1. a) Ashtacacunaca ¿imacunatata huashaman saquishca? b) ¿Imamandata chai cosascunata huashaman saquishca?

GENTECUNACA imatapash munashpaca ashtaca cosascunatami huashaman saquinlla. Huaquin ejemplocunata ricupashunchi. Taitamamacunaca huahuacunata aliguta viñachingapaj munashpami tiempota, culquita gashtashpa, ninanda esforzarin. Juegos Olímpicos nishcapi participajcunapash paicunapa llactata alipi saquingapaj munashpami amigocunatapash huashaman saquishpa ashtaca horascunata entrenan. Jesuspash Diospa Reinomanda villachingapaj munashpami culquita charinata, cazaranatapash huashaman saquirca (Mat. 4:17; Luc. 9:58). Jesusta catijcunapash Diospa Reinota apoyanamandami ashtaca cosascunata huashaman saquirca (Mat. 4:​18-22; 19:27). Ñucanchicunaca ¿imatata rurashun? ¿Imacunatashi huashaman saquinchiman?

2. a) Jesusta catijcunaca ¿imata rurangapajta maimanda tiempota llujchina can? b) Diospa Reinota ashtahuan apoyangapaj munashpaca ¿imatata huaquingunaca rurashca?

² Tucuicunallatami Jehová Diospa ñaupajpi ali ricurishpa catingapaca shinllita esforzarina canchi. Jehovata mañangapaj, Bibliata liingapaj, Familiahuan Adorana Tutata charingapaj, tandanajuicunaman ringapaj, villachingapaca maimandami tiempota llujchina canchi (Jos. 1:8; Mat. 28:​19, 20; Heb. 10:​24, 25). * Villachingapaj esforzarijpimi Jehová Diospash ashtacata bendiciajun. Chaimandami ashtaca gentecuna ‘Mandaj Diospa huasipi shayajuj urcucaman’ shamunajun (Is. 2:2). Huaquingunaca Diospa Reinota ashtahuan apoyangapaj munashpami paicunapa munaicunata huashaman saquishpa Betelpi  sirvinajun. Tantandajui Huasicunata, Jatun Tandanajui Huasicunatapashmi ruranajun. Shujcunaca jatun tandanajuicuna tiachunmi organizanajun o maijanbash llactapi jatun llaquicuna tiajpica ayudanajunmi. Na chashna ruraicunamandachu Paraisopica unai unaicaman causaita ushashun. Shinapash Diospa Reinota chashna apoyanaca alimi can.

3. a) Diospa Reinota ashtahuan apoyashpaca ¿imashinata sintirishun? b) ¿Imatata cada uno tapurina capanchi?

³ Cunanbimi Diospa Reinotaca ashtahuan apoyana canchi. Ashtaca huauquicuna panicuna paicunapa munaicunata huashaman saquishpa Jehová Diosta sirvinajujta ricushpaca ashtacatami cushijunchi (Salmo 54:​6, liingui). Diospa Reino chayamungacaman Diospa Reinota ashtahuan apoyashpaca ninandami cushijushun, ashtaca bendiciongunatapashmi charishun (Deut. 16:15; Hech. 20:35). Shinaca cada uno tapuripashunchi: “Diospa Reinota ashtahuan apoyangapaca ¿imacunatata huashaman saquita ushani? ¿Imashinata Jehovataca ñuca tiempohuan, culquihuan, fuerzahuan sirvijuni? ¿Ima responsabilidadcunatata na cungana cani?” nishpa. Chai tapuicunata yachangapaca israelitacuna paicunapa munai imata rurashcata yachajupashunchi. Shinami ñucanchicunapash Jehová Diostaca cushijushpa sirvishun.

