1. a) Esclavo nijta uyashpaca ¿imapita gentecunaca pensarin? b) Romanos 6:22​pica ¿imatata esclavocunamandaca nin?

ESCLAVO nijta uyashpaca gentecunaca macai tucushpa o mandai tucushpa causajushcatami pensarin. Shinapash Jehová Diospa esclavocunaca na maltratai tucunllu. Bibliapi nishca shinaca, Jehová Diosca llaquishpa mandaj Amomi can. Chaimandami Diosta sirvijcunaca paicunapa munai cushijushpa sirvinajun. Apóstol Pabloca animarcami, Jehová Diosta juyaimandami paipa esclavocuna tucuna canguichi nishpa (Rom. 6:22). Jehovapa esclavo canaca ¿imata can? Diablopa o cai mundopa esclavo ama tucungapaca ¿imatata rurana canchi? Jehovapa ali esclavo caimandaca ¿imata bendiciongunatata chasquishun?

2. a) Huaquinbica ¿imamandata esclavoca na libre llujshingapaj munan carca? b) ¿Imamandata rinrita utujun carca?

² Jehovapa esclavo tucungapaca ¿imata rurana can? Chaita aliguta intindingapaca israelitacunaman cushca Leyta yaripashun. Chai Leypi nishca shinaca, 6 huatacuna jipaca esclavocunaca libre llujshinallami carca (Éx. 21:2). Shinapash paipa amota juyashpa paita sirvishpa catingapaj munajpica, Leypi mandashcashnami amoca pungu yaicuna caspiman quimichishpa chai esclavopa rinritaca utujuna carca (Éx. 21:​5, 6). Shinapash ¿imamandata rinrita utujuna carca? Rinrita utujuchun saquishpami esclavoca amota cazushpa, sirvishpa catingapaj munajushcata ricuchin carca. Ñucanchicunapash Jehová Diosman mingarishpami, Jehovata juyaimanda paita cazushpa causangapaj munajushcata ricuchinchi.

3. ¿Imamandata Jehová Diosman mingarinchi?

³ Nara bautizarishpallatami ñucanchicunaca Jehová Diospa esclavocuna tucushpa paitalla sirvinata agllarcanchi. Jehovaman mingarishpami nircanchi, Jehová Dios  candallatami sirvingapaj munani, canba munaitalla rurashpa causangapami munani nishpa. Jehovaman mingarichunga pipash na ñucanchitaca obligarcachu. Jovengunapash paicunapa munaimi Jehovaman mingarishpa bautizarin, na taitamamacuna obligajpillachu Jehovaman mingarishca. Jesusta catijcunaca ñucanchi jahua pacha Amota juyaimandami paiman mingarinchi. Apóstol Juanga nircami: ‘Taita Diospa mandashcacunata pactachishpallami paita juyajushcata’ ricuchinchi nishpa (1 Juan 5:3).

4. ¿Imata rurashpata Jehová Diospa alita ruraj esclavocuna tucunchi?

⁴ Jehovapa esclavocuna caimandaca cushijushcami canchi. Jesús ñucanchimanda huañushcapi feta charishpami, juchapa esclavocuna canamandaca salvarishcanchi. Shinapash juchayucuna cashpa catinchirami. Juchayucuna cashpapash Jehová Diosta, Jesustami ñucanchi amocuna cachun agllashpa paicunata cazunchi. Apóstol Pabloca nircami: ‘Juchata ama rurangapaca huañushcashnami canchi. Ashtahuangarin Jesusmanda Taita Diospalla causajushcatami yarina canchi’ nishpa. Chai jipaca cashnami advirtirca: ‘Maijanba gañan [“esclavo”, NM] tucushpapash ¿nachu paita cazungapaj gañan tucunguichi? Juchatara gañanshna cazushpaca, huañushpa chingagrinami canguichi. Diosta cazujushpaca [alitami] ruranajunguichi. Ashtahuangarin Taita Diostami pagui nini. Cangunaca gañanshna juchatara cazushpa punda causashca cashpapash, Diosmanda yachachijujta tucui shunguhuan chasquishpami cazunajunguichi. Shinami juchata rurashpa causanamanda Dios cacharichijpi [alita] rurajcuna tucushcanguichi’ nishpa (Rom. 6:​11, 16-18). Jehovaman mingarishpami paita tucui shunguhuan cazungapaj munashcata, Jehová Diospa alita ruraj esclavocuna tucushcata ricuchinchi.

