1. Bibliapi nishcashnaca ¿imamandata gentecunaca shujcunapi na fácil confiaita ushan?

 CAI mundopica ashtaca nali ruraicuna tiashcamandami gentecunaca shujcunapi confiaitaca ñana ushan. Empresacunapa dueñocuna, politicocuna y religionda ñaupaman pushajcuna llullacunata nishcamanda o nali cosascunata rurashcamandami gentecunaca paicunapica ñana confian. Shinallata amigocuna, vecinocuna y familiacunapash llaquichishcamandami paicunapica ñana fácil confiaita ushan. Caimanda parlashpami Bibliapica “último punllacunapica” gentecunaca shujcunata na juyajcunami canga shujcunamanda llullata parlajcuna y amigocunatallata nalita rurajcuna canga nircami. Cashna gentecunaca cai mundota mandajuj dioshnallata cashcatami ricuchin. Chaimandami paicunapica na confiaita ushanchi (2 Tim. 3:1-4; 2 Cor. 4:4).

2. a) ¿Jehová Diospica tucui shunguhuan confiaita ushapanchichu? b) Huaquingunaca ¿imatata pensarita ushan?

² Jehovata sirvijcunaca Jehová Diospi tucui shunguhuan confiai ushashcataca alimi yachapanchi (Jer. 17:7, 8). Shinallata ñucanchita ninanda juyashcata y nunca na jichushpa saquinatapash seguromi capanchi (Sal. 9:10). Jesuspipashmi confiaita ushapanchi. Paica ñucanchimandami huañurca (1 Ped. 3:18). Y Bibliapa consejocuna ñucanchita ninanda ayudashcamandapashmi Bibliapica confiaita ushapanchi (2 Tim. 3:16, 17). Chaimandami Jehová Diospi, Jesuspi y Bibliapi confiai ushashcataca seguro capanchi. Pero huaquingunaca ñucanchi huauquipanicunapica siemprechu confiaita ushanchi nishpami pensarita ushan. Huauquipanicunapica  siempremi confiaita ushapanchi. Pero ¿imamandata shina nipanchi?

3. ¿Ima oportunidadtata tucuicunallata charipanchi? (Marcos 10:29, 30).

³ Jehová Diosca mundo enteropi huauquipanicunahuan shujllashna tandajushpa paita sirvina oportunidadtami carashca. Chaimandami ashtaca bendiciongunata chasquipashcanchi (Marcos 10:29, 30​ta liipangui). Cai huauquipanicunaca Jehovataca ninandami juyan y paipa mandashcacunata tucuipi cazungapami ninanda esforzarin. Shuj llactamanda cashpa o shuj costumbrecuna charishpa y shuj idiomata parlashpapash tucuicunallatami ninanda juyaripanchi. Ashtahuanbachaca tucuicunallata shujllashna tandanajushpa Jehová Diosta alabanata, adoranatami ninanda gushtapanchi (Sal. 133:1).

4. ¿Imamandata huauquipanicunataca minishtipanchi?

⁴ Cunan punllacunapica ñucanchi huauquipanicunahuanga más unidomi cana capanchi. Huaquinbica huauquipanicunami llaquicunata aguantachun ayudan (Rom. 15:1; Gál. 6:2). Shinallata Jehovata sirvishpa catichun animan y paipa amigo cashpa catichunbash ayudan (1 Tes. 5:11; Heb. 10:23-25). Diablota y cai mundopa nali ruraicunata mishangapaca antsicarinmi ñucanchi huauquipanicunapa ayudata charipanchi. Ñallapachami Diablopash y shuj gentecunapash Jehovata sirvijcunataca atacanga. Shina pasajpica huauquipanicuna ñucanchita ayudajushcamandami agradecido sintiripashun.

5. ¿Imamandata huaquingunaca huauquipanicunapi na fácil confiaita ushan?

⁵ Huaquingunaca huauquipanicunapica na fácil confiaita ushanllu. Talvez shuj huauquiman o paniman imagutapash villajpi shujcunaman villashcamandami chai huauquipi o panipica na fácil confiaita ushan. Shinallata shujcunaca imatapash rurashami nishpapash na cumplishcamanda o imatapash nishpa o rurashpa llaquichishcamandami paicunapica na fácil confiaita ushan. Pero huauquipanicunapi ashtahuan confiai ushachunga ¿imata ayudanga?

6. ¿Imamandata huauquipanicunataca juyana capanchi? (1 Corintios 13:4-8).