4. Sacrificiocunata ruraimandaca ¿ima beneficiocunatata ñaupa israelitacunaca charirca?

⁴ Ñaupa israelitacunaca Jehová Dios juchacunata perdonachun nishpa, paipa ñaupajpi ali ricuringapaj nishpami animalcunata huañuchishpa sacrificiocunata ruran carca. Huaquin sacrificiocunataca maimandami rurana carca. Cutin shuj sacrificiocunataca paicunapa munaimi israelitacunaca rurana carca (Lev. 23:​37, 38). Paicunapa munai sacrificiocunata cushpaca animalgucunata huañuchishpami tucuillata Taita Diosman cuna carca. Rey Salomonba punllacunapimi Jehovaman ashtahuan ali sacrificiocunata rurashpa shuj ali ejemplota saquirca (2 Crón. 7:​4-6)

5. Pobrella israelitacuna tiajta yachashpaca ¿imatata Jehová Diosca rurarca?

⁵ Jehová Diosca paipa Leypica mandarcami, animalcunata huañuchishpami yahuarta jichana canguichi nishpa. Chaica jipa punllacunapi Jesús shamushpa imata ruranatami ricuchijurca (Heb. 10:​1-4). Shinapash Jehová Diosca pobrella gentegucuna tiajta yachashpami  nirca, shuj llamaguta o shuj huagrata na cui ushashpaca, ishcai urpigucunata cunallami canguichi nishpa. Shinami pobrella gentegucunapash cushijushpa sacrificiocunataca ruran carca (Lev. 1:​3, 10, 14; 5:7). Israelitacuna paicunapa munai jatun animalta o uchilla animalta cujpipash ¿imatata Jehová Diosca ashtahuan ricun carca?

6. a) Paicunapa munai animalcunata cushpa sacrificiocunaca ¿imashinata cana carca? b) Leypi mandashca shina na rurajpica ¿imata tucuna carca?

⁶ Israelitacuna paicunapa munai animalcunata cushpa sacrificajpipash Jehová Diosca sano, ali animalcunatallami chasquin carca (Lev. 22:​18-20). Imapash huagli o liciado animalgu cajpica na chasquinllu carca. Shinallata paicunapa munai animalta cushpa sacrificiota ruradorpash Leypi mandashca shinami limpio cana carca. Imapipash mapayashca cashpaca Jehovapa ñaupajpi cutin ali ricuringapami juchamandaca shuj animalguta Jehovaman cuna carca (Lev. 5:​5, 6, 15). Leypi nishca shinaca, chaita na rurajcunaca huañuihuanmi castigai tucuna carca (Lev. 7:​20, 21). Jehovapa Leypi mandashca shina shuj sano, ali animalguta sacrificashpaca cushilla sintirishpami concienciapipash tranquilo can carian (1 Crónicas 29:​9, liingui).

7, 8. a) Paicunapa munaicunata huashaman saquishpa Jehovata ashtahuan sirvinajushcamandaca ¿imashinata ashtaca huauquipanicunaca sintirishca? b) ¿Imatata tucuicunallata Jehová Diosman cuita ushapanchi?

⁷ Cunan punllacunapipash ashtaca huauquipanicunami paicunapa munaicunata huashaman saquishpa tucui shunguhuan Jehovata ashtahuan sirvinajun. Chaita ricushpaca ninandami Jehová Diosca cushijun. Huauquipanicunapash shujcunata ayudashpaca ninandami cushijun. Shuj huauquica Tandanajui Huasicunata rurashpa o jatun llaquicuna tiashca jipami ayudan. Paica ninmi: “Tandanajui Huasita rurajpi o jatun llaquicuna tiashca jipa ayudajpica ninanda agradicishpami huauquipanicunaca cushijun. Chaita ricushpami ñucapash ninanda cushijuni” nishpa.

⁸ Cunan punllacunapi Jehová Diospa organizacionbash Diospa Reinomanda villaicuna ashtahuan mirachunmi munan. Huata 1904​pica huauqui Charles T. Russellca nircami: “Jesús munashca shinaca quiquingunallatami cangunapa tiempohuan, imata rurai ushashcacunahuan, culquihuan imata ruranataca ali ricuna canguichi. Quiquingunapa tiempota, imatapash rurai ushashcacunata, culquitaca Taita Diosta alabangapami aliguta aprovechana  canguichi” nishpa. Ñucanchi munaicunata huashaman saquishpa Jehovata sirvinaca shinllimi can. Shinapash ashtaca bendiciongunatami cun (2 Sam. 24:​21-24). Chaimanda pensaripashunchi: “Ñuca tiempota, culquita, fuerzacunataca ¿imashinata ashtahuan aliguta aprovechai ushani?” nishpa.

