1. Jesús ña mil huatacunata mandajujpica ¿imata pasanga?

 JESÚS mil huatacunata mandajujpica ashtaca gentecunami cai alpapica causaringa. Ñucanchicuna chaita ricushpaca ninandami cushijushun. Tucuicunami ñucanchi juyashca familia causarishcata ricushpaca ninanda cushijushun. Jehová Diospashmi ninanda cushijunga (Job 14:15). Mundo enteropi ashtaca huañushca gentecuna causarishpaca cutinmi paicunapa familiahuanga tuparinga. Imashinami caishuj temapi yachajuparcanchi ‘alita rurajcunapa’ shuticunaca causaita chasquinata ricuchij libropimi tiajun. Paicunaca “para siempre causangapami causaringa” (Hech. 24:15; Juan 5:29). Paraíso alpagupica ñucanchi juyashca familiami talvez primero causarin. * Cutin “nalita rurashcacunaca” Jehová Diosta na rijsimanda o paita sirvina oportunidadta na charishcamandami ‘juzgai tucungapaj causaringa’.

2, 3. a) Isaías 11:9, 10​pi nishcashnaca ¿imata pasanga? b) Cai temapica ¿ima tapuicunatata contestapashun?

² Huañushca gentecuna causarishpaca Jehová Diosmandaca ashtacatami yachajuna tucunga (Is. 26:9; 61:11). Chaimandami  Jehová Diosmanda tucuicunaman yachachingapaca ninan esforzarina tucupanga (Isaías 11:9, 10​ta liipangui). Nalita rurajcuna o Jehová Diosta na rijsishpa huañushca gentecunaca Jesusmanda, Jehová Diospa Gobiernomanda Jesús ñucanchita salvangapaj huañushcamanda, Jehová Diospa shutimanda, pailla mandana derechota charishcamandapashmi ashtacata yachajuna tucunga. Huaquin Jehovata sirvijcunaca Biblia nara escribij tucurijpillatami huañurca. Chaimandami Jehová imata yachachishpa catishcataca yachajuna tucun. Chaimi alita rurajcuna y nalita rurajcunapash Jehová Diosmandaca ashtacata yachajuna tucunga.

³ Cai temapica cai tapuicunatami contestapashun: Causarishca gentecunamanga ¿imashinata Jehová Diosmanda, Jesusmandapash yachachina tucunga? ¿Imamandata huaquingunapa shuticunalla causaita chasquinata ricuchij libropi para siempre escribishca quidanga? Cai tapuicunamanda yachajunaca ñucanchitallatami ayudan. Daniel y Apocalipsis librocunapi parlashca huaquin profeciacunata yachajunami, huañushcacuna causarijpi ima pasanata ali intindichun ayudanga. Primeroca Daniel 12:1, 2​pi imatalla yachachijujta ricupashunchi.

4, 5. Daniel 12:1​pica último punllacunapi ¿ima pasanatata parlan?

⁴ (Daniel 12:1​ta liipangui). Daniel libropica último punllacunapi imacunalla pasanatami ordenbi nin. Por ejemplo Daniel 12:1​pica Miguel shuti angelca Taita Diospa llactata ‘ayudangapami shayaringa’ ninmi. Chai angelca Jesusmi can. Cai profeciaca 1914 huatapi Jesús Taita Diospa Gobiernopi Rey shina mandai callarijpimi pactari callarin.

⁵ Shinallata profeta Danielmanga Jesús mandai callarijpica “cai pachapi gentecuna causai callarishcamandapacha chai punllacaman nara tiashca jatun llaqui huatacunami tianga” nircami. Llaqui huatacunamanda parlashpaca Mateo 24:21​pi parlashca ‘ninan manllanai llaqui tiempomandallatami’ parlajun. Jesusca Taita Diospa sirvijcunataca Armagedón tiempopimi difindinga. Shinaca Taita Diospa sirvijcunamanda parlashpami Apocalipsis libropica “na cuentai ushanalla ashtaca ashtaca gentecunatami” “ninan manllanai llaquimanda llujshishcacuna can” ninmi (Apoc. 7:9, 14).

6. Na cuentai ushanalla ashtaca ashtaca gentecuna ninan manllanai llaqui tiempomanda llujshishca jipaca ¿imashi pasanga? ¿Imamandata shina nipanchi? (Cai revistapillata “Gentecunaca tapunmi” nishca parteta ricupangui. Chaipica huañushcacuna cai alpapi causarinamandami parlan).

⁶ (Daniel 12:2​ta liipangui). Na cuentai ushanalla ashtaca ashtaca gentecuna ninan manllanai llaqui tiempomanda llujshishca jipaca ¿imashi pasanga? Cai profeciapica huañushca gentecuna causarinamandami parlan. Shinapash pundacunaca cai último punllacunapi huañushcacuna causarinatami intindin carcanchi. * Pero cai profeciapica huañushca gentecuna paraíso alpapi causarinatami ricuchipan. ¿Imamandata shina nipanchi? Por ejemplo, Daniel 12:2​pica huañushcacuna causarinamanda parlashpaca “ñutu alpapi” samajcunaca rijchachi tucungami ninmi. Y cai ñutu alpamandallata parlashpami Job 17:16​pica “Seol [o pantión]” shimita utilizan. Chaimandami Daniel 12:2​pi ñutu alpapi samajcuna jatarinamanda parlashpaca, huañushcacuna cai alpapi ciertopacha causarinamanda parlajujta intindi ushapanchi. Huañushcacunaca último  punllacuna jipa y Armagedón punlla jipami causaringa.

