‘Juyarishpami causan’

“Nara mandashca mushujtapachami, cashna nishpa cangunataca mandani: ‘Caishujhuan, chaishujhuan ninanda juyarishpami causana canguichi. Ñuca imashnami cangunata ninanda juyani, chashnallatami cangunapash, caishujhuan chaishujhuan ninanda juyarishpa causana canguichi. Shina juyarishpa causanajujta ricushpami, ñucapaj yachajujcuna cashcataca tucuicuna rijsinajunga’ nijurcami” (JUAN 13:34, 35).

Cai shimicunata nishpaca Jesusca ¿imatata ningapaj munarca? Jesusca paipa catijcunataca “ñuca cangunata juyashcashnallatami juyarina canguichi” nircami. Pero Jesusca paicunata juyashcataca ¿imashinata ricuchirca? Chai tiempopi judiocuna shuj llactamanda gentecunata na ricunayachijpipash o huarmigucunata nali tratajpipash Jesusca na chashnallata rurarcachu (Juan 4:7-10). Jesusca shaijushca cashpapashmi gentecunata ayudangapaca ninanda esforzarirca (Marcos 6:30-34). Ashtahuanbachaca paipa causaita cushpami ñucanchicunata ninanda juyashcataca ricuchirca. Paica nircami: “Ñucallami, aliguta michij cani. Aliguta michij cashpami, ñucapaj llamacunamandaca huañusha” nircami (Juan 10:11).

Jesusta punda catijcunapa ejemplo. Jesusta catijcunaca paicunapuraca huauqui, pani nishpami tratarin carca (Filemón 1, 2). Shinallata congregacionbica maijan llactamanda cajpipashmi gentecunataca ali chasquin carca. Jesusta catijcunaca judiocunata, griegocunatapash igualmi tratan carca (Romanos 10:11, 12). Huata 33pi Pentecostés fiestapica Jesusta catijcunaca paicunapa alpata, imata charishcacunatapash jatushpami caishujman chaishujman imata minishtinajujta ricushpa chai culquitaca chaupishpa caranajurca. ¿Imamandata shina rurarca? Chaira bautizarishcacuna apostolcunapa yachachishcacunata uyashpa, yachajushpa chai llactapillata quedachun ayudangapami paicunaca shina rurarca (Hechos 2:41-45). Alipacha estudiashca Tertuliano shuti jarica, shujcuna Jesusta catijcunamanda imata nishcatami parlan: “Shujcunaca ‘Jesusta catijcunaca randimandami ninanda juyarin. Incluso randimanda ayudaringapaca paicunapa causaitapash peligropi churangapaca dispuestomi can’ nishcami”. Chaitaca apostolcuna huañushcamanda casi 200 huatacuna jipami nirca.

Cai shimicunataca ¿picunata cunanbica pactachin? Historia de la decadencia y ruina del Imperio romano nishca libropica, “ashtaca huatacunatami Jesusta catinchi nijpuracunallata paicunapura ninanda llaquichirishca” ninmi. “Chai pasashcaca shuj religionguna llaquichishcatapash yalimi cashca” ninmi. Estados Unidospi rurashca shuj investigacionga, “religionda catij gentecunami ashtahuanbachaca shuj llactamanda gentecunataca nalicachishpa ricun” nishcami. “Shuj shuj llactamanda gentecunaca chai religionmandallata cashpapash nali llevarinllu. Chaimandami chai religionmandallata cashpapash paicunapuraca na ayudarin” nishcami.

2004 huatapica Estados Unidospa Florida llactapimi ishcai quillacunapilla chuscu huracanguna tiarca. Gentecunataca ninandami llaquichirca. Chaimandami chai llaqui apashca pushtupi ayudaj shuj presidenteca, gobierno carashcacunata aliguta repartinajujta o na repartinajujta yachangapami rishcarca. Paica testigo de Jehovacuna tucuipi organizarishca cashcatami ricurca. Chaimandami testigo de Jehovacunataca tucui minishtirishcagupi ayudangapaj ofricirirca. Shinallata 1997 huatapica, huaquin Testigocunaca República Democrática del Congo llactamanmi micunaguta, ropata, medicamentocunatapash aparca. Paicunaca llaqui apashca testigo de Jehovacunata y shuj gentecunatapash ayudangapami rishcarca. Chai tucui carashcacunata culquipi contajpica, 1 millón de dolarcunashnami cashcarca.