1. Ña bautizarishca cashpapash ¿imatata rurashpa catina capanchi?

BAUTIZARISHCA cashpaca tucuicunapa ñaupajpimi Jehovata juyashcata ricuchipashcangui. Shinallata Jehovapa organizaciondapash apoyashpa catinatapashmi ricuchipashcangui. * Ña bautizarishca cashpapash Jehovapi tucui shunguhuan crishpa, paipa organizacionda apoyashpa catingapami esforzarina capangui. Shinami Jehovapa munaitapash pactachishpa catita ushapangui.

2, 3. Jehová Diosca ¿imashinata can?

² Jehová Dios paipa organizacionda imashna ñaupaman pushajujta ricushpami pai imashina cashcata, paipa munai maijan cashcata, paipa mandashcacuna imashina cashcata ricui ushapanchi. Paipa organizacionda ñaupaman imashina pushajujta ricushpami pai imashna cashcata quimsa yuyaicunapi ricupashun.

³ Primero, “Taita Diosca, na pitapash ñavita ricushpalla chasquinllu” (Hech. 10:34). Gentecunata juyaimandami Jehová Diosca paipa juyashca churi Jesusta gentecunata quishpichingapaj cachamurca (Juan 3:16; 1 Tim. 2:6). Jesús huañushcamanda ashtaca gentecuna quishpirichunmi Jehová Diosca paipa organizacionda utilizashpa ali villaigucunata villachichun ayudajun. Segundo, ‘Taita Diosca ordenado, casilla Diosmi’ can (1 Cor. 14:33, NM, 40). Chaimi paita sirvijcunaca ordenado, casilla tranquilo sirvinajun. Tercero, Jehová Diosmi ‘cangunata yachachij’ can (Is. 30:20, 21). Jehovapa organizacionga villachinapi, congregacionbipash Bibliamanda yachachichunmi animan. Punda Jesusta catijcunapa congregacionbica ¿imashinata Jehová  Dios imashna cashcata ricuchirca? Jehová Dioshna cashcataca ¿imashinata Jehovata sirvijcunaca cunanbipash ricuchin? Cunan punllapipash Jehovapa organizacionbica ¿imashinata paipa espíritu santo ayudajushcataca ricuchin?

4. a) Jesusca paipa ali catijcunataca Hechos 1:8​pi nishca shinaca ¿imata rurachunda mandarca? b) ¿Chai mandashcata pactachichunga pita ayudagrijurca?

⁴ Punda Jesusta catijcunapa tiempopi. Jesuspa ali villaigucunaca tucuilla gentecuna cushilla causana munaita charichunmi ayudarca (Luc. 4:43). Jesusca paipa ali catijcunataca ñuca imata rurai callarishcata rurashpa catina canguichi nishpami mandarca. Shinallata “cai pacha tucuri manñacaman ñucamanda villagringuichi” nirca (Hechos 1:8, liingui). Chai mandashcata pactachingapaca Jehovapa espíritu santotami minishtinguichi nishpami Jesusca nirca (Juan 14:26, NM; Zac. 4:6).

5, 6. Jehovapa espíritu santoca ¿imata rurachunda Jesusta ali catijcunataca ayudarca?

⁵ Pentecostés 33 huatapimi Jesusta ali catijcunaca Jehovapa espíritu santota chasquirca. Jehovapa espíritu santo ayudajpimi ali villaigucunata villachi callarirca. Shinami ashalla tiempopica ashtaca ashtaca gentecuna Jesuspa ali catijcuna tucurca (Hech. 2:41; 4:4). Contracuna paicunata llaquichingapaj catirianajujpipash Jesusta ali catijcunaca na manllaita charircachu. Chaipa randica Taita Diostami cashna mañarca: ‘Na manllashpa canba Shimita villachun ushaita carahuai’ nishpa. Shinami paicunaca ‘Diospa jucha illaj espíritu junda cashpa Diospa Shimita na manllashpa villanajurca’ (Hech. 4:18-20, 29, 31).

⁶ Punda Jesusta ali catijcunapaca villachinaca asha shinllimi carca. ¿Imamandata shina nipanchi? Chai tiempopica, Diospa Shimimanda ashalla copiacunatami charirca. Cunanbishna Bibliata intindingapaj publicaciongunataca na charircachu. Chai tiempopica shuj shuj shimicunata parlaj gentecunami tiarca. Shina cajpipashmi Jesusta ali catijcunaca cushijushpa ali villaigucunataca villachinajurca. Ashtaca huatacunatami cai ali villaigucunataca ‘cai pachapi tucui miraicunaman villanajun’ nircami (Col. 1:6, 23).