7. a) “Causaita causagringapaj” causachij tucuna nishpaca ¿imatata ningapaj munan? b) ¿Imamandata ‘ashtahuan ali causaita charingapami causachij tucunga’ nipanchi?

⁷ Daniel 12:2​pi huaquingunaca ‘causaita causagringapami’ causaringa nishpaca ¿imatata ningapaj munan? Cai shimicunaca Jesús mil huatacunata mandajujpi causachi tucushca gentecuna, Jehová Diosta y Jesusta ashtahuan rijsishpa paipa mandashcata cazushpaca para siempre causai ushana cashcatami ricuchin (Juan 17:3). Punda causachij tucushca gentecunahuan ricujpica último punllacuna yalishca jipa causachij tucushca gentecunaca ‘ashtahuan ali causaita charingapami causachi tucunga’ (Heb. 11:35). Cai causarishca gentecunaca cutinga ñana huañungachu.

8. Huaquingunaca “causaita causaicaman pingai tucushpa ninanda musparingapajllami” causachi tucunga nishpaca ¿imatata ningapaj munan?

⁸ Causarishca gentecunamandaca na tucuicuna Jehová Diospa yachachishcacunata chasquingapaca munangachu. Chaimandami Daniel libropa profeciapica huaquingunaca “causaita causaicaman pingai tucushpa ninanda musparingapajllami” causachi tucunga nin. Jehovapa mandashcacunata na cazungapaj munashcamandami causaita chasquinata ricuchij libropica paicunapa shutica na escribishca tiajun. Shinallata para siempre causaitapash na chasquingachu. Paicunaca para siempremi tucuchi tucunga. Shinaca Daniel 12:2​pica huañushcacuna causarishca jipa según paicunapa ruraicuna para siempre causaita chasquinata o para siempre tucuchi tucunamandami parlajun * (Apoc. 20:12).

9, 10. Daniel 12:3​pi nishcashnaca jatun llaqui tiempocuna yalishca jipaca ¿imata pasanga? “Jahua pachamanda punchayachinshnami punchayachinajunga” nishpaca ¿picunamandata parlajun?

⁹ (Daniel 12:3​ta liipangui). “Jatun llaqui” tiempocuna yalishca jipaca ¿imata pasanga? Daniel 12:2​pica huañushcacuna causarinamandami parlan. Y verso 3​pipashmi ninan manllanai llaqui punllacuna yalishca jipa ima pasanatapash ricuchijun.

¹⁰ “Jahua pachamanda punchayachinshnami punchayachinajunga” nishpaca ¿picunamandata parlajun? Mateo 13:43​pi Jesús ima nishcata ricupashunchi. Jesusca: “Chai tiempopica, Taita Dios chasquishcacunami paicunapa Taita Diospa Gobiernopica indishna punchapamba canga” nircami. Jesús cai shimicunata nishpaca ‘Taita Diospa Gobiernopa huahuacunamandami’ parlajurca. Paicunaca ungidocunami can (Mat. 13:38). Shinaca Daniel 12:3​pica ungidocunamanda y Jesushuan Mil Huatacunata Mandajushpa rurana trabajomandami parlajun.

11, 12. 144 mil ungidocunaca mil huatacunapica ¿imatata ruranga?

¹¹ Ungidocunaca alita ‘rurashpa causanajuchunmi ashtaca gentecunata’ ayudanga. Pero chaitaca ¿imashinata ruranga? Ungidocunaca Jesushuan mil huatacunata mandanajushpami gentecuna Jehová Diosta rijsichun ayudanga. 144​mil ungidocunaca reycuna y sacerdotecunami canga (Apoc. 1:6; 5:10; 20:6). Shinaca Bibliapi nishcashnaca ‘gentecunata jambishpami’ asha asha perfectocuna tucuchun ayudanga (Apoc. 22:1, 2; Ezeq. 47:12). Gentecunata shina ayudai ushashcamandaca ungidocunaca ninandami cushijunga.

¹² ¿Picunallata alita rurashpa causanataca yachajunga? Paraisopi causarishcacuna Armagedón punllata yalishcacuna y paraisopi nacirishca  huahuacunapash yachajuna tucunga. Jesús mil huatacunata mandashca jipaca tucuicunami perfecto canga. Shinaca cai gentecunapa shuticunaca ¿ima horata tintahuan escribishcashna causaita chasquinata ricuchij libropica para siempre escribishca quidanga?

13, 14. Perfecto gentecuna cashpapash para siempre causaita chasqui ushangapaca ¿imatata rurana tucunga?

