1, 2. Cunan tiempocunapi ¿ima pasanatata Bibliapica nirca?

HUATA 2015​pica shuj jatun terremotomi Nepal llactataca llaquichirca. Chaimi chai terremotomanda salvarishca huaquin gentecunaca: “Terremotoca ñapashmi huasicunataca urmachirca” nirca. Cutin shujcunaca: “Chai terremoto huaquin minutocunatalla parashca cashpapash, ashtaca horasta parashcashnami carca” ninmi. Ñucanchita shina pasashca cajpica, cunangamanmi chaitaca yarishpa causanajunchiman.

² Cunan punllacunapi alpa mama chujchunshnami Jehová Diosca mundo enteromanda gentecunataca chujchuchijun. Caitaca tauca huatacunatami rurajushca. Caimanda parlashpami profeta Ageoca cashna nirca: “Tucuita Mandaj Diosca, cashnatapashmi nin: ‘Cunanmanda huaquin punlla jipami jahua pachatapash, cai pachatapash, mama cucha yacutapash, chaquishca alpatapash chujchuchisha’” (Ageo 2:6).

3. Ageo parlashca alpa mama chujchuica ¿cunan punllacunapi tiashca alpa mama chujchuihuanga igualchu can?

³ Ageo runaguca Jehová Dios cai alpata chujchuchinatami parlan. Pero chaica cunanbi tiashca alpa mama chujchuicunahuan igualca na canllu. Porque alpa mama chujchuica tucui gentecunatami llaquichin. Pero profeta Ageo parlashcaca, gentecunapa alipami can. Ashtahuangarin Jehová Diosllatami tucui “llactacunapi causajcunatami chujchuchisha. Chai jipami, tucui llactacunapi ninan valishcacuna yaicumujpi cai huasitaca imapash ninan punchapambatashna rurasha” nirca (Ageo 2:7, TNM). Jehová Dios nishca cai shimicunaca, Ageo runagupa tiempopi gentecunapaca ¿imatata significarca? Cutin, cai tiempocunapica chai shimicunaca ñucanchipaca ¿imata significan? Cunanga, cai tapuicunamandami yachajugripanchi. Shinallata tucui llactacunapi causajcunatapash  chujchuchinshna imasha ayudanatami yachajugripanchi.

4. ¿Imata rurachunda Jehová Diosca profeta Ageotaca mandarca?

⁴ 2.558 huatacuna huashamanga, tauca judiocunami Babilonia llactamandaca Jerusalenman tigrarca. Chaipica Ageopashmi cashcanga. Paicunaca Jerusalén llactaman chayashcandimi Jehová Diospa templo huasitaca shayachi callarirca (Esd. 3:8, 10). Shinapash jarcaicuna ricurijpimi, judiocunaca desanimarishpa Jehová Diospa templo huasita shayachinataca chaipi saquirca (Esd. 4:4; Ageo 1:1, 2). Chaimandami Jehová Diosca 2.541 huatacuna huashamanga profeta Ageotaca, Jehová Diospa templo huasiguta huasichi tucuchichun judiocunata animachun mandarca (Esd. 6:14, 15). *

5. Jehová Diospa sirvijcuna profeta Ageopa nishcata uyashpaca ¿imashinashi sintirishcanga?

⁵ Desanimarishca judiocuna Jehová Diospi cutin tucui shunguhuan crichun, shinlli tucuchunmi profeta Ageoca caita nirca: ‘Cai llactapi tucui causajcunapash, tucui shunguhuan trabajaichi. “Ñucaca, cangunahuanmi cani” ninmi, tucuita Mandaj Diosca’ nishpa (Ageo 2:4). Judiocuna chai shimicunata uyashpaca tranquilo, alimi sintirishcanga. Jehová Diosca tauca shinlli angelcunatami ñaupaman pushajun. Chaimandami judiocunaca Jehová Dios paicunata ayudanataca tucui shunguhuan confiana carca.