7. Cien huatacuna huashamanga ¿imatata Jehovata sirvijcunaca rurarca?

⁷ Cunan punllacunapi. Cunan punllacunapica Jehová Diosca Bibliahuanmi paipa organizaciondaca ayudashpa catijun. Bibliapica Jesús cai alpapi cashpa imatalla rurashcata, paipa catijcunaman imata mandashcatapashmi ricuchin. (Mat. 28:19, 20). Julio de 1881 La Atalaya revistapica cashnami nirca: Jehová Diosca ñucanchicunataca charijcuna tucuchun, shujcuna ñucanchita jatunyachichunga na agllashcachu. Ashtahuangarin shujcunata ayudachun, ali villaigucunata villachichunbashmi Jehová Diosca paipa espirituhuan ñucanchitaca agllashca”. Shinallata 1919 huatapica “A quienes se les confía la obra” nishca folletopipash cashnami nirca: “Ashtaca ashtaca gentecunamanmi villachina capanchi. Jesús ayudajpillami villachishpa catishun”. Chaimi punda Jesusta ali catijcunashnallata cai huauquipanicunaca na manllashpa tucui shunguhuan villachishpa catirca. Paicunaca Jehovapa espíritu santo ayudajujtaca seguromi carca. Cunanbipashmi Jehovapa espíritu santo villachichun ayudajujtaca seguro capanchi.

8, 9. Ali villaigucunata villachingapaca ¿imacunatallata Jehová Diospa organizacionga utilizashca?

⁸ Jehová Diospa organizacionga ali villaigucunata villachingapaca imprimishca publicaciongunata, “Foto-Drama de la Creación”, gramófonos, carropi parlantecunahuan, radiotapashmi utilizashca. Cunan punllacunapica telefonocunata, tabletcunata, Internettapash utilizashpami gentecunamanga villachipanchi. Jehová Diospa  organizacionllami ali villaigucunataca ashtaca ashtaca shimicunaman traducin. ¿Imamandata shina traducishca? Tucui gentecuna paicunapa propio shimipi yachajui ushachunmi shina traducishca. Jehová Diosca na pitapash ñavita ricushpalla chasquimandami “tucui llactacunapi causajcuna, aillucuna, shuj rimaita parlajcuna, shuj shuj gentecunapash” ali villaigucunata uyanga nirca (Apoc. 14:6, 7). Jehová Diosca tucui gentecuna paipa Reinomanda yachachunmi munan.

⁹ Na yaicunalla edificiocunapica ¿imashinata villachipanchi? Chai gentecunaman villachingapaca Jehová Diospa organizacionga shuj shuj pushtucunapi villachingapami predicación publicata callarichirca. Por ejemplo, huata 2001​pica Cuerpo Gobernantepi sirvij huauquicunaca predicación pública Francia llactapi tiachunmi aprobarca. Jipamanga shuj shuj pushtucunapipashmi shinallata villachichun aprobarca. Shina villachinaca alipachami carca. Chaimi 2011 huatapica ashtaca gentecuna yalij pushtucunapi predicación publicata Nueva York llactapi callarichirca. Chai huatapillatami 102.129 librocunata, 68.911 revistacunata saquirca. Shinallata 4.701 gentecunami Bibliamanda yachachichun mañarca. Jehová Dios paipa espiritu santohuan ayudajushcatami huauquicunaca ricurca. Chaimi Cuerpo Gobernantepi sirvij huauquicunaca mundo enteropi shinallata villachichun aprobarca.

10. Ali villaigucunata villachingapaca ¿ima ayudacunatata charipanchi?

¹⁰ Ñucanchi usharishcaguta rurapashunchi. Tandanajuicunahuanmi Jehová Diosca ñucanchitaca alipacha yachachin. Villachingapaca congregacionbi tiaj grupohuanmi llujshina capanchi. Paicunami imapipash mejorana cajpica mejorachun ninga. Shinallata paicunapa ali ejemplohuanbashmi ñucanchitaca ayudaita ushanga. Ima llaquita o problemata charishpapash villachishpa catipashunchi. Cai temapa textopi nishcashnaca Jehovapa munaita pactachichunga Jehová Diosca paipa espíritu santota cushpami ñucanchitaca ayudajun. Ñucanchi ushaimandalla villachitaca na ushapanchimanllu (Zac. 4:6). Cai ali villaigucunaca Jehová Diosmandami shamun.

