1, 2. a) ¿Imamandata gentecunaca llullanatalla yaria causan? b) ¿Imashinata llullacunataca caiman chaiman ninajun? (Callari dibujota ricupangui.)

BIBLIACA ninmi, cai Alpata mandajuj Diabloca jatun llullami can nishpa. Chaimandami gentecunaca maipi cashpapash llullashpalla, pandachinatalla yaria causan (1 Tim. 2:14; 1 Juan 5:19). Ashtahuangarin ‘paipa punllacuna tucurijujta yachashpami’ Diabloca ushashcata culirajun (Apoc. 12:12). Gentecunapash Diablopa chaquita catishpami ashtahuan llullacuna tucunajun. Paicunaca Jehovata sirvijcunata pandachingapami munanajun.

² Huaquinbica televisionbi, periodicocunapi, Internetpimi testigo de Jehovacunamanda o paicunapa crishcacunamandaca caiman chaiman llullacunata ninajun. Chaicunata ricushpa, uyashpami huaquingunaca chai llullacunata crishpa manllarishca, huaquinbicarin culirashca.

3. Ama umachi tucungapaca ¿ima ayudatata charipanchi?

³ Llullacunahuan Diablo umachingapaj munajpipash ñucanchica Bibliatami charinchi. Bibliami ‘nalicuna ali purichun’ ayudan (2 Tim. 3:16). Apóstol Pabloca Tesalónica llactamanda huaquin huauquicuna panda yachachishcacunahuan umachi tucunajujpimi cashna escribirca: “Na umachi tucunachu canguichi” nishpa (2 Tes. 2:​1, 2, NM). Shinaca apóstol Pablopa consejomandaca ¿imatata yachajunchi? ¿Imashinata cunanbipash ayudan?

4. a) Tesalónica llactamanda huauquipanicunataca ¿imashinata apóstol Pabloca ‘Jehovapa punllaca’ shamujunmi nishpa advirtirca? b) Cunan punllacunapipash ¿imashinata ñucanchicunataca advirtijun?

⁴ Tesalónica llactamanda huauquicunaman punda cartata escribijushpaca “Jehová Diospa punllamandami”  apóstol Pabloca parlarca (1 Tes. 5:​1, 2, NM). Huauquicuna ama ‘yana yana tutapishna’ cachun munashpami, cangunaca ‘michapa huahuacunami’ canguichi nirca. Apóstol Pabloca nircami: ‘Ñucanchica, aliguta yarishpa rijchariami causana canchi’ nishpa (1 Tesalonicenses 5:​5, 6, liingui). Cunan punllacunapipash Babilonia shuti jatun pueblo o tucuilla panda religionguna tucurichunmi shuyanajunchi. Tucuilla panda religionguna tucurijujta ricushpami Jehovapa punlla callarishcataca yachashun. Cunanbimi Jehovapa munai imashina pactarijujtaca ashtahuan ali intindinajunchi. Ashtahuangarin, congregacionbimi ñucanchimanga rijcharia causashpa catichun advertenciacunata cun. Chai advertenciacunami ‘ali yuyaicunata charishpa’ Jehovata sirvishpa catichun ayudan (Heb. 5:14).

5, 6. a) Tesalónica llactamanda huauquicunaman shuj cartatapash escribishpaca ¿imatata apóstol Pabloca nirca? b) Jehová Diospa mandashcata cazushpa ¿imatata Jesusca ruranga? c) ¿Ima tapuicunapita pensarina capanchi?

⁵ Tesalónica llactamanda huauquicunamanga shuj cartatapashmi apóstol Pabloca escribirca. Chai cartapica nircami, ‘Taita Diosta na rijsijcunata, ali villaicunata na cazujcunataca’ Jehová mandashcashnami Jesusca llaquichinga nishpa (2 Tes. 1:​6-8). 2 Tesalonicenses capítulo 2​pica, Jehová Diospa punlla chayamujushcata crishpa huaquinguna manllarinajushcatami parlan (2 Tesalonicenses 2:​1, 2 *). Chai punllacunapi Jesusta catijcunaca Taita Diospa munai imashina pactarinataca na cabal yacharcachu. Chaimandami apóstol Pabloca profeciacunamanda parlashpa nirca: ‘Cunanbica ashatallami yachanchi. Shina cashpami Diosmandaca na tucuita villai ushanchi. Tucuita aligutapacha yachana punllacuna chayamujpimi, ashallata yachashcapash tucuringa’ nishpa (1 Cor. 13:​9, 10, Mushuj Testamento Imbabura). Chai tiempopi huauquicuna na tucuita yachajpipash apóstol Pablopa, apóstol Pedropa cartacuna, shinallata chai punllacunapi ungidocunapa consejocunami shinlli feta charichun ayudarca.

