1. Congregacionmanda pipash expulsai tucujpica, paicunapa familiarcunaca ¿imashinata sintirin?

CONGREGACIONMANDA pipash expulsai tucujpica expulsai tucushcapa familiacunaca ninandami llaquirin. Hilda * shuti paniguca ninmi: “Ñuca cusaguca 41 huatacunata cazarashca jipami, Jehovata sirvijushpallata huañuparca. Ñuca cusagu huañujpica ninandami llaquirircani. Shinapash ñuca churi congregacionmanda expulsai tucushpa, paipa huarmiguta, huahuacunatapash saquishpa rijpimi ashtahuanbachaca ñuca cusagu huañushcatapash yalimi ninanda llaquirircani” ninmi.

2, 3. Salmo 78:40, 41​pi nishcashnaca, Jehová Diosca pipash paita sirvinata saquijpica ¿imashinata sintirin?

² Caipi pensaripashunchi. Jehová Diosca paipa angelcuna paipa contra tucujpica ¿imashinashi sintirirca? Seguromi Jehová Diosca ninanda llaquirishcanga, porque angelcunaca paipa familiami carca (Jud. 6). Jehová Diosca israelitacunapash paipa llacta cashcamandami ninanda juyarca. Shinapash israelitacunaca Jehová Diostaca cutin cutinmi na cazurca. Chaimandami Jehová Diosca ninanda llaquirirca (Salmo 78:40, 41​ta liipangui). * Shinaca shuj juyashca familia Jehová Diosta sirvinata saquijpica, Jehová Diospashmi ninanda llaquirin. Jehová Diosca ñucanchi imashinapacha sintirijtaca alimi intindin. Chaimandami ñucanchitaca animangapaj, ayudangapaj listo can.

³ Caipica shuj familiarta expulsajpi Jehová Diospa ayudata chasquingapaj imata rurana cashcata, shinallata congregacionmanda huauquipanicuna shuj familiar expulsashcata charijpi imashina ayudana cashcatami ricupashun. Shinapash pundapica, imacunata na pensana cashcatami yachajupashun.

4. Ashtaca taitamamacunaca paicunapa churi Jehová Diosta sirvinata saquijpica ¿imashinata sintirin?

⁴ Shuj churi Jehová Diosta sirvinata saquijpica ashtaca taitamamacunami, “¿imapita pandarishcani? ¿imashata ñuca churigutaca ayudana cashcani?” yashpami pensarin. Luke shuti huauquiguca, paipa churita expulsashca jipaca cashnami nirca: “Ñucami culpata charini yashpami pensan carcani. Puñuitapash nali puñui ushan carcanichu. Huaquinbica ninanda huacashcamandami shungutapash nanan carca” nin. Shinallata Elizabeth panigupashmi paipa churiguta expulsajpica, “¿imapita pandarishcani? Ñucami, ñuca churigumanga Jehovamandaca nali yachachishcani yashpami pensan carcani” nin.

5. Jehová Diosta sirvinata pipash saquijpica ¿pitapash culpanachu capanchi?

⁵ Jehová Diosca cada unomanmi imata ruranata, imata na ruranata agllachun libre saquishca. Chaimandami cada uno Jehová Diosta sirvinata o na sirvinata agllai ushapanchi. Huaquin jovengunaca na Testigo familiapurapimi viñashca. Shinapash paicunaca Jehová Diosta sirvinata dicidishpami siempre Jehovata sirvinajushca. Cutin shujcunaca Testigo taitamamacunahuanmi viñashca. Cai taitacuna Jehovata sirvichun paicunata ninanda ayudashca cajpipashmi, viñashpaca Jehovata sirvinata saquishca. Shinaca cada unomi Jehovata sirvinata o na sirvinataca dicidina capanchi (Jos. 24:15). Chaimandami taitamamacunaca huahuacuna Jehová Diosta sirvinata saquijpica na culparijuna can.

6. Taita o mama Jehová Diosta sirvinata saquijpica ¿imashinata churicuna, ushicunapash sintirin?

⁶ Huaquinbica taita o mamami Jehová Diosta sirvinataca saquin. Huaquinbicarin familiatapashmi jichushpa rin (Sal. 27:10). Cai pasajpica, huahuacunaca ninandami llaquirin. Panigu Estherca paipa taitata expulsajpica, pai imashina sintirishcatami parlan. Paica ninmi: “Ñuca papito Jehová Diosta sirvinata saquijpica ninanda llaquirishpa huacaillami causajurcani. Paica paipa munaimi Jehová Diosta sirvinataca saquirca. Ñuca papitotaca ninandami juyani. Chaimandami expulsashca cajpipash, paimanda ninanda preocuparin carcani. yapata preocuparijuimandami, ñuca saludpash asha asha afectarijurca”.

