1. ¿Imamandata shuj personapi confiaita ushapanchi?

 SHUJ persona imata prometishcata cumplijpi y na llullashpa parlajpica, chai personapica confiaita ushapanchimi (Sal. 15:4). Y shuj gentecunapashmi chai personapi confiai ushashcataca ali yachan. Ñucanchi huauquipanicunapash ñucanchicunapi confiai ushashcata ali yachachunmi munapanchi. Pero paicuna ñucanchipi confiachunga ¿imatata rurai ushapanchi?

2. ¿Imashinata de confianza cashcata ricuchita ushapanchi?

² Shujcuna ñucanchicunapi confiachunga na obligaita ushanchichu. Ñucanchicunami de confianza cashcata ricuchingapaj esforzarina capanchi. Caipi pensaripashunchi: Culquiguta ganangapaca shinllitami esforzarina capanchi. Pero ñapashmi perdita ushanchiman. Shina cuendami shujcuna ñucanchipi confiachunga ninanda esforzarina capanchi. Pero na cuidadota charijpica shujcunaca ñucanchipi confianata saquita ushanmi. Ñucanchicunaca tucui shungumi Jehová Diospica confiaita ushapanchi. “Tucui imatalla pai rurashcacunapash, pactachij cajtami ricuchijun” (Sal. 33:4). Jehová Diosca paipa ejemplota catishpa ñucanchicunapash de confianza cachunmi munan (Efes. 5:1). Cai temapica punda Jehovata sirvijcuna Jehová Diospa ejemplota catishpa de confianzacuna cashcata ricuchishcatami yachajugripanchi. Shinallata shujcuna ñucanchicunapi confiachun imata rurana cashcatami cinco yuyaicunapi ricugripanchi.

3, 4. a) Danielca ¿imashinata shuj persona de confianza cashcata ricuchirca? b) ¿Imapita pensarina capanchi?

³ Profeta Danielca ñucanchicunapaca shuj alipacha ejemplomi can. Babilonia llactaman apai tucushca asha tiempo jipallami  shuj gentecunaca Danielpi confiai ushashcata cuenta japirca. Shinallata rey Nabucodonosorpa muscui imata ningapaj munashcata Jehovapa ayudahuan villashca jipaca shuj gentecunaca Danielpica ashtahuanmi confiai callarirca. Shuj viajeca Danielca Jehová Dios rey Nabucodonosorhuan culira cashcatami villana tucurca. Y rey Nabucodonosorca millai millai reymi carca. Chai rey shina cajpipashmi Danielca na manllashpa villangapaj rirca (Dan. 2:12; 4:20-22, 25). Tauca huatacuna jipapashmi Danielca cutinllata de confianza cashcata ricuchirca. Paica Babilonia llactata mandajpa huasipi ima mensaje escribishca cajtami villarca (Dan. 5:5, 25-29). Y tiempo jipaca rey Dariopash y llactacunata mandajcunapash Daniel “ali yuyaita charij” cashcata cuenta japirca. Shinallata Danielmandaca “ali cazuj, ima mapa munaicunatapash na charij, ima pandatapash na rurajmi can” nircami (Dan. 6:3, 4). Jehovata na sirvij gobiernocunapashmi Danielpica confiai ushashcata cuenta japirca.

⁴ Shinaca ñucanchicunapash cashna pensaripashunchi: “Na Testigo gentecunaca ¿imatata ñucamandaca yuyan? ¿Ñuca shuj persona de confianza y ñuca responsabilidadcunata pactachi cashcatachu ricun?”. ¿Imamandata cashna pensarina capanchi? Porque ñucanchicuna de confianza cashcata ricuchishpaca Jehová Diostami alabapanchi.

5. Hananías runaguca ¿imashinata carca?

⁵ Jesús cai alpaman nara shamushca huata 455​pi Jerusalén llactapa pircacunata cutin shayachinajushpaca, gobernador Nehemiasca chai obrata ricuchunga huaquin jaricunamanmi mingarca. Chai jaricunaca de confianzami carca. Chai jaricunamanda shujca Hananiasmi carca. Bibliapica “Hananías runaca  ashtacacunata yali Taita Diosta manllaj, na llullaj runami carca” ninmi (Neh. 7:2). Hananiasca Jehová Diosta juyaimanda y paita cazungapaj munaimandami, paiman cushca responsabilidadtaca aliguta pactachingapaj esforzarirca. Hananías runagushna canami ñucanchicunapash de confianza cachun ayudanga.