⁶ Shujcunata juyashpaca paicunapica confiashunmi. 1 Corintios capítulo 13​pica juyaita charijcuna imashina cashcatami parlan. Cai textocunapi nishcashna juyaita charishpaca shujcunapi confiai ushashunmi y shujcunapi confianata saquishca cashpapash cutin paicunapi confiachunmi ayudanga (1 Corintios 13:4-8​ta liipangui). Por ejemplo versículo 4​pica “juyaita charijcunaca pacienciata charinmi, shujcunata llaquinmi” ninmi. Jehová Diosca pacienciata charimandami ñucanchicuna pecadota rurashpa paita llaquichijpipash perdonan. Y Jehovapa ejemplota catishpami huauquipanicuna imatapash nishpa o rurashpa ñucanchita llaquichijpipash paicunata perdonangapaca pacienciata ricuchina capanchi. Cutin versículo 5​pica juyaita charijcunaca “na ñapash culiranllu, na risintirishcalla causanllu” ninmi. Shinaca huauquipanicuna imashina llaquichishcata yaria causangapaca na munanchichu y “na risintirishcalla” cangapaj munanchichu. Eclesiastés 7:9​pica ama ñapash fiñaringuichu ninmi. Chaimandami Efesios 4:26​pi consejota catina capanchi. Chaipica ninmi: “Indi huashajungacamanga na culira cashpa catinachu capanguichi”.

7. Mateo 7:1-5​pi consejocunaca ¿imashinata huauquipanicunapi ashtahuan confiachun ayudan?

⁷ Jehová Diosca huauquipanicunataca ninandami juyan y paicunapa pandarishcacunataca na yaria causanllu. Ñucanchicunaca Jehovapa ejemplotami catina capanchi. Shina rurashpaca ñucanchi huauquipanicunapica ashtahuanmi confiaita ushashun (Sal. 130:3). Huauquipanicunapa pandarishcacunata ricunapa randica paicunapa ali cualidadcunata ricungapami esforzarina capanchi. Shinallata paicuna ima ali cosascunata rurajtami ricuna capanchi (Mateo 7:1-5​ta liipangui). Juyaita charijcunaca “tucuitami crin” chaimandami huauquipanicuna ñucanchita na llaquichingapaj munashcata yarina capanchi (1 Cor. 13:7). Jehová Diosca ñucanchi huauquipanicunapi confiai ushashcata yachaimandami paicunapi confiachun munan. *

8. Huauquipanicunapi ashtahuan confiai ushangapaca ¿imatata rurai ushapangui?

⁸ Huauquipanicunapi confiangapaca tiempomi minishtirin. Paicunapi ashtahuan confiangapaca ¿imatata rurai ushapangui? Huauquipanicunata ali rijsingapami esforzarina capangui. Reuniongunapimi paicunahuanga parlaita ushapangui. Shinallata predicacionbimi paicunahuanga yalita ushapangui. Y paicunapi confiai ushashcata ricungapaca pacienciatami charina capangui. Shuj huauquita o panita chairalla rijsishpaca quiquin imashna sintirishcata parlangapaca talvez na munapanguichu. Pero tiempohuan chai huauquita o panita ashtahuan ali rijsishpaca con confianzami quiquin imashna sintirishcata parlangapaj munapangui (Luc. 16:10). Pero shuj huauqui o pani quiquinda llaquichishca cajpica ¿imatata rurai ushapangui? Resentido quidashpa, shujcunapipash ñana confiangapaj munanichu nishpaca na pensanachu capanchi. Chaipa randica shuj huauquipanicunapica confiashpa catipashunchi. Jehovata sirvijcunapa ejemplomanda yachajunapashmi ayudanga. Paicunaca huaquinguna llaquichijpipashmi shujcunapi confiashpa catirca.

9. a) Jehovata representajcuna nalicunata rurajpipash Anaca ¿imatata rurarca? b) ¿Anapa ejemplomandaca imatata yachajupangui? (Dibujota ricupangui).

⁹ ¿Responsabilidadta charij huauquichu imatapash nishpa o rurashpa llaquichishca? Shina pasashca cajpica Anapa ejemplomanda yachajunami quiquindaca ayudanga. Ana huarmigu causajuj tiempopica Elí runami Israel llactapa  sumo sacerdote carca. Elipa churicunapashmi sacerdotecuna carca pero paicunaca huainayashpami causanajurca. Shina pasajujpipash Elica nimata na rurarcachu. Y Jehová Diosca Elipa responsabilidadtaca na ñapash quichurcachu. Shina pasajujpipash Anaca ¿imatata rurarca? Elí sumo sacerdote cashpa catijpipashmi Anaca tabernáculo huasiman Jehovata adorangapaj rishpa catirca. Y Ana huarmigu llaquillapacha caimanda Jehovata mañajujpica Elica machashcami cangui nishpami Anataca tacurirca (1 Sam. 1:12-16). Shina pasajpipashmi Ana huarmiguca shuj huahuaguta chari ushashpaca Jehová Diosta tabernáculo huasipi sirvichun saquisha nishpa prometirca. Y chai huahuagutaca Elimi cuidagrijurca (1 Sam. 1:11). Elipa churicuna shina nalita ruranajushcamandaca tiempohuanga Jehová Diosca corregircami (1 Sam. 4:17). Y Ana huarmigutaca Jehová Diosca shuj huahuaguta chari ushachunmi bendiciarca. Chai huahuaguca Samuel shutimi carca (1 Sam. 1:17-20).

