1. Ña mayoriajushpaca ¿imatata ruraita ushapanchi?

ÑA MAYORIAJUSHPACA Jehová Diosta ñana pundacunashna sirvishpa catinatami manllapanchi. Fuerza illajshna sintirijushpapash ñucanchi experienciahuan, imaguta yachajushcacunahuanbash jovenguna Jehovapa organizacionbi ashtahuan sirvishpa catichunmi ayudaita ushapanchi. Shinallata mushuj responsabilidadcunatapash pactachichunmi ayudaita ushapanchi. Tauca huatacunata anciano cashca shuj huauquica: “Ña mayorlla sintirijushpaca, ñuca charishca responsabilidadcunata shuj joven huauquicuna pactachingapaj ña listo cashcata ricushpaca ninandami cushijurcani” nircami.

2. Cunanga ¿imatata yachajupashun?

² Chaishuj temapica, mayor huauquipanigucunahuan llevarina jovengunapa alipacha cashcatami yachajuparcanchi. Cunanga mayor huauquipanigucuna humildecuna cana, na tucuita rurai ushashcata yarina, agradicidocuna cana, imagutapash na mitsashpa caranaca ali cashcatami yachajupashun. Shinami mayor huauquipanicunaca joven huauquipanicunahuan Jehovapa organizacionbi shujllashna sirvita ushanga.

3. a) Filipenses 2:3, 4​pi nishcashnaca humildecunaca ¿imashinata can? b)  Humilde canaca ¿imashinata ayudan?

³ Jovengunata ayudangapaj munaj mayor huauquipanigucunaca humildecunami cana can. Humilde gentecunaca, shujcuna paita yali cashcatami siempre yuyarin (Filipenses 2:3, 4​ta liipangui). Humilde caj mayor huauquipanicunaca Bibliapi mandashcashna imagutapash de diferente manera rurai usharishcataca alimi yachan. Chaimi paicuna pundacuna rurashcashna shujcunapash rurachunga na shuyan (Ecl. 7:10). Ashtaca experienciata charishpapash ‘cai pachapi imalla tiashcacunapash’  cambianlla cajta yachaimandami paicunapa yuyashcata mandangapaca na munan. Chaipa randica paicunapash mushuj cosascunata yachajungapami esforzarin (1 Cor. 7:31).

4. Superintendente de circuito huauquigucunaca ¿imapita levitacunashna can?

⁴ Mayor huauquigucunaca humildecuna caimandami pundacunashna ñana imagutapash rurai ushashcataca intindin. Superintendente de circuito huauquicunapi pensaripashunchi. Paicuna ña 70 huatacunata charishpaca shuj mushuj asignaciondami chasquin. Paicunapaca tauca congregaciongunata visitanata saquinaca shinllimi cashca. Paicunaca shinami huauquipanicunata ayudan carca. Pero shinapash chai asignacionda joven huauquicuna rurashpa catinatami intindin. Superintendente cashca huauquigucunaca punda tiempopi tiashca levitacunashnami can. Levitacunaca 50 añoscunata charishpaca ñana tabernáculo carpa huasipi sirvishpa catitaca ushanllu carca. Pero paicunapaca ima modospash Jehovata sirvinami alipacha carca. Chaimandami jovengunamanga paicuna imata yachashcataca cushijushpa yachachin carca (Núm. 8:25, 26). Cunanbipash superintendentecuna cashca huauquigucunaca ñana tauca congregaciongunata ayudanajushpapash, cunanbi cashca congregaciongunapica ashtacatami ayudanajun.

5. Huauqui Danmanda paipa huarmigu Katiemandapash ¿imatata yachajupangui?

⁵ Cunanga huauqui Danmanda yachajupashunchi. Paica 23 huatacunatami superintendente de circuito carca. Pai 70 añosta  cumplijpica paita, paipa huarmigu Katietapash precursor especialcuna cachunmi nombrarca. Chai cambiomandaca ¿imashinata paicunaca sintirin? Huauqui Danga ninmi: “Cunanga congregacionbica ashtaca ruraicunahuanmi ocupado ocupado yalipani. Huauquicunatapash siervo ministerialcuna cachun, ashtaca gentecuna purij pushtucunapi predicación metropolitanata imashina ruranata, carcelcunapi imashina villachinatapashmi huauquicunamanga yachachijupani” ninmi. Shinaca tiempo completopi cashpa o na cashpapash mayorlla huauquipanigucuna, quiquingunaca shuj huauquipanicunataca ashtacatami ayudai ushapanguichi. Chaipaca cunanbi imaguta rurai ushashcata rurangapami fuerzarina capanguichi.

