‘Taita Dios mandajujmanda cai ali villaitaca tucui llactacunapimi villanajunga’

“Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga. Chai jipami, tucurimuica chayamunga” (MATEO 24:14).

Cai shimicunata nishpaca Jesusca ¿imatata ningapaj munarca? Bibliapi Lucas libropica, “Taita Dios mandajujmanda ali villaita villashpa, tucui pueblocunapipash, uchilla llactacunapipash Jesusca purijurca” ninmi (Lucas 8:1). Jesusca “Taita Dios mandajujmanda ali villaitaca, shuj pueblocunapipash villanapachami cani. Shina villachunmi, ñucataca cachamuhuarca” nircami (Lucas 4:43). Jesusca paipa catijcunamanga ladolla llactacunapi o pueblocunapi villachichunmi callaripica mandarca. Shinapash jipamanga “cai pacha tucuri manñacaman ñucamandaca villagringuichi” nircami (Hechos 1:8; Lucas 10:1).

Jesusta punda catijcunapa ejemplo. Jesuspa catijcunaca Jesús mandashcata pactachingapami esforzarirca. Chaimandami Hechos 5:42​pica, “paicunaca Jesucristomandami, punllandi Diospaj huasipipash, shuj huasicunapipash yachachishpa villanataca na saquinajurca” ninmi. Na huaquingunalla villachinajunllu carca. Ashtahuangarin Jesusta tucui catijcunami villachin carca. Alipacha estudiashca August Neander shuti jarica, “pobrella gentecuna, na estudiashca gentecuna Bibliamanda yachachin cashcata ricushpami, Jesusta catijcunamandaca Celso nishca shuti jarica burlarin cashca” ninmi. Los primeros siglos de la Iglesia nishca librota llujchishca Jean Bernardi jarica, “Jesusta catijcunaca tucui ladocunapi, ima hora cashpapash, jarcaicunata charishpapashmi villachina can” nircami. Pai nishcashnami Jesusta catijcunaca mundo enteropi villachina can.

Cai nishcacunataca ¿picunata cunanbica pactachin? Iglesia anglicana nishcapi ñaupaman pushaj David Watson shuti jarica, “iglesiata ñaupaman pushajcuna yachachinapi, villachinapi na preocuparishcamandami gentecunaca Taita Diosmandaca caruyashca” nishcami. Shinallata ¿Por qué se van los católicos? nishca libropica José Luis Pérez Guadalupeca, “testigo de Jehovacunami huasin huasin villachishpa purin” nishcami. Chaitaca evangelicocuna, catolicocuna o shuj religionda catijcunapash na ruranllu.

Instituto Cato nishcapi trabajaj Jonathan Turley jarica, “testigo de Jehová shimita uyashpaca gentecunaca huasin huasin villachishpa purijcunatami pensarin” ninmi. Shinallata “Testigo de Jehovacunaca shuj gentecunapash paicunapa crishcacunata catichunllaca na huasin huasin villachinllu. Ashtahuangarin shina rurashpaca paicunallatami Taita Diospi ashtahuan crishpa catin” ninmi (Cato Supreme Court Review, 2001-2002).

[Recuadro]

¿Picuna Jesusta ali catijcuna cashcataca cuenta japiparcanguichu?

Chaishuj temacunapica Jesusta ali catijcuna imacunatalla rurana cashcatami ricurcanchi. Chaicunataca ¿picuna pactachinajujtata ricupashcangui? Cunanbica Jesusta catinchi nij religiongunaca ashtacacunami tian. Shinapash Jesús paipa catijcunaman imata nishcatami yarina capanchi. Jesusca nircami: “Ñucataca: ‘Apunchi Jesús, Apunchi Jesús’ nishpami purinajun. Shina ninajushpapash, na tucuicuna jahua pachapi Dios mandajuj llactaman yaicui ushangachu. Ashtahuangarin jahua pachapi tiajuj ñuca Taita munashcata pactachijcunallami, yaicui ushanga” nircami (Mateo 7:21). Shinaca Taita Diospa Gobierno apamuna bendiciongunata ñucanchicunapash chasqui ushangapaca, Taita Diospa munaitami pactachina canchi. Shinallata Diosta ali sirvijcunahuanmi ñucanchicunapash Diosta adorangapaj tandanajuna canchi. Taita Diospa Gobiernomanda ¿ashtahuan yachajungapaj munapanguimanllu? (Lucas 4:43). Ashtahuan yachajungapaj munashpaca testigo de Jehovacunahuanmi parlaita ushapangui.