6. Tíquico runagu de confianza cashcataca ¿imashinata ricuchirca?

⁶ Tíquico runagupa ejemplomanda ricupashunchi. Apóstol Pabloca Tíquico runagupica confiarcami. Apóstol Pablo paipa huasipillata prezo cajpica, Tíquico runagumi paitaca ayudarca. Chaimandami, Pabloca “paica tucui shunguhuanmi ñucanchi Señor Jesustaca sirvijun” nircami (Efes. 6:21, 22). Apóstol Pabloca pai escribishca cartacunata Éfeso y Colosas llactacunaman Tíquico apanataca confiarcami. Ashtahuanbash chai huauquipanicunata animashpa consolanatapashmi confiarca. Cunan punllacunapipashmi Tíquico runagushna Jehovata tucui shungu sirvij huauquicunaca shuj huauquipanicunata ayudangapaj ninanda esforzarin (Col. 4:7-9).

7. Huauqui ancianocuna y siervo ministerialcunaca ¿ima ali ejemplotata ñucanchimanga cun?

⁷ Anciano huauquicuna, siervo ministerial huauquicunapash paicunapa trabajota alipacha pactachishpami de confianzacuna cashcata ricuchishca. Chaimandami paicunataca ninanda agradicipanchi. Cai huauquicunaca Daniel, Hananías, y Tíquico runagucunashnami paicunapa responsabilidadcunata ali pactachingapaj esforzarin. Por ejemplo chaupi semana reunionman rishpaca huauquipanicuna paicunapa asignaciongunata pactachinataca seguromi cai ushapanchi. Chaimi huauqui ancianocunaca huauquipanicuna paicunapa asignaciongunata ali preparashpa pactachijpica ninandami cushijun. Shinallata ñucanchi estudiantecunata fin de semanapa reunionman invitashpaca, discursota cuj huauqui shamunataca seguromi cai ushapanchi. Y predicangapapash minishtirishca publicacionguna tianatapash seguromi cai ushapanchi. Cai huauquicuna ñucanchita cuidangapaj pendiente cashcamandaca Jehová Diostami ninandami agradicipanchi. Pero ñucanchicunaca ¿imashinata shujcuna ñucanchipi confiai ushashcataca ricuchi ushapanchi?

8. Shujcunapi preocuparishpapash ¿imatata na rurana capanchi? (Proverbios 11:13).

⁸ Ñucanchi huauquipanicunata juyaimandami paicunamanda preocuparinchi. Paicunamanda preocuparishpapash paicunapa vidapi satiringapaca na munapanchichu. Apostolcunapa punllacunapica huaquingunaca chismosocuna, shujcunapa vidapipash satirishpa y na parlana cosascunatapash parlashpami causan carca (1 Tim. 5:13). Ñucanchicuna paicunashna cangapaca na munapanchichu. Por ejemplo shuj paniguca paipa saludhuan nali cashcata o imapash pasajushcatami villanman. Pero chai parlashcataca pimanbash ama villachunmi mañan. Y ñucanchicunaca panigu villashcata shujcunaman na villashpami paita respetashcata ricuchipanchi (Proverbios 11:13​ta liipangui). * Shinaca ¿ima situaciongunapita na imatapash villashpa de confianza caita ushapanchi?

9. Familia ucupica ¿imashinata tucuicunallata cana can?

⁹ Familiapi. Familiapica tucuicunallatami ima pasajushcataca shuj gentecunamanga na villana can. Por ejemplo, shuj huauquica paipa huarmigu imagutapash rurashpa chistosa ricurijtami pensaita ushan. Pero chai huauquica paipa huarmiguta juyaimanda y na pingaichingapaj munaimandami paipa huarmigu imashna  cashcataca na shujcunaman villanga (Efes. 5:33). Shinallata jovengunaca paicunata respetohuan tratachun munajtami taitacunaca yarina can. Chaimandami taitacunaca huahuacunata ama pingaichingapaca paicunapa pandarishcacunataca na shujcunaman villanman (Col. 3:21). Taitamamacunami huahuacunamanga familiapi imapash pasajpica na shujcunaman yangata villanalla cashcata yachachina can (Deut. 5:16). Familia ucupi ima pasashcata na shujcunaman villajpica tucuicunallatami ashtahuan ali llevaringa.