6. ¿Imamandata na jariyashca canaca ali can? Shuj ejemplomanda parlapai.

⁶ Na jariyashca gentecunaca paicuna na tucuita rurai ushashcataca alimi intindin (Prov. 11:2). Pai maicaman rurai ushashcaguta intindishpami paimandallata cushilla, ali sintirin. Shuj na jariyashca personaca shuj carrota shuj subidapi manejajuj cuendami can. Subidapi manejangapaca carropa marchatami bajana can. Shinallami chai subidataca aunque sea alimanda pero vitsiaita ushanga. Shinallatami na jariyashca personaca carropi ‘marchata bajajuj cuenda’ Jehovata ñana pundashna sirvita ushashpapash alimanda, pai usharishcagutalla rurashpa Jehovata sirvishpa catin (Filip. 4:5).

7. Barzilái jariguca ¿imashinata na jariyashca cashcataca ricuchirca?

⁷ Cunanga Barzilái jarigumanda yachajupashunchi. Pai 80 huatacunata charijpimi rey Davidca paita sirvishpa trabajachun animarca. Shinapash Barzilaica humilde caimanda, ñana pundacunashna fuerzata charishcamanda, ña rucugu caimandaca chaitaca na chasquircachu. Paipa randica Kimham shuti joven jaritami rey Davidhuan cacharca (2 Sam. 19:35-37). Barzilái jarigushnallatami mayorlla huauquicunaca mushuj responsabilidadcunataca joven huauquicunaman mingan.

8. Rey Davidca ¿imashinata na jariyashca cashcataca ricuchirca?

⁸ Rey Davidpashmi na tucuita rurai ushashcataca yaria causan carca. Paica tucui shunguhuanmi Jehová Diosman shuj templo huasita shayachingapaj munarca. Shinapash Jehová Dios, Salomonmi chaitaca ruragrin nijpica aliguman chasquishpami Salomondaca tucuipi apoyarca (1 Crón. 17:4; 22:5). Rey Davidca, Salomonga jovenrami can, experienciatapash na charinllu yashpaca na pensajurcachu (1 Crón. 29:1). Paica alimi yacharca que Jehovapa ayudahuanga mashna huatacunata charishpapash o na experienciata charishpapash imagutapash ali pactachi ushanata. Davidshnallatami cunanbi ña ruculla huauquigucunaca pundacuna charishca responsabilidadcunata ñana charishpapash cushijushpa Jehovata sirvinajun. Paicunaca Jehovallata joven huauquicunata paicuna pundacuna charishca responsabilidadcunata ali pactachichun ayudanapimi tucui shunguhuan confian.

9. Comité de Sucursalpi sirvij shuj huauquica ¿imashinata humilde cashcataca ricuchirca?

⁹ Cunan tiempocunapipashmi humilde huauquigucuna tian. Por ejemplo huauqui Shigeoca huata 1976​pimi 30 añosta charishpa shuj Comité de Sucursalpi sirvi callarirca. Huata 2004​pica cai Comitemanda coordinador cachunmi nombrarca. Pero tiempo yalijpica, huauquiguca ñana pundacunashna uchalla imatapash rurai ushashcata, fuerzatapash ñana pundashna charishcatami cuenta japirca. Chaimi Jehovata mañashpa shuj joven huauquirapash pai charishca responsabilidadcunata pactachinapi pensarirca. Cunanbica ñana coordinadorchu can, shinapash chai Comité de Sucursalpi  sirvishpami catijun. Barzilái jarigupa, rey Davidpa, huauqui Shigeopa ejemplocunami ricuchin que, humildecunaca jovenguna imacunatalla rurai ushashcapi confian cashcata y na jovengunapa pandarishcacunatara ricujuna cashcata. Mayorgucunaca jovengunataca contracunatashnaca na ricunajunllu sino paicunapa alipacha compañerocunatashnami ricun (Prov. 20:29).