11. Punda Jesusta catijcunapa tiempopica cuerpo gobernante huauquicunaca ¿imatata rurana tucurca?

¹¹ Punda Jesusta catijcunapa tiempopi. Jerusalén llactapi cuerpo gobernantemanda huauquicunaca  tucuicunallata congregacionbi ordenado, casilla cachunmi ayudarca (Hech. 2:42). Por ejemplo, huata 49​pica circuncisionda ruranata o ñana ruranata dicidingapami Jehová Diospa espíritu santota mañashpa ali desiciongunata agllai usharca. Chaimi Jesusta ali catijcunaca shujllashna villachishpa cati usharca. Apostolcunapash, ancianocunapash judiocuna cashpapash paicunapa costumbrecunataca na catircachu. Chaipa randica Diospa Shimi imata nijtami mascarca. Shinallata Jehovapa espíritu santo ayudachunbashmi mañarca (Hech. 15:1, 2, 5-20, 28). Shina rurashcamandaca Jehová Diosca paicunata bendiciarcami. Chaimi congregacionbica ordenado, casilla ali caita usharca. Shinami paicunaca ali villaigucunata villachishpa catinajurca (Hech. 15:30, 31; 16:4, 5).

12. Jehovapa organizacionbica ¿imamandata ordenado, casilla causai tian nipanchi?

¹² Cunan punllacunapi. Jehovapa organizacionga Jehovata sirvijcuna ordenado, casilla causachunmi ayudashca. 15 de noviembre 1895 huatamanda La Atalaya revista inglés shimipica 1 Corintios 14:40​manda japishcami carca. Chaipica “Decentemente y con orden” nishca yuyaimi llujshirca. Chaipica: “Chairalla callarishca congregacionmanga apostolcunaca cutin cutinmi ordenado cana canguichi nishpa consejarca [...]. Shinallata Diospa Shimipi escribishcaca ñucanchipallata alipa escribichishca can” nijurcami (Rom. 15:4). Punda Jesusta catijcunapa tiempopi ordenado, casilla causana nishcaca cunangamanmi Jehovapa organizacionbica pactarijun. Chaitaca ¿imashinata yachai ushapanchi? Maijan llactaman rishpapash Villajun revistataca chai temamandallatami tucuicunallata yachajupanchi. Shinallata Villajun revistata imashna yachachijta, maijan quillamanda cajtapash alimi yachapanchi. Shinaca maijan llactaman rishpapash ñucanchi congregacionbi cashcashnami sintiripanchi. Tucuicunallata shujllashna cashcamandaca ninandami cushijupanchi. Jehovapa espíritu santomi shina tandanajuchun ayudan (Sof. 3:9).

13. Santiago 3:17​pi nishcapi pensarishpaca ¿imatata tapurina capanchi?

¹³ Ñucanchi usharishcaguta rurapashunchi. Jehová Diosca ‘casilla aliguta causachun, shujllashna causachunmi’ munan (Efes. 4:1-3). Shinaca cashna tapuripashunchi: “¿Huauquipanicunahuan casilla, tranquilo canatachu ayudajuni? ¿Congregacionbi yachachij huauquicunataca tucuipichu cazujuni? ¿Anciano o siervo ministerial  cajpipash huauquipanicunaca ñucapi confianllu? ¿Tandanajuimanga jipayashcachu chayani? Congregacionba ¿imata rurana cajpipash uchashpachu rurani? ¿Huauquipanicunata ayudanata gushtanichu?” (Santiago 3:17, liingui). Cai tapuicunamanda mejorana cashcata yachaj chayashpaca Jehovapa espíritu santota mañapashunchi. Jehová Diosllami ñucanchi causaipi, ruraicunapi cambiachun ayudanga. Chaimi huauquipanicunaca quiquindaca juyanga.