⁶ Apóstol Pabloca nalicuna ali purichun ayudangapaj munashpami nirca, Jehová Diospa punlla ña chayamunallapica congregacionbi llullata yachachijcuna, ‘juchata ruraj runami’  ricuringa nishpa. * Chai jipami Jehová Diospa tiempo chayajpica Jesusca tucuilla pandachi tucushcacunata tucuchinga. Shinapash ¿imamandata tucuchinga? Apóstol Pabloca nircami: ‘Na llullashpa villajuj Shimita na chasquishcamandami’ tucuchinga nishpa (2 Tes. 2:​3, 8-10). Shinaca tapuripashunchi: “¿Bibliapi yachachishcacunataca alicachinichu? Cai revistapi o ñucanchi publicaciongunapi mushuj entendimientocuna llujshijpica ¿aliguta intindingapaj esforzarinichu?” nishpa.

7, 8. a) Ñaupa tiempopi Jesusta catijcunaca ¿ima trampacunatata charirca? b) Cunanbipash ¿ima peligrota tian?

⁷ Jesusta catijcunaca congregacionbi llullata yachachingapaj munajcunamanda cuidarishpapash shuj trampacunamandapash cuidarinami carca. Apóstol Pabloca Timoteomanga escribircami: ‘Culquita juyashpa causanami nalita ruranataca sapishna callarichin’ nishpa. Ashtahuangarin nircami, culquimandami ‘huaquingunaca crishpa catijushcatapash saquishpa, ninan llaquicunata apanajun’ nishpa (1 Tim. 6:10). Shinallata aichapa munaita rurashpa causanapash shuj trampami carca (Gál. 5:​19-21).

⁸ Tesalonicamanda huauquicunataca ‘llullashpa villajcunamanda’ cuidarinami canguichi nishpami Pabloca advirtirca. Congregación ucupillatami ‘Jesusta catijcuna paicunata catichun’ munashpa ‘jatun nalicunata rimajcuna’ tiarca (2 Cor. 11:​4, 13; Hech. 20:30). Jipamanga Éfeso llactamanda congregaciondami Jesusca ‘llullacunataca’ na catishcanguichichu nishpa alicachirca. Chai huauquicunaca chai runacuna llulla cashcatami ricuchirca (Apoc. 2:2). Tesalonicensescunaman jipa cartata escribishpaca apóstol Pabloca nircami: ‘Huauquicuna, panicuna, Jesucristopa shutipimi mandanchi: Ñucanchi yachachishcata na cazushpa imatapash na rurashpa purinajujcunahuanga na tandanajunachu canguichi’ nishpa (2 Tes. 3:​6, 10). Shinaca imatapash na rurashpa purijcuna o quilla runacunamandapash caruyana cashpaca ¿nachu congregacionbi llullata yachachingapaj munajcunamandacarin caruyana carca? Congregacionbi llullata yachachingapaj munajcunahuan tandanajuna peligroso cajpimi paicunamandaca caruyana carca. Cunan punllacunapipash peligrosomi can (Prov. 13:20).

9. ¿Imamandata Jehovapa organizacionda nalicachishpa parlajcunamanda o llullata yachachijcunamandaca cuidarina capanchi?

⁹ Ninan manllanai llaqui punllacunapash, cai nali mundo tucurina punllapash ñallami chayamunga. Chaimandami apóstol Pablopa consejocunataca cunan punllacunapi ashtahuan cazuna canchi. ‘Taita Diospa juyaita chasquishca’ jahua, ‘Diospajta ruranata’ saquishpaca cielopi o cai Alpapi unai unaicaman causana esperanzataca chingachishunmi (2 Cor. 6:1). Tandanajuicunaman shamushpa Jehovapa organizacionda nalicachishpa parlajcunamanda o llullata yachachijcunamandaca cuidarinami canchi (2 Tes. 3:​13-15).

