Bibliami gentecunapa causaita cambiashca

¿IMAMANDATA shuj runaguca pai huahua cashpa catijushca religionman tigrarca? ¿Imashinata shuj jovenga pai charingapaj munashca taitataca tarirca? Paicuna imata nijta ricupashunchi.

“Jehová Diospaman tigrana cashcatami intindircani” (ELIE KHALIL)

NACIRISHCA HUATA: 1976

LLACTA: CHIPRE

PAIPA PUNDA CAUSAI: CHINGASHCA CHURISHNAMI CARCANI

ÑUCA PUNDA CAUSAI: Ñucaca Chipre llactapimi nacirircani. Pero Australiapimi viñarcani. Ñuca taitamamaca testigo de Jehovacunami carca. Chaimi ñucamanga Taita Diosta juyanata, Bibliata respetanata yachachingapaj esforzarirca. Pero ña jovenyashpaca ñana paicunata cazungapaj munarcanichu. Tutacunaca huasimanda escaparishpami, ñuca edadtallata charij amigocunahuanga carrocunata shuangapaj rin carcanchi. Siempremi problemacunapi can carcani.

Primeroca ñuca taitamamacuna culiranata manllaimandami nalicunataca pacalla ruran carcani. Pero jipamanga asha ashami paicunataca ñana manllarcani. Ñuca amigocunaca ñucapa mayorcunami carca. Jehová Diostapash na juyanllu carca. Paicunami ñucataca nalicunata rurachun yachachin carca. Shuj punllacarin, ñuca taitamamacunataca ñana quiquingunapa religionda catingapaj munanichu nircanimi. Paicunaca pacienciahuanmi ñucataca ayudangapaj munarca. Pero shinapash ñucaca, paicuna ñucata ayudachunga nimamanda na munarcanichu. Chaimi paicunaca ninanda sufrirca.

Huasimandapash rishpami, drogacunapi satirircani. Marihuana plantata viñachishpami ashtacata jatui callarircani. Shuj shuj huarmicunahuanbash faltapi urmashpami causan carcani y discotecunapillami yalin carcani. Ashtahuangarin grosero, culira culirami tucurcani. Pipash ñuca imata na gushtashcata nijpi o rurajpica, ninanda culirashpami plitushpa o hasta macashpapash saquinlla carcani. Jesusta catij ali cristianocuna na rurana cosascunatami ruran carcani.

BIBLIAMI ÑUCA CAUSAITA CAMBIASHCA: Jipamanga shuj drogadictohuanmi amigo tucurcani. Pai uchillagu cajpillatami taitaca huañushcarca. Tuta tutacamanmi paihuanga parlanajun carcanchi. Tauca viajetami paica nihuarca, ñuca taitataca ninandami llaquinayan, na cungashcanichu nishpa. Pero ñucaca huahuamandapachami huañushcacuna causarinata yachashpa viñarcani. Chaimi, Jesús cai alpapi cashpaca huañushcacunata causachircami y shamuj punllacunapipash huañushcacunataca causachisha ninmi nishpa parlan carcani (Juan 5:​28, 29). Shinallata ñuca amigotaca ninmi carcani: “Canba taitata cutin ricunatami imaginarina cangui. Tucuicunami shuj juyailla paraíso alpagupi causashun”. Chaita uyashpami ñuca amigoca huacanalla uyan carca.

Cutin shuj viajecunaca, último punllacunamanda y Trinidadmandami ñuca amigohuanga parlan carcanchi. Paipa Bibliatallata japishpami, Jehová Dios pi cajta, Jesús pi cajta y último punllacunamanda Biblia imata nijtaca ricuchin carcani (Juan 14:28; 2 Timoteo 3:​1-5). Ñuca amigoman Jehová Diosmanda ashtahuan parlashpaca, ashtahuanmi Jehová Diostaca yarin carcani.

