1, 2. a) Proverbios 16:31​pi nishcashnaca mayor huauquipanigucunaca ¿imashinata can? b) Cunanga ¿imatata yachajupashun?

ESTADOS UNIDOS llactamanda shuj parquepica diamante rumicunatami alpapica tari usharin. Shinapash cai diamante rumicunaca na limpiashca, nara procesashcacuna cashcamandami yanga shina ricurin. Chaimi parqueta visitajcunaca chai rumicunata ricushpaca diamantecuna cashcataca na cuenta japishpa na valichin.

² Ñucanchi mayor huauquipanicunaca chai ninan valishca diamante rumicunashnami can. Bibliapica, paicuna rucugucuna cashpapash ali cajta ricuchij coronata churajushcacunashnami can ninmi (Proverbios 16:31​ta liipangui; 20:29). Shinapash paicuna importante cashcataca na fácil cuenta japita ushapanchillachu. Paicuna ninan valishca cashcata cuenta japijcunaca shuj ninan valishca tesorotapash yalimi mayorgucunapica tarita ushan. Cunanga cai quimsa tapuicunatami yachajupashun: Jehová Diosca ¿imamandata mayor huauquipanigucunataca shuj ninan valishca tesorotashna ricun? Jehovapa organizacionbica ¿imashinata mayorgucunaca ayudan? Paicunamandaca ¿imatata yachajui ushapanchi?

3. Salmo 92:12-15​pi nishca shinaca Jehová Diosca ¿imamandata mayorgucunataca ninanda valichin?

³ Jehová Diospaca mayor huauquipanigucunaca importantepachami can. Jehová Diosca mayor huauquipanigucuna imashina cashcataca alimi yachan. Y paicuna alicuna cashcamandami alicachishpa ricun. Mayorlla huauquipanigucuna joven huauquipanicunaman imacunatalla yachachijta, Jehovata sirvijuimanda  ima experienciacunatalla charishcata parlajta ricushpaca, Jehová Diosca alicachishpami ricun (Job 12:12; Prov. 1:1-4). Shinallata paicuna imata aguantashcatapash Jehová Diosca yariami can (Mal. 3:16). Mayorlla huauquipanigucunaca paicunapa causaipi problemacunata charishcashpapash siempremi Jehovapi tucui shunguhuan crishcata ricuchishca. Callaripi yachajushcatapash yalimi cunanbica shamuj punllacunapi ali causaigu tianataca crin. Paicuna “ña rucugu[cuna] cashpapash” Jehová Diosmanda parlashpa catijushcamandami Jehová Diosca paicunataca ninanda juyan (Salmo 92:12-15 liipangui).

4. Mayor huauquipanigucunataca ¿imata yarinata animaita ushan?

⁴ Quiquin ña mayoriajushpaca, quiquin imacunatalla rurashcata Jehová Dios na cunganataca seguromi cana capangui (Heb. 6:10). Quiquinga tucui shunguhuanmi villachipashcangui. Chaita yarishpami Taita Diosca ninanda cushijun. Shinallata quiquinga shuj shuj llaquicunatami aguantapashcangui. Bibliapa yachachishcacunatapashmi tucui shunguhuan cazupashcangui. Jehovapa organizacionbipash huaquin responsabilidadcunatami pactachipashcangui y shujcunatapashmi yachachishpa ayudapashcangui. Jehovapa organizacionbi ashtaca cambiocuna tiajpipash chai cambiocunata apoyangapami siempre esforzaripashcangui. Tiempo completopi sirvijuj huauquipanicunatapashmi ayudapashcangui. Jehová Diosca paita tucui shunguhuan sirvishcamandami quiquindaca ninanda juyan. Y Jehová Diosca ‘paipalla causajcunataca nunca na jichushpa saquingachu’ (Sal. 37:28). Shinallata paica quiquindaca: ‘Yuraj ajcha tucungacamanmi candaca cuidasha’ nijunmi (Is. 46:4). Shinaca, ña mayor caimanda Jehovapa organizacionbi na importantechu cani yashpaca na pensanachu capangui.