¹³ Perfecto caimandallaca para siempre causaitami chasquisha nishpaca na pensanachu capanchi. Por ejemplo Adán y Evapi pensaripashunchi, paicunaca perfectocunami carca. Pero para siempre causaita chasquingapaca Jehová Diostami cazuna carca. Shinapash paicunaca Jehovataca na cazurcachu (Rom. 5:12).

¹⁴ Imashinami yachajupashcanchi mil huatacuna jipaca cai alpapica tucui gentecunami perfectocuna caita ushanga. ¿Cai gentecunaca Jehová Diospa Gobiernotaca tucui shunguhuanlla apoyanga? O ¿Adán y Eva cuendachu perfectocuna cashpapash Jehová Diosta na cazunga? Caita yachangapaca shuyanami capanchi.

15, 16. a) ¿Ima horata gentecunaca Jehová Diosta apoyashcata ricuchina tucunga? b) Jehová Diosta cazujcunahuan y na cazujcunahuanga ¿imata pasanga?

¹⁵ Diabloca mil huatacunatami prezo canga. Chai tiempopica pitapash llaquichitaca ñana ushangachu. Shinapash mil huatacuna jipaca libremi quidanga. Chaimi perfecto  gentecunataca cutin umachingapaj munanga. Chai tiempopimi gentecunaca Taita Diospa lado cashcata, Taita Dioslla mandana derechota charishcata ricuchina oportunidadta charinga (Apoc. 20:7-10). Paicuna Jehová Diospa lado cashcata ricuchijpillami causaita chasquinata ricuchij libropi paicunapa shuti para siempre escribishca quidanga.

¹⁶ Huaquingunaca Adán y Eva cuendami Jehová Diospa Gobiernotaca na juyangapaj munanga. Cai gentecunahuanga ¿imata pasanga? Apocalipsis 20:15​pica: “Picunalla causaita chasquinata ricuchij libropi na anotashcacunaca, nina lagunamanmi shitai tucurca” ninmi. Shinaca na cazujcunaca para siempremi tucuchi tucunga. Pero mayoría gentecunami Jehovata apoyanata decidinga. Chaimi paicunapa shuticunaca causaita chasquinata ricuchij libropica para siempre escribishca quidanga.

17. Shuj angelca tucurimui punllacunapi ¿ima pasana cashcatata profeta Danielmanga villarca? (Daniel 12:4, 8-10).

¹⁷ Jipa punllacunapi imacunalla pasanata yachajushpaca ninandami cushijupanchi. Pero cai ‘tucurimui punllacunapi’ ima ashtahuan pasanatami shuj angelca profeta Danielmanga villarca (Daniel 12:4, 8-10​ta liipangui; 2 Tim. 3:1-5). Danielmanga cashnami nirca: “Ima jatun  yachajunacunapash, ninandami miranga” nircami. Shinaca cai tucurimui o último punllacunapi Diosta sirvijcunaca Daniel libropi profeciacunata ashtahuan ali intindina cashcatami ricupanchi. Cai tucurimui punllacunapi ima pasanamanda parlashpaca caitapashmi nirca: “Diosta na manllajcunaca, Diosta na manllashpa catinajungallami. Diosta na manllajcunaca, cashna tucunataca shujllapash na yachai ushangachu” nircami.

18. Nali gentecunahuanga ¿imata pasanga?

¹⁸ Cunan punllacunapica nali gentecunaca paicunapa munashcata rurashpami causan (Mal. 3:14, 15). Pero ñallami Jesusca llamagushna ali gentecunataca, chivoshna nali gentecunamanda separashpa chai nali gentecunataca juzganga (Mat. 25:31-33). Nali gentecunaca ninan manllanai llaqui punllapimi huañunga. Paicunaca ñana causaringachu y paicunapa shuticunaca Malaquías 3:16​pi parlashca ‘yarina libropica’ na escribishca quidangachu.

19. Cunan punllacunapillata ¿imatata rurana capanchi? (Malaquías 3:16-18).

¹⁹ Cunan punllacunapillatami Jehová Diospa lado cashcata ricuchina oportunidadta charipanchi (Malaquías 3:16-18​ta liipangui). Jehová Diosca “ashtahuan valishcacunata” o paipa ñaupajpi ali ricurij gentecunatami tandachijun. Ñucanchicunapashmi chai gentecunapurapi cangapaj munapanchi.

20. Jehová Diosca ¿imatata Danielmanga prometirca? y ¿imamandata chai promesa uchalla pactarichun munapangui?

²⁰ Cai último punllacunapica shuj shuj cosascunami pasanajun. Y Jehová Diosca ñallami cunanbi tiashca tucui nali cosascunataca tucuchinga. Chai jipami Jehová Dios Danielman imata prometishcata pactarijta ricupashun. Jehová Diosca Danielmanga: Cai “tucurimui punllapi jatarishpami, can japinataca japingui” nircami (Dan. 12:13). ¿Quiquinga Daniel y quiquinba juyashca familiacuna causarina punlla ucha chayamuchunllu shuyajupangui? Shina cashpaca Jehovata tucui shungu sirvingapaj esforzaripai. Shina rurajpica quiquinba shutica causaita chasquinata ricuchij libropimi para siempre escribishca quidanga.