Ñuca taitamamacunapa yachachishca yuyaicunaca shuj muyugushnami asha asha ñuca shungupica viñai callarirca. Huaquinbica ñuca amigocunahuan fiestapi drogarinajushpami, ñapash Jehová Diospi pensari callarin carcani. Ñucapa tauca amigocunaca Taita Diosta juyanimi nishpapash, nalicunata rurashpami Taita Diosta na juyashcata ricuchin carca. Y paicunashna hipócrita cangapaca na munarcanichu. Chaimi Jehová Diospaman tigrana cashcata intindircani.

Alita rurana cashcata yachana y alita ruranaca na lo mismochu can. Huaquin cosascunapi cambianaca facilmi can. Por ejemplo, drogacunataca facilllami saqui usharcani. Punda nali amigocunatapash facilllami saquircani. Bibliatapash facilllami congregacionbi shuj ancianohuan estudiai callarircani.

Pero ñucapa mal geniota cambianaca na facilchu carca, dicifilmi ricurirca. Asha tiempotaca ñucapa mal geniota cambiashpa ñana culirashpapash, huaquinbica cutinmi jaicata culiranlla carcani. Chaimi mal sintirishpa, nunca na cambiaita ushashachu yan carcani. Ninanda mal sintirishpami ñucata estudiachijuj huauquihuan parlarcani. Paica pacienciahuan y alimanmi ñucataca ayudahuan carca. Paita uyashpaca siempremi animarin carcani. Shuj punllaca, na desanimarishpa chaipi quidanamanda parlajuj tematami La Atalaya revistapi lii nishpa recomendahuarca. * Chaipica culira sintirijushpa imacunatalla rurana cashcatami estudiarcanchi. Chai revista ima nijta yarishpa y Jehová Diosta cutin cutin mañashpami, ñucapa mal geniotaca controlai usharcani. Shinami año 2000​pica por fin bautizarishpa testigo de Jehová tucurcani. Ñuca taitamamacunaca ninandami cushijurca.

¿IMASHINATA BENEFICIARISHCANI?: Cunanga ñuca cuerpotaca ñana drogacunata chupashpa mapayachinichu. Shuj shuj huarmicunahuanbash ñana pecadopi urmanichu. Chaimi tanto ñuca shungu ucupipash tranquilo sintirini y ñuca concienciapipash ali sintirini. Imagupi trabajashpapash, tandanajuicunaman rishpapash o imaguta rurashpa divirtirijushpapash contentomi sintirini shinallata tucuimi ali llujshinga nishpami pensarinata yachani.

Ali taitamamacunata charishcamandaca tucui shunguhuanmi Jehová Diostaca agradicini. Ñucata ayudanataca nunca na paicunaca saquircachu. Juan 6:44​pi Jesús imata nishcatapash siempremi yaipi charipani. Chaipica ninmi: ‘Ñucata cachamuj Taita ñucapaman pushamujpillami, pipash shamun’. Jehová Dios paipaman pushamujpimi caipi cani yashpaca ninandami cushijuni.

“Taitata charingapami munarcani” (MARCO ANTONIO ALVAREZ SOTO)

NACIRISHCA HUATA: 1977

LLACTA: CHILE

PAIPA PUNDA CAUSAI: DEATH-METAL MUSICATA TOCAJ GRUPOPIMI TOCAN CARCANI

ÑUCA PUNDA CAUSAI: Ñucaca Punta Arenas nishca llactapimi ñuca mamitahuan viñarcani. Chai llactaca tranquilo llactami carca. Estrecho de Magallanes pushtumi carca. Chai pushtuca continente americanopa sur ladopi tiaj ña casi último pushtumi carca. Ñuca taitamamacunaca ñuca 5 añosta charijpimi divorciarirca. Chaimi ñucaca, llaquilla y sololla sintirircani. Taitata charingapami munarcani.

Ñuca mamitaca testigo de Jehovacunahuanmi Bibliata estudian carca y Salón del Reinopi tandanajuicunamanmi pushahuan carca. Shinapash tandanajuicunaman rinataca nimamanda na gushtanllu carcani. Chaimi tandanajuicunaman rinajushpaca, ñandaca imacunatapash nishpa culirami rijun carcani. Ña 13 añosta charishpami tandanajuicunamanga ñana rircani.