5. a) Apóstol Pablo nishca shinaca ¿imashinata causanchi? b) ¿Imamandata shina causanchi?

⁵ Jehovaman mingarishpa Jehovapa esclavocuna tucushcamandaca shuj macanajuipi cuendami causanajunchi. Apóstol Pabloshnami ñucanchicunapash macanajuna canchi. Paica nircami: ‘Ñuca shungupica Taita Dios mandashcata rurashpami cushijuni. Shinapash ñuca cuerpopi nali munaimi, alita ruranahuan macanajujujta ricuni. Ñuca cuerpotaca juchata rurachunmi mandajun, ñucataca prezotashnami charijun’ nishpa (Rom. 7:​22, 23). Ñucanchicunapash juchayucuna caimandaca nali munaicunatami charinchi. Cada punllami shuj macanajuipi cuenda tucuicuna causanchi. Chaimandami apóstol Pedroca consejarca: ‘Cangunaca huatashcashna causanajuimandami cacharichi tucushcanguichi.’ Shinapash ‘ña cacharishcami cani nishpallaca [ama] nalita ruranguichichu. Ashtahuangarin Taita Diosta sirvijcunami cana canguichi’ nishpa (1 Ped. 2:16).

6, 7. Cai mundo juyaillagu cashcata pensachunga ¿ima tentaciongunatata Diabloca churan?

⁶ Shinallata Diablo, paipa demoniocuna cai mundota controlanajujpimi ñucanchicunaca shuj macanajuipi cuenda causanajunchi. Diabloca ñucanchicuna Jehovata, Jesusta cazuchunga na munanllu. Paipa esclavocuna cachun munashpami ashtaca tentaciongunata churan (Efesios 6:​11, 12, liingui). Cai mundo juyaillagu cashcata pensashpa chaipi cangapaj munachunmi Diabloca tentaciongunata churan. Apóstol Juanga nircami: ‘Pipash cai pachatara juyashpaca Taita Diospa juyaica na paipi causajunllu. Cai pachapi tucui imalla tiashcapash, quiquin munaipalla, imatapash ricushcandi munangapalla, yangata jariyashpa causanallami tian. Chaicunataca na Taita Dios yarichijunllu. Cai pachami chashna yarichijun’ nishpa (1 Juan 2:​15, 16).

⁷ Cunanbi gentecunaca ashtahuan charingapallami munan. Ashtaca culquita  charishpallami ali causasha nishca yuyaicunatami Diabloca caiman chaiman yachachijun. Chai yuyaicunata catishpami gentecunaca tucui ladocunapi centro comercial nishcacunata ruranajun. Propagandacunapipash ashtaca cosascunata charishpalla, yanga cushijushpa purinatallami yachachin. Ashtacacunaca Diospa mandashcacunata na cazuj gentecunahuan tandanajushpami shuj llactacunapi puringapaj viaje rin. Maipi cajpipash “llashaj culquita, carrota, ali huasita charinami cangui” nishpallami Jehovata na rijsij gentecunaca parlan.

8, 9. a) ¿Ima trampapita ashtacacunaca urmashca? b) ¿Imamandata chai trampapi urmanaca peligroso can?

⁸ Jesusta catijcuna cashpapash Jehovata na rijsij gentecunapa ruraicunata catinajujpimi apóstol Pedroca nirca: ‘Punllandi nali munaicunata rurashpami ninanda cushijunajun. Cangunahuan tandanajushpa micunajushpapash, paicunapa pandarishcahuanmi cushijunajun. Chashnacunata ruranaca tinirishcashna mapayashcami. Paicunaca ninanda jariyashpami cacharirishcata rimanajun. Ali causaita mascajuj gentecunataca nali munaicunahuanmi pandachinajun. Huatashcashna causajcunata cacharishunmi nishpapash, paicunallatami huaglita rurashpa gañanshna causanajun. Mishai tucushpaca mishajpa gañanmi tucun’ nishpa (2 Ped. 2:​13, 18, 19).

⁹ Imatapash ‘ricushcandi munaicunata’ rurashpaca, cai mundota madajuj Diablopa esclavocunami tucushun (1 Juan 5:19). Ashtacacunami llashaj culquita o ashtaca cosascunata charina trampapi urmashca. Chai trampamanda jarcarinaca shinllimi can.

