Jehová Diosca paita sirvijcunataca chai huatacunapica ninandami ayudarca. Chaimi 225 precursorcunamandaca ñapash 350 precursorcuna tucurca. Shinallata 8 mil yali publicadorcunaca primera vezmi paicuna villachishca informetaca Betelpa oficinacunaman cacharca. Shinami Jehová Dios paicunata ayudajushcata ricurca.

21 de marzo de 1920 huatapica Joseph Rutherford huauquimi Jehovapa organizaciondaca ñaupaman pushajurca. Paimi “millones que ahora viven no morirán jamás” nishca discursota cugrijurca. Chaimi Bibliamanda Yachajujcunaca ashtaca gentecunata invitangapaj ninanda esforzarirca. Paicunaca 320 mil invitaciongunatami saquirca. Shinallata Nueva York llactamanda shuj jatun coliseotapashmi alquilarca.

Chai coliseomanga 5 mil yali gentecunami chai discursota uyangapaj shamurca. Cutin 7 mil gentecunaca canllapimi quidarca. Chai tiempopi Inglés shimipi llujshishca chai revistapica nircami: “Bibliamanda Yachajujcunapaca cai tandanajuimi ashtahuan alipacha carca” nishpa.

Bibliamanda Yachajujcunaca rijsishca rijsishcami tucurca. Paicunaca “millones que ahora viven no morirán jamás” nishcata villachishcamandami rijsishca tucurca. Chai tiempopica mashna gentecunaman Diospa Reinomanda villachina cashcata na ali intindishpapash, paicunaca cushijushpami villachinajurca. Ida Olmstead paniguca 1902 huatapimi tandanajuiman ri callarirca. Paica ninmi: “Jehová Dios bendicianataca alimi yachaparcanchi. Chaimi Jehovapa Reinomanda villachingapaj ninanda esforzariparcanchi” nin.

Jehovapa Reinomanda villachishpa catichunga Betelmanda huauquipanicunaca huaquin publicaciongunatami imprimi callarirca. Imprimingapaca minishtirishca cosascunatami randirca. Chaicunataca shuj alquilashca huasipimi imprimingapaca churarca. Chai huasica Nueva York llactapa Betel ladollapimi carca.

Enero de 1920 huatapimi Leo Pelle y Walter Kessler huauquicunaca Betelpi sirvi callarirca. Walter huauquica ninmi: “Betelpi cajpica shuj huauquica ‘micungapaca shuj horas yali faltanra’ nircami. Chaimi librohuan junda cartongunata bodegamanda llujchishpa jahuaman churapaichi nishpa mandarca”.

Cutin Leo huauquica cayandi punllapi imata rurashcatami parlarca. Paica ninmi: “Alquilashca huasipa primer pisopa paredcunatami limpiarcanchi. Chai paredcunaca mapa mapami cashcarca. Shinapash Jehová Diospa cashcamandaca cushijushpami limpiarcanchi”.

Huaquin semanacunapillami La Atalaya revistataca huaquin voluntariocunapa ayudahuan imprimi callarirca. 1 de febrero de 1920 huatapa revistataca segundo pisopimi 60 milta imprimishpa llujchirca.  Bodegapica shuj jatun imprimina maquinatami churarca. Chai maquinataca Acorazado nishpami rijsin carca. Shinallata 14 de abril de 1920 huatapica ¡Despertad! revistatapashmi imprimi callarirca. Cunanbica Rijcharipaichi nishpami chai revistataca rijsipanchi. Jehovata sirvingapaj esforzarishcamandami paicunataca Jehová Diosca ninanda bendiciarca.

Jehovata sirvijcunaca cutin villachi callarishpami huauquipanicunahuanga cushilla sintirirca. Huaquin huauquipanicunaca 1917 y 1919 huatapica Jehová Diosta sirvinataca saquishcami carca. Paicunata ayudangapaca ¿imatata rurarca?

Chaipaca La Atalaya del 1 de abril de 1920 huatamanda revistapica, “Moremos en paz” nishca yuyaitami llujchirca. Chaipica “Jehová Diosta tucui shunguhuan sirvingapaj munajcunaca punda causaita saquishpa, huauquipanicunahuan shujllashna tandanajushpa Jehovata sirvingapaj” munana cashcatami nijurca.

Cai shimicunata uyashpaca ashtaca huauquipanicunami cushilla sintirirca. Shuj cusahuarmica cashnami nirca: “Shujcuna villachishpa catijpipash ñucanchica shuj huata yalitami na villachircanchi. [...] Shinapash ña villachi callarishpaca, villachinataca nunca na saquingapaj munapanchichu” nircami. Cutin villachi callarishpaca ashtacacunaman villachina cashcatami cuenta japirca.

1918 huatapica El misterio terminado nishca librohuan ama villachichun nishpami gobiernocunaca prohibirca. Chaimi ashtaca librocunata bodegashpa huauquicunaca saquirca. Shinapash 21 de junio de 1920 huatapica, Bibliamanda Yachajujcunaca El misterio terminado * nishca librohuanmi cutin villachi callarirca. Chai librotaca “ZG” nishpami rijsin carca.

Jehovata sirvijcunataca chai librohuan villachichunmi tucuicunatalla animarca. Shuj publicacionbica, “tucui bautizarishca huauquipanicunallatami  villachingapaj munashpaca tucui shunguhuan villachinalla canguichi nijurca. Tucuicunallatami “ZG” librohuan villachina yuyaitaca charita ushapanchi nijurca. Edmund Hooper huauquica, huasin huasin villachinaca ashtaca huauquipanicunapaca primera vezmi carca nircami. Shinallata, “villachinaca ninan minishtirishca cashcatami cuenta japiparcanchi” nircami.

