1, 2. a) Jesusta catijcunaca ¿ima punllatata yarina capanchi? b) ¿Imamandata chai punllataca yarina capanchi?

IMA fechatata ashtahuan yaringui nishpa tapujpica ¿imatata nipanguiman? Cazarashca cashpaca ¿cazarashca fecha punllatami yarini nipanguimanllu? Huaquin gentecunaca paicunapa llacta ima fechapi libre quedashcatami ashtahuan yarin. Shinapash ashtacacunaca 3.500 yali huatacunatami shuj punllata yarinajushca. Chai punllaca ¿maijanda can?

² Chai punllaca Pascua punllami can. Ñaupa tiempo israelitacunaca Egipto llactapi esclavocuna cuenda causajushcamanda salvarishpami, Pascua punllata yari callarirca. Shinapash ¿nachu quiquinga pensaripashcangui, judiocunami Pascuata yarin carca, ñucaca Jesustami catini, judiocunapa Pascua punllataca ñana yarinachu cani nishpa? Shinapash Bibliapica ninmi: ‘Pascua punllapi Diosman carajpi huañuchishca Llamagushnami, Cristoca ñucanchimanda huañurca’ nishpa (1 Cor. 5:7). Bibliapica ¿imamandata shina nin? Chaita yachangapaca judiocunapa Pascua imashina cashcata, shinallata Jesuspa mandashcahuan imapi igual cashcata yachajupashunchi.

3, 4. Israelitacunaca ¿imamanda Pascuata rurai callarirca?

³ Mundo enteropi ashtaca gentecunaca, na judiocuna cashpapash Bibliapi Éxodo librota liishpa, pipash parlajpi o peliculacunapi ricushpami Pascua punlla imashina tiai callarishcataca yachajushca. Shinapash ¿chai punllapi ima pasashcata yaripanguichu?

⁴ Yaripashun. Israelitacunaca ashtaca huatacunatami Egipto llactapi esclavocuna cuenda causanajurca. Chaimandami Jehová Diosca Moisesta Aarondapash faraonbaman cacharca israelitacunata richun saquipai nichun. Shinapash chai faraonga ninanda jariyashcami carca. Israelitacuna  richunga na saquircachu. Chaimandami Jehová Diosca 10 jatun plagacunata cachashpa Egipto llactapi causajcunataca llaquichirca. Último plagapica Egipto llactapi causajcunapa punda churicunami huañurca. Shinami faraonga tucuilla israelitacunata richun saquirca (Éx. 1:11; 3:​9, 10; 5:​1, 2; 11:​1, 5).

5. Egiptomanda libre llujshingapaca ¿imatata israelitacunaca rurana carca? (Página 18​pi dibujota ricupangui.)

⁵ Egiptomanda libre llujshingapaca ¿imatata israelitacunaca rurana carca? Israelitacunaca Jesús shamungapaj 1.513 huatacuna faltajuj tiempopimi causanajurca. Chai tiempoca plantacuna sisana tiempomi carca. Chai tiempotami hebreocunaca abib quilla nin carca. Abib quillatami jipamanga nisán quilla nin carian. Jehová Diosca 10 de nisán punllatami israelitacunataca mandarca, 14 de nisanba segurarinami canguichi nishpa. Chai tiempopica Indi huashajushcamanda cayandi Indi huashajungacamanmi shuj punlla nishpa cuentan carca. Shinaca chai tiempopi 14 de nisán punllaca chishita callarishpa cayandi chishitami tucurin carca. Chai punllaca cada familiami shuj llamaguta o shuj chivoguta huañuchishpa yahuartaca pungu yaicunata charijuj caspipi javina carca (Éx. 12:​3-7, 22, 23). Chai jipaca llamata cusashpa, levadura illaj tandahuan huaquin jihua plantacunatapashmi micuna carca. Chaipimi Jehová Diospa angelca Egipto llactapi tucuilla punda churicunata huañuchishpa yalina carca. Jehovata cazuj israelitacunaca tucuilla salvarishpami Egiptomanda libre llujshina carca (Éx. 12:​8-13, 29-32).

6. ¿Imamandata israelitacunaca cada huata Pascuataca yarishpa catina carca?

⁶ Egiptomanda salvarishcata yarichunmi Jehová Diosca israelitacunata mandarca: ‘Cai punllami cangunapaca yarina punlla canga. Chai punllataca mirai miraicunacaman Mandaj Diosman jatun fiestata ruranguichi. Chai punllataca, tucui causaipimi pactachinajuna canguichi’ nishpa. Pascua punllata 14 de nisanda rurashca jipaca canchis punllacamanmi shuj fiestata rurana carca. 14 de nisandalla Pascua punllata yarina cajpipash chai 8 punllacunatami Pascua nin carian (Éx. 12:​14-17; Luc. 22:1; Juan 18:28; 19:14). Jehová mandashca shinaca, cada huatami israelitacunaca Pascuata yarishpa catina carca (2 Crón. 8:13).