6. Profeta Ageo nishcashnaca ¿imata pasagrijurca?

⁶ Templo huasita shayachinata saquishca judiocunataca cashna nichunmi Jehová Diosca profeta Ageotaca mandarca, Jehová Diosca tucui llactacunatami chujchuchinshna chujchuchigrin nishpa. Jehová Diosca Persia llactamanda gentecunatami chujchuchinshna ayudagrijurca. Chai tiempopica Persia llactaca ninan rijsishca poderoso llactami carca. Jehová Dios Persia llactata chujchuchijpica ¿imata pasagrijurca? Ishcai cosascunami pasagrijurca. Primero, judiocunaca Jehová Diospa templo huasitami huasichinata tucuchi ushana carca. Y segundo, na judío gentecunapashmi judío gentecunahuan tandanajushpa Jehová Diostaca sirvita ushana carca. Shinaca profeta Ageopa nishcata uyashpaca judiocunaca ninandami cushijushcanga (Zac. 8:9).

7. Cunanbi Jehová Diospa sirvijcunaca ¿imatata ruranajupashcanchi?

⁷ Jehová Diosca mundo enteropi gentecunata chujchuchinshnami chujchuchijun. Chaipaca ñucanchimi ayudanajunchi. Por ejemplo, 1914 huatapi ima pasashcata ricupashunchi. Chai huatapimi Jehová Diosca, Jehovapa Reinopi Jesustaca Rey shina mandachun churarca (Sal. 2:6). Chaica cai mundopi tiashca gulpi gobiernocunapaca nali noticiacunami can. Porque ‘paicuna mandashpa causana punllacunaca’ ñami yalishca carca. Shuj shimipi nishpaca, Jehová Diosta representaj shuj gobierno cai alpapi ñana tiashcatami ricuchijurca (Luc. 21:24). Chaimandami Jehová Diospa sirvijcunaca 1919 huatamandapacha cunangaman gulpi gentecunamanga Jehová Diospa Gobiernolla gentecunataca ayudai ushan nishpa villachinajupashcanchi. Chai ‘ali villaigucunami’ mundo enteropi gentecunataca chujchuchinshna chujchuchijun (Mat. 24:14).

8. Salmo 2:1-3​pi nishcashnaca, Taita Diosmanda ali villaigucunata villachishcataca ¿imashinata mayoría gentecunaca chasquinajun?

⁸ Cunan punllacunapica mayoría gentecunami Jehová Diospa ali villaigucunataca nalicachishpa uyan (Salmo 2:1-3, liipangui). Gentecunaca Jehová Dios, Jesusta cai alpapi rey shina mandachun agllashcataca na aceptanllu. Shinallata ñucanchi Taita Diosmanda “ali villaigucunata” villachishcapash nali noticiacunami can nishpami gentecunaca nin. Huaquin gobiernocunacarin  predicaciondaca prohibitapachami prohibishca. Shinallata aunque tauca gobiernocunaca, “ñucanchica Taita Diostami sirvinchi” nishpapash, paicunapa munashcata rurashpami catinajun. Jesús cai alpapi causashca tiempocunapishnami cunanbi gentecunaca Jehová Dios, Jesusta agllashcataca na crishpa Jehovapa sirvijcunataca catiriashpa llaquichinajun (Hech. 4:25-28).

9. Jehová Diosca gentecuna na paipa lado tucujta ricushpaca ¿imatata nin?

⁹ Jehová Diosca gentecuna paipa ali villaigucunata na aliguman chasquijta ricushpami Salmo 2:10​manda 12​camanga cashna nin: “Jatun mandajcunalla, cunanga aligutapacha yarishpa causaichi. Cai pachapi tiaj juezcuna, shinlli tacurishcata cazuichi. Mandaj Diostaca, manllaihuan servishpa causaichi. Cushijuitapash chujchushpa cushijuichi. Pai fiñarijpi ñanbi ama huañungapaca, paipaj Churitami alicachina canguichi. Paica, nina japirinshna ñapash fiñarinllami. Paita yariashpa causajcunaca, tucuicunami ninanda cushijun” nishpa. Jehová Diosca gulpi gentegucunata ninanda juyaimandami, paicuna cambiachun cunangaman tiempoguta carashca. Shinapash ña ‘último punllacunapimi’ causanajupanchi (2 Tim. 3:1; Is. 61:2). Chaimandami gentecunaca uchalla Jehová Diosmanda yachajushpa, paipa lado tucuna can.

