Bibliapi ima nijta ricupashunchi.

Hechos 24:15​pica “alita rurajcunata nalita rurajcunatapash” Taita Dios causachinga ninmi. Nara huañushpallata Diosta sirvishca gentecunami alita rurajcuna can. Paicunapa shuticunami causaita chasquinata ricuchij libropi escribishca can (Mal. 3:16). Cutin nara huañushpallata Jehovata rijsina oportunidadta na charishca gentecunami nalita rurajcuna can. Paicunapa shuticunaca causaita chasquinata ricuchij libropica na escribishca canllu.

Juan 5:28, 29​pi parlashca ishcai grupo gentecunaca Hechos 24:15​pi parlashca gentecunamandallatami parlajun. Jesusca “alita rurashcacunaca para siempre causangapami causaringa. Cutin, nalita rurashcacunaca juzgai tucungapami causaringa” ninmi. Alita rurajcunaca nara huañushpallatami ali cosascunata rurarca. Y paicunapa shuticuna causaita chasquinata ricuchij libropi escribishca caimandami paicunaca para siempre causangapaj causachi tucunga. Cutin nalita rurajcunaca nara huañushpallatami nali cosascunata rurarca. Paicunapa shuticunaca causaita chasquinata ricuchij libropica na escribishca canllu. Chaimi paicunaca juzgai tucungapaj causaringa. Chai tiempopimi Jesusca paicunapa comportamientota ali ali ricunga. Paicunamanga Jehovata rijsina oportunidadtami cunga. Paicuna Jehovata cazujpica paicunapa shuticunataca causaita chasquinata ricuchij libropimi escribinga.

Apocalipsis 20:12, 13​pica paraisopi causarishcacunaca tucuicunallatami ‘rollocunapi escribishcataca’ cazuna tucunga ninmi. Cai escribishcacunaca paraíso alpapi cushca mushuj leycunami canga. Cai leycunata na cazungapaj munajcunaca para siempremi tucuchi tucunga (Is. 65:20).

Daniel 12:2​pica huañushcacunamanda huaquingunaca “causaita causagringapaj, shujcunaca causaita causaicaman pingai tucushpa ninanda musparingapajllami” causaringa ninmi. Cai textopica huañushcacuna causarishca jipa ima pasanamandami parlajun. Shinaca mil huatacuna jipaca alita rurajcunaca para siempre causaitami chasquinga. Cutin nalita rurajcunaca para siempremi tucuchi tucunga (Apoc. 20:15; 21:3, 4).

Caipi pensaripashunchi. Paraíso alpapi causarishca gentecunataca shuj llactapi causangapaj munaj gentecunahuanmi comparaita ushapanchi. Alita rurajcunaca, shuj llactapi causangapaj o trabajangapaj shuj visata chasquishca cuendami can. Cutin nalita rurajcunaca asha tiempotalla chai llactapi cangapaj shuj visata chasquij cuendami can. Paicunaca chai llactapi causashpa catingapaj munashpaca huaquin requisitocunatami cumplina can. Shinallatami paraíso alpapi causangapaj munashpaca Jehová Diospa leycunata cazushpa pai munashcashna causana can. Shinaca chai llactapi causangapaj o asha tiempotalla cangapaj visata chasquishca cashpapash tiempohuanga según paicunapa ruraicunami huaquingunaca chai llactapi causashpa catita ushanga. Pero shujcunaca ñana chai llactapi causashpa cati ushangachu. Shinaca paraisopi causarishcacunaca chaipi causangapaj munashpaca Jehovapa mandashcacunatami tucuipi cazushpa causana can.

Jehová Diosca shuj llaquij Dios cashpapash justo y alita ruraj Diosmi can (Deut. 32:4; Sal. 33:5). Alita rurajcunata y nalita rurajcunata causachishpami juyaj Dios cashcata ricuchin. Pero paicuna paipa mandashcacunata cazushpa, respetashpa causachunmi munan. Shinaca Jehovata tucui shunguhuan juyajcuna y paipa mandashcacunata cazushpa causajcunallami paraisopica causashpa catita ushanga.