10. Huaquinguna llaquichijpipash Davidca ¿imatata rurashpa catirca?

¹⁰ ¿Shuj amigochu quiquindaca llaquichishca? Shina pasashca cajpica rey Davidpa ejemplopi pensaripai. Davidpa churi Absalón Davidpa randi rey tucungapaj munajpica Davidpa amigo Ahitofelca Absalondami apoyarca. Paipa churipash y paipa amigopash paipa contra tucujpica Davidca llaquillapachami sintirishcanga. Shina llaquichijpipashmi Davidca shujcunapi confiashpa catirca. Por ejemplo Husái runagupica confiashpami catirca. Husaica Davidpa alipacha amigo caimandami Davidtaca tucuipi apoyarca. Rey Davidca Husái runagupi confiashcamandaca na arripintirircachu porque Husaica paipa causaitapash peligropi churashpami Davidtaca ayudarca (2 Sam. 17:1-16).

11. Nabal runata sirvij shuj runaguca ¿imashinata shujcunapi confiashcataca ricuchirca?

¹¹ Nabal runata sirvij shuj runagupipash pensaripashunchi. Davidpash y paita cumbaj runacunapashmi Nabal runapa sirvijcunataca cuidanajurca. Y tiempo jipaca Davidpash y paita cumbaj runacunapashmi Nabaltaca micunaguta carachun mañarca. Pero Nabal runaca nimata na cungapaj munarcachu. Chaimandami Davidca ninanda culirashpa Nabalpa huasimanda tucuilla jaricunata huañuchisha nirca. Y shina pasagrijujta yachashpami Nabalta sirvij shuj runaguca Nabalpa huarmi Abigailman tucuita villarca. Chai runaguca Abigaíl huarmigu paicunata ayudai ushashcata yachaimandami shina rurarca. Y Abigaíl chai problemata arreglanatami confiarca.  Abigailca David paicunata ama llaquichichunmi na manllashpa Davidhuan parlangapaj rirca (1 Sam. 25:2-35). Y Abigailpashmi David paicunata llaquinapi confiarca.

12. Jesusca ¿imashinata paipa discipulocuna pandarijpipash paicunapi confiashcata ricuchirca?

¹² Jesusca paipa discipulocuna pandarijpipashmi paicunapica confiarca (Juan 15:15, 16). Santiago y Juanbash Jesús ña mandai callarishpa shujtaca ali ladoman y chaishujtaca lluqui ladoman churachunmi mañarca. Paicuna shina nijpipash Jesusca cangunaca shuj ali puestota munaimandallami Jehovata sirvinajunguichi nishpaca na nircachu. Y ñana ñucapa apostolcunaca canguichichu nishpapash na nircachu (Mar. 10:35-40). Jesusta prezu apanajujpica paipa discipulocunaca Jesusta saquishpami rirca (Mat. 26:56). Pero Jesusca paicunapi confiashpami catirca. Paicuna pandarijpipash Jesusca “paicunataca ultimocamanmi juyarca” (Juan 13:1). Y Jesusca causarishca jipaca paipa 11 apostolcunamanga predicacionda ñaupaman pushachun y paipa catijcunata cuidachunbashmi encargarca (Mat. 28:19, 20; Juan 21:15-17). Jesusca paipa apostolcunapi confiashcamandaca na arripintirircachu. Paicunaca huañungacamanmi paitaca cazurca. Imashinami ricupashcanchi Ana huarmigu, David, Nabalta sirvij runagu, Abigaíl huarmigu y Jesuspash imperfecto gentecunapimi confiarca. Paicunapa ejemplomi ñucanchicunapash shujcunapi confiai ushashcata ricuchin.

13. ¿Ima pasajpita ñana confiaita ushapanchiman?

¹³ Shuj huauqui ancianoman imapash problemamanda villapashcanguiman. Pero imagutapash confiashpa parlajpi shujcuna chai problemamanda yachaj chayashcata uyashpaca llaquillapachami sintiripanchi. Cunanga caipi pensaripashun: Shuj viajeca shuj panigumi ima problemata charishcata shuj huauqui ancianoman parlarca. Shinapash cati punllapaca cai huauqui ancianopa huarmigumi chai panigutaca animangapaj cayachirca. Chaimi huauqui ancianoman villashcata ñapash shujman villashcamanda cai paniguca chai huauquipi ñana confiangapaj munarca. Shinapash cai paniguca risintirishca na quidangapaj munaimandami shuj huauqui ancianohuan parlarca. Chaimi cai huauquiguca ancianocunapi cutin confiaita ushachun ayudarca.