10. Ageo 2:7-9​pi nishcashnaca ¿imata huaquin gentecunahuanga pasagrijurca?

¹⁰ Profeta Ageo nishcashnami huaquin gentecunaca Jehovapa lado tucunajun. Profeta Ageoca, Jehová Dios tucui ‘llactacunapi causajcunata chujchuchinshna’ chujchuchijpimi, gentecunaca Jehovapa lado tucunga nircami. Chaitaca cunan punllacunapimi ricunajupanchi, porque tucui llactacunamanda shamuchun munashca gentecuna o ali shunguta charij gentecunami Jehová Diosta sirvingapaj Jehovapa lado tucushca (Ageo 2:7 *, 8-9​ta liipangui). * Shinallata profeta Isaías, profeta Miqueaspashmi, caica ‘último punllacunapimi’ pactaringa nishpa ña villashca carca (Is. 2:2-4; Miq. 4:1, 2).

11. Diospa Gobiernomanda primera vez uyashpaca shuj huauquica ¿imatata rurarca?

 ¹¹ Diospa Reinomanda ali villaigucunata primera vez uyashpa huauqui Ken imashina sintirishcata ricupashunchi. Huauqui Kenga ashtahuan Jatun Betelpimi sirvijun. Huauqui Kenga 40 huatacuna huashamanmi Diospa Gobiernomandaca por primera vez uyarca. Shinapash siempremi chaitaca yarishpa causan. Paica ninmi: “Bibliamanda cabalguta yachajushpaca, ñucaca cai tucurimui punllacunapi causajushcatami cuenta japircani. Chaimandami Jehová Diospa ñaupapi ali ricuringapaj, para siempre causaiguta chasquingapapash cai nali mundopi na chapurina cashcata, Diospa Reinotalla apoyana cashcatami yachajuparcani. Chaimi Jehová Diostaca tucui shunguhuan mañashpa, Diospa Reinotalla imapash na chujchuchi ushashcata intindishpa, Diospa Reinotalla apoyai callarircani” nin.

12. Cai tucurimui punllacunapica ¿imashinata gentecunaca Jehová Dios munashcashna paita adoranajushcataca ricuchishca?

¹² Cai tucurimui punllacunapica Jehová Diosca ashtacatami paipa organizaciondaca bendiciajushca. Cai tucurimui punllacunapica ashtaca gentecunami Jehová Diosta adorangapaj paipa organizacionman quimirinajushca. Huata 1914​pica ashacunallami carcanchi. Shinapash cunanbica 8 millón yali testigo de Jehovacunami tiapanchi. Shinallata cada huatami ashtaca millón gentecunapash Jesús Huañushcata Yarina Tandanajuiman rin. Shinami cai gentegucunaca paicunapa causaipi cambiocunata rurashpa mushujta churajunshna Jehová Diospa ñaupajpica ali ricurinajun. Shinami Jehová Diosta alabashcata ricuchinajun (Efes. 4:22-24).

13. Cunanbica ¿ima profeciacunallata ashtahuan pactarijun? (Callari paginapi fotota ricupangui).

¹³ Cai último punllacunapica, Isaías capítulo 60​pi nishca shimicunapashmi pactarijun. Por ejemplo, Isaías 60:22​pica Jehová Diosca cashnami nin: “Shuj uchillagumandaca, huaranga huarangashnami tucunga. Ashtahuan ashallagumandaca, ninan shinlli llactashnami tucunga. Mandaj Dios ñucallatami, caicuna chashna tucuna punllacunataca, ucha pactachisha” nijunmi. Cai shimicuna pactarijushcamandami cunanbica ashtaca gentecuna Jehovapa organizacionmanga yaicunajushca. Paicunaca ashtaca shuj shuj habilidadcunata charishpami ninanda ayudanajushca. Ashtahuangarin Jehová “Diospa Reinomanda ali villaigucunata” villachingapapashmi dispuestocuna can. Shinallata profeta Isaiasca, Jehová  Diospa organizacionga shuj llactamanda ‘lecheta ufianshnami’ ninanda beneficiaringa nircami. Chaica diferente habilidadcunata charij mushuj huauquipanicunahuanmi pactarijun (Is. 60:5, 16). Cunanbica shina huauquipanicuna ayudajpimi, 240 llactacunapi predicanajupanchi. Shinallata mil yali idiomacunapipash publicaciongunataca traducinajupanchi.

