Casi 400 huatacuna huashamanmi Gran Bretañamanda Edward Herbert shuti historiadorca nirca: “Na perdonai ushajcunaca paicunallata chimbana chacatami urmachinajun” nishpa. Ñucanchipash jipamanga perdonda mañana caimandami perdonana canchi (Mateo 7:12). Shinapash ¿imamandata ashtahuanbachaca perdonana capanchi? Apóstol Pablopa shimicunata ricupashun. Paica nircami: “Caishujhuan chaishujhuan aguantarishpa catichi. Caishujhuan chaishujhuan llaquichirishca cashpapash, perdonarishpami causana canguichi. Jehová Dios cangunapa juchata perdonashcashnallatami cangunapash perdonarina canguichi” nishpa (Col. 3:​13, NM).

Juchayucuna nacirimandami tucuicuna pitapash culirachinchi, llaquichinchi o pipash ñucanchita culirachin o llaquichin (Romanos 3:23). Shinaca tucuicunahuan tranquilo, aliguta causangapaca ¿imatata rurana capanchi? Apóstol Pabloca nircami, aguantarishpa perdonarinami canguichi nishpa. Chai consejoca cunanbipash alipachami can. Shinaca apóstol Pablopa shimicunamanda yachajupashun.

“Caishujhuan chaishujhuan aguantarishpa catichi.” Griego shimipi “aguantarishpa catichi” nishpaca pacienciata charichi nijunmi. Cai textomanda parlashpaca shuj jarica ninmi, Jesusta catijcunaca aguantarimandami “shujcuna culirachijpipash” pacienciata charishcata ricuchin nishpa. Shinallata “caishujhuan chaishujhuan” nishpaca ishcandimanda aguantarinatami nijun. Shinaca ñucanchipash shujcunata culirachijushcata yarishpami, paicunahuan aliguta causanata mascana capanchi. Cutin pipash llaquichijpica ¿imatata rurashun?

‘Caishujhuan chaishujhuan perdonarishpami causana canguichi.’ Cai textomanda parlashpaca shuj jarica nircami: “Perdonarishpami causana canguichi” nishpaca na shuj viajella perdonanatachu nijun. Ashtaca viajeta perdonanatami nijun nishpa. Shuj libropash nijunmi: “Perdonarishpami causana canguichi” nishpaca imagutapash caranshna perdonanata, cutinbash cutinbash perdonanatami nijun nishpa. Llaquichishca cajpipash perdonanami canchi. Huaquinbica ñucanchimi shujcunata perdonda mañana tucushun. Chaimandami perdonana capanchi.

“Jehová Dios cangunapa juchata perdonashcashnallatami cangunapash perdonarina canguichi.” Jehová ñucanchita perdonashcamandami ñucanchipash perdonana capanchi (Miqueas 7:18). Jehová Diosca na juchayu Dioschu can. Ñucanchi perdonda na minishtina cashpapash, paica ñucanchicuna arripintirijpica cushijushpami perdonan. Jehová Diosmi ñucanchimanga imashina aliguta perdonanata yachachin.

Jehová Diosca llaquij Diosmi can. Ñucanchicunapash paipa ejemplotami catina capanchi (Efesios 4:32–5:​1). Shinaca tapuripashunchi: “Jehová llaquishpa cutinbash cutinbash perdonajpica ¿imamandata ñucashnallata juchayu gentecunataca na perdonashayari? nishpa (Lucas 17:​3, 4).