14. Huauqui ancianocunapi cutin confiachunga shuj huauquigutaca ¿imata ayudarca?

¹⁴ Shuj huauquiguca ashtaca tiempotami ishcai ancianocunahuanga risintirishca carca. Y confiaitapash ñana confiarcachu. Shinapash shuj huauquigu paiman imata nishcapimi pensarirca. Paica “ñucanchi huauquipanicunaca na ñucanchi contrachu can. Sino Diablomi ñucanchi contra can” nishcatami yarirca. Cai shimicunaca huauquipa shungumanmi chayarca. Chaimi Jehová Diospa ayudata mañashpa resintirishca huauquicunahuanga cutin ali tucurca.

15. Grete paniguca ¿imamandata huauquipanicunapi cutin uchalla confiaitaca na usharca?

¹⁵ Congregacionbi ñana responsabilidadcunata charishcamandaca talvez llaquillapachami sintiripangui. Cunanga panigu Grete y paipa mamapa experienciamanda ricupashun. Cai panigucunaca 1930 huatapimi Jehová Diostaca tucuipi cazungapaj esforzarishpa sirvinajurca. Paicunaca Jehová Diospa obrata prohibishca Alemania llactapimi causanajurca. Grete panigutaca La Atalaya revistapa copiacunata rurashpa ayudachunmi mingarca. Shinapash Grete panigupa taita Bibliamanda na gushtan cashcatami huauquicunaca yachaj chayarca. Chaimi cai panigupa taita Jehová Diospa contra shayarijcunaman tucuita villanga yashpa panigupa privilegiotaca quichurca. Grete paniguca shuj llaquitapashmi aguantana tucurca. Segunda Guerra Mundial tiempopica panigu Gretepi y paipa mamapipash na ashta confiaimandami huauquicunaca villajun revistataca  cuitapash na cun carca. Shinallata huauquipanicunapash saludaitapash na saludanllu carca. Shina pasashcamandami panigu Greteca ninanda llaquirishpa huauquipanicunata uchalla perdonashpa, paicunapi cutin confiaitaca na usharca. Tiempohuanga Jehová Dios chai huauquipanigucunata perdonashcata cuenta japishpami paipash perdonana cashcata intindirca. *

16. ¿Imamandata huauquipanicunapi cutin confiangapaj esforzarina capanchi?

¹⁶ Chaishuj parrafocunapi parlashca huauquipanicunashna parecido llaquicunata charishca cashpaca cutin huauquipanicunapi confiangapaj esforzaripangui. Caipi pensaripashun. Imapash micunata micunajushpa intoxicarishpaca ñana cutinga micushachu nishpaca na pensanchimanllu. Imata micushpapash solo ashtahuan cuidadotallami charinchiman. Shina cuendami shuj huauqui o pani ñucanchita llaquichishcamandaca paicunapi confiaitaca na saquinchiman. Paicunaca imperfectocuna caimandami pandarita ushan. Ñucanchi huauquipanicunapi cutin confiashpaca ñucanchillatami cushilla sintirishun y congregacionbipash tucuicunallata ali llevarichunmi ayudashun.

17. a) Huauquipanicunapi confianaca ¿imamandata importante can? b) Cati temapica ¿imatata ricupashun?

¹⁷ Cai mundopi gentecunaca shujcunapica na confiaita ushanllu. Pero Jehová Diospa organizacionbica tucuicunallata randimanda juyarimandami tucuicunapi confiaita ushapanchi. Chaimi tucuicuna shujllashna caimanda cushilla sintiripanchi. Cunanbillata huauquipanicunapi confianami jipacunaman llaquicuna ricurijpipash paicunapi confiashpa catichun ayudanga. Pero shuj huauqui o pani ñucanchita llaquichijpica ¿imashinata paicunapi cutin confiaita ushapanchi? Huauquipanicunataca Jehová Dios ricunshnallatami ricuna capanchi shinallata Bibliapa consejocunatami catina capanchi. Ñucanchi huauquipanicunatapash juyashpa catingapaj y Bibliapi parlashca ejemplocunata catingapami esforzarina capanchi. Shina rurashpaca tucui huauquipanicunahuanmi ali amigocuna caita ushapashun. Bibliapi nishcashnaca cai amigocunaca “huauquitapash yali alicunami” caita ushan (Prov. 18:24). Huauquipanicunapi confiashpapash paicunapash ñucanchipi confiai ushashcatapashmi ricuchina capanchi. Cati temapimi huauquipanicuna ñucanchipi confiachun imata rurana cashcata ricupashun.