Chai tiempopica musicata tocanataca ninandami gushtan carcani. Y tocaitapash alimi tocan carcani. 15 añosta charishpaca, jatun fiestacunapi, barcunapi y privado fiestacunapimi heavy-metal y death-metal nishca musicacunata tocashpa purircani. Alipacha tocanata yachaj musicocunahuan tandanajushpami, música clásica nishca punda tiempo musicata tocangapaj munarcani. Chaimi, chai llactapi musicata yachachij conservatoriopi estudiai callarircani. Pero ña 20 añosta charishpaca, musicata ashtahuan estudiangapaj munashpami Chile llactapa capitalman Santiago llactaman rircani. Shinallata, heavy-metal y death-metal nishca musicata tocanata yachaj bandapipashmi tocashpa catircani.

Shinapash siempremi imapash faltajujpishna, sololla sintirishpa causarcani. Chaimi ama shina sintiringapaca, machan carcani y ñuca tocajuj bandapi cumbacunahuanbash drogarin carcani. Paicunataca ñuca propio familiatashnami yan carcani. Nipita na cazungapaj munanllu carcani. Y nipita na cazungapaj munashpami yana ropata churajushpa, barbastapash largota viñachishpa y ajchatapash casi cinturascaman viñachishca purin carcani.

Ñucaca yapapachami can carcani. Chaimi siempre macanajuicunapi can carca y policiacunahuanbash problemacunata charin carcani. Shuj punllaca, drogacunata traficashpa purij shuj grupomi ñucatapash y ñuca amigocunatapash molestanajurca. Chaimi ñucaca, machashca caimandaca paicunahuan macanajungapaj shayarircani. Pero paicunaca ushashcatami ñucataca macashpa saquihuarca. Quijadas tullupash faquirijtami macahuarca.

Shinapash, ñuca novia ñucapa mejor amigohuan ña tauca huatacunata traicionajushcata yachaj chayashpa y ñucapa chaishuj amigocunapash ali yachashpata upalla purinajushcata yachaj chayashpami, macai tucushcatapash yali ashtahuan nali, nali sintirircani.

Chai jipaca Punta Arenasman tigrashpami, clases de musicata cushpa trabajai callarircani. Violonchelo nishcatapash tocashpami trabajai callarircani. Shinallata heavy-metal y death-metal musicata tocaj grupocunahuanbashmi musicata graban carcani. Chai tiempopica, Susann shuti juyailla jovengunata rijsishpami paihuan causai callarircani. Tiempohuanga, paipa mama Trinidadpi crijta y ñucaca na Trinidadpi crijtami Susannga yachaj chayarca. Chaimi ñucataca “Trinidadmanda yachachishcacunaca ciertochu can o llullachu can?” nishpa tapuhuarca. Chaimi Trinidadmanda yachachishcacunaca falsomi can, na ciertochu can nircani. Y chai yachachishcacuna llulla cashcata na ñucapacha Bibliapi textocunahuan ricuchita ushashpapash, testigo de Jehovacunaca Bibliapi textocunahuan ricuchingallami nircanimi. Y chaipimi ñucaca aunque tauca huatacunata Taita Diosta na mañashca cashpapash, Taita Diostaca ayudahuai nishpa oracionda rurarcani.

Huaquin punllacuna jipaca, rijsishcashnalla runaguta ricushpami, quiquinga testigo de Jehovachu capangui nishpa tapurcani. Aunque ñucata ricushpa manllarishpapash, cushilla, aliguman parlashpami Salón del Reinopi tandanajuicunamanda parlahuarca. Taita Dios ñucapa oracionda uyashpa contestashcamanda chai runaguta tuparishcataca seguromi carcani. Salón del Reinoman rishpaca, ama pipash ricuchun yashpami último filapi tiarircani. Shinapash ashtacacunaca, ñuca huahua cashpa tandanajuicunaman rishcata yarishpa, ñucata rijsishpami ninanda cushijushpa chasquihuarca y juyaihuanmi ugllahuarca. Chaimi ñucaca tranquilo, ali sintirircani. Cutin ñuca huasiman tigramunshnami sintirircani. Ñuca huahua cajpi, ñucaman estudiota cuj Testigota ricushpaca, cutin estudiachihuai nishpami rogarcani.