7. Expulsashca taitamamacunata charij jovengunataca, Jehová Diosca ¿imashinata ricun?

⁷ Jovenguna, quiquingunapa taita o mamita expulsai tucujpica llaquillami sintiripanguichi. Quiquinguna imashina sintirishcataca intindipanchimi. Jehová Dioscarin quiquinguna imashina sintirijushcataca ashtahuan alimi intindin. Paica quiquingunataca juyanmi. Paita sirvishpa catinajujta ricushpacarin ninandami cushijun. Congregacionmanda huauquipanicunapashmi quiquingunataca ninanda juyapanchi. Shinaca, quiquingunapa taitamamacuna expulsai tucushca cajpica quiquingunaca chaicunamandaca na culparijunachu capanguichi. Shinaca imashina ricupashcanchi, Jehová Diosca cada unomanmi paita sirvinata o na sirvinata agllachun saquishca. Shinapash Jehovata sirvijcunaca cada unomi “imata rurashcashnallata japinajunga” (Gál. 6:5).

8. Expulsashcacuna Jehovapa organizacionman tigramungacamanga ¿imatata paipa familiacunaca ruraita ushan? (“ Jehová desea que vuelva” nishca recuadrota ricupangui).

⁸ Quiquinba familiamanda pipash expulsai tucushca cajpica, “shuj punllaca tigramungami” yashpa pensanaca normalmi can. Shinapash chai punlla pasangacamanga ¿imatata ruraita ushapangui? Jehová Diosmanda yachajushpami catina capangui. Shinallami quiquinba familiaman, expulsai tucushca familiamanbash shuj ali ejemplota ricuchipangui. Chaicunata ruranami ama yapata llaquirishpa aguantashpa catichun ayudanga. Cunanga Jehovata sirvishpa catingapaj imacunatalla rurana cashcatami yachajugripanchi.

9. Tucui shunguhuan Jehová Diosta sirvishpa catichunga ¿imata ayudanga? (“ Familiapi pipash expulsai tucushca cajpi animaj textocuna” nishca recuadrota ricupangui).

⁹ Jehová Diosta tucui shunguhuan sirvishpa cati ushangapaj esforzaripashunchi. Quiquinbash, quiquinba familiapash Jehová Diosta sirvishpa catingapaj esforzarinaca minishtirishcapachami can. Chaipaca cada punllami Bibliata liina capanguichi. Liishcapipash pensarinami capanguichi. Shinallata tandanajuicunamanbash na faltashpami rina capanguichi. Panigu Joannapi pensaripashunchi. Panigu Joannapa taita, paipa ñañapashmi Jehová Diospa organizacionmandaca llujshirca. Panigu Joannaca ninmi: “Bibliapi Abigailmanda, Estermanda, Jobmanda, Josemanda, Jesusmandapash liishpaca tranquila, alimi sintirini. Paicunapa ali ejemplomi ñucataca ama llaquilla pensamientocunata charichun ayudahuashca. JW Broadcastingbi llujshishca canciongunapashmi ñucataca ashtacata animahuan” ninmi.

10. Salmo 32:6-8​pi nishcashnaca llaquilla, preocupado sintirishpaca ¿imatata rurai ushapanchi?

¹⁰ Llaquicunahuan, preocupaciongunahuan cashpaca quiquin imashina sintirishcatami Jehová Diosmanga villana capangui. Jehová Diosta mañanataca na saquinachu capangui. Jehová Diostaca, “quiquin munashcashna imagutapash rurai ushangapaj ali yuyaita carahuai, ali decisiongunata agllangapaj ayudahuai” nishpami mañanalla capangui (Salmo 32:6-8 liipangui). Jehová Diosman ñucanchicuna imashina sintirishcata villanaca na facilchu can. Shinapash Jehová Diosca ñucanchitaca ali alimi intindin. Paica ñucanchita juyaimandami ñucanchicuna imashina sintirishcata paiman villachun munan (Éx. 34:6; Sal. 62:7, 8).

11. Hebreos 12:11​pi nishcashnaca, expulsanataca Jehová Diosca ¿imamandata churashca? (“ Jehová Diosca juyaimandami expulsan” nishca recuadrota ricupangui).

¹¹ Ancianocunapa decisionda apoyapashunchi. Expulsana arreglotaca, Jehová Diosca congregacionbi tucuicunapallata alipa, shinallata juchata ruradorta ayudangapami chai arreglotaca churashca Huaquingunaca pitapash expulsajpica, “ancianocunaca nalitami rurashca pandarishcami  yarin” nishpami rimaita ushan. Paicunaca expulsashca personata alipi quidachingapaj munaimandami shina nita ushan. Shinapash imamanda expulsai tucushcataca na cabalta yachanllu (Hebreos 12:11​ta liipangui). * Chaimi pitapash expulsajpica, “Jehovapa mandashcacunata catishpami ancianocunaca comité judicialtaca rurashcanga” nishpa pensarina capanchi (2 Crón. 19:6).