9. Lucas 10:​2-4​pi shimicunamandaca ¿imatata yachajupanchi?

⁹ Ñucanchi tiempo. Ñucanchi publicaciongunata traducingapaj, imprimingapaj, Tandanajui Huasicunata rurangapaj, jatun llaquicuna tiashca jipa ayudangapaj, jatun tandanajuicuna tiachun organizangapaj o shuj minishtirishca cosascunata rurangapaca ashtaca tiempo, esfuerzomi minishtirin. Na ashtaca tiempota charimandaca ¿imashinata tiempotaca aliguta aprovechana canchi? Paipa catijcunata villachun cachajushpaca Jesusca nircami: “Ñambi maijanhuan tuparishpapash, alillachu canchi nishpaca, na shayarinachu canguichi” nishpa (Luc. 10:​2-4). ¿Imamandata Jesusca shina nirca? Shuj biblistaca nircami: “Chai punllacunapi gentecuna saludashpaca na cunanbishna umata shitashpalla, maquita cushpalla yalin carca. Paicunaca cutin cutin ugllarishpa, alpacaman urai cumurishpami saludarin carca. Shina rurashpaca ashtaca tiempotami chingachin carian” nishpa. Imashinami ricunchi, Jesusca na saludashpa yangata yalinataca na nijurcachu. Jesusca paipa catijcuna ashalla tiempo tiajta cuenta japishpa minishtirishca cosascunapi tiempota aliguta aprovechachunmi Lucas 10:​2-4​pi shimicunataca nirca (Efes. 5:16). Shinaca ñucanchicunapash Jesuspa consejota catishpa Diospa Reinota ashtahuan apoyangapaj tiempota llujchishpaca alimi canman.

10, 11. a) Diospa Reino ñaupajman catichun cushca culquitaca ¿imashinata Jehovapa organizacionga utilizan? b) ¿Imashinata 1 Corintios 16:​1, 2​pi shimicunaca ayudan?

¹⁰ Ñucanchi culqui. Diospa Reinomanda villachingapaca culquimi minishtirin. Cada huatami Jehovapa organizacionga superintendentecunapi, precursor especialcunapi, misionerocunapi ashtaca millón culquita gashtan. Pobrella llactacunapipash huata 1999mandami 24.500 Tandanajui Huasicunata rurashca. 6.400 Tandanajui Huasicunatapash ruranarami can. Ashtahuangarin cada quillami casi 100 millón Villajun, ¡Despertad! revistacunata llujchin. Cai tucuita rurangapaca ñucanchicunallatami usharishca culquita churashpa ayudanchi.

¹¹ Aliguta ayudachunmi apóstol Pabloca Jehová Dios yuyachijpi nirca, semana tucurijpi puchushcata churanapa randica, semana callari punllapillatami imagutapash cungapaj alichina canguichi nishpa (1 Corintios 16:​1, 2, liingui). Cunan punllacunapipash culquita nara gashtashpallatami mashnata cui ushashcata separana canchi (Luc. 21:​1-4; Hech. 4:​32-35). Shina rurajpica cushijushpami Jehová Diosca ricun.

12, 13. a) ¿Imata pensashpata huaquinbica Jehová Diosta na ashtahuan apoyangapaj munanchi? b) ¿Imashinata Jehová Diosca ayudan?

¹² Ñucanchipa fuerzacuna, rurashcacunapash. Tucuicunallatami imacunatapash ali rurai ushanchi, fuerzatapash charinchi. Tucui chaicunahuan Diospa Reinota pundapi churajpica Jehová Diosca ayudanmi. Jehová Diosca nircami, na fuerzata charinichu nijuj horascunaca ñucami cangunata ayudasha nishpa (Is. 40:​29-31). Huaquinbica pensashcanchimi, ñucaca nali rurai ushanichu, shujcunami ñucamanda yali ashtahuan ali preparadocuna can nishpa. Shina yuyaicunata charishpaca Oholiabta, Bezalelta Jehová Dios imashina ayudashcatami yarina canchi (Éx. 31:​1-6; página 13​pi dibujota ricupangui).

¹³ Jehová Diosca ñucanchita animanmi, cangunapa ali rurashcacunahuan sirvinataca na saquinachu canguichi nishpa (Prov. 3:27). Judiocunaca Diospa templota arreglanata cungashpami  shuj cosascunatara ruranajurca. Chaimandami Jehová Diosca nirca: ‘Canguna imashna causanajushcata’ o chai templota arreglanapi imashina ayudajushcataca ‘aligutami yarina’ canguichi nishpa (Ageo 1:​2-5). Shinaca ñucanchicunapash tapuripashunchi: “¿ Jehovapa munaitachu pundapi churajuni? Cai ‘tucurimui punllacunapica’ ¿Diospa Reinota ashtahuan apoyaita ushanichu?” nishpa.