14. ¿Imatata cunanbica gentecunaca dicidina can?

¹⁴ Cai último punllacunapimi Jehová Diosca llactacunapi causajcunataca chujchuchijushca. Chaimandami gentecunaca cunanmandallata Jehová Diospa lado tucunata o cai mundopi gobiernocunata cazushpa catinata ricuna can. Jehovata sirvijcunaca paicuna causanajushca llactacunapi leycunata cazushpami causan. Shinapash politicapica na chapurinchichu (Rom. 13:1-7). Ñucanchica Jehová Diospa Reinolla tucui llaquicunata tucuchinataca alimi yachapanchi. Shinallata Jehová Diospa Reino o Gobiernoca cai mundopi tiashca gobiernocunahuanga na chapurinllu (Juan 18:36, 37).

15. Jipa punllacunapi ¿ima pasanatata Apocalipsis libropica villajun?

¹⁵ Apocalipsis libropica cai tucurimui punllacunapi Jehovata sirvijcunata ninanda catiriashpa llaquichinatapashmi ricuchijun. Chai tiempopica Jehovata sirvijcunaca ciertopacha Jehovata sirvingapaj munashcata o na munashcatami ricuchina can. Cai mundopi gobiernocunaca paicunata na apoyangapaj munajcunataca ninanda catiriashpami llaquichinga (Apoc. 13:12, 15). Cai mundopi gobiernocunaca ‘ali lado maquipi cashpa, frentepi cashpapash, tucuicunapi shuj ricuchinata churachunmi mandanga. Chaitaca, uchillacunapi, jatungunapi, charijcunapi, imagutapash na charij gentecunapi, na esclavocunapi, esclavocunapipashmi churachun mandanga’ (Apoc. 13:16). Punda tiempocunapica esclavocunataca pi paicunapa amo cashcata yachachunmi shuj señalta churan carca. Shina cuendallatami jipa punllacunapica, cai mundopi gobiernocunaca paicunatalla apoyajushcata ñucanchi ruraicunahuan, pensamientocunahuanbash ricuchichunmi shuyanajunga.

16. ¿Imamandata cunanmandallata Jehovata sirvingapaj munashcata ricuchina capanchi?

¹⁶ Ñucanchicunaca ¿imatata ruragripanchi? ¿Cai mundopi gobiernocunata apoyajuimandachu shuj señaltashna chasquigrinchi? Cai mundopi gobiernocunata na apoyajcunataca ninandami llaquichigrin. Gobiernocunaca ashtaca jarcaicunatapashmi churagrin. Chaimandami Apocalipsis libropica chai señalta o chai ricuchinata na charishpaca ‘jatuitapash, randitapash na ushangachu’ nin (Apoc. 13:17). Shinapash Jehovata sirvijcunaca gobiernocunata apoyashpaca Apocalipsis 14:9, 10​pi parlashca llaquicunata chasquinatami yachapanchi. Chaimandami ñucanchicunaca Jehovatalla sirvingapaj munaimanda ñucanchi ali lado maquipica “Mandaj Diospajllami cani” nishcata churashcashna capashun (Is. 44:5). Cunanmandallatami, Jehová Diosta sirvingapaj munashcata ricuchina capanchi. Chaita rurajpimi Jehová Diosca ninanda cushijushpa, “paicunaca ñucapami can” ninga.