10. ¿Picunatata Diabloca ashtahuanbacha pandachin?

¹⁰ Diabloca na ashtaca experieciata charijcunata, ashtahuanbachaca jovengunatami Evata cuenda pandachingaj munan. Shuj joven huambragu, cuitsagu o pipash Jehovapa esclavo tucungapaj munajujpica Diabloca ninandami culiran. Paica ima modopash Jehovata sirvijcunata Jehovamanda caruyachishpa Jehovata na cazuchunmi munan.

11. ¿Imamandata ashtahuan estudianatalla mascanaca nali canman?

¹¹ Cunanga israelitacunapa tiempopi esclavocunata cutin yaripashunchi. Rinrita utujuj horas rinrita ushashcata nanachishpapash jipamanga yalinmi carca. Rinrita utujushca señasllami quedan carian. Cunan tiempopi Jesusta catij jovengunapapash shinallatami can. Diabloca gentecunataca pensachinmi, ali trabajota charingapaj estudiashpallami ali causangui  nishpa. Shuj cumbacuna chai pensamietocunata charijpi paicunalla aparte canaca jovengunapaca shinllimi can. Shinapash Jesusta catijcunaca na ashtahuan estudiashpachu cushijuitaca tarinchi. Jesusca nircami: ‘Diosmanda yachajungapaj ninanda munajcunami ninanda cushijun’ nishpa (Mat. 5:3). Jesusta catijcunaca na Diablotachu sirvinchi, Jehová Diostalla sirvishpami causanajunchi. Jehovapa mandashcacunata juyashpami tutapash punllapash chai mandashcacunata yaria causanchi (Salmo 1:​1-3, liingui). Ashtahuan estudianata mascajcunaca Jehovapa mandashcacunapi pensaringapaj, Jehovamanda ashtahuan yachajungapaca na tiempota charinllu.

12. Ashtaca jovengunapaca ¿ima ishcai decisiongunata ricurin?

¹² Corinto llactamanda huauquicunaman escribishpami apóstol Pabloca tapurca: ‘Dios cayajuj punllapica ¿gañanllu carcangui? Na chaimanda llaquirinachu cangui. Shina cajpipash chaimanda llujshi ushanashnalla cashpaca llujshinallami’ cangui nishpa (1 Cor. 7:21). Apostolcunapa punllacunapi huaquin amocunaca millai millaicunami carca. Chaimandami huaquin esclavocuna libre llujshi ushanalla cashpaca libre llushinata mascanalla carca. Cunan punllacunapipash, ashtaca llactacunapica huaquin huatacunata estudianaca obligatoriomi can. Chai jipami jovengunaca estudiashpa catinata o tiempo completopi sirvinata agllangapaj libre can. Ashtahuan estudianata agllashpaca huatashcashnami quedanga (1 Corintios 7:​23, liingui).

13. Jehovata sirvijcunataca ¿ima estudiocunata ali causachun ayudan?

¹³ Colosas llactamanda huauquicunataca cashna nishpami apóstol Pabloca advirtirca: ‘Pipash cangunata pactarallapash aliguta yachajunami nij tucushpara pandachinman. Paicunaca Cristomanda na yachachishpami runacuna yachachishpa saquishcata, cai pachapajtalla cutin cutin yachachinajun’ nishpa (Col. 2:8). Cunanbi ashtaca profesorcunaca ‘runacuna yachachishpa saquishcatallami’ yachachinajun. Gentecunapa yachachishcacunata universidadcunapi yachachishpaca gentecuna aliguta trabajanata o llaquicuna ricurijpi imashina aliguta causanataca na yachachinllu. Cutin Jehovata sirvijcunaca, imata estudianata agllashpapash minishtirishca cosascunahuanlla Jehovata ali sirvinatami pundapi churan. Paicunaca apóstol Pablo Timoteoman consejashcatami yaria causan. Apóstol Pabloca nircami: ‘Imaguta charishpapash Diosta yaria causashpami, ninanda  charijyashcashna causanchi. Shinamandami micunaguta, churajunaguta charishpallata cushijushpa causanchi’ nishpa (1 Tim. 6:​6, 8). Jesusta catijcunaca ashtacata estudiashpa shuj shuj titulocunata llujchinapa randica gentecunaman villachishpa, yachachingapami ashtahuanga esforzarin (2 Corintios 3:​1-3, liingui).