10. Congregacionbica ¿imashinata mayorgucunaca jovengunataca ricun?

¹⁰ Mayor huauquigucunaca jovenguna imagutapash rurajpica ninandami agradicin. Shinallata jovengunataca Jehovapa shuj regalotashnami ricun. Paicuna ña mayorianajushcamandami fuerza illajshna sintirin. Chaimi jovenguna paicunapa fuerzata congregacionbi ayudangapaj utilizajta ricushpaca, mayorgucunaca ninanda agradicin.

11. Rut 4:13-16​pi shimicunaca ¿imashinata mayorgucuna jovengunapa ayudata chasquinaca ali cashcata ricuchin?

¹¹ Bibliapica shuj payalla mamagu shuj jovenba ayudata chasquishpa agradicishcatami parlajun. Paica Noemí huarmigumi carca. Paipa churi huañushca jipaca, Noemica paipa jachun Ruttaca, canba familiacunapaman tigrailla nircami. Shinapash Rutca, Belén llactaman Noemihuan ringapapachami munarca. Chaimi Noemica Rut paita cumbachun saquirca (Rut 1:7, 8, 18). Belenman rinaca ishcandipallatami ali carca (Rut 4:13-16 liipangui). Mayoriashca humilde huauquipanigucunaca Noemipa ejemplotami catinajun.

12. Apóstol Pabloca ¿imashinata agradecido cashcataca ricuchirca?

¹² Apóstol Pablopashmi paita ayudashcamandaca agradicin carca. Shuj viajeca Filipos llactamanda huauquipanicuna pai imaguta minishtishcata carashcamandami ninanda agradicirca  (Filip. 4:16). Shinallata Timoteo paita ninanda ayudashcamandapashmi agradicirca (Filip. 2:19-22). Y Roma llactaman prezo rijujpi huauquipanicuna paita tuparingapaj llujshishpa animashcamandapashmi Jehová Diostaca agradicirca (Hech. 28:15). Apóstol Pabloca caru carucunata rishpami villachin carca y congregaciongunapipashmi huauquipanicunata animan carca. Shina cashpapash shujcuna paita ayudachunga saquinllami carca.

13. Mayor huauquipanigucunaca ¿imashinata jovengunata agradicishcataca ricuchita ushan?

¹³ Mayoriashca huauquipanigucuna, jovengunata agradicishcataca shuj shuj cosascunapimi ricuchita ushapanguichi. Quiquingunata maimanbash pushangapaj munajpi, comprasta shinashpa ayudangapaj o imagupipash quiquingunata ayudangapaj munajpica cushijushpami chai ayudataca chasquinalla capanguichi. Chai ayudacunataca Jehová quiquingunata juyaimanda cujushcatashnami ricuna capanguichi. Jovengunapa ayudata chasquishpaca, quiquinguna paicunahuan alipacha llevarichunmi ayudanga. Jovengunataca Jehovata ali sirvishpa catichun ayudapaichi. Congregacionbi ayudangapaj munanajushcamandapash felicitapaichi. Shinallata quiquingunapa experienciacunamandapash parlangapaj tiempoguta llujchipaichi. Chaicunata rurashpami Jehová Diostaca jovengunata congregacionman apamushcamanda agradicishcata ricuchipanguichi (Col. 3:15; Juan 6:44; 1 Tes. 5:18).