17. Jehová Dios pacienciata charishcamandaca ¿imatata yarina capanchi?

¹⁷ Jehová Diosca pipash huañuchi tucuchunga na munanllu. Chaimandami cunangaman gentecuna arripintirichun, ali decisionda agllachunbash Jehová Diosca saquishca (2 Ped. 3:9, TNM). Pero Jehová Diosca na siemprechu pacienciahuan shuyajungalla. Jehovata na cazungapaj munajcunaca Moisespa tiempopi faraonshnallatami ninanda llaquichi tucunga. Faraondaca Jehová Diosca nircami: “Cunanga candapash, cambaj gentecunatapash, ninan llaquichinahuan llaquichingapajmi ñuca maquita chutasha. Shina rurajpimi, cai pachamandaca anchuchi tucungui. Napacha llullashpami nini. Ñuca ushaita cambi ricuchingapaj, shinallata ñuca shutipash tucui cai pachapi uyarijuchunmi, candaca churarcani”  nishpa (Éx. 9:15, 16). Tucuripica tucui llactamanda gentecunami Jehová Dioslla shujlla Dios cashcata yachaj chayanga (Ezeq. 38:23). Chaica ¿imashata pasanga?

18. a) Ageo 2:6, 20-22​pica ¿ima chujchuchinamandapashta parlajun? b) ¿Imamandata Ageopa nishca shimicunaca jipa punllacunapimi pactaringa nipanchi?

¹⁸ Profeta Ageo ashtaca huatacuna huañushca jipaca, apóstol Pabloca Ageo 2:6, 20-22​pi shimicuna jipa punllacunapipash pactarinatami ricuchirca (chai textota liipangui). Apóstol Pabloca nircami: “[Taita Diosca] cunangarin cashnami nirca: ‘Cutin cuyuchisharami. Na cai pachatalla cuyuchishachu, ashtahuangarin jahua pachandimi cuyuchisha’ nircami. ‘Cutin cuyuchishami’ nishpaca, Dios rurashca cuyurinalla tiajcunataca anchuchinatami shina nijun. Shina anchuchijpipash, na cuyurinallacunaca chashnallatami canga” nircami (Heb. 12:26, 27). Ageo 2:7​pica Jehová Diosca tucui llactacunapi ninan valishcacunata paipa organizacionman yaicuchingapaj tucui llactacunapi causajcunata chujchuchinatami parlajun. Pero Hebreos 12:26, 27​pica faraonshnallata Jehová Dioslla mandana derechota na cazujcunata tucuchitapacha tucuchinamandami parlajun.

19. a) ¿Imata na cuyuchi tucushca o na destruishca quedanga? b) Chaitaca ¿imamandata yachapanchi?

¹⁹ ¿Imata na cuyuchi tucushca o na destruishca quidanga? Apóstol Pabloca nircami: ‘Dios mandajuj, na cuyurinalla llactata o Reinotami japigrinchi. Shinamandami Diosta pagui nishpa, tucui shunguhuan manllashpa, alicachishpa causana canchi’ (Heb. 12:28). Taita Dios ultimota chujchuchijpica, solo Jehová Diospa Reino o Gobiernollami cai alpapica quedanga (Sal. 110:5, 6; Dan. 2:44).

20. a) ¿Ima decisiondata gentecunaca agllana can? b) ¿Imashinata ayudaita ushapanchi?

²⁰ Shinaca cunan tiempopimi gentecunaca Jehová Diosta sirvinata o na sirvinata agllana can. Cai mundota catishpaca paicunallatami llaquichi tucunga. Cutin paicunapa causaipi cambiocunata rurashpa, Jehová Diospa munaita rurashpaca para siempre causaigutami chasquinga (Heb. 12:25). Diospa Gobiernomanda villachishpami ñucanchicunaca, gentecuna Jehovata sirvinata dicidichun ayudapanchi. Chaimandami tucui llactacunapi ninan valishca gentegucuna Jehová Diospa Reinota apoyachun ayudana capanchi. Shinallata Jesuspa nishca shimigutapashmi yaipi charina capanchi. Jesusca nircami: “Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga. Chai jipami, tucurimuica chayamunga” (Mat. 24:14).