7. Paipa catijcunahuan útimo Pascua punllata yarishpaca ¿imatata Jesusca callarichishpa saquirca?

⁷ Jesuspash apostolcunapash judiocunami carca. Judiocuna caimandaca Moisesman cushca leycunata cazushpami cada huata Pascuata yarin carca (Mat. 26:​17-19). Último Pascuata yaringapaj tandanajushca jipaca Jesusca mandarcami, cunanmandaca ñucata yarishpa micuitami cada huata rurana canguichi nishpa. Chai micuitami Bibliapica Apunchij Jesusta Yarishpa Micui nin. Shinapash ¿ima punllapita chai punllataca yarina carca?

8. Judiocunapa Pascuamanda parlashpa, Jesusta Yarina Micuimanda parlashpaca ¿imatata yachangapaj munanchiman?

⁸ Pascuata, último viajeta yarishca jipallami Jesusca Paita Yarishpa Micuita rurai callarichun mandarca. Chaimandami Jesusta Yarina Micuitaca 14 de nisán punllatallata rurana can. Jesusta ali catijcunaca 14 de nisán punllallatami Jesús mandashcataca pactachinchi. Shinapash cunan tiempo judiocunaca ñucanchicuna Jesús Huañushcata Yarina punllapica na Pascuataca yarinllu. Shuj fechapimi ruran. Shinaca ¿imamandata cai ishcai fechacuna ricurin? Ricupashun. 14 de nisán punllapi ima horas Pascuata rurana cashcata yachachunmi Jehová Diosca mandarca,  ‘chai llamagutaca tucuilla tandanajushca israelitacunami, ña chishajujpi huañuchina’ canguichi nishpa. Cai textopi, ña chishajujpi nishca shimi tiajujta ricushpami huaquingunaca 14 de nisandami Pascuataca yarina can nin, cutin shujcunaca shuj punllapimi Pascuataca yarina can nin (Éxodo 12:​5, 6, liingui).

9. Éxodo 12:6​pi nishca shinaca ¿ima horasta llamagutaca cungata muchushpa huañuchina carca?

⁹ Éxodo 12:6​pi nishca shinaca, llamagutaca ña ‘chishajujpimi’ huañuchina carca. Judiocunapa Tanakh nishca Bibliapi, shuj Bibliacunapipash ‘amsayajujpi’, ‘ña tutayajujpi’ nishpami cai shimitaca traducin. Llamagutaca 14 de nisán punlla callarijuj horas, Indi huashajushca jipalla, punchalla caj horaspimi cungata muchushpa huañuchina carca.

10. Huaquin judiocunaca ¿ima punllapita Pascua llamaguta huañuchin carca nin? Shinapash ¿chai yuyaicunaca Bibliamandachu can?

¹⁰ Jipa punllacunamanga huaquin judiocunaca pensai callarircami, Jehovapa temploman apashca llamagucunata huañuchingapaca ashtaca horascunami minishtirishcanga nishpa. Chaimandami paicunaca yarca, Éxodo 12:6​pi shimicunaca 14 de nisán punlla tucurijujpimi cashcanga nishpa. Chai judiocunapa yuyaicuna cierto cajpica ¿ima punllata israelitacunaca Pascuata yarin cashcanga? Jonathan Klawans shuti profesorca ninmi: “Indi huashajushca jipami judiocunapaca shuj punlla callarin carca. Llamacunataca 14 de nisanda huañuchi callarishpami 15 de nisanda Pascua micuitaca ruran carca. Shinapash chai fechacunataca Bibliapa Éxodo libropica na villanllu” ninmi. Diospa temploca huata 70​pimi tucurirca. Chai punllacunacaman ima punllapi Pascuata yarin cashcataca chai tiempopi ali yachachijcunapash na villarcachu.

11. a) Huata 33​pi Pascuata yarina punllapica ¿imata pasarca? b) ¿Imamandata 15 de nisán punllataca samana o sábado “Jatun” punlla nin? (Notata ricupangui.)