BIBLIAMI ÑUCA CAUSAITA CAMBIARCA: Shuj punllaca Proverbios 27:​11​tami liircani. Chaipica nijunmi: “Ñuca huahualla, aliguta yachajushca cashpa, ñuca shungupi cushichihuayari”. Gentecunaca imapash yangalla cuendami canchi. Pero shinapash, universo enterota rurashca Taita Diosta cushichinalla cashcata cuenta japishpaca ninandami cushijurcani. Chaipimi Jehová Diosca, ñuca munashca taita cashcata intindircani.

Ñucaca, jahua cielopi causajuj Taita Diosta cushichingapami munarcani. Pero drogacunata, tragota ashtaca huatacunata ufiaimandami, drogapa y tragopa esclavoshna causarcani. Chaipimi Mateo 6:24​pi Jesuspa shimicunata intindircani. Chaipica nijunmi: “Pipash ishcai amota sirvitaca na ushanllu”. Cambiangapaca ninandami esforzarijurcani. Bibliapica “nali gentecunahuan llevarishpaca, alita ruranajushcatapashmi cunganguichi” nijunmi. Chai shimicunata yarinami ñucataca ayudahuarca (1 Corintios 15:33, Traducción del Nuevo Mundo [TNM]). Shinallata chaipimi intindircani que, punda rijushca pushtucunamanllata rishpa y punda amigocunahuanllata llevarishpaca, nali ruraicunata na saqui ushana cashcata. Bibliapica claritomi nijurca, nali cosascunata ruranata saquingapaj munashpaca, shinlli cajpipash shuj derecho imatapash rurana cashcata (Mateo 5:30).

Musicata ninanda gushtaimandami, heavy-metalta saquinata decidinaca shinllipacha carca. Pero congregacionbi amigocunapa ayudahuanmi heavy-metaltaca saqui usharcani. Machanata y drogarinatapashmi saquita usharcani. Ajchatapash y barbastapashmi ruturircani. Yana ropahuanlla vistirinatapashmi saquircani. Ajchata ruturigrinimi nishpa Susannman villajpica, paica imamanda ñuca shina nijujta yachangapaj munashpami, “ñucapashmi canhuan Salón del Reinoman ringapaj munani. Chaipi imata ruranajujta ricungapami munani” nirca. Salón del Reinopi imata yachajujujta ricushpami paipash Bibliata estudiai callarirca. Shinami tiempohuanga cazararcanchi y año 2008​pica ishcandimi bautizarishpa testigo de Jehovacuna tucurcanchi. Cunanbica cushijushpami ñuca huarmigundi, ñuca mamitandi Jehová Diosta sirvinajupanchi.

IMASHINATA BENEFICIARISHCANI: Cushillashnalla causajuj gentecunamanda y traicionero amigocunamandapashmi libre quidashcani. Musicataca gushtashpa catinirami. Pero cunanga aliguta ricushpami musicataca agllani. Ñuca ima pasashcata yarishpami, ñuca familiacunatapash, shuj gentecunatapash pero ashtahuanbachaca jovengunata ayudapani. Paicunataca cai mundopi ashtaca cosascunaca juyailla, alishnalla ricurishpapash imapash basura imapash ‘jupa ismushcashna’ cashcata intindichun ayudangapami munapani (Filipenses 3:​8).

Taita Diosman quimirishpami, Jesusta catij congregacionbica ali amigocunata taripashcani. Congregacionbica tucuicunami tranquilo cangapaj, juyaita ricuchingapaj esforzarin. Pero ashtahuanbachaca, ñuca charingapaj munashca taitatami taripashcani. Jehovami ñucapa taita can.

[Nota]

[Comentario]

“Jehová Dios paipaman pushamujpimi paipaman tigraitaca ushashcani”