12. Jehovapa disciplinata apoyashpaca ¿imashinata huaquingunaca beneficiarishca?

¹² Shuj familiarta congregacionmanda expulsana decisionda ancianocuna japijpi y chai decisionda ñucanchicunapash apoyajpica, expulsai tucushca persona Jehová Diosman tigrachunmi ayudanajushun. Por ejemplo, párrafo 4​pi parlashca Elizabeth paniguca: “Ñuca churigu expulsai tucujpica, paihuan totalmente parlanata saquinaca shinllipachami carca. Shinapash ñuca churigu cutin Jehová Diosman tigrashpaca, ñucallatami pandarishcani expulsai tucunallatami cashcani, Jehová Dios ñucata juyashcamanda cashna disciplinashcatami cuenta japishcani nircami” ninmi. Cutin Elizabethpa cusa Markca ninmi: “Huaquin huatacuna yalishca jipaca ñuca churiguca, ‘quiquinguna Diospa mandashcata tucuipi cazushcamandami Jehová Diosman cutinlla tigranata decidircani’ nircami. Jehová Dios ñucanchita chai llaquicunahuan cashpapash paita tucuipi cazushpa catingapaj Jehová Diosllata ayudashcamandaca ninandami agradicipanchi” ninmi

13. Ama yapata llaquilla sintirijuchunga ¿imata ayudanga?

¹³ Quiquin imashina sintirijushcata intindij huauquipanicunahuan parlapangui. Shuj huauquipanicunahuan parlanami, quiquindaca cushilla, ali sintirichun ayudanga (Prov. 12:25; 17:17). Párrafo 9​pi parlashca Joanna paniguca ninmi: “Ñuca papito, ñuca ñañapash expulsai tucujpica, ñucaca solallami sintirircani. Pero ñucataca shuj turiñañacunahuan parlanami ninanda ayudahuarca” nin. Shinapash shuj huauqui o pani animanapa randi, imatapash nalitara nishpa nali sintichijpica ¿imatata rurai ushapanchi?

14. ¿Imamandata caishujhuan chaishujhuan cazurishpa, perdonarishpapash catina capanchi?

¹⁴ Huauquipanicunata pacienciata ricuchinami capanchi. Huaquinbica pitapash ayudangapaj munashpapash paicunaman ima nijtaca na atinanchichu. Chaimi huaquinbica pandatara nishpa llaquichita ushapanchiman (Sant. 3:2). Huauquipanicunaca juchayucuna caimandami tal vez ñucanchita animangapaj munashpapash, imapash pandata nishpa nali sintichita ushan. Chaimandami ñucanchicunaca apóstol Pablopa nishca consejota yarina capanchi. Paica nircami: “Caishujhuan chaishujhuan cazurishpa, shinallata caishujhuan chaishujhuan llaquichirishca cashpapash, perdonarishpami causana canguichi” (Col. 3:13). Expulsashca familiata charij shuj paniguca nircami: “Huaquin turiñañagucunaca ñucata animangapaj munashpapashmi, juchayucuna caimandaca imacunatapash pandatara nishpa nali sintichihuashca. Shinapash Jehová Diosmi chai turiñañagucunata perdonachun ayudahuashca” nin. Cunanga congregacionmanda huauquipanicuna shuj familiar expulsashcata charijpi imashina ayudana cashcatami yachajupashun.

15. Expulsashca familiarcunata charij huauquipanigucunataca ¿imashinata ayudai ushapanchi?

¹⁵ Expulsashca familiarcunata charij huauquipanicunata juyaihuan, ali tratapashunchi. Míriam shuti paniguca ninmi: “Ñuca turi expulsai tucushca  jipaca, shujcuna ima ninata manllaimandami tandanajuiman rinataca manllan carcani. Pero huaquin turiñañagucunaca, ñuca llaquilla cajta ricushpami paicunapash llaquilla sintirin carca. Shinallata ñuca turimandapash na imacunatapash ninajunllu carca. Paicunapa ayudamandami ñana solalla sintirijurcani” nin. Cutin shuj paniguca ninmi: “Ñuca churita expulsajpica, huaquin turiñañagucunaca ñucata animangapami shamurca. Paicunaca imaguta ninata na atinashpapash ñucahuanmi huacarca. Huaquingunaca ñucata animangapami cartagucunata escribishpapash cachamuhuarca. Chaicunaca ñucataca ninandami ayudahuarca” nin.