10. Tesalonicamanda huauquicunaca ¿ima villashcacunatata na saquina carca?

¹⁰ Pabloca nircami, ‘cangunaman villashcataca’ na saquinachu canguichi nishpa (2 Tesalonicenses 2:​15, liingui). Apóstol Pabloca ¿ima villashcacunamandata parlajurca? Villashcacuna nishpaca panda religiongunapa yachachishcacunamandaca na parlajurcachu. Villashcacuna  nishpaca Jesuspa yachachishcacunata, shinallata Pabloman, shuj huauquicunaman Jehová Dios yuyachishca shimicunatami villashcacuna nijurca. Corinto llactamanda huauquicunataca Pabloca nircami: ‘Ñucataca na cungashpami ñuca imata yachachishpa mingashcataca aliguta catinajunguichi. Shina cajpimi cangunataca, cushijushpa alicachini’ nirca (1 Cor. 11:2). Chai villashcacuna Taita Diospa cajpimi chai yachachishcacunapica tucui shunguhuan confiana carca.

11. Pandachichun saquijcunaca ¿imashinata Jehovamanda caruyan?

¹¹ Hebreocunaman escribishpaca apóstol Pabloca nircami, ‘chingarijcuna’ ‘anchurijcunami’ feta chingachishpa jatun llaquicunapi urman nishpa (Hebreos 2:1 *; 3:​12, liingui). Imashina chingarijta, anchurijta aliguta intindingapaca pensaripashunchi: Yacu manña ladopi shuj uchila barcopi tiajushcanchiman. Shina tiajujpica yacuca na sintijtami manñamandaca asha asha caruyachinman. Shinallata pensaripashunchi, yacu manñamanda caruyachun nishpa chai uchila barcota tanganajushcanchiman. ¿Nachu ñucanchi culpamandallata barcoca yacu manñamanda anchurinchiman? Imashinami ricupanchi, pandachichun saquishpa, Bibliapi confianata saquishpaca Jehovamanda caruyashunmi.

12. ¿Imacunata espiritualmente pandachinman?

¹² Cunanbica ¿imacunata ñucanchicunataca pandachinman? Huaquin ejemplocunata ricupashunchi. Huaquingunaca imapash gushtashca cosascunata rurashpa, mensajecunata cachashpa contestashpa, deporte pugllai noticiacunata ricushpa o shuj gentecuna imashina causanajujta Internetpi ricushpami ashtaca tiempota chaipi yalin. Na cuidarijpica ñucanchicunatapashmi chai ruraicunaca pandachinga. Jehovata tucui shunguhuan sirvichunga na saquingachu. Shinami Jehová Diostaca ñana tucui shunguhuan mañashun. Bibliata yachajungapaj, tandanajuicunaman ringapaj, villachingapajpash na tiempota charishunllu. Shinaca ama pandaringapaca ¿imatata rurashun?

13. a) Apóstol Pedro nishca shinaca ¿imashina gentecunata cai punllacunapica causana carca? b) Ñucanchi fe ama chiriyachunga ¿imata ayudanga?

¹³ Ñucanchi fe ama chiriyachunga ‘tucurimui punllacunapi’ causanajushcataca na cunganachu canchi. Shinallata tucurimui punllacunapi causajushcata na cringapaj munaj gentecunamandapash caruyanami canchi. Apóstol Pedroca nircami: ‘Asishpa ricujcunami shamunga. Chaicunaca ningami: “Cristo tigramushami nishcapash ¿maita pactanyari? Taitacuna huañushca punllamandapacha imapash chashnallatami tiajunlla. Tucui ima tiachunbash Dios churashca punllamandami cunangaman chashnallata” ’ tiajun nishpa (2 Ped. 3:​3, 4). ‘Tucurimui punllacunapi’ causanajushcata ama cungangapaca cada punllami Bibliata liina, yachajuna canchi. Congregacionbi llullata yachachingapaj munajcunaca punda huatacunapi ricuri callarishpapash cunan punllacunacamanmi tian. ‘Juchata ruraj runaca’ cunangamanmi Jehovata sirvijcunataca catiriashpa llaquichijun. Chaimandami Jehovapa punlla ñalla chayamunataca yaria causana canchi (Sof. 1:7).

