Cunanbica jaricuna, huarmicuna lluchulla * pingaipa nalicunata shinanajujtaca televisionbi, celularcunapi, musicacunapi, revistacunapi, propagandacunapi tucui ladocunapimi ricuchin. Mundo enteropica maipi cashpapash ashtaca ashtaca gentecunami chaicunata ricun ( “¿Mashna gentecunata pornografiata ricun?” recuadrota ricupangui).

Profesora Gail Dines shutica ninmi: “Punda tiempopica lluchullacuna imacunatapash shinanajujta ricushpaca gentecunaca manllarinmi carian. Shinapash cunanbica normalmi can” nishpa.

Quiquinbaca chaita ricunaca ¿normalchu can? ¿O veneno cuendachu can? Chaita yachangapaca Jesuspa shimicunata ricupashun. Jesusca nircami: ‘Tucui ali yuragupica juyaillagumi fucun. Nali yurapica ima alipash na fucunllu’ nishpa (Mateo 7:17). Shinaca quimsa yuyaicunata ricupashun.

GENTECUNACA ¿IMATATA NIN? Huaquin investigadorcuna, terapiata cudorcunaca ninmi, lluchullacuna pingaipa nalicunata shinajujta ricunaca droga vicio cuendami can nishpa.

Jorgeca * Internetpimi lluchullacuna pingaipa nalicunata shinanajujta ricun carian. Paica ninmi: “Chaitalla ricungapami munarcani. Drogarishca cuendami carcani. Huaquinbica nali sintirimandami imamandapash manllarinlla carcani. Umatapash nananmi carca. Ashtaca huatacuna jipami chai viciotaca saqui usharcani” nishpa.

Pornografía viciopi urmashca gentecunaca chaicunata ricujushcataca na villanllu. Llullacuna, imamandapash manllarijllacunami can. Paicunaca sololla cangapajmi munan. Huaquinbica pinganayachin, culirami causan. Huaquingunacarin paicunallatami huañuchiringapa, munan. Sergioca casi cada punllami lluchullacuna pingaipa nalicunata shinajujta celularpi ricun carian. Paica ninmi: “Tucui gentecunamandami caruyarcani. Ansiami chaicunatalla ricungapaj munarcani. Mapa mapami sintirircani. Ayudata mascangapajpash pinganayachishpami manllan carcani” nishpa.

Shuj ratogutalla ricushpapash huaquingunaca jatun llaquipimi urmashca. Estados Unidospa shuj comité ñaupajpica doctora Judith Reismanga nircami: “Jaricuna, huarmicuna lluchullacuna pingaipa nalicunata shinanajujta ricushpaca chai nalicunaca ratomi gentecunapa umapi grabarin. Umamanda chaicunata llujchinaca na facilchu can” nishpa. Susanaca 19 huatacunata charishpami, napash yashcapi pornografiata ricushpa jipamanga chai viciopi urmarca. Paica ninmi: “Chai nali ricushcacunaca cungashcapimi umaman shamun. Ñuca umamanda llujchitaca na ushanichu” nishpa.

IMASHINAMI RICUSHCANCHI, pornografiata ricujcunaca esclavo cuendami tucun, jatun llaquicunapimi urman (2 Pedro 2:19).

GENTECUNACA NINMI: “Pornografiata ricunaca cusahuarmitapash familiacunatapash ninandami llaquichin” nishpa (The Porn Trap [Las trampas del porno], de Wendy y Larry Maltz).

Pornografiata ricujcunaca ...

• ... cusahuan huarmihuan cana munaita, confianzata, juyaitapash asha ashami chingachin (Proverbios 2:​12-17).

• ... paicunapillami pensarin, nalicunata ricushcapillami pensarinajun, cusatapash huarmitapash na contendanllu (Efesios 5:​28, 29).

• ... paicunapash chai nali ricushcacunatallata rurangapami munan (2 Pedro 2:14).

• ... huarmita o cusatapash pinganai mapa ruraicunata shinachunmi obligan (Efesios 5:​3).

• ... shuj huarmipi o jaripi pensarijushpallatami shujta mascan (Mateo 5:28).

Bibliaca ninmi huarmita o cusataca na traicionanachu can nishpa (Malaquías 2:16). Traicionajpimi ashtaca cusahuarmicunaca problemacunata  charishpa partirin, divorciarin. Huahuacunapash ninandami sufrin.