10. Shuj ali amigoca ¿imashinata can? (Proverbios 17:17)

¹⁰ Amigocunahuan. Casi tucuicunallatami ñucanchicuna imashna sintirishcata villangapaca shuj ali amigota minishtipanchi. Pero huaquinbica ñucanchicuna imashna sintirishcata shujcunaman villana costumbreta na charimandami imashna sintirishcata parlanaca difícil caita ushan. Ñucanchi imashna sintirishcata shuj amigoman parlashca jipa chai amigo shuj personaman villashcata yachaj chayashpaca ninandami llaquiyanchi. Pero shuj ali amigoca pimanbash na villangachu. Chaimi ninandami agradicinchi. Y Bibliapi nishcashnaca chai amigoca ali amigo o “ali cumbagu” cashcatami ricuchin (Proverbios 17:17​ta liipangui).

11. a) ¿Imamandata ancianocunapi y paipa huarmigucunapi confiaita ushapanchi? b) Parrafopi parlashca ejemplomandaca ¿imatata yachajupanchi? (Fotota ricupangui).

¹¹ Congregacionbi. Huauqui ancianocunaca paicunaman imagutapash villajpi shujcunaman na yangata villashpami “huairajuj tiempopipash pacajuna pushtushna” cashcata ricuchin (Is. 32:2, TNM). Ñucanchi villashcata shujcunaman na villanata yachaimandami anciano huauquicunahuanga tranquilo parlai ushapanchi. Y ñucanchicunapash paicuna yachashca cosascunata ñucanchiman villachunbash na atichinchichu. Anciano huauquicunapa huarmigucunatapash ninandami agradicipanchi. Porque paicunaca na yachanalla informacionda paicunapa cusa villachunga na atichinllu. Huauqui ancianocuna shujcunapa informacionda paicunapa huarmigucunaman na villajta yachanaca shuj jatun bendicionmi can. Shuj anciano huauquipa  huarmiguca cashnami nirca: “Ñuca cusaguca visita de pastoreota rurashpaca imata parlashcata o imata rurashcataca na villahuanllu. Shinallata espiritualmente ayudata minishtinajuj turiñañacunamandapash na parlahuanllu. Ni paicunapa shutitallapash na nihuanllu. Chaimandami ninanda agradicipani. Ñuca cusagu ñuca na yachana informacionda na villashcamandami shuj turiñañacunataca normal trataita ushani. Shinallata ñuca cusaguman imapash problemamanda o ñuca imashna sintirishcata villajpi pai shujcunaman na villanatapash segurami capani”. Tucuicunallatami shujcuna ñucanchicunapi confiachun munapanchi. Shujcuna ñucanchipi confiachun imata rurai ushashcata ricupashunchi.

12. Juyaimandaca ¿imatata rurashun?

¹² Juyaimandami shujcunapica confiaita ushapanchi. Jesusca Jehová Diosta juyana y projimota juyanami ashtahuan importante mandamientocuna can nirca (Mat. 22:37-39). Jehová Diosta juyaimandami paipa ejemplota catingapaj munapanchi. Jehová Diospica tucui shungumi confiaita ushapanchi. Huauquipanicunata juyaimandami paicuna ñucanchiman imagutapash villajpica na shujcunaman villashun. Paicunata llaquichingapaj o pingaichingapaca na munapanchichu (Juan 15:12).

13. ¿Imamandata humilde cana capanchi?

¹³ Shujcuna ñucanchipi confiachunga humildemi cana capanchi. Humilde huauquipanicunaca shujcunapa ñaupapi ali quidangapaj munaimandallaca na imatapash primerito villashpa jariyanllu (Filip. 2:3). Shinallata na villana cosascunatami ñucaca yachani nishpapash na jariyanllu. Humilde cashpaca Bibliapi o publicaciongunapi na yachachishca yuyaicunata shujcunaman nishpaca na purishunllu.