¹¹ Shinaca ¿ima punllapita huata 33​pi Pascuataca rurarca? Jesusca Pascuata yarishpa llamaguta huañuchina punlla chayamujujpimi 13 de nisán punllataca Pedrota Juandaca mandarca, ‘Pascua punllapi micungapaj alichigrichi’ o seguragrichi nishpa (Luc. 22:​7, 8). Shinami Indi pacajushca jipa 14 de nisán punllata Pascuataca yarishpa micurca. Ashtahuangarin Jesusca Pascuata yarishpa micushca jipallami Paita Yarishpa Micuita cunanmandaca yaringuichi nishpa mandarca (Luc. 22:​14, 15). Chai tutami contracunaca Jesusta prezo japishpa huañuchinami canchi nirca. Shinami 14 de nisán ña chaupi punlla tucujujtaca shuj jatun racu caspipi Jesustaca huarcurca. Chai chishillatami Jesusca huañurca (Juan 19:14). Shinaca ‘Pascua punllapi Diosman carajpi huañuchishca Cristoca’ 14 de nisán punllapimi huañurca. Imashinami judiocunaca 14 de nisanbi llamagucunataca huañuchin carca chai punllapillatami Jesuspash huañurca (1 Cor. 5:7; 11:23; Mat. 26:2). Shinallata 14 de nisán punlla ña tucurijujpimi Jesusca pambai tucurca. Chai horasca nara 15 de nisán punlla callarircachu (Lev. 23:​5-7; Luc. 23:54). *

12, 13. ¿Imamandata huahuacunapash Pascuapi ima pasashcata aliguta yarin cashcanga?

¹² Cunanga Egipto llactapi ima pasashcata cutin yaripashunchi. Moisesca israelitacunataca mandarcami, unai unaicamanmi ‘tucui causaipi’ Pascuataca yarina canguichi nishpa. Pascuata yarinajujta ricushpami imamanda Pascuata  ruranajunguichi nishpa huahuacunaca taitamamacunata tapunajurianga (Éxodo 12:​24-27, liingui; Deut. 6:​20-23). Pascuata ruranami huahuacunatapash Pascuapi ima pasashcata ‘yarichun’ ayudana carca (Éx. 12:14).

¹³ Pascuata imamanda yarina cashcata taitamamacuna yachachijpimi huahuacunapash paicunapa huahuacunamanga Jehová cierto tiashcata, paita sirvijcunata ayudangapaj listo cashcata yachachi ushashcanga. Jehová Diosca paipa llactata llaquishpa ayudangapaj munaimandami ‘Egiptopi causajcunata huañuchishpa’ israelitacunataca salvarca.

14. Pascua punllamandaca ¿imatata taitamamacunaca huahuacunaman yachachita ushan?

¹⁴ Cunan punllacunapi Jesusta catij taitamamacunapash Pascuapi ima tucushcata cada huata huahuacunaman parlanaca na minishtirinllu. Shinapash ¿huahuacunamanga yachachijunguichu Jehová Diosca Cuidaj Diosmi can nishpa? ¿Huahuacunaca cuenta japinllu quiquinguna Jehová Dios cuidajta tucui shunguhuan crijta? (Sal. 27:11; Is. 12:​2.) Jehová Dios Cuidaj Dios cashcataca na shuj discursota cushpa cuendaca huahuacunamanga yachachinachu can. Cushilla, aliguta parlashpami huahuacunamanga yachachina can. Shina rurashpami Jehová Diospi ashtahuan confiachun ayudangui.

15, 16. Pascua punlla parlocuna, Egiptomanda israelitacunata llujshishca parlocunaca ¿imatata ñucanchimanga Jehová Diosmanda yachachin?

¹⁵ Pascuamanda yachajushpami Jehová Dios cuidashcata yachanchi. Cuidashca jahuapash Jehová Diosca salvanmi. Israelitacunata imashina salvashcata yaripashun. Jehová Diosca Egiptomanda llujchishpami maita rinata yachachunga punllaca pilarshnalla fuyuta churarca. Cutin tutaca pilarshnalla ninatami churarca. Shinallata Mar Rojopa yacucunata chaupijpimi israelitacunaca yacu chaupita yalirca. Ña chaishuj ladoman yalishpaca egipcio soldadocuna tucuilla huañujtami ricurca. Chaimandami paicunaca ninanda agradicishpa candarca: ‘Ñucaca Mandaj Diosmanmi candasha. Paica caballocunandi soldadocunandimi mama cuchapi huashajuchishca. Mandaj Diosca ñucata shinllichij, ñucata quishpichijmi’ can nishpa (Éx. 13:​14, 21, 22; 15:​1, 2; Sal. 136:​11-15).

¹⁶ Shinaca Jehová Dios Salvaj Dios cashcataca ¿huahuacunaman yachachinajupanguichichu? Imata parlajushpapash o ima decisionda agllagrijushpapash ¿salvanata yachaj Diospi confiashcata huahuacunaman yachachinajunguichichu? Jehová Dios Salvaj Dios cashcata ashtahuan yachajungapaca Familiahuan Adorana Tutapi Éxodo capítulo 12manda 15​caman yachajushpaca alimi canman. Shuj punllacunapash Familiahuan Adorana Tutapi Hechos 7:​30-36, Daniel 3:​16-18, 26-28​ta yachajushpaca alimi canman. Jovengunapash mayorllacunapash, israelitacunata cuenda ñucanchitapash shamuj punllacunapi Jehová Dios salvanataca tucui shunguhuanmi confiana canchi (1 Tesalonicenses 1:​9, 10, liingui).