16. Congregacionmanda huauquipanicunaca ¿imashinata ayudashpa catita ushan?

¹⁶ Expulsashca familiacunata charij huauquipanicunata apoyashpa catipashunchi. Paicunaca cunan horascunami ashtahuanbachaca paicunata juyashcata ricuchichun minishtinajun (Heb. 10:24, 25). Huaquin huauquipanicunaca, expulsashca familiata charij familiacunataca paicunapash expulsai tucushca cajpishnami tratan. Pero ñucanchicunaca na shina canachu capanchi. Expulsashca taitamamacunata charij jovengunaca paicunata animachun, cushichichunmi minishtinajun. Panigu Mariapa cusa expulsai tucushca jahuapash paicunataca jichushpami rirca. Panigu Mariaca ninmi: “Huaquin turiñañagucunaca ñuca huasiman shamushpa ñucanchihuan yanushpa, shinallata ñuca huahuacunaman Bibliamanda yachachichunbashmi ayudahuarca. Paicunaca ñucanchicuna imashina sintirijushcata intindishpami ñucanchihuanbash huacarca. Shinallata shujcuna ñucamanda imapash nalicunata nishpa rimanajujpica, paicunami ñucataca difindihuarca. Chaita ricunami, ñucataca ninanda animahuarca” nin (Rom. 12:13, 15).

17. Expulsashca familiarcunata charij huauquipanigucunataca ¿imashinata ancianocunaca animaita ushan?

¹⁷ Congregacionmanda ancianocunaca, expulsashca familiarcunata charij huauquipanicunataca Jehová Diosta sirvishpa catichunmi ayudashpa catina capanguichi. Anciano huauquicunami ashtahuanbachaca cashna llaquihuan pasanajujpica, paicunata animashpa ayudana responsabilidadtami charin (1 Tes. 5:14). Chaimandami tandanajuicuna nara callarijpillata o ña tucurishca jipapash paicunata animashpa ayudana capanguichi. Shinallata ancianocunaca paicunapa huasigucunaman rishpa, paicunamanda mañashpapashmi ayudaita ushapanguichi. Ashtahuangarin villachingapaj paicuna cumbachunbashmi invitaita ushapanguichi. Shinallata Adorana Tutata rurashpapashmi invitanalla capanguichi. Anciano huauquicunami, expulsai tucushca  familiacunata charijcunata, ashtahuanbachaca llaquishpa, juyaihuan, paicuna imaguta minishtinajujpipash ayudana responsabilidadta charin (1 Tes. 2:7, 8).

18. 2 Pedro 3:9​pi nishcashnaca ¿imata rurachunda Jehová Diosca shuyajun?

¹⁸ Jehová Diosca ‘tucuicuna arripintirichun y shujllapash na tucuchi tucuchunmi munan’ (2 Pedro 3:9​ta liipangui). * Pipash shuj jatun juchata rurashca cashpapash, Jehová Diospa ñaupajpica chai personaca importante cashpami catin. Jehová Diosca cada unomanda huañuchunmi paipa shujlla Churiguta cai alpaman cachamurca. Jehová Diosca juyaimandami paimanda caruyashcacuna cutin tigramuchun ayudangapaj munan. Chaitaca, Jesús parlashca tucuita yanga tucuchishca jovenmanda chimbapuraipimi cuenta japita ushapanchi (Luc. 15:11-32). Ashtaca expulsai tucushcacunaca, tiempohuanga cutinmi congregacionman tigrashca. Congregacionmanda huauquipanicunaca cushijushpami chasquishca. Chaishuj parrafocunapi parlashca panigu Elizabethca, paipa churigu cutin congregacionman tigrajpica ninandami cushijurca. Paica ninmi: “Chashna llaquicunahuan pasajujpi turiñañagucuna ñucanchicunata ninanda animashpa ayudashcamandaca, ninandami agradicipani” ninmi.

19. ¿Imamandata Jehová Diospica confiashpa catina capanchi?

¹⁹ Jehová Diospica siempremi confiana capanchi. Paica imaguta mandashpapash, ñucanchipa alipallatami chaicunataca mandan. Jehová Diosca imagutapash na mitsashpa caraj, llaquij Diosmi can. Paipa sirvijcunataca ninandami juyan. Jehová Diosca imapash llaquicunahuan cajpica, nunca ñucanchitallaca na saquingachu. Siempremi ayudanga (Heb. 13:5, 6). Párrafo 12​pi parlashca Mark shuti huauquica ninmi: “Jehová Diosca, nunca ñucanchitaca na saquishcachu. Paica siempremi ñucanchitaca ayudashpa catishca. Llaquilla cajpipash, Jehová Diosca siempremi ñucanchitaca ayudashpa catimushca” nin. Jehová Diosca aguantashpa catichunmi “ninan ushaita” cunga (2 Cor. 4:7). Shinaca ñucanchi familiamanda pipash Jehovata sirvinata saquijpica, Jehová Diospi tucui shunguhuan crishpa catinataca na saquinachu capanchi.