14. Villachishpa purinaca ¿imashinata ñucanchita ayudan?

¹⁴ Espiritualmente rijcharia cangapaj, pipash ama pandachichunga ali villaicunata villachinataca na saquinachu canchi. Jesusca mandarcami, tucui llactamanda gentecuna ñucata catichunmi ñuca yachachishcacunata yachachina canguichi nishpa. Paicunallata espiritualmente ali cachunmi chashna mandarca. Gentecunaman yachachishpaca ñucanchillatami cuidarinajunchi  (Mat. 28:​19, 20). Shinaca Jesuspa mandashcata pactachingapaca cushijushpami villachina canchi. Tesalonicamanda huauquicunaca na mandajpillachu villachishpa purinajurca. Apóstol Pabloca paicunataca nircami: ‘Diospa espíritu ima nijujtaca pactara jarcanguichiman. Pactara Dios ima nishcata villanata yangapi churanguichiman’ nishpa (1 Tes. 5:​19, 20). Ashtahuangarin ¿nachu Bibliapi profeciacunamanda parlanaca rijcharia causachun ayudan?

15. Familiahuan Adorana Tutapica ¿imacunamandallata yachajuita ushapanchi?

¹⁵ Tucuicunallatami ñucanchi familiacuna aliguta villachichun munanchi. Chaimandami huaquin huauquicunaca Familiahuan Adorana Tutapa huaquin minutocunapica imashina villachinata yachajunajun. Gentecuna uyajpica ¿imatata cutin visitashpaca nisha? ¿Ima temacunatashi uyangapaj munanga? ¿Ima hora visitanashi ali canman? nishpa yachajunaca alimi canman. Cutin ashtacacunaca Familiahuan Adorana Tutapa huaquin minutocunapica tandanajuicunapa, chaipi comentangapami prepararin. Ñucanchicunapash tandanajuicunapa prepararishpa, tandanajuicunapi comentashpaca ñucanchi feta shinlliyachishpami llullacuna pandachichunga na saquishun (Sal. 35:18). Huaquingunaca Bibliapi imatapash na claro nijujpimi cashnami chashnami canga nishpa pandari callarin. Shinapash imashinami ricupanchi, Familiahuan Adorana Tutapi yachajunami chai trampapi ama urmachun ayudanga.

16. Ungidocunaca ¿imamandata aliguta pensarin, llullacuna pandachichunbash na saquin?

¹⁶ Cai tucui huatacunacamanga Jehová Diosca ashtaca profeciacuna imashina pactarijtami intindichishca. Chaicunata yarishpami shamuj punllacunapi profeciacuna pactarinatapash crinchi. Ungidocunaca Jesucristohuan cielopi causana esperanzatami charin. Chai esperanzata charimandami aliguta pensarin, llullacuna pandachichunbash na saquin. Ungidocunaca tesalonicensescunaman escribishca cai shimicunataca shungupimi charin: ‘Juyashca [huauquipanicuna] cangunamandami Taita Diosta punllandi pagui ninajunalla canchi. Cangunataca Diospa espíritu Diospalla causachun rurashcamanda, na llullashpa villajuj Shimita crishcamandami agllarca’ nishpa (2 Tes. 2:13).

17. ¿Imashinata 2 Tesalonicenses 3:1-5​pi shimicunaca animan?

¹⁷ Cai Alpapi unai unaicaman causana esperanzata charijcunapash llullacuna pandachichunga na saquinachu can. Quiquinbash cai Alpapi causana esperanzata charijpica, Tesalónica llactamanda ungidocunaman escribishca shimicunaca ninandami animanga (2 Tesalonicenses 3:​1-5, liingui). Chai ali shimicunahuan animashcamandaca tucui shunguhuanmi agradicinchi. Tesalonicensescunaman escribishca cartacunaca llullacunata ama uyachun, ama crichunmi advirtirca. Tucurimui punllacunaca ñallami tucuringa. Shinaca apóstol Pablopa advirtishcacunata cazupashunchi.