14. Rey Davidca ¿imashinata na mitsa cashcataca ricuchirca?

¹⁴ Rey Davidca pai imaguta charishcatapashmi na mitsashpa caranlla carca. Jehová Diosman templo huasita rurajujpica rey Davidca ashtaca culquihuan, materialcunahuanbashmi apoyarca. Paica mayorgucunapapash alipacha ejemplomi can (1 Crón. 22:11-16; 29:3, 4). Paipa rurashcacunamanda Salomondara felicitanata yachashpapashmi rey Davidca templo huasita ruranapica ayudarca. Shinallatami quiquinbash ayudaita ushapangui. Ñana jovenlla cashpapash, construcciongunapi na ayudaita ushashpapash culquiguhuanmi ayudashpa catita ushapangui. Shinallata Jehovata sirvijushpa ima experienciacunatalla charishcatapashmi jovengunaman parlaita ushapangui.

15. Apóstol Pabloca ¿imacunatallata Timoteomanga yachachirca?

¹⁵ Apóstol Pablopashmi imaguta yachashcataca shujcunaman yachachinlla carca. Pabloca congregaciongunata visitangapaj rijushpa, villachingapaj rijushpaca Timoteota pushashpami rirca. Chai viajecunapica imashina villachinata, yachachinatapashmi Timoteomanga yachachirca (Hech. 16:1-3). Pablopa yachachishcacunami Timoteotaca ali villaigucunata ali villachi ushachun ayudarca (1 Cor. 4:17). Shinallata Timoteopash Pablo imaguta yachachishcatami shujcunamanbash yachachirca.

16. Huauqui Shigeoca ¿imashpata shujcunataca yachachirca?

¹⁶ Cunanbi mayorlla huauquicunaca paicuna congregacionbi imaguta ruranata yachashcataca jovengunamanmi yachachin. Por ejemplo, párrafo 9​pi parlashca huauqui Shigeoca pai sirvijushca llactapi ali villaigucuna ñaupaman catichunmi shuj joven huauquicunatapash ayudarca. Paica Comité de Sucursalpi sirvij shuj joven huauquicunamanmi pai imata yachashcata yachachirca. Shinami pai ña mayorlla cajpi, ñana Comité de Sucursalmanda coordinador cai ushajpica shuj joven huauquica pai imacunatalla rurajushcata rurangapaj listo carca. Huauqui Shigeoca 45 yali huatacunata Comité de Sucursalpi imacunatalla yachajushcataca jovengunaman yachachishpami catin. Jehovapa organizacionbica chashna huauquigucunata charinaca shuj sumaj bendicionmi can.

17. ¿Imatata mayorgucunaca shujcunaman caranshna cuita ushan? (Lucas 6:38).

 ¹⁷ Mayorlla huauquipanigucuna, Jehovata tucui shunguhuan crishpa, tucui causaipi paitalla sirvina alipacha cashcatami quiquingunaca ricuchinajupashcanguichi. Quiquingunapa ali ejemplomi Jehovapa mandashcacunata pactachishpa causanaca alipacha cashcata ricuchin. Quiquingunaca pundacunamanda imata, imashina ruranatami yachaparcanguichi. Shina yachashpapash cunanbi cambiocuna tiajpica, quiquingunapashmi chai cambiocunata pactachishpa, cazushpa catipanguichi. O chairalla bautizarishcacuna cashpapash cai tiempopi Jehovamanda yachajuna imashina quiquingunata ayudashcatami parlaita ushapanguichi. Joven huauquipanicunaca cushijushpami quiquingunapa experienciacunataca uyanga. Quiquinguna charishca experienciacunata ‘shujcunaman caranshna’ parlajpica, Jehová Diosca cushijushpami quiquingunataca bendicianga (Lucas 6:38​ta liipangui).

18. Mayorcunapash, jovengunapash ¿imashinata ayudarita ushapanguichi?

¹⁸ Mayorlla huauquipanigucuna, quiquinguna jovengunahuan ashtahuan ali llevaringapaj esforzarishpaca randimandami animarita ushapanguichi (Rom. 1:12). Cada unomi ayudarita ushanguichi. Mayorcunaca ali yachaita, ashtaca experienciatapashmi charipanguichi. Cutin jovengunaca shinllirami capanguichi y fuerzatapashmi charipanguichi. Mayorcunapash, jovengunapash randimanda maquipurarishpa ayudarishpaca Jehová Diostami alabanguichi y congregacionbipashmi alipacha ayudapanguichi.