14. Filipenses 3:8​pi nishca shinaca Jehovapa, Jesuspa esclavo tucuimandaca ¿imatata apóstol Pabloca nirca?

¹⁴ Apóstol Pablota yaripashunchi. Paitaca judiocunapa Leyta alipacha yachajushca Gamalielmi yachachirca. Chai estudiocunata charinaca cunanbi universidadta estudiashca cuendami carca. Shinapash Jehovapa, Jesuspa esclavo tucuimandami apóstol Pabloca nirca: ‘Ñucata Mandaj Jesusmanda yachajunaca juyaillagupacha cajpimi, punda imatapash alimi canga yajushcataca, tucuillatapacha cungarcani. Cristota juyashpa tucuita saquishpami, paihuan causangapaca jupa ismushcatashna tucuilla jichurcani’ nishpa (Filip. 3:8). Imata estudianata agllagrijushpapash cai textopi shimicunami Jesusta catij jovengunatapash taitamacunatapash aliguta decidichun ayudanga (dibujocunata ricupangui).

15, 16. a) Jehová Diosca ¿imashinata ñucanchicunataca yachachin? b) ¿Imamandata chashna yachachin?

¹⁵ Universidadcunaca ¿imashinata can? ¿Nachu ashtacacunaca universidadcunapi machan o pihuanbash cusahuarmishna puñun? ¿Nachu chaicunapi evolucionmanda yachachin? (Efes. 2:​2.) Cutin Jehovapa organizacionga tucui congregaciongunapimi alipacha yachachin. Cada semanami Bibliamanda Yachachingapaj Escuelapi yachajunajunchi. Shinallata soltero precursorcunapaca Soltero Huauquicunapa Escuelami tian. Cutin cazarashca precursorcunapaca Cazado Huauquipanicunapa Escuelami tian. Chai escuelacunami ñucanchi Amo Jehová Diosta cazuchun yachachin.

¹⁶ Shinallata Índice de las publicaciones Watch Tower nishcata, CD-ROM de la Watchtower Library nishcatapashmi charinchi. Chaicunami ñucanchicunataca Jehovata ashtahuan aliguta adorachun ayudan. Chai ayudacunahuanmi shuj gentecunapash Jehová Dioshuan ali tucuchun ayudai ushanchi (2 Cor. 5:20). Shinami paicunapash shuj gentecunata ayudai ushan (2 Tim. 2:2).

17. Ashtahuan ali educacionda agllajcunaca ¿ima bendiciongunatata chasquin?

¹⁷ Jesusca ishcai esclavocunamanda parlashpami nirca, paicuna aliguta sirvijpimi amoca ninanda cushijushpa paicunamanga ashtahuan responsabilidadcunata mingarca nishpa (Mateo 25:​21, 23, liingui). Ñucanchicunapash ashtahuan ali educacionda agllashpaca ninanda cushijushpami ashtaca bendiciongunata charishun. Michaelpa ejemplota ricupashun. Ali notacunata charijpimi profesorcunaca nirca, universidadman rinami cangui nishpa. Shinapash Michaelca shuj uchilla cursota catishpami rato trabajai callarirca, precursor tucurca. Chai decisionda agllaimandaca ¿paica arripintirircachu? Michaelca ninmi: “Precursorcunapa, ancianocunapa escuelacunami ñucataca ashtacatapacha ayudahuashca. Ashtaca culquitapash yali ashtaca bendiciongunata, jatun responsabilidadcunatami charishcani. Universidadman na rishcamandaca ninandami cushijuni” nishpa.

18. ¿Imamandata ninchi, Jehová Dios cushca educacionmi ashtahuan ali can nishpa?

¹⁸ Jehová Dios cushca educacionmi ashtahuan ali yachachin. Chai educacionmi ñucanchitaca esclavocuna cuenda Jehovata aliguta sirvichun, paipa munaita rurachun ayudan. Shinallata Jehová cushca educacionmi ‘yanga ismushpa tucurinamanda cacharichishpa, Paipa huahuacuna’ tucuna esperanzata charichun ayudan (Rom. 8:21). Ashtahuangarin Jehová cushca educacionmi Paita tucui shunguhuan juyashcata ricuchichun yachachin (Éx. 21:5).