Mundo enteropimi diciembre quillapica, Jesús nacirishcata yaringapaj nishpa shuj pesebreta rurashpa uchilla muñecogucunata churan. Shinapash ¿ Jesusca llullu huahuagurachu can? . . . * Chaipaca Belén llacta ladolla pambacunapi llamagucunata michijcunahuan shuj tuta ima pasashcata yaripashun.

Shuj ángel ñapash ricurishpami michijcunataca nirca: ‘Cangunapa ali cachun shuj Quishpichijmi huacharishca. Paica Mandaj Cristomi’ can nishpa. Shinallata nircami, Jesustaca ‘animalcuna micuchun churana jahuapi maitushca sirijujtami’ taringuichi nishpa. Chai jipallami ashtaca angelcuna ricurishpa Diosta alicachinajurca.

Angelcuna Diosta alicachinajujta uyashpaca ¿imashinashi sintiringuiman? . . . Michijcunaca cushijushpami nirca: ‘Belenman rishpa Dios ñucanchiman villashcata ricugrishunchi’ nishpa. Shinami michijcunaca ‘Mariata, Joseta, huahuagutapash animalcuna micuchun churana jahuapi sirijujta tarirca’.

Belenmanga shuj gentecunapashmi chayanajurca. Ima pasashcata michijcuna parlajpica cushijunajurcami. Jesusmanda ashtahuan yachajushpaca ¿nachu cushilla sintiringui? . . . Diosta juyaimandaca Jesús imashina nacirishcata yachashpaca ninandami cushijunchi. Shinapash ¿imamandata gentecunaca ninanda cushijurca? Chaita yachangapaca María soltera cashca tiempopi ima pasashcata ricupashun.

Shuj punllaca ángel Gabrielmi Mariaman ricurishpa nirca: Shuj huahuagutami tarigringui. Paica ninan ushaitami charinga. Paica ‘jahua pachapi causajuj Diospa Churimi canga’. Paipa mandanaca napacha tucuringachu nishpa.

 Mariaca nircami, nara cazada canica imashinashi vijsayu quedasha nishpa. Chaimandami ángel Gabrielca nirca: ‘Diospa ushaimi candaca fuyushna llandunga. Shinami jucha illaj huahuaguta ungungui. Paitaca: “Diospa Churimi cangui” ninajungami’ nishpa. Jehová Diosca paipa Churipa causaitami shuj huahuagucunashna viñachun Mariapa vijsa ucupi churagrijurca.

¿Pesebreta rurashca pushtucunapi, quimsa “reyes magocunata” Jesuspa ladopi churajta ricushcanguichu? . . . Gentecuna shina churajpipash chaica na ciertochu can. “Reyes magocunaca” estrellacunata ricushpa adivinashpaca, Diospa ñaupajpi nalitami ruranajurca. Paicuna chayajpica, Jesusca ¿maipita carca? Bibliapica ninmi, ‘huasi ucuman yaicushpami huahuagutapash Mariatapash ricurca’ nishpa. Shinaca Jesusca ñana shuj llullu huahua carcachu, pesebrepipash ñana carcachu. Imashinami ricunchi, shuj juizulla huahuagumi Josehuan, Mariahuan huasipi causajurca.

Estrellacunata ricushpa adivinajcunaca, Jesustaca ¿imashinata tarirca? . . . Nara Belenman chayashpaca, estrellacunata ricushpa adivinajcunaca shuj “estrellatashnalla” catishpami, pundapica Jerusalenbi rey Herodespaman chayarca. Bibliapica ninmi, rey Herodesca Jesustaca huañuchingapami taringapaj munarca nishpa. Shinaca ¿pishi chai “estrellatashnallaca” churarca? . . . Diospa contra Diablomi churarca.

Diabloca munanmi Jesusca llullu huahuagurami can nishpa gentecunaca pensachun. Shinapash ángel Gabriel Mariaman imata nishcatami yarina capanchi. Paica nircami: Jesusca ‘mandajmi canga. Pai mandanaca napacha tucuringachu’ nishpa. Chaimandami, Jesusca ñami jahua cielopi mandajun, ñallami Diospa contracunata tucuchinga nishpa shujcunaman yachachina canchi.