1. ¿Imamandata 2 Corintios 3:1-3​pi nishca shinaca bautizarichun ayudana capanchi? (Callari paginapi fotota ricupangui).

ÑUCANCHI congregacionmanda pipash bautizarijpica ninandami cushijupanchi (Mat. 28:19). Cutin quiquinhuan yachajuj bautizarijpicarin ashtahuanmi cushijupashcangui (1 Tes. 2:19, 20). Mushuj bautizarishca huauquipanicunaca ‘ñucanchita alicachishpa escribishca cartacunashnami’ can. Chaimi paicuna bautizarijpica congregacionmanda huauquipanicunaca ninanda cushijupanchi (2 Corintios 3:1-3, liingui).

2. a) ¿Imatata tapurina capanchi? b) Bibliamanda yachachina nishpaca ¿imatata ningapaj munan? (Notata ricupangui).

² Cai ultimo 4 huatacunapica cada quillami casi 10 millón gentecuna mundo enteropi Bibliamanda yachajunajushca. * Shinallata chai huatacunapillatami cada huata casi 280 mil yali bautizarishca. Caita yachanaca alipachami cashca. Shinapash ashtaca millón gentecuna bautizarinaca tianrami. Paicunataca ¿imashinata ayudai ushapanchi? Jehová Diosca gentecuna Bibliamanda yachajushpa Jesuspa catijcuna tucuchunmi tiempota cujun. Chai tiempoca ñami tucurijun. Chaimi Bibliamanda yachajujcunataca uchalla bautizarichun ayudangapaj esforzarina capanchi (1 Cor. 7:29a; 1 Ped. 4:7).

3. ¿Imatata yachajupashun?

 ³ Cuerpo Gobernantemanda huauquicunaca Bibliamanda yachajujcunata uchalla bautizarichun imashina ayudanata yachangapami huaquin Betelcunapi sirvij huauquicunahuan parlarirca. Cai yachajuipi, cati yachajuipipash superintendente de circuito huauquicunamanda, misionerocunamanda, experienciata charij precursorcunamandami yachajugripanchi (Prov. 11:14; 15:22). * Paicunapa experienciacunaca Bibliamanda ali yachachijcuna tucuchun, Bibliamanda yachajujcuna ñaupaman catichunbashmi ayudaita ushan. Cunanga Bibliamanda yachajujcuna bautizaringapaj 5 cosascunata pactachina cashcatami yachajupashun. Bibliamanda yachachijcuna imashina ayudana cashcatapashmi yachajupashun.

4. Huasi pungupi Bibliamanda yachachinaca ¿imamandata ashata nali can?

⁴ Ashtaca huauquipanicunaca gentecunapa huasi pungupillatami Bibliamandaca yachachin. Shina yachachina ali cajpipash asha tiempogutallami gentecunahuanga Bibliamanda parlaita usharin. Huaquin huauquipanicunaca Bibliamanda parlashpa catingapami celular numerota mañashpa cayan o escribin. * Shina yachachinaca talvez huaquin quillacunatami yalita ushan. Shinapash unaita yachajushpapash Bibliamanda yachajujca na cambiocunata rurangachu. Ashalla tiempota yachajuimandaca Jehová Dios candallami sirvisha nishpa mañashpa bautizaringapapash na munangachu.

5. Lucas 14:27-33​pi nishca shinaca Bibliamanda yachajujcunaca ¿imatata rurana can?

⁵ Jesusca ishcai chimbapuraimanda parlashpami paipa catijcuna tucungapaj imata rurana cashcata yachachirca. Jesusca huasichingapaj munaj runamanda, shinallata macanajungapaj rigrijuj shuj reymandapashmi parlarca. Jesusca ‘maijanbash huasiguta rurangapaj munashpaca culquigu pactanata, na pactanatami’ ricuna can nircami. Shinallata reypash macanajushpa ganangapaca mashna soldadocuna tiajtami ricuna can nirca (Lucas 14:27-33, liingui). Shina cuendami Jesusca paita ali catijcuna tucungapapash imata rurana cashcataca ali yachana can nirca. Bibliamanda yachajujcunataca Jesús nishcata pactachichunga cada semanami  Bibliamanda yachajuchun animana capanchi. ¿Imashinata chaitaca pactachita ushapanchi?

6. Bibliamanda yachajuj ashtahuan Bibliamanda yachajuna munaita charichunga ¿imatata rurana capanchi?

⁶ Huasi pungupi Bibliamanda ashtahuan parlangapaj esforzaripashunchi. Chaipaca cada semana visitashpa Bibliamanda shuj o ishcai textota liishpashunchi. Shinami paicunaca Bibliamanda ashtahuan yachajungapaj munanga. Chaimi yachachingapaj rishpaca nachu maigupipash tiarishpa ashtahuan yachajui ushapanchiman nishpa tapunalla capanchi. Ari nishpaca, Bibliamanda yachajuna munaita charishcatami ricuchinga. Semanacuna yalijpica semanapi nachu ishcai viaje Bibliamanda yachajungapaj munapangui nishpa tapuita ushapanchi. Shinallata Bibliamanda yachajuna imamanda minishtirishca cashcatami yachachina capanchi. Shinaca paicuna Bibliamanda ashtahuan yachajuna munaita charichun imata rurana cashcata yachajupashun.