14, 15. a) Pobrella llactacunapi huauquipanicunaca ¿ima ejemplotata ñucanchimanga saquishca? b) ¿Imatata rurana capanchi?

¹⁴ Ashtaca huauquipanicunaca pobre pobre llactacunapimi causan. Chaimandami ñucanchi organizacionga paicunata ayudangapaj esforzarin (2 Cor. 8:14). Pobrecuna cashpapash usharishca culquiguta churashpami chai huauquipanicunaca ayudan. Ashagutalla charishpapash tucui shunguhuan cujpica Jehová Diosca cushijushpami ricun (2 Cor. 9:7).

¹⁵ Africamanda shuj pobre pobre llactapi huauquipanicuna tarpunajushpaca, Jehovaman cungapaj nishpami shuj uchilla pushtuguta separan. Shinami chai tarpushca viñajpi jatushpaca chai culquihuan Diospa Reinotaca apoyan. Chai llactapillatami shuj mushuj Tandanajui Huasita minishtinajurca. Shinapash tarpuna punllacunapillatami Tandanajui Huasitaca ruragrinajurca. Shinaca ¿imatata chai llactamanda huauquipanicunaca rurarca? Paicunaca ayudangapaj munaimandami punllacunaca Tandanajui Huasita rurangapaj rin carca, cutin tutapica tarpungapaj rin carca. Paicunaca Macedonia llactamanda huauquipanicunashnami ‘imaguta na charishpapash’ shujcunata tucui shunguhuan ayudangapaj munarca (2 Cor. 8:​1-4). Shinaca ñucanchicunapash llashajllata charishpa o ashalaguta charishpapash ‘Mandaj Dios bendiciashcashnallatami imagutapash carana’ canchi (Deuteronomio 16:​17, liingui).

16. Ñucanchi sacrificiocuna Jehová Diospa ñaupajpi ali ricurichun munashpaca ¿imatata rurana capanchi?

¹⁶ Ñucanchipa munai sacrificiocunata Jehovaman cunajushpapash israelitacunapa ejemplota catishpami ñucanchi sacrificiocuna Jehovapa ñaupajpi ali ricurichun esforzarina canchi. Chaimandami Tandanajui Huasicunata ruranapi o jatun llaquicuna tiashca jipa ayudajushpapash, ñucanchi familia ima minishtishcata cuna canchi, espiritualmente ali cachunbash ricuriana canchi. Shujcunata ayudanamanda ñucanchi familiata na ali cuidajushpaca ¿nachu ñucanchica na charishca tiempota Jehovaman cunajunchiman? (2 Corintios 8:​12, liingui.) Ñucanchi espiritualidadtapash na descuidarinachu canchi (1 Cor. 9:​26, 27). Shinami Bibliapi mandashcashna causanajushpaca ninanda cushijushun. Ashtahuangarin ñucanchi sacrificiocunataca cushijushpami Jehová Diosca chasquinga.

17, 18. a) Diospa Reinota apoyanajuj huauquipanicunamandaca ¿imatata pensapanchi? b) ¿Imapita tucuicunallata pensarina capanchi?

¹⁷ Ashtaca huauquipanicunaca paicunapa culquihuan, tiempohuan, fuerzahuanmi Diospa Reinotaca apoyanajun (Filip. 2:17). Paicunataca ninandami agradicinchi. Shinallata Diospa Reinota apoyanajuj huauquicunapa huarmicuna, huahuacunaca ninandami cusata, taitata apoyashpa Diospa Reinota ayudanajun. Paicunatapash ashtacatami agradicinchi.

¹⁸ Shinapash Diospa Reinota apoyangapaca ninanda esforzarishpa catinarami canchi. Shinaca Jehovata mañashpa pensaripashunchi ¿imashinata Diospa Reinota ashtahuan apoyaita ushani? nishpa. Ashtahuan apoyashpaca cunan punllacunapipash shamuj punllacunapipash ashtaca bendiciongunatami charishun (Mar. 10:​28-30).