17, 18. Judiocunapa Pascuapi llamagupa yahuarmandaca ¿imatata yarina capanchi?

¹⁷ Moisesman cushca Leypica Pascuata ruranguichi nishpami mandajurca. Shinapash ñucanchicunaca ñana chai Leyta catinajunchichu. Chaimandami judiocunapa Pascuataca ñana ruranchi (Rom. 10:4; Col. 2:​13-16). Cunanbica Diospa Churi huañushcatami yarinchi. Shinapash judiocunapa Pascuamandaca ashtaca cosascunatami yachajui ushanchi.

¹⁸ Israelitacunapa punda churicunaca, huasicunaman yaicuna pungu caspipi llamagupa yahuarta javijpimi salvarita usharca. Cunan punllacunapi Jesusta catijcunaca, judiocuna Pascuata rurashca punllapi o shuj punllacunapipash na animalcunata huañuchishpa Jehová Diosman cunajunchichu. ‘Diospalla tandanajushca punda huacharishca huahuacunata’ o unguidocunataca apóstol Pabloca nircami, Jesús ‘ñucanchimanda jichashca yahuarmandami’ unai unaicaman causaita ushanchi nishpa (Heb. 12:​23, 24). Unai unaicaman cai Alpapi causana esperanzata charijcunapash Jesuspa yahuarmandami salvarita ushan. Shinaca tucuicunallata cai shimicunata yaripashunchi: ‘Jesucristopa yahuarmandami, Diosca ninandapacha juyashpa, ñucanchipa juchacunataca anchuchishpa quishpichirca’ (Efes. 1:7).

19. Jesús huañujpi profeciacuna pactarijta yachanaca ¿imashinata Bibliapa shuj profeciacunapash pactarinata ashtahuan crichun ayudan?

¹⁹ Israelitacuna Pascuata yaringapaj shuj llamaguta huañuchishpaca shuj tullutallapash na faquinachu carca (Éx. 12:46; Núm. 9:​11, 12). Shinaca ñucanchita salvangapaj shamushca Jesusca ¿imata tucurca? (Juan 1:29.) Jesustaca cada ladoman shuj nali runata churashpami shuj jatun racu caspipi huarcurca. Uchalla huañuchun nishpa, ama 15 de nisán punllacaman huarcurianajuchun nishpami judiocunaca chai quimsandicunataca chaquita faquichi nishpa Pilatotaca mañarca. Chaimandami soldadocunaca ishcai nali runacunapa chaquita faquirca, shinapash ‘Jesuspaman chayashpaca, ña huañushcatami ricunajurca. Shina cajpimi chaquitaca na faquirca’ (Juan 19:​31-34). Imashinami Pascuata rurangapaca llamagupa tulluta na faquin carian shinallatami Jesustaca ima tullutapash na faquirca. Chai llamaguca 14 de nisán huata 33​pi Jesús shamushpa ima tucunatami ricuchijurca (Heb. 10:1). Ashtahuangarin Jesuspa ima tullutapash na faquijpimi Salmo 34:20​pi shimicunapash pactarirca. Chaita yachashpami Bibliapi shuj profeciacunapash pactarinataca tucui shunguhuan crinchi.

20. Judiocunapa Pascuata, Jesusta Yarina Micuihuan chimbapurajpica ¿imapita shuj can?

²⁰ Judiocunapa Pascuata, Jesusta Yarina Micuihuan chimbapurajpica huaquin cosascunapica shujmi can. Shuj ejemplota ricupashun. Pascuapica israelitacunaca llama aichatami micun carca, llamapa yahuartaca na ufianllu carca. Cutin Jesusca paipa catijcunataca mandarcami, ‘Taita Diospa mandajuj llactaguman [“Reinoman”, NM]’ rinacunaca tandata micunami can, vinotapash ufianami can nishpa. Tandaca Jesuspa cuerpotami ricuchijurca. Cutin vinoca Jesuspa yahuartami ricuchijurca. Tandamanda vinomandaca shamuj temapimi ashtahuan yachajushun (Mar. 14:​22-25).

21. ¿Imatata judiocunapa Pascuamandaca yachajuita ushapanchi?

²¹ Pascuata ruranaca judiocunapaca minishtirishcapachami carca. Judiocuna Pascuata ‘yarina’ cajpipash ñucanchicunapashmi chai Pascuapi ima pasashcata yarishpa ashtacata yachajui ushapanchi. Chai yachajushcacunapash ‘Dios escribichishca Shimicuna’ cuendami can (2 Tim. 3:16).