Pornografiaca huahuacunatapashmi afectan. Jorgeca ninmi: “Ñuca 10 huatacunata charishpaca pacajushpa pugllajushpami ñuca taitapa revistacunata tarircani. Chaipica lluchullacuna pingaipa nalicunata shinajujtami ricurcani. Imacuna cashcata nali yachashpapash ninanda ricungapaj munashpami pacalla ricun cariani. Shinami ña jatunyashpaca chai viciopi urmarcani” nishpa. Investigadorcunaca nishcami, pornografiata ricuj huambracuna cuitsacunaca chaira viñajushpallatami shujhuan shujhuan puñun. Huarmihuan jarihuanga na normalmente puñunllu. Ashtahuangarin, ratoca ali can, ratoca nalimi can nishpa.

IMASHINAMI RICUSHCANCHI, pornografiaca veneno cuendami can, gentecunataca ninandami llaquichin, juyarishpa causachunga na saquinllu (Proverbios 6:27).

BIBLIACA NINMI, nali ‘munaicunataca, tucuitami huañuchinshna saquina canguichi: Huainayanata, Diospaj ñaupajpi mapayanata, nalita rurana yuyaicunata, charijyanataca na munanachu canguichi. Chaita munanaca, rurashcalla dioscunata mañanajunshnallatami’ can nishpa (Colosenses 3:​5).

Jehová * Diosca ninandami pornografiataca millanayachin. Gentecunata Taita Dios rurashpaca, jarihuan huarmihuan cana munaita charishpa, cusahuarmipura cashpa ali sintirishpa huahuacunata charichunmi rurarca (Santiago 1:17).

Shinaca pornografiata Jehová Dios imamanda millanayachijta ricupashun.

• Pornografiata ricujcuna nali causajta yachashpami Jehová Diosca pornografiata millanayachin (Efesios 4:​17-19).

• Jehová Diosca juyashpami ñucanchicuna sufrishpa causachunga na munan (Isaías 48:​17, 18).

• Cusahuarmicunapash familiacunapash cushilla, aliguta causachunmi munan (Mateo 19:​4-6).

• Tucuicuna shuj limpio causaiguta charishpa, respetarishpa causachunmi Taita Diosca munan (1 Tesalonicenses 4:​3-6).

• Yangata pihuanbash puñuchunga na munanllu. Cusahuarmilla pajta puñuchunmi munan (Hebreos 13:⁠4).

• Pornografiata ricujcuna paicunapilla pensarishpami Diablopa yuyaicunata catin (Génesis 6:2; Judas 6, 7).

IMASHINAMI RICUSHCANCHI, pornografiata ricujcunaca Diospa ñaupajpica nali ricurinllu (Romanos 1:24).

Shinapash pornografía viciota saquingapaj munajcunataca Jehová Diosca llaquishpami ayudan. Bibliaca ninmi: ‘Mandaj Diosca ninanda llaquij, ali shungu, na ñapash fiñarij, ninanda juyajmi. Paica ñucanchi imashna cajtami rijsin. Ñucanchitaca ñutu alpa cajtami yarin’ nishpa (Salmo 103:​8, 14). Taita Diosca humilde gentecuna ‘ima llaquipi cajpipash llaquishpa ayudangapami munan’ (Hebreos 4:16; “ Pornografía viciota saquichunga ¿imata ayudanga” recuadrota ricupangui).

Ashtacacunaca Taita Dios ayudajpimi pornografía viciota saqui ushashca. Bibliaca ninmi: ‘Jesuspa shutipi ñucanchi Taita Diospa espiritumandami, ña armashcacuna canguichi. Shinallata Diospallami causanajunguichi, imatapash [alita] rurashcashnami chasqui tucushcanguichi’ nishpa. (1 Corintios 6:11). Pornografía viciota saquishca gentecunaca ninmi, ‘Taita Diosmi ñucata quishpichij. Paita yariashpa causashpami imatapash na manllasha. Mandaj Diosmi ñucata shinllichin’ nishpa (Isaías 12:2).

Susanaca pornografía viciota saqui ushashpami nirca: “Chai viciota saquichunga Jehová Diosmi ayudahuashca. Paita mañajpica limpio causaita charichun, paipa ñaupajpi ali ricurichunmi ayudahuashca. Paica nunca na ñucanchitaca saquingachu” ninmi.