7. Bibliamanda yachachigrijushpaca ¿imatata primero rurana capanchi?

⁷ Bibliamanda yachachingapaca ali prepararinami minishtirin. Shinaca huasipillatami maijan textota liinata, titulocunata, subtitulocunata, tapuicunata, “liipangui” nishca textocunata liina capanchi. Fotocunata o dibujocunatapashmi ricuna capanchi. Shinallata chai temamandallata parlaj shuj videota ricuchingapaj ricuna capanchi. Bibliamanda yachajujman imashina fácil yachachinatapashmi ricuna capanchi. Shinami paicunapa causaipi pactachi ushachunbash ayudashun (Neh. 8:8; Prov. 15:28a).

8. Colosenses 1:9, 10​pi nishca shinaca Bibliata yachajujmandaca ¿imatata rurai ushapanchi?

⁸ Bibliata yachajujmanda, paipa minishtirishca cosascunamandapashmi Jehovataca mañaita ushapanchi. Shinallata paicunapa shunguman chayangapaj ayudahuai nishpapashmi mañanalla capanchi (Colosenses 1:9, 10, liingui). Paicunaca caitaca facilllachu intindinga o Bibliapa yachachishcacunapi crinaca shinllicha canga nishpami pensarina capanchi. Bibliamanda yachajujcunataca bautizaringapaj munaita charichunmi ayudana capanchi.

9. Bibliamanda yachajuj ashtahuan ali yachajuchunga ¿imatata rurana capanchi?

⁹ Bibliamanda yachajujca cada semana Bibliamanda yachajushpami Jehovapash, Jesuspash imata rurashcata yachajunga.  Shinami Bibliamanda ashtahuan yachajuna munaita charinga (Mat. 5:3, 6). Bibliamanda yachajuj aliguta yachajui ushachunga paillata prepararichunmi yachachina capanchi. Chaipaca imashina prepararina cashcata, paicunapa causaipi imashina pactachinatapashmi ricuchi ushapanchi. * Respuestata tarichun, señalachunbash yachachipashunchi. Shinallata paicuna imata intindishcata parlachun ayudana capanchi. Shinallami intindijujta o na intindijujta yachaita ushashun. Cunanga Bibliamanda yachajuj imata ashtahuan rurana cashcata ricupashunchi.

10. a) Bibliamanda yachajujca ¿imatata rurana can? b) Bibliapi liishcata Bibliamanda yachajuj intindichunga ¿imata ayudanga?

¹⁰ Cada semana Bibliamanda yachajushpapash ¿imatata paipa munai ashtahuan rurana can? Jehovata mañana, Jehová Dios ima nishcatapashmi yachajuna can. Chaipaca Bibliatami cada punlla liina can (Jos. 1:8; Sal. 1:1-3). Internetpi jw.org^® paginapi “Bibliata liingapaj programa” nishcata utilizachunmi yachachina capanchi. Shinallata chai programata imprimi ushashcatapashmi yachachina capanchi. * Bibliata liishpa intindi ushachunga liishcapi pensarichunmi animana capanchi. Shinami Jehová Dios imacunatalla rurashcata, paipa causaipi imashna pactachi ushanatapash yachajunga (Hech. 17:11; Sant. 1:25).

11. Bibliamanda yachajujca ¿imashinata Jehovata mañanataca yachajunga?

¹¹ Bibliamanda yachajujtaca cada punlla Jehovata mañachunmi animana capanchi. Ñucanchicunaca Bibliamanda yachachi callarijushpa, tucuchijushpapash tucui shunguhuanmi paimandapash Jehovata mañana capanchi. Shina mañajta uyashpaca Jehovata tucui shunguhuan mañanata, Jesuspa shutipi mañanatapashmi yachajunga (Mat. 6:9; Juan 15:16). Bibliata cada punlla liishpa, Jehovata mañashpaca paicunallatami ashtahuan Jehová Diosman quimirita ushanga (Sant. 4:8). Shinami Jehová Dios ñuca causaipica candallami sirvisha nishpa bautizaringapapash munanga.

