‘Ñuca yachachijushca shimicunata cazushpa’ causaichi

‘Ñuca yachachijushca shimicunata, quiquinguna cazushpa catishpaca, ñucapaj yachajujcunapachami canguichi. Na llullashpa villachijuj shimitapash rijsinajunguichi. Chai na llullashpa villajushca shimimi, quiquingunataca cacharichinga’ (JUAN 8:31, 32).

Cai shimicunata nishpaca Jesusca ¿imatata ningapaj munarca? “Shimi” nishpaca Jesusca paipa yachachishcacunamandami parlajurca. Pero chai yachachishcacunaca, Taita Diospa yachachishcacuna cashcatami Jesusca nirca. Paica “ñucapaj munaica, na cashna villajunichu. Ashtahuangarin ñucata cachamuj Taitami imata nichumbash, imata villachumbash ñucataca mandahuarca” nircami (Juan 12:49). Jesús Jehová Diosta mañajushpaca ‘canba shimica, napacha llullachu’ nircami. Chaimandami Jesusca gentecunaman yachachijushpaca Taita Dios nishcata siempre ricuchishpa parlan carca (Juan 17:17; Mateo 4:4, 7, 10). Shinaca Jesusta ciertopacha catijcunaca ¿imashinata Jesuspa mandashcacunata cazushpa causanajushcataca ricuchin? Bibliapi yachachishcashna causashpa, Bibliapi nishcacunata siempre cazushpallami Jesusta ciertopacha catijcuna cashcata ricuchin.

Jesusta punda catijcunapa ejemplo. Apóstol Pablopashmi Jesús cuenda Taita Diospa shimi Bibliataca ninanda alicachirca. Paica “Dios escribichishca tucui shimicunaca, paillata yarichishpa escribishcami. Chai shimicunaca [...] yachachingapajmi ali” nircami (2 Timoteo 3:16). Chaimandami congregacionbi ñaupaman pushajcunataca ‘Diospa shimica na llullaj cajta yachachishcataca, aliguta yarishpa yachachichun’ mandan (Tito 1:7, 9). Shinallata punda Jesusta catijcunataca “pipash cangunata pactarallapash aliguta yachajunami nij tucushpara, yanga parlocunatalla parlashpa pandachinman. [...] Cristomandaca na yachachishpami, runacuna yachachishpa saquishcata, cai pachapajtalla cutin cutin yachashcata yachachinajun” nircami (Colosenses 2:8).

Cai nishcacunataca ¿picunata cunanbica pactachin? 1965 huatapi llujshishca Constitución dogmática sobre la divina revelación nishcapi y Catecismo de la Iglesia Católica nishca libropipash: iglesiapi yachachishcacunaca na tucui Bibliamandallachu can. Shina cajpipash iglesia catolicapa yachachishca costumbrecunata, Bibliapa yachachishcacunatapash respetashpa, ali yuyaihuanmi chasquina canchi nishpami yachachirca. Shinallata Canadá llactamanda revista Maclean’s nishcapipash religionbi yachachijca, “punda punda huatacunamanda shuj libropa nishcacunataca ¿imamandata cazuna canchi? Ñucanchicunapashmi ali yuyaicunata charinchi. Shinapash Jesús yachachishcacunapi o Bibliapa nishcapi cazushpaca ñucanchi yuyaicunataca na ali pactachi ushanchichu” nircami.

New Catholic Encyclopedia nishcapica, “testigo de Jehovacunaca Bibliapa nishcacunapillami crin. Shinallata Bibliapa nishcacunata cazushpami causan” ninmi. Canadá llactapi shuj testigo de Jehová predicajujpimi shuj jarica, “canguna pi cajtaca yachanimi. Cangunami siempre Bibliata marcaria purinata yachanguichi” nishcarcami.