14. Imatapash aligutapacha yarishpa ruranaca ¿imashinata ayudan?

¹⁴ Bibliapi nishcashna aligutapacha yarishpa purij huauqui o panica ima hora “upalla” quidanata o ima hora parlanataca alimi yachan (Ecl. 3:7). Huaquin pushtucunapica “gentecunaca parlanaca culquishnami can. Pero upalla quidanaca oroshnami can” ninmi. Cai shimicunaca huaquinbica upalla quidashparapash ashtahuan ali cashcatami ricuchin. Chaimandami Proverbios 11:12​pica: “Aligutapacha yarishpa purij runaca, jarcarishpa upalla quidanllami” ninmi. Shuj congregacionmanda huauqui ancianocunaca imapash difícil casocuna ricurijpica experienciata charij shuj huauqui ancianopa ayudatami mañan. Cai huauquigumanda parlashpaca shuj huauqui ancianoca ninmi: “Cai huauquiguca shuj congregacionbi imapash pasajushcata ama villangapami siempre cuidadota charin” nin. Cai huauquigu aligutapacha yarishpa ruraj cashcamandami chaishuj huauqui ancianocunaca imapash na villana cosascunata cai huauquigu na villanata seguro cashcamandami ashtahuan respetan.

15. ¿Imamandata honrado cana capanchi?

¹⁵ Shujcuna ñucanchipi confiachunga honradocunami cana capanchi. Honrado personacunaca siempremi cabalta parlan. Chaimandami paicunapica facillla confiaita ushapanchi (Efes. 4:25; Heb. 13:18). Shuj huauquigu discursota prepararijushpaca imapi mejorana cashcata nichunmi shuj huauquigupa ayudata mañan. Cai huauquiguca ¿pipa ayudatata mañanman? ¿Nachu juyaihuan y imapi mejorana cashcata na llullashpa nij huauquipa ayudata mañanman? Bibliapica: “Juyaimandalla na imatapash ningapaj randica, imata jarcana cashpapash rimashpa jarcanami ashtahuan ali. Juyaj runa rimashpa chugrichinshna saquishcacunami ashtahuan ali” can ninmi (Prov. 27:5, 6). Shuj ali amigo imapi mejorana cashcata na llullashpa consejashcata  chasquinaca ashata dificilmi caita ushan. Pero chai consejocunaca ñucanchitallatami ninanda ayudan.

16. Controlarinamandaca ¿imatata Proverbios 10:19​pica yachachin?

¹⁶ Shujcuna ñucanchipi confiachunga, controlarinatami yachajuna capanchi. Controlarinata yachashpaca na villana cosascunataca na shujcunaman villashunllu (Proverbios 10:19​ta liipangui). Internetta, redes socialesta utilizajushpami controlarinaca difícil caita ushan. Porque si na cuidadota charishpaca shujcuna na yachana informaciondarami internetpi o redes socialescunapica churanchiman. Y chai informacionda shujcuna imashina utilizanataca na yachapanchichu. Y ima problemacuna tianatapash na yachapanchichu. Chaimandami cuidadota charina capanchi. Shinallata Jehovata sirvichun prohibishca llactacunapimi ñucanchi huauquipanicunapa informacionda villachun policiacunaca atichita ushan. Chai cosascunapimi controlarinata yachanaca ñucanchi huauquipanicunapa informacionda ama villachun ayudanga. Cashna pasajpi o imapash shuj situacionguna ricurijpica “ñuca shimitaca frenohuanshnami jarcasha” nishca consejota catinami ayudanga (Sal. 39:1). Ñucanchicunapi familiacuna, amigocuna y huauquipanicunapash confiachunga controlarinata yachanami importantepacha can.

17. Huauquipanicuna randimanda confiachunga ¿imashinata cana capanchi?

¹⁷ Jehová Dios ñucanchita paipa organizacionman pushamushcamandaca ninandami agradicipanchi. Jehovapa organizacionbi huauquipanicunaca shuj familiashnami randimanda juyarin. Chaimi paicunapica confiaita ushapanchi. Ñucanchi huauquipanicuna ñucanchipi confiachunga siempremi esforzarina capanchi. Si tucuicunallata juyaita ricuchinchi humildecuna canchi, aligutapacha yarishpa imatapash ruranchi, honrado y controlarinata yachanchica huauquipanicuna randimanda confianata yachajuchunmi ayudapashun. Jehovapa ejemplota catishpa ñucanchipash de confianza cashcata ricuchipashunchi.