5. Mayorgucunaca ¿imatata siempre yarina capan?

⁵ Mayorgucunaca masqui pundacunashna na fuerzata charishpapash ashtacatami ayudaita ushan. Paicunaca paicunapa causaipica ashtaca experienciatami charishca. Jehová Diosca punda tiempopi, cunanbipashmi mayoriashca huauquipanigucunataca paipa organizacionbi ayudashpa catichun utilizashca. Imashina chaita  rurashcataca cati parrafocunapi yachajupashunchi.

6, 7. Jehovata tucui shunguhuan sirvishcamanda ima bendiciongunatalla chasquishca gentecunamanda parlapai.

⁶ Bibliapica mayor tucungacaman Jehovata tucui shunguhuan sirvishcacunamandami yachajuita ushapanchi. Por ejemplo, Moisesca 80 huatacunata charishpami profeta tucurca y israelitacunatapash ñaupaman pusharca. Cutin Danielca 90 yali huatacunata charishpapashmi Jehovapa profeta carca. Shinallata apóstol Juanga Apocalipsis librota Jehová Dios yarichijpi escribijushpaca 90 yali huatacunatami charishca yarin.

⁷ Ashtacacunapashmi na yapata rijsishcacuna cashpapash Jehovata alipacha sirvirca. Paicunatapashmi Jehová Diosca alicachishpa ricuimanda bendiciarca. Por ejemplo, Bibliapica ‘Diosta yariashpa causajuj Simeón shuti jarigumandami’ parlan. Paitami Jehová Diosca Jesús huahuagu cajpi rijsina bendicionda curca. Simeonga Jesusmanda, Mariamandapashmi jipa punllacunapi ima pasanata villarca (Luc. 2:22, 25-35). Cunanga 84 huatacunata charij Ana shuti profetisa huarmigumanda yachajupashunchi. Paica viudagumi carca. Paica siempremi ‘Diospa templo huasipi’ can carca. Chaimandami Jehová Diosca Jesusta rijsina bendicionda curca. Shinaca Jehová Diospaca Simeonbash, Anapash importantecunami carca (Luc. 2:36-38).

8, 9. Viuda panigucunaca ¿imashinata ayudashpa catinajun?

⁸ Cunan punllacunapipashmi mayorlla huauquipanicunaca joven huauquipanicunapaca shuj alipacha ejemplo can. Cunanga Lois Didur shuti panigumanda parlapashunchi. Paica 21 huatacunatalla charishpami Canadá llactapica precursora especial shina sirvi callarirca. Jipaca, paipa cusagu Johndimi huaquin huatacunata circuitopi, cutin 20 huatacunata yalica Canadá llactamanda Betelpi sirvinajurca. Panigu 58 huatacunata charijpica Ucrania llactamanda Betelpi sirvichunmi paicunataca invitarca. Paicunaca cushijushpami chai invitacionda chasquirca. Huauqui Johndaca Comité de Sucursalpi sirvichunmi invitarca. Huauquiguca 7 huatacuna jipallami huañurca. Paniguca chaipillata sirvishpa catinatami dicidirca. Panigu Loisca cunanga 81 huatacunatami charin. Y Ucrania Betelpi sirvishpami catijun y tucuicunami paitaca ninanda juyan.

⁹ Talvez panigu Loishnami huaquin panigucunaca ña viudagucuna quidashpaca pipash paicunata na valichijtashna sintinga. Shinapash Jehovapa ñaupapica ninan valishcacunami can. Jehová Diosca paicunapa cusagucuna causanajujpi ninanda apoyashcamanda, cunanbipash tucui shunguhuan paita sirvishpa catishcamandami Jehová Diosca cushijushca sintirin (1 Tim. 5:3). Viuda panigucunaca jovengunatapashmi ashtacata ayudan.