12. Bibliamanda yachajujtaca ¿imashinata Jehovapa amigo cachun ayudaita ushapanchi?

¹² Bibliamanda yachachijushpaca paicunapa shunguman chayangapami yachachina capanchi. ¿Imamandata shina yachachina capanchi?  Shunguman chayajta yachachijpimi paicunapa causaipi, yuyaipi, ruraicunapipash cambiangapaj munanga. Jesusca Diospa Shimimanda yachachishpaca gentegucunapa shunguman chayajtami yachachin carca. Chaimi gentegucunaca ashtahuan yachachichun nishpa Jesustaca catishpa rin carca (Luc. 24:15, 27, 32). Bibliamanda yachajujtaca Jehová Dios causaj Dios cashcata, paihuan ali amigo tucuita ushashcatami yachachina capanchi (Sal. 25:4, 5). Shinallata Bibliamanda yachachijushpaca Jehová Dios imashina cashcatami yachachina capanchi (Éx. 34:5, 6; 1 Ped. 5:6, 7). Maijan temamanda yachachijushpapash Jehová Dios juyaj, llaquij, tucuita caraj Dios cashcataca siempremi yachachina capanchi. Jesús cai alpapi cashpaca Jehová Diostaca “tucui shunguhuan” juyana canguichi nishpami mandarca. Jesusca cai mandashcami tucuimanda “ashtahuan yali ali” can nircami (Mat. 22:37, 38). Bibliamanda yachajujtaca tucui shunguhuan Jehovata juyachun yachachipashunchi.

13. Jehová Dios imashina cashcataca ¿imashinata Bibliamanda yachajujmanga yachachita ushapanchi?

¹³ Bibliamanda yachajujcunahuan parlajushpaca Jehovata tucui shunguhuan juyashcata parlapashunchi. Shina parlajpimi Bibliamanda yachajujca ñucanchicunapash Jehovata tucui shunguhuan juyashcata cuenta japishpa, paipash Jehovata tucui shunguhuan juyana cashcata cuenta japinga (Sal. 73:28). Caipi pensaripashunchi. Jehová Dios juyaj, ali yachaj, alita ruraj, poderta charij Dios cashcata shuj publicacionbi o shuj textopi Bibliamanda yachajujhuan liinajushcanchiman. Chaicunata yachajushcamandami Jehovata tucui shunguhuan juyapanchi ni ushapanchi. Cunanga Bibliamanda yachajuj bautizari ushangapaj imata ashtahuan rurana cashcata yachajupashun.

14. Hebreos 10:24, 25​pi nishca shinaca bautizarina munaita charichunga ¿imata ashtahuan ayudanga?

¹⁴ Bibliamanda yachajujcuna bautizarichunmi munapanchi. Chaimi Tandanajuiman shamuchun animana capanchi. Bibliamanda yachachinapi experienciata charij huauquipanicunaca, Tandanajuicunaman rishpami Bibliamanda yachajujcunaca bautizarina munaita charinga ninmi (Sal. 111:1). Shinallata Bibliamanda yachajujmanga cada semana Bibliamanda yachajushpapash, Tandanajuicunapimi ashtahuan yachajui ushangui ni ushapanchi. Shinallata Hebreos 10:24, 25​ta liishpami Tandanajuicunaman shamuna imashina ayudai ushashcata ricuchi ushapanchi  (cai textota liingui). Ñucanchi tandanajuicunaca ¿imashinata can? * nishca videotapashmi ricuchita ushapanchi. Tandanajuicunaman shamuchunmi animana capanchi.

15. Bibliamanda yachajujcuna Tandanajuicunaman shamuchunga ¿imatata ruraita ushapanchi?

¹⁵ Bibliamanda yachajujcuna Tandanajuiman ni shuj viajeta na rishca cajpica ¿imatata rurai ushapanchi? Tandanajuicunapi imatalla yachajushcata cushijushpa parlana capanchi. Huaquinbica Tandanajuiman invitajpica talvez na ringapaj munangachu. Pero ñucanchi imatalla yachajushcata parlajta uyashpaca Tandanajuiman talvez ringapaj munanga. Shinallata tandanajuipi yachajungapaj Villachijun revistata, Tandanajuipi Yachajungapaj Hojatapash paicunaman cunami capanchi. Chai semana imata yachajugrijushcata ricuchipashunchi. Imata ashtahuan yachajungapaj munapanguiman nishpapashmi tapuita ushapanchi. Tandanajuiman primera vez rishpaca shuj iglesiacunapishna na igual cashcatami cuenta japinga (1 Cor. 14:24, 25). Tandanajuicunaman shamushpaca shuj shuj huauquipanicunatami rijsita ushanga. Paicunapashmi bautizarina munaita charichun ayudaita ushanga.

16. a) Bibliamanda yachajujcuna bautizarichunga ¿imatata rurana capanchi? b) Caya semanaca ¿imatata yachajupashun?

¹⁶ ¿Imashinata Bibliamanda yachajujtaca bautizarina munaita charichun ayudaita ushapanchi? Bibliamanda cada semana yachajuchun, yachajungapaj prepararichunbash ayudapashunchi. Shinallata Jehová Diosta cada punlla mañachun, paihuan amigo cachun, tandanajuicunaman richunbashmi animana capanchi. (⁠“⁠ Bibliamanda yachajujca ¿imatata rurana can?” nishca recuadrota ricupangui). Caya semanapaca Bibliamanda yachajujcuna bautizarichun Bibliamanda yachachijcuna imata rurana cashcatami 5 yuyaicunapi yachajupashun.