Primera Guerra Mundialpica shuj llactamanda huauquipanicunataca na visitai usharishcachu carca. Chaimi chai huauquipanicunata animangapaj, cutin villachi callaringapapash huauqui Rutherford, chuscu huauquicunapash chai huauquipanicunata visitai callarirca. 12 de agosto de 1920 huatapimi Gran Bretaña, Europa continental, Oriente Medio llactacunapi huauquipanicunataca visitai callarirca.

Gran Bretaña llactapica Bibliamanda Yachajujcunaca 3 jatun tandanajuicunata, shinallata 12 tandanajuicunatapashmi charirca. Chai tucui tandanajuicunaman rishcacunata cuendajpica 50 mil gentecunami rishca carca. La Atalaya revistapica chashna tandanajuicunata charishcamandaca huauquipanicunaca “ninanda animarishcata, cushijushca sintirishcatami villarca. Shinallata ashtahuan juyaita charishcata, ashtahuan villachina munaita charishcatapashmi cai revistapica” nijurca. París llactapica huauqui Rutherfordca cutinllatami “millones que ahora viven no morirán jamás” nishca discursota curca. Chai discursotaca ashtaca ashtaca gentecunami uyangapaj rishca carca. Chai tandanajui tucurishca jipaca 300 gentecunami Bibliamanda ashtahuan yachachichun huauquipanicunataca mañarca.

Huaquin semanacuna jipami huaquin huauquicunaca Atenas, El Cairo, Jerusalén llactacunaman visitangapaj rirca. Chai llactacunapi Bibliamanda ashtahuan yachajungapaj munaj gentecunata ayudangapami huauqui Rutherfordca shuj almacenda publicaciongunahuan pascarca. Chai almacenga Jerusalén ladolla Ramala llactapimi carca. Chai jipaca huauqui Rutherfordca Europa llactamanmi tigrarca. Chaipimi Oficina de Europa Centralta callarichirca. Chaipipashmi publicaciongunata imprimin carca.

Septiembre de 1920​pimi ¡Despertad! número 27 revistataca llujchirca. Cai revistapica Bibliamanda yachajujcunata 1918​pi yangamanda catiriashpa llaquichishcatami villajurca. Chai revistataca El Acorazado nishca maquinapica tuta y punlla imprimimandami 4 millón yali copiacunata imprimi usharirca.

¡Despertad! revistata shujcuna liishpaca Emma Martin shuti precursora paniguhuan ima pasashcatami  yachaj chayarca. Paica California, Estados Unidos llactamandami carca. 17 de marzo de 1918 huatapica Emma panigu, Edward Hamm huauqui, Edward Sonnenburg huauqui, Ernest Stevens shuti huauquipashmi Bibliamanda yachajujcunapa shuj tandanajuiman rishca carca.

Chai tandanajuimanga gobiernopa parte shuj jaripashmi rishca carca. Paica Bibliamanda yachajuna munaihuanga na rishca carcachu. Jipacunamanga cai jarica nishcarcami: “Ñucaca chai tandanajuimanga gobiernopa trabajajcuna mandajpillami chaimanga rircani. Chaipica Bibliamanda yachajujcunata juchachishpa catingapaj pruebacunata mascangapallami rircani” nishcarcami. Chai jarica chai tandanajuipica El misterio terminado nishca librotami japi usharca. Huaquin punllacuna jipallami Emma Martin paniguta, chaishuj quimsa huauquicunatapash prezo aparca. Gobiernopa Leyta na cazushpami gobierno prohibishca librocunata gentecunaman saquishpa purinajun nishpami paicunataca juchachirca.

Emma paniguta, chaishuj quimsa huauquicunatapashmi quimsa huatacunapa sentenciashca carca. Shinapash paicuna inocentecuna cashcata ricuchingapami paicunapash huaquin juiciocunata catirca. Shinapash 17 de mayo de 1920​pica napacha chai juiciocunata mishaimandami paicunapa sentenciata ña pactachi callarinajurca. Pero shinapipachami shuj cambio tiarca. ¿Imata pasarca?

Huauqui Rutherfordca 20 de junio de 1920 huatapi shuj jatun tandanajuipimi chai paniguhuan, chaishuj quimsa huauquicunahuanbash ima pasashcata villarca. Chai jatun tandanajuica California llactapimi carca. Chai jatun tandanajuipi cajcunaca chai huauquipanicunahuan ima pasashcata yachaj chayashpami Estados Unidos llactamanda presidenteman shuj cartata cacharca. Chai cartapica: “Emma Martin huarmitaca yangamandami juchachishcanguichi. Paica na gobiernopa contrachu can. Gobiernopa trabajajcunapash yangamanda juchachishpami paitaca prezo cachashca. Chaita rurashpaca nalitapachami rurashca” nijurcami.

Cayandipallatami Estados Unidosmanda presidente Woodrow Wilson shuti jarica Emma Martin paniguta, Edward Hamm huauquita, Edward Sonnenburg huauquita, Ernest Stevens shuti huauquitapash libre churarca.

1920 huata tucurijujpica Bibliamanda yachajujcunaca ninanda cushijushcami carca. Ashtahuan jatun Betelmanda oficinacunapica huauquipanicunaca ashtahuan trabajashpami catinajurca. Shinallata Diospa Reinollami tucui llaquicunataca tucuchinga nishpami tauca huauquipanicunaca villachishpa catinajurca (Mat. 24:14). Diospa Reinomanda villachishpa catingapaca huata 1921​ca alipachami cagrijurca.