10. Huauqui Tonymandaca ¿imatata yachajupanchi?

¹⁰ Ashtaca mayor huauquipanigucunaca mayorgucunata cuidaj huasicunapimi causan. Paicunapashmi  Jehovapaca importantecuna can. Cunanga huauqui Tonymanda yachajupashunchi. Paica 20 huatacunata charishpami Pensilvania (Estados Unidos) llactapi, agosto de 1942​pi bautizarirca. Asha tiempo jipaca, cuartelman na ringapaj munashcamandami paica 2 huata chaupita prezo carca. Paipash paipa huarmigu Hildapash paicunapa ishcai huahuacunataca Jehovamanda yachachishpami viñachirca. Huauqui Tonyca, quimsa congregacionmanda superintendente presidentemi carca (cunanga coordinador del cuerpo de ancianos nishpami rijsipanchi). Shinallata superintendente de asamblea de circuitopashmi carca. Shuj carcelpipashmi Bibliamanda yachachishpa tandanajuicunatapash ruran carca. Cunanga 98 huatacunatami charin. Mayorgu cashpapash Jehovata tucui shunguhuan sirvishpa catingapaj, paipa congregacionbipash ayudashpa catingapami ninanda esforzarin.

11. Mayorgucunata cuidaj huasicunapi o huasimanda na llujshi ushaj huauquipanigucuna ñucanchicunapa importante cashcataca ¿imashinata ricuchi ushapanchi?

¹¹ Mayorgucunata cuidaj huasicunapi caj huauquipanigucuna o mayorgucuna caimanda huasimanda na llujshi ushaj huauquipanigucuna ñucanchicunapa importante cashcataca ¿imashinata ricuchi ushapanchi? Congregacionmanda ancianocunami usharijpica predicacionman, reuniongunamanbash ri ushachun o uyaitallapash uyai ushachun ayudana can. Paicunamanda preocuparishcataca visitangapaj rishpa o videollamadata rurashpapashmi ricuchita ushapanchi. Congregacionmanda carupi causaj huauquipanicunamandami ashtahuanbachaca pendiente cana capanchi. Ñucanchicuna paicunahuan parlanajushpaca Jehová Diosta imashina sirvi callarishcata, Jehovata sirvingapaj imacunatalla rurashcatami tapunalla capanchi. Huaquinbica paicunaca na parlangapaj munangallachu, chaimi ñucanchira tapuna capanchi. Y paicuna parlanajujpica ali alimi uyana capanchi.

12. Ñucanchi congregacionmanda mayor huauquipanigucunamandaca ¿imatata yachajui ushapanchi?

¹² Ñucanchi congregaciongunapillatami mayor huauquipanigucunamandaca ashtacata yachajui ushapanchi. Estados Unidosmanda Harriette shuti paniguca, tauca huatacunatami Nueva Jersey congregacionbica Jehovata alipacha sirvirca. Paica ña payagu caimandami paipa ushiguhuan causangapaj rirca. Chai mushuj congregacionmanda huauquipanicunaca panigu Harrietteta ashtahuan rijsingapami esforzarirca y paimandaca ashtacatami yachajurca. Paniguca huata 1925cunapi Jehovata sirvijuimanda ima experienciacunatalla charishcatami parlarca. Chai tiempopica paniguca quirucunata maillana cepillohuanmi villachingapaca llujshin carca. Chai tiempopi villachinajushcamanda prezo apanlla cajpimi paica chaita apashpa purin cashca. 1933​pica ishcai viajetami carcelpica shuj semanata churai tucurca. Antsicarin paipa cusami na Testigo cashpapash paicunapa 3 huahuacunata cuidashpa ayudashca carca. Harriette panigushnallata Jehovata tucui shunguhuan sirvishca mayor huauquipanigucunataca ninanda valichipashunchi.