14. Colosenses 1:9, 10​pi nishca shinaca punda Jesusta catijcunataca ¿imashinata Jehová Diosca yachachirca?

¹⁴ Punda Jesusta catijcunapa tiempopi. Jehová Diosca paita sirvijcunata yachachinataca ninandami gushtan (Sal. 32:8). Paipa juyashca churicuna paita rijsichun, paita juyachun, para siempre causaiguta chasquichunmi munan. Cai bendiciongunata chasquitaca ushapanchimi. Pero pai yachachichunmi saquina capanchi (Juan 17:3). Punda Jesusta catij huauquipanicunataca congregacionbi huauquicunahuan yachachichunmi Jehová Diosca ayudarca (Colosenses 1:9, 10, liingui). Jesús nishcashnami Jehovapa espíritu santoca chai huauquipanicunataca ayudarca (Juan 14:16, NM ). Jehovapa espíritu santomi Jesusta ali catijcunatapash chai tiempopica Diospa Shimita ali intindichun ayudarca. Shinallata Jesús imata rurashcata, nishcata yarichunbashmi ayudarca. Chaicunaca Mateo, Marcos, Lucas, Juan librocunapi escribishcami tiajun. Chai yachajushcacunami punda Jesusta catijcunataca Jehovapi tucui shunguhuan crichun, shinallata Jesusta, huauquipanicunatapash ashtahuan juyachunmi ayudarca.

15. Isaías 2:2, 3​pi nishca shinaca ¿imashinata Jehovapa nishcacuna pactarijujtaca ricupanchi?

¹⁵ Cunan punllacunapi. Jehová Diosca “tucurimui punllacunapica” shuj shuj llactamanda gentecunami yachajungapaj munanga nircami (Isaías 2:2, 3, liingui). Cai shimicuna cunanbi pactarijujtaca ricunallami can. Jehová Diosca  paita sirvijcuna paimanda yachajuchunga “aliguta cazushpa, aliguta yarishpa servij” esclavota utilizashpami ashtaca ashtaca publicaciongunahuan, videocunahuan, Bibliamanda discursocunahuan, shuj shuj cosascunahuan Bibliamanda ñucanchitaca yachachijun. Chaimi shuj iglesiacunahuan ricujpica shujpacha can (Is. 25:6; Mat. 24:45). Ñucanchicunapash punda tiempopi Elihú jarigushnami sintiripanchi. Paica Jehovamandaca cashnami nirca: “Paishna yachachij Diosca, ¿pita tiangayari?” (Job 36:22).

16. Jehovapa yachachishcacunata aprovechangapaca ¿imatata rurana capanchi?

¹⁶ Ñucanchi usharishcaguta rurapashunchi. Jehovapa espíritu santoca Bibliapi liishcata ñucanchi causaipi pactachichunmi ayudan. Salmista jarigushna cashna mañapashunchi: ‘Jehová Dioslla canba ñanguta rijsichihuayari. Canba yachachishcacunata siempre catichun ayudahuayari. Canba shutita manllashpa causangapaj shujlla shunguta charichun ayudahuayari’ (Sal. 86:11, NM ). Ñucanchicunapash Jehová Dios Bibliahuan, paipa organizacionhuan yachachijta aprovechashpa catipashunchi. Bibliamanda yachajuna cashcamandallaca ama yachajupashunchichu. Chaipa randica ima yachajushcata ñucanchi shungupi alichishpa ñucanchi causaipi pactachingapaj esforzaripashunchi. Pactachichunga Jehovapa espíritu santomi ayudanga. Huauquipanicunatapash ayudapashunchi. Paicunaca ñucanchi propio familiashnami can (Heb. 10:24, 25).Tandanajuicunapi tucui shunguhuan comentangapaj, shuj asignacionda pactachingapapash ayudahuai nishpa Jehovata mañapashunchi. Shinami Jehovata, Jesusta, huauquipanicunatapash juyashcata ricuchipashun (Juan 21:15-17).

17. Jehovapa organizacionda apoyajushcataca ¿imashinata ricuchina capanchi?

¹⁷ Shuj punllaca Jehovapa organizacionllami cai alpapica tianga. Chai organizaciondaca Jehová Diosca paipa espíritu santota utilizashpami mandanga. Shinaca cunanmandallatami Jehová Dioshna gentecunata na agllashpa ali villaigucunata villachina capanchi. Shinami Jehová Dioshna juyashcata ricuchipashun. Shinaca congregacionbi ordenado, casilla, huauquipanicunahuanbash ali cangapaj esforzaripashunchi. Jehová Dios yachachijujtaca ali aprovechapashunchi. Shinami Diablota, tucui nalicunata tucuchina punlla chayamujpica na manllashpa shuyashun. Shinaca Jehovapa organizacionda tucui shunguhuan apoyaj huauquipanicunahuanmi cana capanchi.