ñucanchita ayudanataca  tucui shungu cripanchi (Salmo 46:1-3, liingui). Shinallata villachishpa catichunga Jesusmi cielomanda ayudajun. Chaita rurachunga Jehová Diosllatami Jesusmanga poderta, autoridadtapash cushca (Mat. 28:18-20).

17. ¿Imamandata villachishpa catina capanchi? Shuj experienciata parlapai.

¹⁷ Jehovapi tucui shunguhuan crimandami pai ñucanchicunata bendicianataca seguro capanchi (Ecl. 11:6). Testigocunataca cada punllami ashtaca ashtaca gentecunaca predicación publicapi villachinajujta ricun. Shina villachinajushcamandami ashtaca gentecunaca Bibliamanda yachajui callarishca. Por ejemplo, noviembre de 2014​pi Diosmanda Villashunchi nishca hojapica shuj joven huarmigumandami parlajurca. Paica universidadpimi estudiajurca. Paica testigo de Jehovacunamandami escribingapaj munajurca. Shinapash shuj Tandanajui Huasitallapash na tarircachu. Shinapash paipa universidadpillatami Testigocuna predicación publicapi villachinajujta ricurca. Chaipimi chai joven huarmiguca testigo de Jehovacunamanda escribingapaj publicaciongunata japirca. Chai jovenga Bibliamanda yachajushpami bautizaritapash bautizarirca. Cunanbica precursora regularmi can. Cashna experienciacunata uyashpami Diospa Reinomanda villachishpa catinaca minishtirishcapacha cashcata cuenta japipanchi.

18. ¿Ima horacamanda Diospa Reinomandaca villachina capanchi?

¹⁸ Jehová Dios caicamanllami villachina canguichi ningacamanmi villachishpa catina capanchi. Jehová Diosca ñami shuj punllata agllashcalla charin. Chai punlla chayamunataca seguromi caita ushapanchi. Jehová Diosca imata nishcataca siempremi pactachin. Cunanga Noepa punllacunapi ima pasashcata yaripashunchi. 120 huatacuna faltajpillatami Jehová Diosca Jatun Manllanai Tamia imahora tianataca ña decidishca carca. Ashtaca huatacuna jipami Noetaca shuj arcata rurachun mandarca. Noeca 40 o 50 huatacunatami arcata rurashpa pararca. Jehová Dios tucui animalcunata arcaman yaicuchi ningacamanmi Noeca gentecuna na uyajpipash villachishpa catirca. Chai jipami Jehová Diosca pai agllashca punllapi arcapa “punguta vicharca” (Gén. 6:3; 7:1, 2, 16).

19. ¿Imatata rurashpa catina capanchi?

¹⁹ Jehová Diosca arcapa ‘punguta vichanshnami’ ama villachishpa catichichu ninga. Ñallami Satanaspa mundota tucuchinga. Chai punllacuna chayamungacamanga Noé runagushna, profeta Habacucshna, Jehovata shuj sirvijcunashnami villachishpa catina capanchi. Chaicamanga ñucanchi causaipi villachishpa catipashunchi, pacienciata charipashunchi, Jehovapi, paipa nishcacunapipash tucui shunguhuan crishpa catipashunchi.