13. Jehovapa organizacionbi mayor huauquipanigucunamandaca ¿imatata yachajui ushapashcanchi?

¹³ Mayor huauquipanigucunaca Jehová Diospa, paipa organizacionbapash ninan importantecunami can. Paicunaca Jehová Dios paicunapa causaipi imashina bendiciashcata, Jehovapa organización imasha ñaupaman catishcatami ricushca. Shinallata paicunapa pandarishcacunamandapashmi ashtacata yachajui ushashca. Shinaca paicunapa yachajushcacunamanda, experienciacunamandapash yachajushpa catipashunchi (Prov. 18:4). Mayorlla huauquipanicunata ashtahuan rijsingapaj tiempoguta llujchishpaca Jehovapimi ashtahuan cripashun y ashtacatapachami paicunamandapash yachajui ushapashun.

14. Deuteronomio 32:7​pica ¿imatata consejajun?

¹⁴ Mayor huauquipanicunahuan parlangapaj esforzaripashunchi (Deuteronomio 32:7​ta liipangui). Mayorgucunaca ñana pundashna purita ushanllu, ricuitapash ashagutallami ricuita ushan. Shina cashpapash paicunaca paicunapa shungupica jovengunarami can. Paicunaca Jehovapa ñaupapica alipachami ricurin (Ecl. 7:1). Jehová Dios paicunata imamanda valichishcata yarishpami ñucanchicunaca ninanda respetashcata ricuchina capanchi. Ñucanchicunaca Eliseo runagushnami cana capanchi. Paica última vez profeta Eliashuan cashpaca quimsa viajecamanmi “candaca na saquishachu” nirca (2 Rey. 2:2, 4, 6).

15. Mayor huauquipanigucunataca ¿imacunatata tapuita ushapanchi?

¹⁵ Mayor huauquipanigucunapi preocuparishcataca paicunahuan parlangapaj, respetohuan imagutapash tapuchingapaj tiempoguta llujchishpami ricuchipanchi (Prov. 1:5; 20:5). Paicunataca cashnami tapuita ushapanchi: “¿Quiquindaca imata ayudarca Jehovapa organización shuj ali religión cashcata crichunga?”, “Jehovapi ashtahuan confiachunga ¿imata quiquindaca ayudarca?”, “Jehovata cushilla sirvishpa catichunga ¿imata ayudashca?” nishpa (1 Tim. 6:6-8). Paicuna imata nishcataca ali ali uyapashunchi.

16. ¿Imamandata nipanchi que shuj joven huauqui shuj mayorlla huauquiguhuan parlashpaca randimandami animarin nishpa?

¹⁶ Shuj joven huauqui shuj mayorlla huauquiguhuan parlashpaca randimandami animarin (Rom. 1:12). Joven huauquica Jehová Dios paipa sirvijcunata siempre cuidan cashcatami cuenta japinga. Y mayorlla huauquiguca shujcuna paita juyashcatami cuenta japinga. Shinallata Jehová Dios paipa tucui causaipi cuidajushcata parlashpaca cushillami sintiringa.

17. ¿Imamandata Jehovapa ñaupapica mayorgucunaca cada huatami ashtahuan ali ricurin nipanchi?

¹⁷ Joven cana, ali ricurinaca asha tiempotallami paran. Pero Jehovapa ñaupapica mayor huauquipanigucunaca cada huatami ashtahuan ali ricurin (1 Tes. 1:2, 3). ¿Imamandata shina nipanchi? Mayoriashca huauquipanicunaca cada huatami paicunapa causaipi Jehová Dios ayudachun, cambiashpa catichun ayudachunbashmi saquishca. Mayor huauquipanigucunata ashtahuan rijsishpaca ashtahuanmi paicunamandaca yachajupashun. Y shuj valishca tesorocunatashnami ricui ushapashun.

18. Caya semanaca ¿imatata yachajupashun?

¹⁸ Jovenguna mayorgucunata respetajpi, shinallata mayorgucunapash jovengunata valichishpa respetajpimi congregaciongunaca shujllashna tandanajushca can. Chaimandami caya semanaca congregacionbi mayorgucuna jovengunata imashina valichishpa ricui ushashcata yachajupashun.